?Olsem Wanem Blong Save Nem Blong God?
WAN woman blong raetem niuspepa i kasem leta ya long wan man we i ridim niuspepa blong hem: “Long olgeta yia blong laef blong mi, mi bin tingting dip long wan kwestin. Mi hop se yu yu save ansarem kwestin ya: ?Wanem nem blong God? Ol man Jiu oli talem se prapa nem blong God i lus long ol yia we oli pas. Ol Kristin oli singaot Hem se Jisas. Ol Muslim oli singaot Hem se Allah. . . . ?Wanem nao trufala nem blong God?” Oli putum leta blong man ya long niuspepa, mo oli raetem wan ansa i gobak long hem, se: “Folem tijing blong ol Hibru man bifo, God i gat olgeta paoa, ale i no gat wan nem we i naf blong eksplenem Hem. Be mi promes long yu se Hem (nating se hem i Man no Woman) bambae i ansa long wanem nem we yu yu yusum blong singaot hem wetem respek.”
Plante man tede oli gat sem tingting olsem woman blong raetem niuspepa ya, oli no tingting dip long nem blong God. Plante we oli bilif long Baebol oli no tingbaot nem blong God plante, nating se oli go long jos oltaem. ?Be, wanem tingting blong God long bisnes ya? ?Hem i ting se nem blong hem i impoten no nogat?
I No Wan Smol Samting
Tingbaot se Baebol i talem prapa nem blong God, Jeova, plante taosen taem. !Long New World Translation of the Holy Scriptures, nem blong God i stap 7,210 taem!a God nao i pulum ol man we oli raetem Baebol blong yusum nem blong hem plante. Wan long ol man ya, Asaf, we hem i raetem plante Sam, hem i talem se: ‘Yu, we nem blong yu Jeova, yu nomo yu Hae God long olgeta ples blong wol.’ (Ol Sam 83:18, NW ) Deved tu i raetem wan Sam we i talem se: “Bambae yumi tokbaot nem blong God ya blong yumi, Jeova.”—Ol Sam 20:7, NW.
Baebol i soem se Jeova God i stap lukluk hat blong man blong faenemaot tingting blong yumi long saed blong nem blong hem. Wan man blong raetem Ol Sam i talem se: “Sipos yumi fogetem finis nem blong God blong yumi, . . . God bambae i faenemaot samting ya, from we hem i save ol tingting we oli stap haed long hat blong man.” (Ol Sam 44:20, 21, NW ) Profet Aesea i raetem se: “Yufala i talem tangkiu long Jeova. Yufala i singaot long nem blong hem. Yufala i talemaot ol fasin blong hem long ol laen blong man. Yufala i talemaot samting ya: se ol man oli mas leftemap nem blong hem.”—Aesea 12:4, NW.
God hem wan i talem se: “Bambae oli mas savegud we nem blong mi, hem i Jeova.” (Jeremaea 16:21, NW ) Long wan narafala taem, hem i talem se: “Hae nem blong mi i tabu we i tabu, be yufala i spolem long fes blong olgeta man. Be taem mi soemaot nem ya blong mi long ol man blong ol narafala kantri, bambae olgeta oli savegud we mi mi Hae God [“Jeova,” NW ].” (Esikel 36:23) Sam long ol vas ya oli tokbaot wan taem we bambae Jeova i soemaot kros blong hem long ol man we oli no ona long nem blong hem. Yes, yumi luk se prapa nem blong God i no wan smol samting long tingting blong hem.
Jeova i No Stap Longwe Long Yu Nating
?Yu yu mas mekem wanem blong save nem blong God? ?Yumi save kasem wanem frut sipos yumi save nem blong God? Baebol i ansa se: “Olgeta we oli save [“nem blong,” NW ] yu, oli trastem yu.” (Ol Sam 9:10) I klia se blong save nem blong God, i no naf we yu save nomo se nem blong hem hem i Jeova. Nogat. Yu yu mas trastem hem. Hemia i min se yu mas savegud God, wetem ol fasin mo tingting blong hem. Samting ya bambae i pulum yu blong trastem hem.
I gat wan rod nomo blong save Jeova God. Yu mas ridim Baebol mo stadigud long hem. Jeova i promes blong lukaotgud long olgeta we oli lavem hem mo oli lavem nem blong hem tu. Long saed blong man we i mekem olsem, God i talem se: “Mi bambae mi sevem olgeta we oli save we mi mi Hae God [“oli save nem blong mi,” NW ]. Sipos oli singaot long mi, mi bambae mi ansa long olgeta, mo sipos oli stap long trabol, mi bambae mi stap wetem olgeta. Mi bambae mi tekemaot olgeta long trabol, mi leftemap olgeta, mi givim hae nem long olgeta. Mi bambae mi sevem olgeta, mi givim longfala laef long olgeta, olsem pei blong olgeta.”—Ol Sam 91:14-16.
