TAEM yumi kasem wan tok long Tiokratik Skul, plante long yumi i raetem evri samting long pepa, i stat long fastok go kasem lastok. Bifo we yumi rerem tok ya fulwan, ating yumi raetem mo jenisim plante taem. Maet yumi tekem plante aoa blong mekem olsem.

?Yu yu stap mekem olsemia taem yu rerem ol tok blong yu? ?Yu yu wantem save wan rod we i moa isi? Sipos yu raetem wan plan blong tok blong yu, yu no moa nid blong raetem evri samting. Nao bambae yu gat moa taem blong lanem gud tok blong yu bifo we yu givim long miting. Bambae yu luk se i moa isi blong givim tok ya, mo tu, samting we yu talem bambae i pulum tingting blong ol man moa. Mo tu, bambae oli rere moa blong folem ol advaes we yu givim.

Ol brata we oli mekem ol pablik tok long kongregesen, oli kasem wan pepa we i gat plan blong tok finis long hem. Be long plante narafala tok i no olsem. Maet yu kasem nomo wan poen we yu mas tokbaot, no maet yu kasem nomo nem blong tok blong yu. Sipos no, maet oli talem wan haf long wan buk we yu mas tokbaot. Samtaem, maet oli jes givim wan pepa we i eksplenem se bambae yu mekem tok blong yu olsem wanem. Blong mekem ol tok olsem, yu wan yu mas raetem plan blong tok blong yu.

Long pej 41, i gat wan smol plan blong wan tok. Bambae yu luk se ol bigfala poen oli stap long lefsaed mo oli stap long bigfala raeting. Aninit long evri bigfala poen i gat ol tingting we oli sapotem poen ya. Aninit long ol tingting ya, i gat ol smosmol poen bakegen we brata i save yusum blong mekem ol tingting ya oli klia moa. Yu traem lukluk gud plan ya. Bambae yu luk se i gat tu bigfala poen we oli laenap gud wetem nem blong tok ya. Mo tu, ol tingting aninit long tufala poen ya oli no ol tingting nomo we maet ol man oli glad blong harem. Ol tingting ya oli sapotem bigfala poen we i stap antap long olgeta.

Taem yu raetem plan blong tok blong yu, maet i defren lelebet long plan ya we yumi jes tokbaot. Be sipos yu folem gud rod ya we pej 41 i soemaot, samting ya bambae i givhan long yu blong yu putum ol poen long stret ples blong olgeta, mo bambae yu no tekem tumas taem blong rerem wan gudfala tok. ?Bambae yu stat olsem wanem?

Yu Tingting Gud, Jusum Ol Save, Putum Ol Poen Long Stret Ples

Fastaem, tok blong yu i mas gat wan nem no stamba tok blong hem. Nem blong tok i no wan wod nomo we fulap save i joen long hem. Nem ya hem i stamba tingting we yu yu wantem se ol man oli kasem, mo hem i soemaot wanem samting stret we yu mas tokbaot. Sipos oli givim nem blong tok long yu finis, yu mas tingting gud long evri wod long hem. Sipos yu yusum save we i stap long wan buk blong mekem nem ya no stamba tok ya i kamaot klia, yu mas stadi gud long ol save long buk ya, mo long semtaem, yu mas holem nem blong tok ya i stap long tingting blong yu. Sipos oli talem wanem samting we bambae yu tokbaot be oli no givim wan nem no stamba tok, ale, yu nao yu mas jusum wan nem blong tok blong yu. Be bifo we yu mekem olsem, i gud yu lukaot moa save. Taem yu openem tingting blong yu blong kasem moa save, plante taem yu luksave sam niufala rod blong eksplenem ol poen, no sam niufala tingting.

Taem yu stap mekem ol samting ya, yu mas tingbaot se: ‘?From wanem save ya i impoten long olgeta we bambae oli harem? ?Mi mi wantem se tok ya i mekem wanem long ol man?’ Tok ya i no blong flatem ol save long wan buk nomo, mo i no blong givimaot save nomo long wan fasin we ol man oli glad blong lesin. Tok ya i mas givhan long laef blong olgeta. Taem yu faenemaot wanem samting we yu wantem se tok blong yu i mekem long ol man, yu raetemdaon samting ya. Nao yu tingbaot samting ya bakegen mo bakegen, taem yu gohed blong rerem tok blong yu.

Afta we yu faenemaot wanem samting we yu wantem se tok blong yu i mekem long ol man, mo yu jusum wan nem we i laenap wetem samting ya (no yu tingting gud long nem blong tok we oli givim long yu), naoia yu save wanem samting stret we yu mas faenem moa save long hem. Yu lukaot ol save we bambae i givhan gud long ol man we oli lesin long yu. Yu lukaot ol poen we oli stret gud long ol man ya mo we oli givhan gud long olgeta, i bitim we yu yusum enikaen poen nomo. Be yu no mas lukaot tumas save. Kwiktaem nomo bambae yu faenem plante save, i bitim wanem we yu nidim. Taswe yu mas jusum gud ol save we bambae yu yusum.

Yu mas jusum ol bigfala poen we bambae oli mekem se nem no stamba tok i kamaot klia, mo oli mekem samting we yu wantem se tok ya i mas mekem long ol man. Hemia nao ol bigfala poen we bambae yu raetem long plan blong tok blong yu. ?Yu mas jusum hamas bigfala poen? Sipos tok blong yu i sot nomo, ating tu bigfala poen i naf. Sipos tok blong yu i longfala moa olsem wan aoa, ating faef bigfala poen i naf. Taem yu no gat plante bigfala poen, i isi moa blong ol man oli rimemba olgeta.

