-
Toktok Blong Yu i Leftemap Tingting Mo i Mekem Man i StrongTiokratik Skul i Save Givhan Long Yu Long Wok Blong God
-
-
Poen 53
Toktok Blong Yu i Leftemap Tingting Mo i Mekem Man i Strong
NOMATA wanem trabol ol man blong God oli kasem, be taem oli joen wetem Kristin kongregesen, oli mas harem se samting ya i leftemap tingting blong olgeta. Ol elda nao oli mas faswan blong talem ol tok mo ol advaes we i leftemap tingting blong ol brata mo sista. Ol elda oli mas stap ‘olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.’—Aes. 32:2.
?Olsem wanem? Yu we yu wan elda, ?ol tok blong yu long miting oli leftemap tingting blong ol brata mo sista? ?Ol tok ya oli mekem olgeta oli harem gud? ?Oli givhan long ol brata mo sista we oli stap traehad blong mekem ol samting we Jehova i wantem? ?Oli mekem olgeta oli strong blong gohed long wok blong God, nating se bighaf blong ol man we oli prij long olgeta oli no wantem lesin, no maet oli agensem olgeta stret? ?I gat sam long kongregesen we tingting blong olgeta i foldaon, no oli stap wari from we oli no gat mane, no oli gat wan strong sik we i no gat meresin blong hem? Ol tok blong yu i save ‘leftemap tingting blong olgeta.’—Job 16:5.
Taem yu givim wan tok, yu gat janis blong givhan long ol brata mo sista blong oli putum tingting blong olgeta i stap strong long Jehova mo ol gudfala samting we hem i givim. Mo yu gat janis blong mekem olgeta oli kam strong moa. Yu mas yusum gud janis ya.—Rom 15:13; Efes. 6:10.
Yu Tokbaot Ol Samting We Jehova i Mekem Long Ol Man Blong Hem. Wan gudfala rod blong mekem tingting blong ol man i strong, se yu tokbaot ol samting we Jehova i mekem blong givhan long ol man blong hem bifo, taem oli kasem trabol.—Rom 15:4.
Taem ol man Isrel oli rere blong go insaed long Promes Lan, we long taem ya i fulap long ol neson we oli enemi blong olgeta, Jehova i talem long Moses se hem i mas “toktok gud” long Josua blong “mekem tingting blong hem i strong.” ?Moses i mekem samting ya olsem wanem? Moses i toktok long olgeta evriwan long neson ya we Josua tu i wan long olgeta. Hem i mekem olgeta oli tingbaot ol samting we Jehova i mekem blong givhan long olgeta, stat long taem ya we oli aot long Ijip oli kam. (Dut. 3:28; 7:18) Mo tu, Moses i tokbaot ol faet we ol man Isrel oli mekem agensem ol man Amoro. Mo hem i tokbaot tu, se ol man Isrel oli winim ol faet ya from we Jehova i givhan long olgeta. Biaen, Moses i talem long Josua se: “!Josua! Tingting blong yu i mas strong, mo yu mas stanap strong oltaem.” (Dut. 31:1-8) Taem yu yu wantem leftemap tingting blong ol Kristin brata mo sista, ?yu pulum olgeta blong oli tingbaot ol samting we Jehova i mekem finis blong givhan long olgeta? Samting ya i save mekem olgeta oli kam strong.
Sam brata mo sista we oli gat plante bigfala trabol long laef blong olgeta, oli lusum strong tingting we oli gat fastaem se bambae oli kasem ol blesing blong Kingdom. Yu mas mekem olgeta oli tingbaot se oli save trastem ol promes blong Jehova, from we oltaem ol promes blong hem oli kamtru.—Jos. 23:14.
Long sam kantri, ol brata mo sista oli kasem hadtaem from we gavman i putum tabu long wok blong prij. Long taem olsem, ol elda oli save givhan long olgeta long kaen fasin, blong oli tingbaot ol samting we i hapen long ol aposol blong Jisas Kraes. Samting ya i save mekem olgeta oli kam strong. (Wok 4:1 kasem Wok 5:42) Mo tu, ol elda oli save tokbaot stori long buk blong Esta, mo wanem we God i mekem blong ol trabol blong ol man blong hem oli kam gud. Hemia i save givhan long ol brata mo sista blong oli gat strong tingting mo oli no fraet.