!Jeova God i frengud wetem olgeta we oli singaot hem long nem blong hem! Yu tu yu save frengud wetem hem. Taem yu prea wetem fulhat blong yu, yu no mas fraet blong yusum nem blong hem. Hem bambae i ansa long prea blong yu, from we Baebol i talem se: “God ya i no stap longwe long yumi nating.”—Ol Wok 17:27.
[Futnot]
a New World Translation of the Holy Scriptures we ol Witnes blong Jeova oli wokem, hem i toktok long fasin we ol man oli yusum tede, hem i no yusum ol olfala tok we plante Baebol oli yusum. Bigfala samting long Baebol ya, se i gat nem blong God i stap long evri ples we hem i mas stap. Oli wokem finis 122 milian kopi blong Baebol ya long 45 lanwis. Long sam lanwis, oli wokem Baebol ya fulwan, mo long sam narafala lanwis oli wokem haf blong hem nomo.
[Bokis/Foto blong pija long pej 11]
God i Save Nem Blong Yu
God i talem long Moses se: “Mi mi save nem blong yu.” (Eksodas 33:12, NW ) Wan stori we i soemaot gud samting ya, hemia stori ya we plante man oli save long hem long saed blong tri ya we faea i laet long hem. Baebol i talem se God “i singaot long [Moses], we tok blong hem i kamaot long medel blong tri ya, i talem se, ‘!Moses! !Moses!’ ” (Eksodas 3:4) I gat plante narafala stori long Baebol tu we oli soemaot se God i yusum prapa nem blong man taem i toktok long hem. Yes, i klia se Man We i Wokem heven mo wol i save yumi wanwan.
Baebol i talem se God i save nem blong olgeta sta long skae evriwan. (Aesea 40:26) !Hem i mas save moa ol man we oli mekem wosip long hem! Aposol Pol i raetem se: “Hae God, hem i save finis ol man blong hem.” (2 Timoti 2:19) Hemia i no minim nomo se hem i holem nem blong yumi i stap long tingting blong hem. Nogat. God i save evri samting long saed blong ol man we oli mekem wosip long hem. Taswe, yumi tu, yumi mas yusum nem blong God mo savegud ol fasin blong hem.
Laswan buk long Baebol i tokbaot wan buk blong God, olsem wan pijatok nomo. Long buk ya, hem i raetem nem blong olgeta man we oli mekem wosip long hem long ol yia we oli pas finis. Nem blong buk ya, ‘buk blong laef,’ from we Jeova bambae i givim laef we i no save finis long ol man we nem blong olgeta i stap long buk ya. (Revelesen 17:8) Hemia wan gud nius long ol man we oli singaot God long nem blong hem.
[Bokis blong pija long pej 12]
Oli Talemaot Nem Blong God
● Singsing blong Moses jes bifo we Isrel i go insaed long Promes Lan: ‘Bambae mi mi talemaot nem blong [“Jeova,” NW ].’—Dutronome 32:3.
● Tok we Deved i talem long bigfala man ya Golaeat: “Mi mi kam blong faet long yu long nem blong [“Jeova,” NW ].”—1 Samuel 17:45.
● Tok we Job i talem nating se hem i lusum olgeta samting blong hem mo olgeta pikinini blong hem: “Mi mi presem nem blong [“Jeova,” NW ].”—Job 1:21.
● Aposol Pita i yusum tok ya we i kamaot long Hibru hanraet: “Olgeta man we oli singaot mi long nem blong mi [“Jeova,” NW], mi bambae mi sevem olgeta.” —Ol Wok 2:21.
● Profet Aesea i talem se: “Yufala i talem tangkiu long Jeova. Yufala i singaot long nem blong hem. . . . Yufala i talemaot samting ya: se ol man oli mas leftemap nem blong hem.”—Aesea 12:4, NW.
● Jisas Kraes i tijim ol disaepol blong hem long fasin blong prea: “Taem yufala i prea bambae yufala i prea olsem. ‘Papa blong mifala. Yu yu stap long heven. Nem blong yu i tabu.’ ”—Matiu 6:9, 10.
● Jisas Kraes i prea long God se: “Mi mi stap talemaot nem blong yu.”—Jon 17:6.
● God i toktok long ol man blong hem se: “!Mi nomo mi [“Jeova,” NW]! !Hemia nao nem blong mi! Bambae ol man oli no mas leftemap nem blong narafala god.”—Aesea 42:8.