Jisas i Tijim Ol Disaepol Blong Oli Prea

Oltaem ol Farisi oli traem pulum ae blong ol man. Oli kaen long man blong pulum ol narafala blong lukluk olgeta. Oli prea long ol pablik ples blong ol man oli save lukluk olgeta. Oli lanem gud ol prea, mo oli stap talem bakegen mo bakegen long ol haos prea mo long ol big rod, blong ol man oli harem olgeta. Taswe, ol man oli sapraes taem Jisas i talem se: ‘Yu no mas folem fasin blong ol Farisi. Oli ting se God i glad long ol prea blong olgeta from we oli talem plante toktok, be God i no glad. Taem yu prea, hemia yu wetem Jehova nomo. Yu no mas talem sem samting bakegen mo bakegen. Jehova i wantem se yu talemaot olgeta filing blong yu.

‘Yu mas prea olsem: “Papa blong mifala long heven, plis yu mekem we nem blong yu i tabu. Yu mekem Kingdom blong yu i kam. Yu mekem wil blong yu i kamtru long wol ya olsem long heven.”’ Jisas i talem long ol man se oli mas prea blong God i givim kakae we i naf blong tede, mo blong hem i fogivim sin blong olgeta, mo oli save tokbaot ol narafala samting tu long laef blong olgeta.

Jisas i talem se: ‘Yu mas gohed nomo blong prea. Yu gohed blong askem long Papa Jehova, blong i givim ol gudfala samting long yu. Ol papa mo mama oli wantem givim ol gudfala samting long pikinini blong olgeta. Sipos pikinini blong yu i askem bred, ?bae yu givim wan ston long hem? Sipos hem i askem wan fis, ?bae yu givim wan snek long hem?’

Biaen, Jisas i eksplenem se: ‘Yu yu stap givim ol gudgudfala samting long pikinini blong yu. Taswe, ?yu no ting se Papa blong yu long heven, i save givim tabu spirit long yu? Yu nidim nomo blong askem long hem.’ ?Olsem wanem? ?Yu tu yu stap folem advaes ya blong Jisas? ?Yu yu tokbaot wanem long ol prea blong yu?