Stori 10

Bigfala Wota i Draonem Wol

AFSAED long bigfala sip, ol man oli gohed blong mekem ol semfala samting evri dei, olsem bifo. Oli no bilif se Bigfala Wota bambae i ron. Ating oli laf moa naoia, i bitim fastaem. Be i no longtaem, oli no moa laf.

Wantaem nomo, ren i kam. Ren i foldaon olsem wota we yu kafsaedem long wan baket. !Tok blong Noa i tru! Be naoia i let tumas, ol man oli no moa save kam insaed long bigfala sip. Jeova i satem doa finis.

I no longtaem, wota i kavremap olgeta flat ples. Hem i ron olsem ol bigfala reva. Hem i wasemaot ol tri mo i tantanem ol bigfala ston. Wota ya i mekem plante noes. Ol man oli fraet tumas. Oli klaem i go antap long ol hil. !Naoia oli sore tumas we oli no bin lesin long Noa! !Sipos oli bin kam insaed long bigfala sip ya taem doa i open i stap, bambae oli sef! Be naoia, i let tumas.

Wota i stap kam antap moa. Ren ya i gohed blong 40 dei mo 40 naet. Wota i draonem evri ples gogo, i kavremap ol bigbigfala hil evriwan. Olsem God i talem, olgeta man mo anamol we oli stap afsaed long bigfala sip oli ded. Be olgeta we oli stap insaed oli sef.

Noa mo ol pikinini blong hem oli bin wokem gud sip ya. Taem wota i kam antap, sip i flot gud. Ale, wan dei, ren i stop, mo san i kam antap. !Ples i defren we i defren! Wota i stap long evri ples. I gat wan samting nomo i no draon, hemia bigfala sip blong Noa.

Ol bigbigfala man oli no moa stap. Bambae oli no moa save kilim mo spolem ol man. Olgeta ya oli ded, wetem ol mama blong olgeta, mo ol narafala man nogud. ?Be wanem i hapen long ol papa blong olgeta?

Ol papa blong ol bigbigfala man ya oli no man blong wol ya. Olgeta ya oli enjel we oli kamaot long heven blong laef olsem ol man blong wol. Taswe taem Bigfala Wota i draonem wol, oli no ded wetem ol narafala man. Oli jenisim bodi blong olgeta bakegen, nao oli gobak long heven olsem ol enjel. Be God i no moa letem olgeta oli joen long famle blong ol enjel blong hem. Taswe oli kam ol enjel blong Setan. Baebol i kolem olgeta se ol devel.

Nao, God i mekem wan win i blu, mo Bigfala Wota ya i stat godaon. Faef manis biaen, sip blong Noa i fas antap long wan bigfala hil. Afta we plante moa dei i pas, olgeta insaed long sip ya oli save lukluk top blong ol bigfala hil. Wota i stap godaon sloslo.

Ale Noa i tekem wan blak pijin we nem blong hem reven, i letem hem i flae i go. Pijin ya i flae olbaot afsaed be hem i no save faenem wan ples blong sidaon, ale i flae i kambak long sip. Hem i mekem samting ya plante taem, be evri taem hem i flae i kambak.

Smoltaem biaen, Noa i traem save bakegen sipos wota i kam drae, ale hem i tekem wan sotleg, i letem hem i flae i go. Be sotleg ya tu i kambak from we hem i no save faenem wan ples blong sidaon. Smoltaem moa, Noa i sanemaot sotleg ya bakegen, nao sotleg ya i kambak we i karem wan lif blong olif tri long maot blong hem. Noa i save nao se wota ya i godaon finis. Namba tri taem, Noa i letem sotleg ya i goaot bakegen, mo long taem ya, pijin ya i faenem wan drae graon blong sidaon long hem.

Nao God i toktok long Noa, i se: ‘Yu kamaot long bigfala sip ya. Yu karem famle blong yu mo olgeta anamol tu oli kamaot.’ Oli bin stap bitim wan yia insaed long sip ya. !Tingbaot olsem wanem oli glad blong kam afsaed bakegen, mo blong stap laef!

Jenesis 7⁠:​10-24; 8⁠:​1-17; 1 Pita 3⁠:​19, 20.