Taem yu gat nem blong tok blong yu finis mo yu jusum ol bigfala poen, yu putum ol narafala save we yu bin lukaotem i go long stret ples blong hem. Yu jusum ol save we i stret long ol bigfala poen. Yu jusum ol smosmol save we oli mekem se tok blong yu i laef. Taem yu jusum sam vas blong sapotem ol bigfala poen, yu mas tingbaot sam rod blong mekem ol man oli tingting gud long ol vas ya. Ol save we yu faenem yu raetem aninit long bigfala poen we i stret long hem. Yu sakemaot ol save we i no laenap wetem ol bigfala poen ya, nating se hem i gudfala save. I gud yu raetem ol save ya long wan narafala buk, blong bambae yu yusum long wan narafala tok bakegen. Yu mas holem ol save ya nomo we i beswan, mo we i stret long tok blong yu. Sipos yu traem tokbaot tumas samting, bambae yu toktok hareap tumas mo ol poen bambae oli no klia. I moa gud yu tokbaot sam poen nomo we oli save givhan gud long ol man, mo yu eksplenem gud ol poen ya. Be yu no mas bitim taem we yu gat blong mekem tok ya.

Naoia i gud yu putum ol poen we yu faenem oli go long stret ples blong olgeta, sipos yu no mekem samting ya yet. Taem Luk i raetem Gospel blong hem, hem i mekem olsem. Hem i faenem olgeta save we hem i wantem tokbaot, nao i putum gud ‘evri tok blong oli stret.’ (Luk 1:3) Maet yu wantem tokbaot ol poen folem ol manis no yia we ol samting oli hapen, no maet yu tokbaot wan tingting nao yu go long narafala tingting, mo yu gohed olsem. Maet yu tokbaot wan fasin mo frut blong hem, no maet yu tokbaot wan trabol mo rod blong stretem trabol ya. Yu mas jusum fasin we bambae i givhan long tok blong yu, blong hem i stret long ol man we oli lesin. Yu mas lukaot se yu no jam long wan poen i go long narafala poen. Yu mas lidim tingting blong ol man sloslo i go long ol defdefren poen, we i no gat wan hol long medel blong ol poen ya. Ol pruf we yu yusum i mas lidim ol man blong oli kasem stret tingting. Taem yu stap putum ol poen long stret ples blong olgeta, yu mas tingbaot wanem samting we ol man bambae oli kasem from ol poen ya. ?Bambae oli gat sem tingting we yu yu gat? ?Ol tok we oli harem, bambae i pulum olgeta blong oli tekem aksen? ?Bambae tok blong yu i mekem samting we yu yu wantem se hem i mekem long ol man?

Nekis samting se, yu mas rerem fastok we i pulum man blong i wantem lesin long samting we bambae yu tokbaot. Fastok ya i mas soemaot long ol man se samting we yu wantem tokbaot bambae i givhan bigwan long olgeta. Maet yu raetemdaon fastok blong yu. Ale samting we yu mekem laswan, se yu rerem lastok we i pulum ol man blong oli folem advaes long tok blong yu, mo we i laenap wetem samting we yu wantem se tok blong yu i mekem long olgeta.

Longtaem lelebet bifo long dei we yu givim tok blong yu, i gud yu stat blong raetem plan blong tok ya. Sipos yu mekem olsem, bambae i gat taem blong stretem sam samting. Maet yu luk se i nidim moa save blong sapotem wan tingting. Maet yu talem sam namba, wan pijatok, no wan laef stori. Sipos yu tokbaot wan samting we i jes hapen long wol, no wan nius we i kamaot long ples blong yu, maet samting ya i givhan long ol man blong oli luksave klia se tok ya i stret long olgeta. Taem yu luklukbak long tok blong yu, maet yu faenem sam narafala rod blong mekem tok ya i stret moa long ol man we oli lesin. Sipos yu wantem se ol gudfala save long tok blong yu i givhan long ol man, i impoten tumas blong tingting bakegen long tok ya mo jenisim sam samting.

Samfala oli raetem moa toktok long plan blong olgeta i bitim ol narafala. Be i gud yu tingbaot se: Yu mas raetem sam bigfala poen nomo long plan blong yu, yu sakemaot ol save we i no laenap wetem ol bigfala poen ya, mo yu putum ol poen long stret ples blong olgeta. Sipos yu mekem olsem, bambae yu luk se, afta we yu rerem plante tok, yu no moa gat nid blong raetem evri wod long pepa. !Hemia i save sevem fulap taem! Mo ol tok blong yu bambae oli kam gud moa. Bambae i klia se Tiokratik Skul i stap givhan gud long yu blong mekem wok blong God.

EVRI tok we yu yu mekem long Tiokratik Skul i givim janis long yu blong kam gud moa. Yu mas traehad blong rere gud long tok blong yu, nao bambae yu luksave se yu yu gohed gud, mo ol narafala tu, bambae oli luksave samting ya. (1 Tim. 4:15) Skul ya bambae i givhan long yu blong yu gat gudhan long wok blong yu.

