TAEM yu yusum ol pijatok mo ol eksampol, oli gat bigfala paoa blong tijim ol man. Plante taem, rod ya i nambawan blong wekemap tingting blong man, mo blong mekem se man i gohed blong lesin. Oli pulum man blong yusum tingting blong hem. Oli tajem hat blong man, mo from samting ya, oli save givhan long man blong i trenem tingting blong hem we i save jajem hem. Samtaem, yumi save yusum ol pijatok blong winim ol tingting we maet sam man oli gat agensem narafala. Ol pijatok oli save givhan long ol man tu blong oli no fogetem ol tok we yumi talem long olgeta. ?Olsem wanem? ?Yu yu stap yusum ol pijatok taem yu tijim man?

Taem yu yusum wan pijatok, i no nid blong talem plante toktok. Ol sot tok we yu talem i save mekem wan klia pija long tingting blong ol man. Sipos yu jusum gud pijatok, bighaf blong mining blong hem bambae i klia finis, bambae yu no nid blong eksplenem plante. Be maet yu we yu tija, yu eksplenem pijatok ya smol blong givim moa paoa long hem. I gat fulap pijatok long Baebol we yu save lanem samting from.

Yusum Pijatok Ya, Se Wan Samting i Sem Mak Long Wan Narafala Samting. Pijatok we i isi moa blong yusum, hemia taem yu tokbaot wan samting se hem i sem mak long wan narafala samting. Sipos yu stap lanem blong yusum ol pijatok, ating i gud blong yusum kaen pijatok ya fastaem. Klosap oltaem yumi yusum tok ya “olsem” blong statem pijatok ya. Yumi tokbaot tu samting we tufala i defdefren, be yumi soemaot samting we i sem mak long tufala ya. Baebol i tokbaot plante samting raonabaot long yumi olsem pijatok: ol flaoa mo tri, ol anamol, ol sta long skae, mo sam samting we oli hapen long laef blong man. Ol Sam 1:3 i talem se ol man we oli stadi oltaem long Tok blong God, oli “olsem ol tri we oli gru long saed blong wota we i stap ron,” hemia ol tri we oli givim plante frut mo oli no kam drae. Baebol i talem se rabis man i “olsem wan laeon” we i stap haed, i wet blong kasem wan anamol. (Sam 10:9) Jehova i mekem promes long Ebraham se ol pikinini blong hem bambae oli kam plante “olsem ol sta long skae,” mo “olsem sanbij daon long solwota.” (Jen. 22:17) Taem Jehova i tokbaot we hem i openem rod blong neson blong Isrel i fren gud wetem hem, hem i talem se: “Mi mi wantem tumas blong ol man Isrel bifo, mo ol man Juda naoia, oli holemtaet mi olsem we kalsong i fas strong long bodi blong man.”—Jer. 13:11.

Long ol lanwis we oli yusum blong raetem Baebol, i gat wan defren kaen pijatok bakegen we i gat moa paoa. Kaen pijatok ya i tokbaot tu samting we tufala i defren olgeta, be long wan fasin tufala i sem mak. Jisas i talem long ol disaepol blong hem se: “Yufala i laet blong wol ya.” (Mat. 5:14, NW) Disaepol Jemes i tokbaot bigfala trabol we i kamaot taem man i no lukaot gud long ol toktok blong hem. Hem i raetem se: “Tang blong yumi, hem i wan faea.” (Jem. 3:6, NW) Deved i singsing long Jehova se: “Yu nao yu sefples blong mi, yu nomo yu strong ples blong mi blong haed.” (Sam 31:3) Sipos yu jusum gud wan pijatok, i no nid blong yu toktok plante blong eksplenem. Taem pijatok i sot, hem i gat moa paoa. Pijatok olsem i save givhan moa long ol man blong oli holem wan poen long tingting blong olgeta, i winim we yu toktok nomo.

Long toktok blong yumi evri dei, yumi stap yusum wan defren kaen pijatok bakegen, blong givim paoa long ol tok blong yumi. Yumi tokbaot wan samting long fasin we i bitim mak. Yu mas yusum kaen pijatok ya long waes fasin, sipos no, maet ol man oli kasem rong tingting. Jisas i yusum kaen pijatok ya blong ol man oli no save fogetem ol tok blong hem, taem i talem se: “?From wanem yu stap tokbaot smol doti ya we i stap long ae blong brata blong yu, be yu no save luk bigfala wud ya we i stap long ae blong yu?” (Mat. 7:3) Bifo we yu traem yusum kaen pijatok ya, i gud yu lanem blong yusum ol narafala pijatok fastaem, we oli soemaot se wan samting i sem mak long wan narafala samting.

