Sam man oli harem se i had tumas blong lavem God. Oli ting se God i stap longwe, hem i stap spolem ol man, mo oli no naf blong save hem. Traem luk tingting blong samfala:

• “Mi mi prea long God blong i givhan long mi, be long semtaem mi harem olsem se God i stap longwe tumas. Mi ting se God i olsem win nomo.”—Marco, Itali.

• “Mi mi wantem tumas blong mekem wok blong God, be i luk olsem se hem i stap longwe tumas. Mi ting se God i stap mekem i strong long yumi mo i wantem panisim yumi nomo. Mi no ting se hem i lavem yumi.”—Rosa, Guatemala.

• “Taem mi pikinini, mi ting se God i stap lukaot ol mastik blong yumi nomo, blong panisim yumi from. Afta, mi ting se God i no wantem save ol man. Hem i olsem wan praeminista we i wantem bos long laef blong ol man, be hem i no rili intres long olgeta.”—Raymonde, Kanada.

?Wanem tingting blong yu? ?Yu ting se ol man oli save lavem God? Plante handred yia finis, ol kristin oli gat kwestin ya. Be long ol yia 500 kasem 1500, plante man blong Krisendom, oli no stap prea long God ya we i gat Olgeta Paoa. ?From wanem? From we oli fraet long hem. Wan man blong raetem histri, nem blong hem Will Durant, i talem se: “?Yu ting se i isi long wan sinman blong i prea long wan God we i stap mekem ol man oli fraet?”

?From wanem ol man oli ting se God i stap mekem ol man i fraet mo i no wantem fren wetem olgeta? ?Wanem samting we Baebol i rili tijim long saed blong God? ?Sipos yu save trutok long saed blong God, bambae yu yu lavem hem?

BILIF WE PLANTE MAN I GAT

“Mifala i agri se God i no gat nem. Sipos i tru se God i gat nem, ?wanem nem ya?”—Professor David Cunningham, Theological Studies.

TRUTOK BLONG BAEBOL

Jehova i talem long Moses se: “Yu mas talem long olgeta se, ‘God we i sanem mi mi kam long yufala, nem blong hem “Mi Stap We Mi Stap [Jehova, futnot].”’” (Eksodas 3:14) Jehova, i nem blong God long lanwis Hibru we i min se, “Hem i mekem i kamaot.”

Jehova i wantem we yumi yusum nem blong hem. Hem i talem se: “Olgeta man we oli singaot mi long nem blong mi, mi bambae mi sevem olgeta.” Mo hem i wantem we ‘yumi talemaot ol samting ya we hem i mekem. Yumi talemaot long ol man, we nem blong hem i hae we i hae.’—Ol Wok 2:21; Aesea 12:4.

Jisas i yusum nem blong God. Hem i prea long Jehova se: “Ol man ya we yu yu tekemaot olgeta long wol ya blong givim long mi, mi mi stap talemaot nem blong yu long olgeta blong mekem olgeta oli save yu.” ?From wanem Jisas i talemaot nem blong God long ol disaepol blong hem? Hem i gohed i talem se: “Blong oli save lavem mi olsem we yu [God] yu lavem mi, mo blong laef blong mi i save joen gud long laef blong olgeta.”—Jon 17:6, 26.

?FROM WANEM I GUD BLONG SAVE?

Wan man blong stadi long ol tijing blong ol jos, Walter Lowrie i raetem se: “Wan man we i no save nem blong God, hem i no rili save hem. Mo sipos man i tingbaot God olsem wan paoa nomo, bambae hem i no save lavem hem.”

Wan man we nem blong hem Victor, i stap go long jos evri wik, be hem i harem se hem i no save gud God. Hem i talem se: “Taem mi kasem save se Jehova i nem blong God, i olsem we wan man i tekem mi mi go long Jehova, mo i soemaot hem long mi. Mi harem olsem se, saye mi save Man ya we plante man oli stap tokbaot hem. Naoia mi mi save gud Jehova mo mi traehad blong fren gud wetem hem.”

Jehova i kam klosap long ol man we oli yusum nem blong hem. Hem i promes se: ‘Olgeta we oli ona gud long nem blong hem mo oli tinghevi long hem, hem bambae i gat sore long olgeta, i givhan long olgeta, stret olsem we wan papa i gat sore long pikinini blong hem, we i stap wok blong hem.’ (Malakae 3:16, 17) Mo tu, God bambae i blesem ol man we oli stap singaot long nem blong hem. Baebol i talem se: “Olgeta man we oli singaot long mi long nem blong mi, mi bambae mi sevem olgeta.”—Rom 10:13.