?Yu yu stap seksek taem yu tingbaot se bambae yu toktok long fored blong kongregesen? I no rong blong harem se yu fraet smol. Mo nating sipos yu joen long skul ya longtaem finis, maet yu fraet smol yet. Be i gat sam samting we oli save givhan long yu blong yu no wari bitim mak. Taem yu stap long haos, i gud yu lanem fasin ya blong ridim buk long bigfala voes. Taem yu kam long ol miting blong kongregesen, yu mas traem blong givim ansa oltaem. Mo sipos yu yu wan pablisa finis, i gud yu joen oltaem long wok blong prij. Ol rod ya oli save givhan long yu blong yu lanem blong toktok long fored blong plante man. Antap long hemia, i nogud yu rerem ol tok blong yu long las minit. Sipos yu rere longtaem lelebet bifo we yu mas givim tok blong yu, bambae yu gat taem blong lanem tok ya long bigfala voes. Yu no mas fogetem se ol man we bambae oli harem tok ya oli ol fren blong yu. Bifo we yu givim tok blong yu, i gud yu prea long Jehova. Hem i glad blong givim tabu spirit long ol man blong hem we oli askem long hem.—Luk 11:13; Fil. 4:6, 7.

Yu no mas traem blong kam gud long evri samting wantaem. I nidim taem blong yu yu kam wan gudfala man blong toktok mo wan gudfala tija. Yu no save mekem samting ya kwiktaem. (Maeka 6:8) Sipos yu jes joen long Tiokratik Skul, yu no mas ting se fas tok we yu givim bambae i stret gud olgeta. I gud yu traem wok long wan poen fastaem, ale biaen yu go long narafala poen. Long buk ya, bambae yu faenem ol tok long saed blong poen we yu mas wok long hem. Yu mas stadi gud long ol tok ya. I gud yu traem folem haf ya “Trenem Yu Wan” we i stap long en blong evri poen we buk ya i tokbaot. Long rod ya, bambae yu save sam samting long poen we yu mas wok long hem, bifo we yu givim tok blong yu long kongregesen. Long evri tok we yu mekem, bambae yu kam gud moa.

Yu Rerem Wan Riding

Taem yu rerem wan riding blong mekem long fored blong ol man, i no naf blong lanem nomo ol wod long riding ya. Yu mas traehad blong kasem mining blong hem tu. Taswe i gud yu ridim kwiktaem afta we brata i givim pepa long yu. Yu mas traem blong kasem save long mining blong ol ful toktok, mo long bigfala tingting we i stap long evri paragraf. Long rod ya, bambae yu soemaot stret poen, mo bambae yu ridim ol save ya long fasin we i stret long mining blong hem. Sipos i gat nid, yu save yusum wan diksonari blong lukaot mining blong sam wod we maet yu no save. Yu mas traem blong kasem save gud long riding ya. Ol papa mama oli mas givhan long ol pikinini blong olgeta blong oli mekem samting ya.

?Olsem wanem? ?Oli askem long yu blong yu ridim wan haf blong Baebol no sam paragraf long Wajtaoa? Yu save askem long wan man we i ridgud blong hem i ridimaot haf ya long yu. Ale, yu lesin gud mo yu makem gud fasin blong hem blong talem ol wod, ridim ol grup blong wod, mekem ol bigfala poen oli kamaot klia, mo jenisim voes blong hem. Ale, yu traem folem ol fasin ya long riding blong yu.

Taem yu stat blong rerem riding blong yu, yu mas meksua se yu stadi gud long ol tok long buk ya, long saed blong poen we yu mas wok long hem. Mo i gud yu lukluk ol save ya bakegen, afta we yu lanem riding blong yu plante taem lelebet. Yu mas traehad blong folem gud olgeta advaes long poen we yu wok long hem.

Trening ya bambae i givhan bigwan long yu taem yu stap long wok blong prij. Long taem ya, bambae yu gat plante janis blong ridim Baebol long ol man. Tok blong God i gat paoa blong jenisim laef blong man, taswe i impoten blong ridim long fasin we i stret. (Hib. 4:12) Yu no mas ting se afta long wan no tu riding, bambae yu rid long nambawan fasin. Aposol Pol i raetem leta i go long wan Kristin we hem i mekem wok blong elda plante yia finis, i se: “Yu mas mekem we wok ya blong ridim Baebol long ol man . . . i kam nambawan wok blong yu.”—1 Tim. 4:13.

Stamba Tok Mo Rod Blong Storian

?Bambae yu mekem wanem taem yu kasem wan tok long Tiokratik Skul, nao yu nomo yu mas jusum rod we bambae yu yusum blong storian wetem man?

I gat tri samting blong tingbaot: (1) nem blong tok no stamba tok we oli givim long yu, (2) rod we bambae yu yusum blong storian wetem man, mo (3) poen we yu mas wok long hem.

Yu mas faenem ol save long saed blong stamba tok we oli givim long yu. Be bifo we yu lukaot plante save, i gud yu tingbaot wanem rod we bambae yu yusum blong storian wetem man. Samting ya bambae i givhan long yu blong yu save wanem samting blong tokbaot, mo olsem wanem blong tokbaot. ?Wanem rod we bambae yu yusum blong storian wetem man? ?Bambae yu talemaot gud nius long wan man we yu save gud hem? ?Bambae yu mekem olsem we yu jes mitim wan man long wok blong prij? ?Man ya bambae i olfala moa long yu no i yang moa? ?Bambae hem i gat wanem tingting long save we yu yu tokbaot? ?Hem i gat sam save finis long saed ya? ?Yu yu wantem se tok blong yu i mekem wanem long man ya? Ansa blong ol kwestin ya bambae i lidim yu taem yu rerem tok blong yu.

