Stori 8
Ol Bigbigfala Man Long Wol
?SIPOS wan man i stap wokbaot i kam, mo man ya i longfala we hed blong hem i tajem ruf blong haos, bambae yu tingting olsem wanem? !Man ya i wan bigbigfala man! Long taem bifo, i gat sam bigbigfala man long wol ya. Baebol i talem se ol papa blong olgeta oli enjel. ?Be olsem wanem samting ya i save hapen?
Tingbaot we, nogud enjel ya Setan i stap hadwok blong mekem plante trabol. Hem i stap traem blong pulum ol enjel blong God tu oli kam nogud. Sloslou, sam enjel oli lesin long Setan. Oli no moa mekem wok ya we God i givim long olgeta long heven. Oli kamdaon long wol, mo oli jenisim bodi blong olgeta i kam olsem bodi blong ol man. ?Yu yu save from wanem oli mekem samting ya?
Baebol i talem se hemia from we ol pikinini ya blong God oli luk ol naesfala woman long wol ya mo oli wantem stap wetem olgeta. Taswe oli kamdaon long wol mo oli maredem ol woman ya. Baebol i talem se samting ya i nogud, from we God i wokem ol enjel blong oli laef long heven, i no long wol ya.
Taem ol enjel ya mo ol woman blong olgeta oli gat pikinini, ol pikinini ya oli narakaen. Taem oli smol, oli no defren tumas. Be biaen, oli gru gogo oli kam bigwan tumas, mo oli strong we oli strong. Yes oli kam ol bigbigfala man we oli dabolbun.
Ol bigbigfala man ya oli nogud tumas. Mo from we oli big mo oli strong tumas, oli stap kilim ol man. Oli traem fosem evriwan blong oli kam nogud olsem olgeta ya.
Inok i ded finis, be i gat wan narafala gudfala man long wol ya. Nem blong hem, Noa. Oltaem, hem i mekem samting we God i wantem hem blong mekem.
Wan dei, God i talem long Noa se bambae hem i spolem ol nogud man. Be bambae God i sevem Noa mo famle blong hem wetem plante anamol. Bambae yumi luk olsem wanem God i mekem samting ya.