Traehad Blong Save Ol Man

TAEM yu talemaot trutok blong Baebol long ol man, yu no givim save nomo blong fulumap tingting blong olgeta. Yu mas traem kasem hat blong olgeta tu. Wan rod blong mekem olsem, hemia se yu traehad blong save gud ol man wanwan. I gat plante rod blong mekem samting ya.

Yu Tingbaot Ol Man Wanwan. Aposol Pol i tingbaot wanem kaen laef ol man oli gruap long hem mo wanem tingting we oli gat. Hem i talem se: ‘Mi mi laen blong Isrel, mo long fes blong ol laen ya blong mi, mi folem fasin blong mifala, blong pulum olgeta oli kam man blong Kraes. Olgeta oli stap aninit long Loa blong Moses, be mi no. Be long fes blong olgeta, mi mekem olsem we mi tu, mi aninit long Loa ya. Mo mi mi no afsaed long loa blong God, mi stap aninit long loa blong Kraes, be long fes blong ol man we oli no laen blong Isrel we oli no save Loa blong Moses, mi mekem olsem we mi tu mi no save Loa ya. Mo long sem fasin, long fes blong ol man we bilif blong olgeta i no strong, mi mekem olsem we mi tu, bilif blong mi i no strong. Long fes blong ol man we oli gat ol defdefren kaen fasin, be mi mekem olsem we mi tu mi gat sem fasin we olgeta oli gat, blong yusum olgeta rod blong sevem sam long olgeta. Mi mekem ol samting ya from gud nius blong Jisas Kraes.’ (1 Kor. 9:20-23) ?Wanem rod blong ‘mekem ol defdefren fasin’ long ol defren kaen man?

Bifo we yu toktok long wan man, maet yu gat janis blong lukluk sam samting raonabaot long yu. Maet yu luksave samting we man ya i laekem, mo sam narafala samting long laef blong hem. ?Olsem wanem? ?Yu yu luksave wanem wok we man ya i mekem? ?Yu luk sam samting we oli soemaot wanem skul blong man ya? ?I gat sam samting we yu luk long famle blong hem we oli givim save long yu? Folem ol samting we yu luk, yu save jenisim toktok blong yu blong mekem se man ya i glad blong lesin.

Sipos yu wantem se ol man long ples blong yu oli glad blong lesin, yu mas tingbaot fastaem ol rod we yu save yusum blong statem wan storian wetem olgeta. Long sam ples, i gat plante man we oli kam long ol narafala kantri. Sipos i gat sam man olsem long ples blong yu, ?yu faenem finis wan gudfala rod blong prij long olgeta? God i wantem “sevem olgeta man, mo i wantem we olgeta man bambae oli save trutok blong hem.” Taswe yu mas traehad blong talemaot Kingdom long wan fasin we ol man bambae oli glad blong lesin.—1 Tim. 2:4.

Yu Lesin Gud. Nating se Jehova i save evri samting finis, be hem i rere yet blong lesin long ol narafala. Long wan vison, profet Mikaea i luk we Jehova i stap askem long ol enjel blong oli talemaot wan rod we oli ting se i gud blong folem. Ale wan enjel i talemaot tingting blong hem, nao God i letem hem i mekem samting we hem i talem. (1 King 22:19-22) Taem Ebraham i talemaot se hem i wari long ol man we Jehova bambae i jajem olgeta long Sodom, Jehova i lesin gud long hem. (Jen. 18:23-33) Long wok blong prij, ?yu save mekem wanem blong folem fasin blong Jehova blong lesin gud?

I gud yu traem pulum ol man blong oli talemaot tingting blong olgeta. Yu save askem wan kwestin long olgeta, nao yu wet blong oli ansa. Yu mas lesin gud. Taem oli luk se yu lesin gud, bambae oli glad moa blong talemaot tingting blong olgeta. Sipos oli tokbaot samting we oli laekem, yu save askem wan narafala kwestin long kaen fasin, blong faenemaot moa save. Be yu no mas askem tumas kwestin. Yu traem save olgeta nomo. Maet yu save talem sam gudfala tok we i kamaot long hat blong yu from ol tingting we oli talemaot. Nating sipos yu no agri wetem tingting blong olgeta, be yu save talem tangkiu long olgeta from samting we oli talem.—Kol. 4:6.