Yusum Ol Eksampol. Maet yu no wantem yusum wan pijatok, be yu wantem yusum wan eksampol. Blong givhan long yu blong tijim ol man, maet yu mekemap wan stori, no maet yu yusum wan tru stori long laef blong wan man. Yu mas waes taem yu yusum ol stori olsem, from we i isi blong toktok tumas. Yu mas yusum ol stori olsem blong tokbaot nomo ol poen we oli impoten tumas. Mo yu mas talem stori ya long fasin we i mekem se man bambae i rimemba tijing we yu stap givim, i no stori ya nomo.

Yu save yusum ol stori we yu mekemap nomo. Be yu mas meksua se oli soemaot tingting blong ol man mo samting we i hapen long laef blong ol man. Taswe, taem Jisas i tijim ol man long stret tingting we oli mas gat long wan man we i tanem tingting blong hem from sin, hem i yusum eksampol blong wan man we i harem gud tumas taem hem i faenem wan sipsip blong hem we i lus. (Luk 15:1-7) Wan taem, Jisas i toktok long wan man we i no kasem save gud long Loa ya se hem i mas lavem ol man we oli stap raonabaot long hem. Ale, Jisas i talem stori blong wan man we i hafded long rod from we sam man oli kilim hem nogud. Wan pris mo wan Livaet tufala i kam pas long hem we tufala i no givhan long hem nating. Nao wan man Sameria i kam mo i givhan long hem. (Luk 10:30-37) Sipos yu lukluk gud long ol fasin mo aksen blong ol man, yu save yusum ol samting ya blong tijim narafala.

Profet Natan i talem wan stori blong stretem King Deved. Hemia wan gudfala rod blong yusum, from we sipos Natan i bin stretem hem long defren fasin, ating Deved bambae i girap i mekem eskius from sin blong hem. Natan i talem stori blong wan rijman we i gat plante sipsip, mo wan puaman we i gat wan smol sipsip nomo we man ya i stap lukaot gud long hem. Bifo, King Deved i wan man blong lukaot long sipsip. Ale hem i kasem save se puaman ya i harem nogud tumas. Deved i kam kros long rijman ya we i stilim smol sipsip blong puaman ya. Nao Natan i talem stret long Deved se: “!Yu nao yu man ya!” Hem i kasem hat blong Deved wantaem, nao Deved i tanem tingting blong hem from sin blong hem. (2 Saml. 12:1-14) Sloslo yu save lanem gudfala rod ya blong tokbaot ol samting we oli mekem hat blong man i trabol.

Yu save faenem plante eksampol blong tijim man, long ol samting we Baebol i talem se i hapen long taem bifo. Jisas i yusum wan long olgeta, taem hem i talem sot tok ya nomo se: “Yufala i mas tingbaot woman blong Lot.” (Luk 17:32) Taem Jisas i tokbaot saen we bambae i soemaot se hem i stap bakegen, hem i tokbaot “taem blong Noa.” (Mat. 24:37-39) Long Hibrus japta 11, aposol Pol i talem nem blong 16 man mo woman we oli gat bigfala bilif. Taem yu gohed blong save moa ol stori long Baebol, yu save yusum eksampol blong sam samting mo sam man we Baebol i tokbaot.—Rom 15:4; 1 Kor. 10:11.

Samtaem maet yu luk se i gud blong yusum wan tru stori we i hapen long laef blong wan man, blong givim paoa long tijing blong yu. Be taem yu mekem olsem, yu mas lukaot gud se yu yusum nomo ol stori we oli tru. Mo yu no mas mekem man we i stap lesin i sem. Yu no mas yusum stori we bambae i leftemap wan narafala poen we ol man oli stap raorao long hem mo i no laenap nating wetem tok blong yu. Mo tu, yu mas gat wan risen blong talem stori ya. Yu no mas talem ol smosmol samting we i pulum tingting blong man i gowe long bigfala poen we yu wantem soemaot.