BILIF WE PLANTE MAN I GAT

“Katolik Jos, Otodoks Jos mo Protestan Jos we oli talem se oli kristin, oli agri se God i gat tri haf blong hem. Hemia God Papa, God Pikinini mo God Tabu Spirit. Folem tijing blong olgeta, oli talem se trifala i no tri god, be oli wan nomo.”—The New Encyclopædia Britannica.

TRUTOK BLONG BAEBOL

Jisas, pikinini blong God, i neva talem se hem i sem mak long Papa blong hem. Mo hem i neva talem se hem mo papa blong hem i sem man nomo. Be hem i talem se: “Mi stap go long Papa blong mi, from we hem i hae moa long mi.” (Jon 14:28) Hem i talem tu se: “Mi mi stap gobak long Papa blong mi we hem i Papa blong yufala tu, mo i God blong mi mo i God blong yufala tu.”—Jon 20:17.

Tabu spirit i no wan man. Long taem blong ol Kristin bifo, “Tabu Spirit i kam fulap long olgeta.” Mo Jehova i talem se: “Mi bambae mi givim Spirit blong mi long olgeta man, we bambae olgeta evriwan oli kasem fulpaoa blong hem.” (Ol Wok 2:1-4, 17) Tabu spirit i no wan haf blong Triniti. Hem i Paoa blong God.

?FROM WANEM I GUD BLONG SAVE?

Karl Rahner mo Herbert Vorgrimler we tufala i stadi long tijing blong Katolik jos, tufala i eksplenem se “sipos wan man i no luk wan vison, no maet i luk wan vison we God i soemaot long hem be bambae hem i no naf blong kasem save fulwan long tijing blong Triniti.” ?Olsem wanem? ?Yu save lavem wan man we yu no save hem, mo i had blong kasem save long hem? Taswe, tijing blong Triniti i blokem man blong save God mo lavem hem.

Marco we yumi tokbaot finis, i talem se tijing blong Triniti i olsem wan fenis we i blokem hem, blong hem i no save God. Hem i talem se: “Mi ting se God i no wantem we mi mi save hem. Mo mi ting se hem i stap longwe, yumi no naf blong kasem save long hem, mo hem i no wantem we yumi toktok long hem.” Be, “God ya i no stap longwe long yumi nating.” (Ol Wok 17:27) God i no haedem hem long yumi. Hem i wantem tumas we yumi save hem. Jisas i talem se: “Mifala i stap mekem wosip long God, we mifala i save hem.”—Jon 4:22.

Marco i talem se: “Taem mi kasem save se God i no wan haf blong Triniti, mi stat blong fren gud wetem hem.” Sipos yumi tingbaot se Jehova i no olsem wan strenja, be yumi naf blong kasem save long hem, bambae i moa isi blong lavem hem. Baebol i talem se: “Man we i no save lavem narafala man, hem i no save God, from we God i stamba blong fasin ya blong lavem man.”—1 Jon 4:8.

BILIF WE PLANTE MAN I GAT

“Man we i mekem bigfala sin, taem hem i ded, sol blong hem i go long helfaea. Long ples ya, bambae i kasem panis long helfaea, hemia ‘faea we i stap blong olwe.’” (Catechism of the Catholic Church) Sam lida blong skul oli talem se man we i go long hel, hem i stap longwe long God.

TRUTOK BLONG BAEBOL

Ol man we oli ded “oli no moa save wan samting.” (Prija 9:5) Sipos wan man i ded mo i no moa save wan samting, ?olsem wanem hem i save harem nogud long ‘faea we i stap blong olwe’?

Baebol i tokbaot wan ‘bigfala hol blong faea, we i fulap long faea mo salfa.’ (Revelesen 20:10) Baebol hem wan i eksplenem se: “Bigfala hol blong faea ya, hemia seken ded ya.” (Revelesen 20:14; 21:8) Yes bigfala hol blong faea, hem i no wan prapa ples blong bonem man. Taem Baebol i talem se man bambae i stap ‘harem nogud gogo i no save finis,’ long bigfala hol blong faea, hem i minim seken ded, we man i no moa save laef bakegen.

?FROM WANEM I GUD BLONG SAVE?

Tijing ya se God i stap mekem i strong tumas long man, i pulum man i go longwe long God. Rocio we i laef long Meksiko, i talem se: “Taem mi mi pikinini, mi bilif long giaman tijing ya blong helfaea. Mi mi fraet tumas, from mi ting se God i no gat ol gudfala fasin. Mi ting se hem i save kros mo i save agensem man.”