Yu mas lukaot gud se yu no bitim mak taem yu traehad blong save ol narafala. Yu no gat raet blong go insaed long prapa bisnes blong olgeta. (1 Pita 4:15) Taem woman i prij long man, mo taem man i prij long woman, oli mas lukaot gud. Taem oli kaen mo oli traehad blong save man no woman ya, oli mas lukaot gud se oli no givim rong tingting long hem. Stret rod blong save narafala i no sem mak long evri kantri, mo maet i no sem mak long evri man tu. Yu mas naf blong luksave samting we i stret long ol man wanwan, mo yu no mas bitim mak.—Luk 6:31.

Sipos yu rere gud fastaem, samting ya i save givhan long yu blong yu lesin gud. Taem ol samting we yu wantem tokbaot oli klia gud long tingting blong yu, yu no stap tingbaot samting we yu wantem talem, be yu lesin gud long narafala. Samting ya i mekem se olgeta tu oli no fraet long yu, be oli glad nomo blong storian wetem yu.

Yu ona long narafala taem yu lesin long hem. (Rom 12:10) Taem yu lesin gud, yu soemaot se yu tinghae long ol samting we hem i talem mo ol tingting blong hem tu. Maet fasin blong yu blong lesin gud i pulum hem blong i lesin moa long wanem we yu talem. Yes, i gat gudfala risen from wanem Tok blong God i givim advaes ya se, ‘yumi mas rere oltaem blong lesin, be yumi no mas hareap blong toktok.’—Jem. 1:19.

Yu Givhan Long Narafala Blong i Gohed. Sipos yu wari long laef blong narafala, yu no save fogetem ol man we yu storian wetem olgeta finis. Bambae yu go luk olgeta bakegen, blong yu serem ol trutok blong Baebol we oli stret long laef blong olgeta wanwan. Taem yu stap mekemrere blong gobak bakegen, yu traem tingbaot lastaem we yu bin storian wetem olgeta, mo wanem samting we yu luk we i givim save long yu. Nao yu rerem wan storian we i stret long samting we oli stap tingbaot. Yu mas tokbaot olsem wanem save ya bambae i givhan long laef blong olgeta. Olsem nao, bambae oli luksave se samting we oli stap lanem, i save mekem i gud long olgeta.—Aes. 48:17.

Maet man we yu stap storian wetem hem i talemaot wan trabol no wan samting we hem i stap wari long hem. I gud yu luk samting ya olsem wan janis blong serem gud nius wetem hem. Yu mas folem fasin blong Jisas we oltaem hem i rere blong leftemap tingting blong man we i trabol. (Mak 6:31-34) Maet yu wantem hareap blong toktok blong talem wan advaes long hem, no maet yu talem ol tok we i no hevi nating. Sipos yu mekem olsem, maet man ya i harem se yu no stap traehad nating blong kasem save long ol trabol blong hem. I moa gud we fastaem yu soemaot long man ya se yu sore long hem. (1 Pita 3:8) Biaen, yu lukaot moa save long ol buk we oli tokbaot Baebol. Nao bambae yu gat sam gudfala save blong talem long man ya, we i leftemap tingting blong hem mo i givhan long hem blong i winim trabol ya. Mo tu, from we yu lavem ol man mo yu tingbaot olgeta, bambae yu no talemaot ol prapa bisnes blong olgeta long narafala, sipos i no gat wan stret risen blong talemaot.—Prov. 25:9.

I impoten we yu traehad blong save ol man we yu mekem Baebol stadi long olgeta. Yu mas prea long Jehova mo tokbaot olgeta wanwan, mo wanem we yu save mekem blong givhan long olgeta. Nao yu tingbaot samting ya taem yu rerem stadi we bambae yu mekem wetem olgeta. Yu save tingbaot se: ‘?Wanem nekis samting we man ya i mas mekem, blong hem i save gohed gud?’ Yu save tokbaot samting ya wetem hem long kaen fasin. Yu givhan long hem blong i luksave wanem we Baebol mo ol buk blong ‘slef we i stret mo waes’ oli talem. (Mat. 24:45, NW) Sipos yu eksplenem nomo ol tok blong Baebol, maet hemia i no naf. Maet yu mas soemaot long hem olsem wanem blong folem wan advaes blong Baebol, blong hem i lanem se advaes ya i save wok gud long laef blong hem.—Jon 13:1-15.