?Bambae Ol Man Oli Kasem Save? Nomata wanem pijatok no eksampol yu yusum, be i mas gat wan risen blong yusum samting ya. Sipos yu wantem se ol man oli kasem save from wanem yu yusum pijatok ya, yu mas soemaot klia se i joen olsem wanem wetem samting we yu stap tokbaot.

Afta we Jisas i talem se ol disaepol blong hem oli “laet long ol man long wol,” hem i tokbaot smol se ol man oli yusum ol laet olsem wanem. Mo hem i tokbaot wok ya we ol disaepol oli mas mekem folem pijatok ya. (Mat. 5:15, 16) Afta we Jisas i talem pijatok ya blong sipsip we i lus, hem i tokbaot glad we i kamaot long heven taem wan man we i mekem bigfala sin i tanem tingting blong hem. (Luk 15:7) Mo afta we Jisas i talem stori blong gudfala man Sameria, hem i askem wan kwestin i go stret long man we i stap lesin. Biaen hem i givim klia advaes long hem. (Luk 10:36, 37) Be Jisas i mekem i defren taem hem i talem pijatok ya blong ol defren kaen graon, mo pijatok ya blong ol rabis gras. Hem i no talem mining blong ol pijatok ya long olgeta man, be hem i talem nomo long ol man we oli askem wetem tingting daon. (Mat. 13:1-30, 36-43) Tri dei bifo we Jisas i ded, hem i talem pijatok ya blong ol man blong wok long wan plantesen blong grep, we oli kilim sam man i ded. Jisas i no eksplenem mining blong pijatok ya, from we i no nid blong eksplenem. “Ol jif pris mo ol Farisi . . . oli save we hem i stap tokbaot olgeta.” (Mat. 21:33-45) Taswe, taem yu wantem save sipos yu mas talemaot mining blong wan pijatok no sam haf blong hem, yu mas tingbaot kaen pijatok ya we yu yusum. Mo yu mas tingbaot tingting blong ol man we yu stap toktok long olgeta, mo risen from wanem yu yusum pijatok ya.

I nidim taem blong yu lanem blong yusum gud ol pijatok mo eksampol, be bambae i no blong nating nomo we yu traehad. Ol gudfala pijatok oli gat paoa long tingting mo long hat blong ol man. Frut blong samting ya se tijing we yu givim bambae i gat paoa long ol man, i bitim we yu talem ol tok nomo.

I IMPOTEN blong yusum pijatok we i stret long save we yu stap tokbaot. Be sipos yu wantem se pijatok ya i mekem gudfala wok, i impoten tu we hem i stret long ol man we yu stap toktok long olgeta.

Ating yu stap toktok long plante man wantaem. ?Olsem wanem? ?Bambae yu jusum wan pijatok we i stret long ol man long grup ya? ?Jisas Kraes i mekem wanem? Nating se Jisas i stap toktok long plante man no long ol disaepol blong hem nomo, hem i no yusum ol pijatok blong ol samting long laef blong ol man long ol narafala kantri longwe long Isrel. Ol man we hem i toktok long olgeta oli no save long samting ya. Jisas i no tokbaot laef blong ol man long haos blong king blong Ijip, mo hem i no tokbaot ol fasin blong ol skul blong India, nogat. Hem i yusum pijatok blong wok we ol man long evri kantri oli save long hem. Hem i tokbaot wok blong somap klos we i brok, ol man we oli mekem bisnes, man we i lusum samting we i sas, mo lafet blong mared. Hem i save wanem fasin ol man oli mekem taem oli fesem ol defren trabol, mo hem i yusum samting ya olsem pijatok. (Mak 2:21; Luk 14:7-11; 15:8, 9; 19:15-23) Jisas i prij moa long ol man Isrel. From samting ya, hem i yusum moa ol pijatok blong olting mo ol wok we oli joen wetem laef blong ol man Isrel. Olsem nao, hem i tokbaot wok long garen, ol sipsip we oli folem man blong lukaot long olgeta, mo skin blong anamol we oli fulumap waen long hem. (Mak 2:22; 4:2-9; Jon 10:1-5) Mo tu, Jisas i yusum ol samting we oli hapen long taem bifo, we ol man oli save gud long olgeta. Hem i tokbaot taem ya we God i mekem fas man mo woman, Bigfala Wota we i ron long taem blong Noa, taem ya we God i spolem Sodom mo Gomora, mo woman blong Lot we i lus. (Mat. 10:15; 19:4-6; 24:37-39; Luk 17:32) ?Yu yu mekem olsem Jisas? ?Taem yu jusum ol pijatok, yu yu tingting gud long wanem samting ol man we yu toktok long olgeta oli mekem evri dei? ?Yu tingbaot fasin blong laef mo kantri blong olgeta?

