Stadi 6
?Wanem Ya Kingdom Blong God?
?Kingdom blong God i stap wea? (1)
?Hu ya King blong Kingdom ya? (2)
?I gat sam narafala man we oli joen blong rul wetem King ya? ?Sipos yes, hamas man bambae oli rul? (3)
?Wanem samting i soem se yumi stap long ol las dei? (4)
?Kingdom blong God bambae i mekem wanem blong givhan long ol man long fyuja? (5-7)
1. Taem Jisas i stap long wol, hem i tijim ol man blong hem blong prea from Kingdom blong God. Wan kingdom, hem i wan gavman we wan king i lida blong hem. Kingdom blong God i wan spesel gavman. Hem i stanap long heven, mo bambae hem i rul antap long wol ya. Bambae hem i leftemap nem blong God, mo mekem i tabu. Bambae hem i mekem ol samting we God i wantem oli kamaot long wol ya, olsem we oli kamaot finis long heven.—Matyu 6:9, 10.
2. Long taem bifo, God i promes se bambae Jisas i kam King blong Kingdom ya blong Hem. (Luk 1:30-33) Taem Jisas i stap long wol ya, hem i pruvum se bambae hem i kam wan nambawan King, from we hem i kaengud, hem i mekem stret fasin, mo hem i no gat sin. Taem hem i gobak long heven, hem i no kam King long Kingdom blong God wantaem nomo. (Hibrus 10:12, 13) Long 1914, Jeova i givim paoa long Jisas, we Hem i promes finis blong givim. Stat long taem ya, Jisas i rul long heven olsem King we Jeova i jusumaot.—Daniel 7:13, 14.
3. Jeova i jusum sam narafala man mo woman long wol ya we oli stap tru long Hem, blong oli go long heven tu. Bambae oli rul wetem Jisas olsem ol king, jaj, mo pris, antap long olgeta man. (Luk 22:28-30; Revelesen 5:9, 10) Jisas i singaotem ol man ya we bambae oli rul wetem hem long Kingdom blong hem, se ‘smol kampani.’ Namba blong olgeta ya, hemia 144,000 man.—Luk 12:32; Revelesen 14:1-3.
4. Taem Jisas i kam King, wantaem nomo hem i sakem Setan mo ol rabis enjel blong hem oli aot long heven oli kamdaon long wol. Taswe, ol samting oli kam nogud olgeta long wol ya, stat long 1914. (Revelesen 12:9, 12) Ol faet, kakae i sot, ol sik, mo fasin blong brekem loa, oli kam antap—olgeta samting ya oli mekemap wan “saen” we i soemaot se Jisas i stap rul, mo se ol rabis fasin blong wol ya oli kasem las dei blong olgeta.—Matyu 24:3, 7, 8, 12; Luk 21:10, 11; 2 Timote 3:1-5.
5. I no longtaem, bambae Jisas i jajem ol man, mo i seraotem olgeta, olsem man blong lukaot long sipsip i seraotem ol sipsip long ol nani. Ol “sipsip,” hemia olgeta we oli bin soemaot se oli ol man we oli stap tru mo obei long hem. Bambae oli kasem laef we i no save finis long wol ya. Ol “nani,” hemia olgeta we oli sakemaot Kingdom blong God. (Matyu 25:31-34, 46) Kolosap nao, bambae Jisas i spolem olgeta man we oli gat fasin olsem nani. (2 Tesalonaeka 1:6-9) Sipos yu yu wantem stap olsem wan “sipsip” blong Jisas, yu mas lesin long mesej blong Kingdom mo mekem ol samting we yu lanem.—Matyu 24:14.
6. Naoia, wol i seraot long plante defren kantri. Evriwan oli gat prapa gavman blong olgeta. Plante taem, ol kantri oli stap faet agens long ol narafala kantri. Be Kingdom blong God bambae i tekem ples blong olgeta gavman ya blong man. Bambae hem nomo i rul, olsem wan gavman nomo antap long ful wol. (Daniel 2:44) Ale, bambae i no moa gat ol faet, fasin blong stil mo brekem loa, mo raf fasin. Olgeta man bambae oli laef tugeta long pis, mo oli joengud.—Maeka 4:3, 4.
7. Long Wan Taosen Yia Rul blong Jisas, olgeta man we oli stap tru long God bambae oli kam stretgud olgeta, mo ful wol ya bambae i kam wan paradaes. Long en blong wan taosen yia ya, bambae Jisas i finisim olgeta wok we God i bin askem hem blong mekem. Long taem ya, bambae hem i givim Kingdom i gobak long Papa blong hem. (1 Korin 15:24) I gud we yu storeyan wetem sam fren mo famle blong yu, long olgeta samting we Kingdom blong God bambae i mekem.
[Tok blong pija long pej 12]
Taem Jisas i rul, bambae i no moa gat man we i no laekem narafala, mo man we i agensem narafala we i defren long hem