Jisas i Jusum Sol

Sol i wan sitisen blong Rom we i bon long taon ya Tasas. Hem i wan Farisi we i gat plante save long Loa blong ol man Jiu, be i no laekem nating ol Kristin. Hem i stap pulumaot ol Kristin man mo woman long ol haos blong olgeta, mo i sakem olgeta long kalabus. Mo tu, hem i wajem ol man oli stonem disaepol Steven i ded.

Sol i stap arestem ol Kristin long Jerusalem, be i wantem go lukaotem olgeta long ol narafala ples tu. Ale, hem i askem long hae pris blong i sanem hem i go long taon ya Damaskes. Taem Sol i kam klosap long taon ya, wan bigfala laet i saen long hem, nao i foldaon long graon. Hem i harem wan voes i se: ‘Sol, ?from wanem yu stap mekem i nogud long mi?’ Sol i askem se: “?Yu yu hu?” Voes ya i talem se: ‘Mi mi Jisas ya. Yu go long Damaskes, nao bae yu faenemaot wanem we yu mas mekem.’ Wantaem nomo, Sol i kam blaen, mo oli holem han blong hem, oli lidim hem i go long Damaskes.

I gat wan Kristin long Damaskes, nem blong hem Ananaeas. Long wan vison, Jisas i talem long Ananaeas se: ‘Yu go long haos blong Judas long rod ya we nem blong hem Stret Rod, mo yu askem wan man we nem blong hem Sol.’ Ananaeas i talem se: ‘!Masta, mi harem plante stori long saed blong man ya! !Hem i stap sakem ol disaepol oli go long kalabus!’ Be Jisas i se: ‘Yu girap yu go luk hem. Mi mi jusum Sol blong i talemaot gud nius long ol man long plante kantri.’

Ananaeas i faenem Sol, mo i talem long hem se: ‘Sol, brata, Jisas i sanem mi blong mi mekem ae blong yu i kam gud.’ Wantaem nomo, Sol i save lukluk bakegen. Hem i kasem plante save long saed blong Jisas mo i kam wan man blong hem. Taem hem i baptaes, hem i joenem ol narafala Kristin blong oli prij long ol haos prea blong ol man Jiu. !Traem tingbaot olsem wanem ol man Jiu oli sek taem oli luk se Sol i stap tijim ol man long saed blong Jisas! Oli talem se: ‘?Hemia i no sem man ya we i bin ronem mo kilim ol disaepol blong Jisas?’

Long tri yia we Sol i prij long Damaskes, ol man Jiu oli no laekem hem nating mo oli mekem plan blong kilim hem i ded. Be ol brata oli harem plan ya mo oli givhan long Sol blong i ronwe. Oli putum hem long wan bigfala basket, mo oli yusum rop blong slakem hem i godaon, tru long wan bigfala hol long stonwol blong taon ya.

Taem Sol i go long Jerusalem, hem i wantem joen wetem ol brata, be oli fraet long hem. Nao disaepol Banabas we i gat kaen fasin, i tekem Sol i go long ol aposol, mo i toktok long olgeta blong oli luksave se Sol i rili jenisim fasin blong hem. Nao Sol i joen wetem kongregesen long Jerusalem mo i gohed strong blong talemaot gud nius. Biaen, ol man oli singaot hem se Pol.