Samfala oli kam long ol miting blong kongregesen, be oli no traehad blong gohed moa. Maet oli harem se long laef blong olgeta oli mekem ol nogud samting bitim mak, ale God i no save fogivim olgeta. Sipos i olsem, yu save tokbaot King Manase mo fasin we Jehova i mekem long hem. (2 Kron. 33:1-16) Maet yu tokbaot ol man long taon ya Korin bifo, we oli jenisim fasin blong olgeta nao oli kam Kristin, ale God i luk olgeta olsem we oli stret man finis.—1 Kor. 6:9-11.
Maet samfala oli harem se ol trabol we oli stap kasem i soemaot se God i no moa glad long olgeta. Yu save tokbaot ol trabol we i kasem Job, mo ol blesing we hem i kasem taem hem i holemstrong long Jehova. (Job 1:1-22; 10:1; 42:12, 13; Sam 34:19) Ol giaman fren blong Job oli gat rong tingting, oli stap talem se Job i kasem ol trabol ya from we hem i mekem wan bigfala sin. (Job 4:7, 8; 8:5, 6) Pol mo Banabas tufala i mekem samting we i defren. Taem tufala i stap mekem tingting blong ol disaepol i strong, “tufala i stap givim tok long olgeta blong mekem olgeta oli stanap strong long bilif blong olgeta.” Tufala i talem long olgeta se: “Long rod blong go insaed long niufala wol ya we God i king long hem, yumi save kasem plante trabol, be nating, yumi mas stanap strong.” (Wok 14:21, 22) Tede tu, yu save mekem tingting blong olgeta we oli kasem trabol i kam strong. Yu save tokbaot se God i wantem we olgeta Kristin oli stanap strong taem oli kasem trabol, mo hem i glad tumas long olgeta we oli stanap strong.—Prov. 27:11; Mat. 24:13; Rom 5:3, 4; 2 Tim. 3:12.
Yu save pulum ol man we oli stap lesin long tok blong yu blong oli traem tingbaot ol promes blong Jehova we oli kamtru finis long olgeta. Sipos yu pulum olgeta blong tingting bakegen long ol samting olsem, ating olgeta wanwan bambae oli luksave se Jehova i mekem sam samting finis blong givhan long olgeta, olsem we hem i promes. Ol Sam 32:8 i talem se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.” Yu save givhan long ol man blong oli tingbaot sam taem long laef blong olgeta, we Jehova i lidim olgeta mo i mekem olgeta oli strong. Sipos yu mekem olsem, bambae olgeta wanwan oli luksave se Jehova i stap lukaot gud long olgeta, mo se hem i wantem givhan long olgeta long enikaen trabol we oli kasem.—Aes. 41:10, 13; 1 Pita 5:7.
Yu Mas Glad Tumas Long Samting We God i Stap Mekem Naoia. Taem yu wantem leftemap tingting blong ol brata mo sista, yu save tokbaot wanem we Jehova i stap mekem naoia. Yu toktok long fasin we yu glad tumas long ol samting ya we hem i stap mekem. Sipos yu mekem olsem, bambae olgeta we oli lesin long yu oli kasem sem glad ya.
Yu save tokbaot samting we Jehova i mekem blong givhan long yumi blong stanap strong mo winim ol wari blong laef. Fasin blong laef we hem i talem long yumi blong folem, hem i beswan. (Aes. 30:21) Hem i talem from wanem plante man oli stil mo oli kilim narafala man, from wanem oli mekem i no stret long ol narafala, from wanem man i pua, i sik, mo i stap ded. Mo hem i talem wanem samting we bambae hem i mekem blong finisim ol trabol ya. Hem i mekem yumi joen wetem ol Kristin brata mo sista we oli lavem yumi. Hem i givim nambawan blesing ya long yumi blong prea long hem. Hem i givim janis long yumi blong stap olsem ol Witnes blong hem. Hem i openem tingting blong yumi, nao yumi luksave se Kraes i king finis long heven, mo se klosap nao ol las dei blong rabis wol ya bambae oli kasem en blong olgeta.—Rev. 12:1-12.