Maet yu no stap toktok long wan bigfala grup blong man, be yu stap toktok long wan man nomo no long wan smol grup. Long taem olsem, yu mas yusum pijatok we i stret long smol grup ya. Taem Jisas i prij long woman Sameria long wan wel klosap long taon ya Saeka, hem i tokbaot ‘wota we i gat laef long hem.’ Hem i talem se ‘bambae man i no save tosta bakegen.’ Mo hem i tokbaot ‘springwota we i save ron oltaem insaed long man, blong givim laef ya long hem we i no save finis.’ Hemia ol pijatok we oli joen wetem wok blong woman ya. (Jon 4:7-15) Taem Jisas i toktok long ol man blong pulum fis we oli stap wasem ol net blong olgeta, hem i yusum pijatok blong wok ya blong pulum fis. (Luk 5:2-11) Long tufala taem ya, ating hem i save tokbaot wok long garen, from we oli stap long wan ples we ol man oli stap wokem garen. Be hem i mekem samting we i moa gud. Hem i yusum wan pijatok we i joen wetem wok we oli stap mekem long taem ya. ?Yu tu yu stap traehad blong mekem olsem?

Jisas i traem faenem ‘ol sipsip we oli lus long ol laen blong Isrel.’ Be aposol Pol i go long ol man we oli no laen blong Isrel mo long ol laen blong Isrel tu. (Mat. 15:24; Wok 9:15) ?Olsem wanem? ?Pol i toktok long fasin we i defren long Jisas? Yes. Taem Pol i raetem leta i go long ol Kristin long Korin, hem i tokbaot ol man blong resis, fasin ya blong kakae mit we ol man oli yusum finis blong mekem wosip long aedol, mo glad blong king we i wokbaot blong gohom afta we hem i winim ol enemi blong hem. Ol man we oli no laen blong Isrel oli save gud ol samting ya.—1 Kor. 8:1-10; 9:24, 25; 2 Kor. 2:14-16.

?Olsem wanem? ?Yu yu olsem Jisas mo Pol? ?Yu yu lukaot gud blong yusum ol pijatok mo eksampol we oli stret long ol man we yu tijim olgeta? ?Yu yu tingbaot fasin blong laef blong olgeta mo wok we oli mekem evri dei? I tru, wol ya i no sem mak olsem long taem blong Jisas mo Pol. Plante man tede oli lukluk televisin blong faenemaot ol nius we i kamaot long olgeta ples blong wol. Plante man oli save gud long samting we i stap hapen long narafala kantri. I gud yu traem yusum sam long ol nius ya olsem eksampol. Be yu mas tingbaot yet se ol samting we oli tajem hat blong ol man moa, hemia ol samting long prapa laef blong olgeta, olsem: hom blong olgeta, famle blong olgeta, wok blong olgeta, kakae, mo weta long ples blong olgeta.

Sipos yu luk se yu mas eksplenem pijatok blong yu plante, maet hemia i soemaot se yu stap tokbaot samting we ol man oli no save gud long hem. Wan pijatok olsem i save mekem se ol man oli no kasem tijing we yu wantem givim. Bambae oli tingbaot pijatok we yu yusum, be bambae oli no tingbaot trutok blong Baebol we yu stap traehad blong tijim olgeta long hem.

Jisas i yusum ol pijatok we oli isi mo oli tokbaot samting we i hapen evri dei long laef blong man. Hem i no yusum ol longfala pijatok we i had blong kasem save long olgeta. Hem i yusum ol smosmol samting nomo blong eksplenem ol bigfala trutok. Hem i yusum ol samting we i isi blong kasem save long olgeta, blong eksplenem ol samting we i had blong kasem save long olgeta. Taem Jisas i yusum ol samting long laef blong ol man blong eksplenem ol trutok blong Baebol, hem i givhan long olgeta blong oli kasem save gud long ol trutok ya we hem i stap tijim olgeta long hem, mo blong oli holem ol trutok ya long tingting blong olgeta. !Hemia wan nambawan eksampol blong folem!