?Yu mas mekem olsem wanem blong faenem ol save long saed blong nem no stamba tok we oli givim long yu? Long pej 33 kasem 38 blong buk ya, i gat wan haf we nem blong hem se, “?Yu Mekem Olsem Wanem Blong Lukaot Moa Save?” I gud yu ridim haf ya, mo biaen yu save yusum ol buk mo ol narafala samting we yu yu gat blong lukaot moa save. Plante taem, bambae yu luk se yu faenem fulap save i bitim wanem we yu nidim. I gud yu ridim plante long ol save ya, olsemia, bambae yu save jusumaot hemia we i beswan. Be taem yu stap lukaot save, yu no mas fogetem wanem rod we bambae yu yusum blong storian wetem man. Yu makem ol poen we oli stret blong yusum.

Bifo we yu wokem plan blong tok blong yu mo yu jusum ol smosmol poen we yu wantem yusum, i gud yu tekem taem blong ridim haf long buk ya we i tokbaot poen we bambae yu wok long hem. Wan impoten risen from wanem yu givim tok ya, hemia blong traehad blong folem ol advaes long poen ya.

Sipos yu no bitim taem we oli givim long yu blong tokbaot ol save we yu rerem, bambae yu gat taem yet blong talem lastok blong yu. Bambae oli ringim wan smol bel sipos yu bitim taem. I tru, long wok blong prij i defren lelebet, from we i no gat wan stret taem we yumi mas spenem blong storian wetem wan man. Taswe, taem yu rerem tok blong yu, yu mas tingbaot hamas taem we yu yu gat blong givim tok ya. Be yu no mas fogetem se samting we i moa impoten, hemia blong tijim gud man.

Advaes Long Ol Defren Rod Blong Storian. Long pej 82 blong buk ya, i gat sam eksampol we yu save lukluk gud long olgeta. Yu save jusum wan we i stret long ples blong yu mo i stret long samting we bambae yu tokbaot. Sipos yu joen long Tiokratik Skul longtaem lelebet, yu save tingbaot evri tok olsem wan janis blong lanem ol niufala fasin blong prij.

Sipos elda we i lukaot long Tiokratik Skul i talem long yu wanem rod we yu mas yusum blong storian wetem man, i gud yu folem rod ya. Plante taem, yumi mekem ol tok olsem we yumi stap long wok blong prij. Sipos yu neva prij long fasin we brata ya i talem long yu, yu save askem advaes long sam pablisa we oli traem fasin ya finis. Bifo we yu givim tok blong yu, i gud yu traem yusum ol save ya long sem rod we bambae yu yusum long Tiokratik Skul. Hemia nao samting we Tiokratik Skul i stap trenem yu blong mekem.

Tok We Yu Givim Long Kongregesen Nomo

Sipos yu yu wan man, maet yu kasem wan sot tok we bambae yu givim long kongregesen. Taem yu rerem tok ya, yu save folem ol advaes we yumi tokbaot finis, long saed blong ol tok long Tiokratik Skul we oli olsem ol pleplei. Wan samting nomo we i defren, hemia se bambae yu toktok long plante man wantaem, mo bambae yu no mekem tok ya olsem we yu storian wetem narafala.

I gud yu mekemrere tok blong yu wetem tingting blong givhan long evriwan we oli lesin. Plante long olgeta oli save finis ol stamba trutok blong Baebol. Maet oli gat save finis long samting we bambae yu tokbaot. Yu mas tingbaot samting ya taem yu mekemrere tok blong yu. Mo yu mas traem bes blong yu blong mekem se tok blong yu i givhan long olgeta. Yu save tingbaot se: ‘?Mi save mekem wanem blong givhan long mi wan mo ol man we oli lesin long mi, blong mifala i laekem moa ol nambawan fasin blong Jehova? ?Wanem ol poen we bambae oli givhan long mifala blong save samting we God i wantem? ?Bambae save ya i givhan long mifala olsem wanem blong mekem ol waes desisen, taem ol narafala man oli stap folem ol fasin we tingting blong olgeta nomo i wantem?’ (Efes. 2:3) Blong kasem ansa blong ol kwestin ya, yu mas lukaot moa save. Yu no mas ridim vas blong Baebol nomo. Yu mas mekem ol man oli tingting long vas ya, mo yu mas givhan long ol man blong oli kasem save long samting we yumi lanem long vas ya. (Wok 17:2, 3) I nogud yu traem tokbaot tumas save. Mo yu mas tokbaot ol save long wan fasin we bambae i isi blong ol man oli holem long tingting blong olgeta.

Taem yu rerem tok blong yu, i gud yu tingbaot se bambae yu mekem olsem wanem taem yu stanap long fored blong ol man. Hemia i impoten tumas. Taem yu lanem tok blong yu, i gud yu toktok long bigfala voes. Sipos yu stadi gud long ol advaes long poen we yu wok long hem mo yu folem ol advaes ya, bambae yu stap kam gud moa oltaem. Nating se yu jes joen long Tiokratik Skul no yu stap mekem ol tok longtaem finis, yu mas rere gud long tok blong yu, nao bambae yu save toktok wetem bilif, ol tok bambae i kamaot long hat blong yu, mo bambae yu soemaot fasin we i stret long ol save long tok blong yu. Evritaem, taem yu mekem wan tok, yu mas tingbaot se bigfala tingting blong yu i blong yusum maot mo voes we Jehova i givim long yu, blong presem hem.—Sam 150:6.

