?Setan i Rili Stap?
Ansa we Baebol i givim
Yes, Setan hem i rili stap. Hem nao i “rula blong wol ya.” Hem i wan spirit we i kam nogud mo i rebel agensem God. (Jon 14:30; Efesas 6:11, 12) Long Baebol, i gat ol defren nem blong Setan we oli soemaot ol fasin blong hem:
Setan, we i minim “Man Blong Agens.”—Job 1:6.
Devel, we i minim “Man Blong Spolem Nem Blong Narafala.”—Revelesen 12:9.
Snek, we Baebol i yusum blong minim “Man Blong Trikim Man.”—2 Korin 11:3.
Man Blong Traem Man.—Matiu 4:3.
Man Blong Giaman.—Jon 8:44.
Setan i no wan rabis fasin blong man
Sam man oli ting se Devel Setan i wan rabis fasin we i stap insaed long yumi. Be i gat wan stori long Baebol we i tokbaot se God i toktok long Setan. God i stret gud olgeta, taswe yumi no save talem se hem i stap toktok long wan rabis fasin we i stap insaed long hem. (Dutronome 32:4; Job 2:1-6) Mo tu, Setan i bin traem blong pulum Jisas we hem i no gat sin nating. (Matiu 4:8-10; 1 Jon 3:5) Taswe, Baebol i soemaot klia se Devel Setan i no wan rabis fasin, be hem i rili stap.
Plante man oli no bilif se Setan i rili stap. ?Samting ya i mas mekem yumi sapraes? Nogat, from we Baebol i talem se Setan i yusum eni kaen trik blong kasem samting we hem i wantem. (2 Tesalonaeka 2:9, 10) Wan long ol bigfala trik blong hem, hemia blong blaenem tingting blong ol man nao oli ting se hem i no stap.—2 Korin 4:4.
Sam moa rong tingting long saed blong Setan
Giaman tingting: Lucifer i narafala nem blong Devel Setan.
Samting we i tru: Hibru tok ya we sam Baebol i tanem i kam “Lucifer,” i minim man we i ‘saen gud.’ (Aesea 14:12) Ol vas raonabaot long wod ya i soemaot se toktok ya i minim king blong Babilon, we God bambae i mekem hem i sem from hem i praod tumas. (Aesea 14:4, 13-20) Tok ya ‘man we i saen gud’ i wan tok we oli yusum blong jikim king blong Babilon afta we gavman blong hem i lus.
Giaman tingting: Setan i wok blong God olsem ‘jaj blong jajem ol man.’
Samting we i tru: Devel Setan i no man blong wok blong God, be i enemi blong hem. Mo hem i agensem ol man we oli mekem wok blong God, mo i talem ol giaman poen agensem olgeta.—1 Pita 5:8; Revelesen 12:10.