Antap long ol blesing ya, yumi gat ol miting blong kongregesen mo ol asembli. Sipos yu tokbaot ol gudfala samting ya long fasin we yu glad tumas long olgeta, bambae yu mekem tingting blong ol narafala i strong blong oli joen oltaem wetem ol brata mo sista.—Hib. 10:23-25.
I gud yu tokbaot sam stori blong wok blong prij we oli soemaot se Jehova i stap blesem wok blong yumi. Samting ya tu i save mekem ol man oli kam strong. Long taem blong ol aposol, Pol mo Banabas tufala i wokbaot i go long Jerusalem. Taem tufala i stap wokbaot, tufala i talemaot long ol brata we tufala i luk olgeta, olsem wanem God i pulum ol man we oli no laen blong Isrel oli kam man blong hem. Mo tok ya i ‘mekem ol brata ya oli harem gud tumas.’ (Wok 15:3) Yu tu yu save mekem ol brata mo sista oli harem gud tumas, sipos yu talemaot ol gudfala stori blong prij long olgeta.
Yu save leftemap tingting blong ol narafala sipos yu givhan long olgeta blong oli luksave se wok we olgeta wanwan oli mekem i impoten tumas. Yu talem ol gudfala tok long olgeta from we oli joen oltaem long Kristin wok ya blong prij. Yu talem ol gudfala tok long ol olfala mo olgeta we oli sik, from we oli stanap strong nating se oli no moa save mekem plante wok. Yu mekem olgeta oli tingbaot se Jehova i no save fogetem ol wok we oli mekem finis from we oli lavem nem blong hem. (Hib. 6:10) Taem ol samting i kam blong traem yumi, nao yumi stanap strong long bilif, hemia wan samting we i gud we i gud tumas. (1 Pita 1:6, 7) Yu mas tokbaot samting ya wetem ol Kristin brata mo sista.
Yu Mas Glad Tumas Taem Yu Tokbaot Ol Promes We Bambae Oli Kamtru. Ol promes we Baebol i talem se bambae oli kamtru, oli givhan bigwan long olgeta we oli lavem God blong oli holem strong tingting. Ating bighaf blong ol man we oli lesin long yu oli save finis ol promes ya. Be sipos yu yu glad tumas long ol promes ya, tok blong yu bambae i laef, nao ol blesing ya bambae oli klia gud long tingting blong ol man. Yu save mekem tingting blong olgeta i strong se ol promes ya bambae oli kamtru. Mo yu save mekem olgeta oli harem se oli glad tumas long hat blong olgeta from ol promes ya. Sipos yu folem ol advaes we yu kasem long Tiokratik Skul, samting ya bambae i givhan long yu blong mekem olsem.
Jehova i Bigfala Man blong leftemap tingting blong ol man blong hem, mo hem i Bigfala Man blong mekem olgeta oli strong. Yu save wok wetem hem blong givim blesing ya long ol narafala. Taem yu givim wan tok long kongregesen, yu gat janis blong mekem olsem. Yu mas yusum gud janis ya.
-
-
Yu Mas Traehad Blong Gohed MoaTiokratik Skul i Save Givhan Long Yu Long Wok Blong God
-
-
Yu Mas Traehad Blong Gohed Moa
?OLSEM wanem? ?Yu yu wok finis long evriwan long ol poen ya long Tiokratik Skul? ?Yu yu mekem finis evri samting long ol haf ya “Trenem Yu Wan”? Taem yu givim wan tok long Tiokratik Skul no long wan narafala miting, mo taem yu prij, ?yu yu traehad blong folem ol advaes ya?
Yu mas gohed blong kasem trening long Tiokratik Skul we i save givhan long yu long wok blong God. Nomata sipos yu givim ol tok longtaem finis i kam, be i gat sam samting yet we yu save kam gud moa long hem.
-