PROGRAM blong Tiokratik Skul i blong givhan long yumi evriwan long kongregesen. Plante gudfala save i kamaot long ol narafala miting blong kongregesen tu mo long ol asembli. Sipos oli askem long yu blong yu givim wan tok long taem olsem, yu mas tinghevi long wok ya. Aposol Pol i talem long Timoti, we i wan Kristin elda, se hem i mas lukaot gud long ol tok we hem i stap tijim ol man long hem. (1 Tim. 4:16) Ol brata sista we oli stap long ol Kristin miting oli makemaot taem blong kam long ol miting ya, from we oli wantem kasem tijing we i givhan long olgeta blong oli fren gud wetem God. Sam long olgeta oli mas traehad bigwan blong oli save kam long miting ya. !Taswe, sipos yumi gat janis blong givim wan tok we i tijim olgeta, yumi kasem wan nambawan blesing! ?Yu save mekem wanem blong soemaot se yu tinghae long blesing ya?

Ol Bigfala Poen Blong Baebol Riding

Brata we i mekem haf ya blong Tiokratik Skul hem i tokbaot Baebol riding blong wik. Hem i mas soemaot se ol save long riding ya i givhan olsem wanem long yumi tede. Nehemaea 8:8 i talem se pris ya Esra mo ol Livaet oli ridim Tok blong God long fored blong olgeta man, oli eksplenem tok ya, oli “talemaot mining blong hem,” mo oli givim save long ol man. Taem yu tokbaot ol bigfala poen blong Baebol riding, yu tu yu gat janis blong mekem olsem.

?Yu mekem olsem wanem blong rerem tok ya? Sipos yu gat janis, i gud yu ridim ol japta ya blong Baebol wan no tu wik bifo we yu givim tok ya. Mo yu tingbaot kongregesen mo ol nid blong hem. Yu save prea long saed ya. ?Wanem nao ol advaes, ol eksampol, mo ol rul long ol japta ya blong Baebol, we oli stret long ol nid blong kongregesen?

Yu mas lukaot moa save. ?Olsem wanem? ?Yu yu gat Watch Tower Publications Index no Watchtower Library long CD-ROM, no Indeks we i kamaot long Wajtaoa long en blong yia? Sipos i gat, yu mas yusum gud. Yu lukaot save long ol vas we yu jusum blong tokbaot. Maet yu faenem save we i mekem mining blong ol vas ya i klia, no maet yu faenem save long sam profet tok we oli kamtru finis. Maet yu faenemaot samting we wan vas i soemaot long saed blong Jehova, no maet yu faenem save long wan samting we Baebol i no talem wan klia loa long hem. I nogud yu traem tokbaot plante poen. Mo i nogud yu traem tokbaot plante vas. I moa gud yu tokbaot sam vas nomo, nao bambae yu gat taem blong eksplenem gud ol vas ya.

Long tok blong yu, ating yu mas askem long olgeta long kongregesen blong oli talem wan poen long Baebol riding we i givhan long olgeta. ?Oli faenem wanem poen we i save givhan long stadi we olgeta wanwan oli mekem no long famle stadi, no maet i givhan long olgeta long wok blong prij, no long laef blong olgeta? ?Baebol riding i tokbaot wanem fasin we Jehova i mekem long ol man mo ol neson? ?Olgeta long kongregesen oli lanem wanem long Baebol riding, we i mekem bilif blong olgeta i kam strong, mo i mekem se oli laekem Jehova moa? Yu no mas spenem taem blong tokbaot ol smosmol poen we oli no impoten tumas mo we i tekem plante taem blong eksplenem. Yu jusum sam poen nomo, yu eksplenem mining blong ol poen ya, mo yu tokbaot se oli save givhan olsem wanem long laef blong yumi.

Miting Blong Kingdom Wok

Taem yu givim wan tok we i stanap long wan haf blong Kingdom Wok Blong Yumi, yu tokbaot evri samting we i stap long haf ya. Yu no save jusum sam haf nomo we yu ting se oli stret moa long kongregesen. Yu givhan long ol man blong oli tingting gud long ol vas we Kingdom Wok i yusum blong givim advaes. (Taet. 1:9) Oli makemaot smoltaem nomo blong mekem ol tok ya, taswe bambae i no gat taem blong yu joenem sam narafala save i go long tok blong yu.

?Olsem wanem sipos yu mas givim wan tok we ol save blong hem i no stap long Kingdom Wok Blong Yumi? Maet tok ya i kamaot long wan Wajtaoa, no maet oli givim sam tingting nomo we tok ya i mas stanap long olgeta. I stap long yu nao blong yu mekem tok blong yu i laenap wetem ol nid blong kongregesen. Maet i gud yu yusum wan sot pijatok we i klia gud, no yu talem wan laef stori we i soemaot impoten poen long tok ya. Yu mas tingbaot se wok blong yu i no blong tokbaot ol save nomo, be i blong givhan long kongregesen blong i mekem wok we Tok blong God i talem, mo blong i faenem glad long wok ya.—Wok 20:20, 21.

Taem yu rerem tok blong yu, yu tingbaot ol samting long laef blong olgeta long kongregesen. Yu mas talem ol gudfala tok long olgeta from hadwok we oli stap mekem. Sipos oli folem ol advaes long tok blong yu, ?samting ya bambae i givhan long olgeta olsem wanem, blong oli kam gud moa long wok blong prij, mo blong oli faenem moa glad long wok ya?

Maet long tok blong yu i gat wan pleplei no yu mas askem sam kwestin long wan brata no sista long kongregesen. Sipos i olsem, yu mas rere gud fastaem. Maet yu ting se i gud yu askem long wan narafala brata, blong hem nao i jusum samfala blong mekem ol pleplei mo i lesin long olgeta, be plante taem, rod ya i no beswan. I gud sipos yu nao yu save lesin long ol pleplei ya no ol kwestin mo ansa bifo long dei blong miting. Yu mas meksua se ol pleplei ya oli givim paoa long tijing we i kamaot long tok blong yu.