Taem yu stap givhan long ol narafala blong oli mekem laef blong olgeta i stret wetem ol loa blong Jehova, yu mas naf blong luksave mo skelem gud ol samting. Ol man oli kamaot long ol defren kaen laef, oli gat defdefren save, sam oli gohed kwik sam oli slo. Yu no mas ting se man i mas gohed kwik olsem we yu yu wantem. (Fil. 4:5) Yu no mas fosem olgeta blong oli jenisim ol fasin blong olgeta. Yu mas letem Tok blong God mo spirit blong hem i pusum olgeta. Jehova i wantem se ol man oli mekem wok blong hem from we oli glad blong mekem, i no from we narafala i fosem olgeta. (Sam 110:3) Yu no mas talemaot prapa tingting blong yu long ol desisen we oli wantem mekem. Mo yu mas lukaot gud se yu no mekem desisen long ples blong olgeta, nating se oli askem long yu blong mekem.—Gal. 6:5.

Yu Mekem Wan Samting Blong Halpem Olgeta. I tru, Jisas i tingbaot moa blong givhan long ol man blong oli kasem save long God. Be hem i tingbaot olgeta long sam narafala rod tu. (Mat. 15:32) Nating se yu no gat mane, be i gat plante samting we yu save mekem blong halpem ol man.

Sipos yu stap traehad blong save narafala, bambae yu mekem i gud long hem. Maet yu stap storian wetem wan man long ples we san i strong no i ren bigwan, ale yu save askem long hem sipos yutufala i save muv i go long wan narafala ples. Sipos no, yu save putum wan narafala taem blong yu kam luk hem bakegen. Maet yu prij long haos blong wan man long taem we i no stret long hem, ale yu save askem long hem sipos i oraet we yu kambak long wan narafala taem. Sipos wan man we i stap long haos klosap long yu no wan we i laekem trutok, i sik no i slip long hospital, yu save sanem wan smol leta long hem, no yu go luk hem. Samting ya i soemaot se yu tingbaot hem. Sipos yu luk se i stret, maet yu kukum wan smol kakae no mekem wan narafala gudfala samting blong halpem hem.

Taem olgeta we yu mekem Baebol stadi long olgeta oli gohed, oli no moa joen tumas wetem ol fren blong olgeta. Samting ya i save mekem olgeta oli harem nogud. I gud yu yu kam fren blong olgeta. Yu mas storian plante wetem olgeta, afta we yu mekem stadi wetem olgeta mo long sam narafala taem bakegen. Yu save pulum olgeta blong oli faenem ol gudfala fren. (Prov. 13:20) Yu save givhan long olgeta blong oli kam long ol Kristin miting. Yu save sidaon klosap long olgeta long ol miting, mo yu givhan blong lukaot long ol pikinini blong olgeta. Olsemia, bambae oli kasem plante moa gudfala samting long ol miting.

Yu Mekem Ol Samting Ya Wetem Fulhat Blong Yu. Taem yu traehad blong save narafala mo blong mekem i gud long hem, yu no mas mekem blong soem yu nomo. Fasin ya i mas kamaot long hat blong yu. I gat plante samting we oli soemaot sipos yu yu wantem tumas blong save narafala. Yu soemaot samting ya long ol toktok blong yu, taem yu lesin long hem, taem yu kaen, mo taem yu tingbaot hem. Maet yu no talem no mekem wan samting, be fes mo fasin blong yu nomo i save soemaot sipos yu wantem save hem. Taem yu talem no mekem samting wetem fulhat blong yu, bambae hem i luksave.

I gat wan bigfala risen moa blong traehad wetem fulhat blong yu blong save narafala. Taem yu mekem olsem, yu folem fasin blong Papa blong yumi long heven, we i lavem man mo i gat sore. Taem yu folem fasin blong Jehova, yu pulum ol man oli kam long Hem mo long gud nius we Hem i askem long yumi blong talemaot. Taswe, taem yu stap talemaot gud nius, yu mas traehad blong mekem olsem Baebol i talem, se: “Yufala evriwan i mas givgivhan long yufala long laef blong yufala. I nogud wan man i stap lukaot long laef blong hem nomo.”—Fil. 2:4.