Ol Las Dei—?Blong Wanem?
MAET yu luk wan saen long windo blong wan stoa, we i talem se: “Ol Las Dei.” Ating kwiktaem nomo yu kasem save long mining blong saen ya. Hem i save minim se klosap janis i finis blong pem samting we stoa i daonem praes blong hem. Sipos no, saen ya i save minim se stoa ya bambae i finis, mo bambae oli no moa mekem bisnes long ples ya. ?Be olsem wanem sipos wan man i talem long yu se yumi stap naoia long ol las dei? ?Wanem mining blong tok ya?
Longtaem finis i kam, ol man oli yusum tok ya “ol las dei” mo “taem blong en.” (2 Timoti 3:1, NW; Daniel 12:4, NW) Bitim 2,500 yia bifo, God i givim sam vison long profet Daniel long saed blong ol politik paoa blong wol, mo ol faet we bambae oli kamaot bitwin ol politik paoa ya long “taem blong en.” Mo God i talem long Daniel se mining blong ol vison ya bambae i kam klia long taem blong en. (Daniel 8:17, 19, NW; 11:35, 40, NW; 12:9, NW) Mo tu, Daniel i raetem se: “Long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”—Daniel 2:44.
Taem Jisas Kraes i ansarem kwestin long saed blong “saen [we] bambae i soemaot we [hem i] stap mo we hemia lashaf blong fasin blong laef long wol ya,” hem i yusum tok ya “en.” (Matiu 24:3-42, NW) I klia se Daniel mo Jisas tugeta i stap tokbaot samting we bambae i finis—wan bigfala jenis we bambae i kamaot, mo bambae i gat paoa long ol man we oli laef naoia mo we oli bin laef bifo. Daniel i tokbaot en blong ol gavman blong wol. Jisas i tokbaot “lashaf blong fasin blong laef long wol ya.”
?Olsem wanem? ?Yu yu mas tingbaot samting ya? Yes. Olgeta man oli mas tingbaot, from we jenis ya bambae i gat paoa long yumi evriwan. Nating se i olsem, plante man oli no tinghevi long bisnes ya. Baebol i talem se: “Long taem blong [“ol las dei,” NW], bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf . . . , oli talem se, ‘?Olsem wanem nao? ?Hem i promes finis blong kam, be hem i stap wea? Ol olfala blong yumi oli lus evriwan finis, be i no gat wan samting i jenis. I stat bifo olgeta, taem we God i mekem wol ya fastaem, i kam kasem tede, evri samting oli stap sem mak nomo.’” (2 Pita 3:3, 4) Yes, samfala tede oli ting se ol semfala samting oli kamaot bakegen mo bakegen taem ol yia oli stap pas, mo se laef bambae i gohed olsem nomo, bambae i neva save jenis.
?Olsem wanem? ?I gat sam samting blong soemaot se yumi rili stap long taem ya we Baebol i kolem ol las dei? Bambae yumi luk.
[Credit Line long pej 3]
© Jacob Silberberg/Panos Pictures