Ol Asembli

Ol brata we oli gat ol gudfala Kristin fasin mo we oli kam ol gudfala man blong toktok mo tij, maet bambae oli kasem wan tok long asembli. Asembli i wan spesel taem blong kasem tijing blong God. Sam long ol tok long asembli, oli raetem evri wod blong olgeta long wan pepa, mo sam narafala tok, oli raetem ol bigfala poen nomo, olsem wan plan blong tok. Maet yu mas lukaot long wan drama blong wan stori long Baebol, we i laenap wetem taem blong yumi. Maet yu kasem wan pepa we oli raetem smol toktok nomo long hem, blong talem wanem we yu mas tokbaot. Sipos yu kasem blesing ya blong givim wan tok long asembli, yu mas stadi gud long ol save we oli givim long yu. Yu mas tingting long hem gogo yu kasem save from wanem hem i impoten tumas.

Taem wan brata i givim tok we oli raetem evri wod blong hem finis long pepa, hem i ridim tok ya olsem we i stap. Hem i no mas jenisim ol wod no seftem sam haf blong tok i go long narafala ples. Hem i stadi gud long tok ya, blong luksave klia wanem ol bigfala poen blong hem, mo se tok ya i mekem ol poen ya oli kam klia olsem wanem. Hem i ridim tok ya bakegen mo bakegen long bigfala voes, gogo hem i save talem strong ol tok we i stret blong talem strong. Hem i ridim gogo i save toktok wetem glad mo toktok kaen, ol tok blong hem oli kamaot long hat, mo hem i soemaot se hem i tinghevi mo i bilif strong long wanem we hem i stap ridim. Long semtaem, voes blong hem i mas gat paoa mo i mas naf blong ol man oli harem tok blong hem.

Ol brata we oli kasem wan pepa we i gat ol bigfala poen nomo long hem olsem plan blong tok blong olgeta, oli folem gud ol bigfala poen ya, oli no mas gowe long olgeta. Oli no ridimaot ol tok we i stap long pepa ya, mo oli no raetem evri wod we oli wantem talem, be oli yusum prapa toktok blong olgeta we i kamaot long hat blong olgeta. I impoten we brata i folem stret ol minit we oli raetem long evri haf blong tok blong hem. Samting ya bambae i mekem se hem i save eksplenem klia evri bigfala poen we i stap long pepa. Brata i yusum ol tingting mo vas we oli raetem i stap aninit long ol bigfala poen. Hem i no mas karemaot sam poen we oli stap long pepa ya blong ademap sam poen we hem nomo i laekem. Olgeta tijing we oli stap insaed long ol tok ya oli kamaot long Tok blong God. Wok blong ol Kristin elda i blong ‘talemaot tok ya.’ (2 Tim. 4:1, 2) Taswe, brata we i givim tok i mas yusum gud ol vas we oli stap long pepa. Hem i pulum ol man blong oli tingting gud long olgeta, mo i soemaot klia se ol vas ya oli joen olsem wanem wetem ol bigfala poen long tok blong hem.

Yu No Mas Rerem Tok Blong Yu Long Las Minit

?Yu yu stap long wan kongregesen we i no gat fulap man blong mekem ol tok? Ating yu stap kasem plante tok. ?Yu save mekem olsem wanem blong yu rere gud long evriwan? Yu no mas rerem ol tok blong yu long las minit.

Wan tok we i givhan gud long kongregesen, hemia tok we man i tingting gud long hem fastaem. Taswe, yu mas lanem fasin ya blong ridim ol save long tok blong yu kwiktaem afta we yu save se bambae yu mekem tok ya. Nao yu tingbaot ol save ya taem yu gohed long ol narafala wok blong yu. Long ol dei mo ol wik bifo we yu givim tok ya, maet yu harem sam narafala oli talem samting we i save givhan long yu blong yu luksave rod we i beswan blong mekem tok ya i joen wetem laef blong ol man. Maet sam samting oli hapen we oli soemaot se tok ya i kamaot long stret taem. Stret afta we yu kasem wan tok, yu mas makemaot taem blong ridim ol save long tok ya mo blong tingbaot ol save ya. Hemia i no wan wok we i blong westem taem. Taem yu sidaon blong wokem plan blong tok blong yu, bambae yu glad tumas we yu bin tingting gud long hem fastaem. Sipos yu folem rod ya, bambae yu no seksek mo wari tumas taem yu givim wan tok, mo bambae yu mekem tok blong yu long fasin we i givhan long evriwan long kongregesen mo i kasem hat blong olgeta.

Program ya we Jehova i stanemap blong tijim ol man blong hem, i wan nambawan presen. Taem yu tinghae long janis ya we yu yu gat blong joen long program ya, yu ona long Jehova, mo yu givhan gud long ol man we oli lavem hem.—Aes. 54:13; Rom 12:6-8.

EVRI wik, bighaf blong ol kongregesen blong ol Witnes blong Jehova oli folem program blong lesin long wan pablik tok we i stanap long Baebol. Sipos yu yu wan elda no wan man blong givhan, ?yu stap traehad blong toktok gud mo tij gud long fored blong ol man? Sipos yu stap mekem olsem, maet bambae oli askem long yu blong yu givim wan pablik tok. Tiokratik Skul i mekem plante taosen brata oli naf blong givim ol pablik tok. Be taem yu mas mekem wan tok olsem, ?bambae yu rerem olsem wanem?