Baebol i talemaot klia samting we God bambae i mekem blong jajem ol man, mo hem i tokbaot klia wanem i hapen taem man i ded. Ol samting ya oli jenisim tingting we Rocio i gat long God. Hem i talem se: “Naoia mi mi fri, i olsem se wan hevi samting i kamaot long mi. Mi stat blong lavem God, mo mi trastem hem se hem i wantem mekem i gud long yumi, mo i lavem yumi. Hem i olsem wan papa we i holem pikinini blong hem long han blong hem, mo i wantem tumas blong mekem i gud long hem.”—Aesea 41:13.

Plante man oli traehad blong mekem samting we i stret, from oli fraet blong go long helfaea. Be God i no wantem we yumi mekem wok blong hem from yumi fraet. Defren olgeta, Jisas i talem se: “Yufala i mas lavem Hae God [Jehova] ya we i God blong yufala long olgeta hat blong yufala.” (Mak 12:29, 30) Antap moa, taem yumi kasem save se God i no save mekem wan samting we i no stret, yumi trastem ol jajmen blong hem long fiuja tu. Yumi save gat strong tingting olsem fren blong Job, Elihu, we i talem se: “!God ya, hem i no save mekem wan samting we i no stret! Olgeta samting we hem i stap mekem oli stret nomo.”—Job 34:12.

Wan dei, taem Jisas i stap long Jerusalem, hem tokbaot Jehova, mo i mekem ol giaman tijing blong ol lida blong skul long taem ya, oli kamaot long klia ples. (Jon 8:12-30) Tede, i gat plante giaman tijing long saed blong God. Taswe, samting we Jisas i talem long taem ya, i tijim yumi se yumi mas luklukgud long ol tijing ya. Hem i talem se: “Sipos yufala i obei long ol tok ya blong mi, yufala i prapa man blong mi. Nao bambae yufala i save trutok, mo trutok ya bambae i mekem yufala i fri man.”—Jon 8:31, 32.

Taem Jisas i talem se, “sipos yufala i obei long ol tok ya blong mi,” hem i soemaot se yumi mas skelem wan tijing blong luksave sipos hem i “trutok.” Taem yu harem wan tijing long saed blong God, i gud yu askem se, ‘?Tijing ya i laenap wetem ol tok blong Jisas, mo olgeta tok blong Baebol?’ I gud yu mekem olsem ol man we Pol i stap toktok long olgeta. Olgeta ya ‘oli stap ridimgud ol tok blong Baebol, blong faenemaot se ol tok blong hem i tru no i no tru.’—Ol Wok 17:11.

Marco, Rosa, mo Raymonde, we yumi tokbaot finis, oli jekem gud bilif blong olgeta, taem oli stadi Baebol wetem ol Witnes blong Jehova. ?Wanem tingting blong olgeta long ol samting we oli lanem?

Marco: “Man we i mekem Baebol stadi long mi mo woman blong mi, i yusum Baebol blong ansa long ol kwestin blong mitufala. !Mitufala i stat blong lavem Jehova, mo mitufala i kam klosap moa long mitufala!”

Rosa: “Fastaem, mi ting se Baebol, i wan buk blong man nomo we i talemaot tingting we ol man oli gat long God. Be biaen, mi luk se Baebol i givim ansa long plante kwestin we mi mi gat. Naoia mi kasem save se Jehova i rili stap. Hem nomo we mi save trastem.”

Raymonde: “Mi mi prea long God blong mi save hem. Smoltaem afta, mi mo man blong mi, mitufala i stat blong stadi long Baebol. !Mitufala i lanem trutok long saed blong Jehova! Mitufala i glad tumas blong faenemaot se God i kaen tumas.”

Baebol i mekem ol giaman tijing ya, oli kamaot long klia ples, be i no hemia nomo. Hem i talem stret ol gudfala fasin blong God tu. Baebol i Tok blong God mo hem i givhan long yumi blong ‘save olgeta samting we God i givim long yumi.’ (1 Korin 2:12) Plante man oli stap askem plante kwestin long saed blong God, stamba tingting blong hem, mo long saed blong fiuja blong yumi. ?Olsem wanem? ?Yu tu yu wantem save ansa we Baebol i givim long ol impoten kwestin ya? Yu save go long “Ol Baebol Tijing > Baebol i Ansa” long www.jw.org. Sipos yu wantem stadi long Baebol yu save go long websaet blong askem wan Baebol stadi, no maet yu askem long wan Witnes blong Jehova. Mifala i gat strong tingting se, sipos yu mekem olsem, bambae yu luk se i isi nomo blong lavem God.