Yu Stadi Long Plan Blong Tok

Bifo we yu stat blong lukaot moa save long ol narafala buk, i gud yu ridim plan blong tok we oli givim long yu, mo yu tingting dip long hem gogo yu kasem save gud long ol poen. Yu mas putum nem blong tok ya i stap gud long tingting blong yu, hemia nao stamba tok blong yu. ?Wanem tijing we yu wantem givim long ol man? ?Yu yu wantem se tok blong yu i mekem wanem long ol man?

Yu mas save gud ol smol stamba tok we oli ol bigfala poen long tok blong yu. Yu mas tingting gud long olgeta. ?Ol poen ya wanwan oli laenap olsem wanem wetem nem blong tok ya? Aninit long evri smol stamba tok, i gat ol poen we oli joen wetem stamba tok ya. Mo aninit long ol poen ya i gat sam narafala tingting bakegen blong sapotem olgeta. Yu mas tingbaot se wan haf blong tok ya i laenap olsem wanem wetem haf we i kam bifo long hem, wan haf i joen olsem wanem wetem haf we i kam biaen, mo olgeta haf oli joen olsem wanem blong givim bigfala tingting insaed long tok ya. Taem yu kasem save finis long nem blong tok ya, mo yu luksave wanem we yu wantem se tok ya i mekem long ol man, mo olsem wanem ol bigfala poen oli save mekem samting ya, naoia yu save stat blong rerem tok ya.

Fastaem maet i gud yu tingbaot pablik tok ya olsem se hem i fo no faef sot tok, we olgeta wanwan oli stanap long wan bigfala poen. Ale, yu rerem wan fastaem, afta, yu rerem narawan.

Plan blong tok we yu kasem wetem ol bigfala poen long hem, hem i wan tul blong givhan long yu blong rerem tok blong yu. Bambae yu no yusum pepa ya taem yu givim tok blong yu. Pepa ya i olsem wan haos we yu stap bildim. Yu stanemap ol wol blong haos ya, mo yu putum kapa mo windo long hem. Bifo we yu save go stap long haos ya, yu putum ol samting insaed long hem, olsem ol jea mo tebol mo sam narafala samting bakegen.

Yu Mas Yusum Baebol

Olgeta tijing blong Jisas Kraes mo ol disaepol blong hem, oli stanap long Baebol. (Luk 4:16-21; 24:27; Wok 17:2, 3) Yu tu yu mas tij long fasin ya. Tok blong yu i mas stanap long Baebol. I no naf blong eksplenem ol tok we i stap long pepa ya we oli givim long yu olsem plan blong tok. Mo i no naf blong talem wanem we yumi mas mekem blong wokem save ya long laef blong yumi. Yu mas luksave tu olsem wanem Baebol i sapotem ol tok ya we oli raetem long plan blong tok, mo yu mas yusum Baebol blong tijim ol man.

Taem yu rerem tok blong yu, yu jekemap evri vas we oli raetem long pepa. Mo yu ridim ol vas we oli stap raonabaot long olgeta. Sam long ol vas we oli stap long pepa ya oli stap nomo blong givim moa save long yu long wan stori. Be taem yu mekem tok blong yu, i no nid blong ridim mo tokbaot olgeta vas ya evriwan. Yu jusum ol vas ya nomo we oli stret long ol man we oli lesin long yu. Sipos yu yusum gud ol vas we oli stap long pepa ya, ating i no nid blong lukaot sam narafala vas bakegen.

Sipos yu tij gud, tok blong yu bambae i gat paoa long ol man. Samting ya i no dipen long hamas vas we yu yusum, be i dipen long fasin blong yu blong tij. Bifo we yu ridim wan vas, yu mas soemaot from wanem yu yusum vas ya. Yu no mas spid tumas, be yu mas eksplenem gud vas ya blong man i save se i joen olsem wanem wetem ol bigfala poen long tok blong yu. Afta we yu ridim wan vas, yu lego Baebol blong yu i open taem yu gohed blong tokbaot vas ya. Ating olgeta we oli lesin long yu, bambae oli mekem sem mak. ?Yu save mekem wanem blong pulum ol man blong oli tingting gud long wan vas, mo blong oli luksave se Tok blong God i save givhan bigwan long olgeta? (Neh. 8:8, 12) Yu eksplenem gud vas ya, yu yusum wan pijatok, mo yu soemaot wanem we oli save mekem blong folem vas ya long laef blong olgeta.

Yu eksplenem gud. Taem yu rerem ol tok we bambae yu talem blong eksplenem wan impoten vas, yu mas tingbaot se: ‘?Vas ya i minim wanem? ?From wanem mi mi yusum vas ya long tok blong mi? ?Wanem sam kwestin we maet olgeta we oli lesin oli gat, taem oli ridim vas ya?’ Blong ansa long ol kwestin ya, maet yu mas jekemap ol vas raonabaot, yu mas faenemaot wetaem mo weples oli raetem vas ya, mo from wanem oli raetem tok olsem. Maet yu mas kasem save se ol tok long vas ya i save gat paoa olsem wanem long ol man, mo wanem samting we man blong raetem tok ya i wantem soemaot. Blong faenemaot ol samting ya, yu mas lukaot moa save. Bambae yu faenem plante gudfala save long ol buk blong “slef ya we i stret mo waes.” (Mat. 24:45-47, NW) Yu no mas traem blong eksplenem evri samting long wan vas. Be yu mas eksplenem se vas ya i laenap olsem wanem wetem poen we yu stap tokbaot.

Pijatok. Yu yusum pijatok blong givhan long ol man blong oli kasem save moa long wan poen, mo blong givhan long olgeta blong oli rimemba wan poen no wan tingting blong Jehova we yu stap tokbaot. Pijatok i halpem ol man blong oli kasem save long ol tok we yu talem, mo blong oli joenem save ya wetem samting we oli save finis. Hemia nao samting we Jisas i mekem long Bigfala Toktok blong hem antap long hil. Hem i tokbaot ‘ol pijin we oli stap flae olbaot,’ ‘ol flaoa we oli stap gru olbaot,’ wan ‘get we i smol nomo,’ wan ‘haos we man i wokem antap long bigfala ston,’ mo plante narafala pijatok we oli mekem se tijing blong hem i gat paoa, i klia gud, mo i isi blong rimemba.—Mat., japta 5–7.

Man i mekem save ya i wok. Taem yu eksplenem wan vas mo yu yusum wan pijatok blong mekem i klia, bambae yu givim save long ol man. Be gudfala frut i kamaot taem man i mekem save ya i wok. I tru, hem i wok blong ol man wanwan blong oli folem wanem we Baebol i talem. Be yu yu save givhan long olgeta blong oli luksave olsem wanem blong mekem samting ya. Fastaem, ol man oli mas kasem save gud long vas we yu stap tokbaot mo oli mas luksave se vas ya i joen olsem wanem wetem poen we yu stap tokbaot. Afta long hemia, i gud yu soemaot se vas ya i save gat paoa olsem wanem long bilif blong olgeta mo fasin blong olgeta. Yu mas soemaot klia from wanem i gud blong sakemaot ol rong tingting mo ol fasin we oli no laenap wetem trutok ya we yu stap tokbaot.

Taem yu stap tingbaot sam rod blong man i mekem wan vas i wok long laef blong hem, yu mas tingbaot se olgeta we bambae oli lesin long yu, laef blong olgeta wanwan i defdefren, mo oli fesem ol defren kaen trabol. Maet i gat sam we oli jes stat blong save trutok, sam yangfala, sam olfala, mo sam we oli stap traehad blong winim ol defdefren trabol long laef blong olgeta. Tok blong yu i mas givhan long olgeta, mo i mas laenap wetem ol samting we oli stap hapen long laef. Yu no mas givim advaes we i stret long sam man nomo we oli stap lesin.

Ol Desisen Blong Yu Taem Yu Rerem Tok

I gat sam desisen we yu no nid blong mekem long tok blong yu. Long pepa we yu kasem, oli raetem finis ol bigfala poen, mo hamas minit we yu yu gat blong tokbaot ol poen ya. Be i gat sam narafala desisen we yu nao yu mas mekem. Maet yu jusum blong spenem moa taem long wan poen we i sapotem wan bigfala poen, i bitim ol narafala poen. Yu no mas ting se taem we yu spenem long evri poen i mas sem mak. Sipos taem we yu spenem long evri poen i sem mak, bambae yu mas spid tumas blong tokbaot evri poen, mo maet ol man oli no moa kasem save gud long tok blong yu. ?Wanem poen nao we yu mas spenem moa taem long hem, mo wanem poen we yu mas tokbaot blong smoltaem nomo? Blong save samting ya, yu mas tingbaot ol kwestin ya: ‘?Wanem ol poen we bambae oli soemaot bigfala tingting long tok ya? ?Wanem ol poen we bambae oli givhan moa long olgeta we oli lesin? ?Sipos mi no yusum sam long ol vas no poen we oli stap, bambae mi mi givim naf pruf blong soemaot gud bigfala tingting long tok ya?’

Yu mas lukaot gud se yu no talem samting we yu ting se i stret nomo, mo yu no talem prapa tingting blong yu. Jisas Kraes, we hem i Pikinini blong God, i lukaot oltaem blong i no talem ol tok we i ‘kamaot long hem nomo.’ (Jon 14:10) Tingbaot se ol man oli kam long ol miting blong ol Witnes blong Jehova from we oli wantem harem wanem we Baebol i talem. Sipos ol man oli stap talem se yu yu givim ol gudfala tok, ating hemia from we oltaem yu pulum tingting blong man i go long Tok blong God be i no long yu wan. From risen ya, ol man oli glad blong harem ol tok blong yu.—Fil. 1:10, 11.

Naoia we yu faenem finis plante save long Baebol blong eksplenem ol poen long plan blong tok blong yu, yu yu rere blong lanem tok blong yu. I gud yu mekem samting ya long bigfala voes. Impoten samting, hemia blong meksua se olgeta poen oli stap klia long tingting blong yu. Ol tok we yu talem i mas kamaot long hat blong yu, yu mas mekem tok i laef, mo yu mas soemaot se yu yu glad tumas long ol trutok we yu stap eksplenem. Bifo we yu givim tok ya, yu save tingbaot se: ‘?Mi mi wantem se tok ya i mekem wanem long ol man? ?Ol bigfala poen oli kamaot klia? ?Tok blong mi i stanap long Baebol? ?Ol bigfala poen wanwan oli lidim tingting blong man i go long nekis bigfala poen? ?Tok ya i pulum man blong i lavem Jehova mo blong i tinghae long ol samting we hem i givim? ?Lastok i pulum tingting i gobak long nem blong tok ya, mo i soemaot long ol man wanem we oli mas mekem, mo i pulum olgeta blong oli wantem mekem samting ya?’ Sipos yu ansa ‘yes’ long olgeta kwestin ya, ale yu yu rere blong toktok long fasin we i mekem ol man ‘oli glad long save’ we yu yu givim. !Yes, bambae yu mekem i gud long kongregesen, mo bambae yu presem Jehova tu!—Prov. 15:2.