Stori 109

Pita i Go Luk Konilias

MAN we i stap stanap long pija ya, hemia aposol Pita. Mo tufala man we tufala i stanap biaen long hem, hemia tufala fren blong Pita. ?Be from wanem man ya i stap bodaon long Pita? ?I stret we hem i mekem olsem? ?Man ya, hem i hu?

Hem i Konilias, wan kapten blong ami blong Rom. Hem i no save Pita, be wan man i bin talem long hem se hem i mas singaot Pita i kam long haos blong hem. Bambae yumi luk olsem wanem samting ya i hapen.

Ol faswan man blong Jisas, oli man Isrel. Be Konilias i no wan man Isrel. Nating se i olsem, hem i laekem God, i stap prea long God, mo hem i mekem plante gudfala samting blong givhan long ol man. Wan dei, long aftenun, wan enjel i kamtru long hem, i talem long hem se: ‘God i glad long yu, mo bambae hem i ansa long ol prea blong yu. Naoia yu mas sanem sam man oli go long Jopa, blong oli singaot wan man i kam long ples ya. Man ya, nem blong hem Pita. Hem i stap wetem wan man, we nem blong hem Saemon. Haos blong hem i stap daon, klosap long solwota.’

Wantaem nomo, Konilias i sanem sam man oli go blong faenem Pita. Long nekis dei, long medel dei, taem ol man ya oli stap yet long rod, we klosap oli gotru long Jopa, Pita i go antap long ruf blong haos blong Saemon, blong spel smol. Long ples ya, God i mekem hem i luk wan samting olsem drim. Hem i luk wan bigfala tapolen i kamaot long heven, i stap kamdaon long wol. Insaed long hem, i gat ol naranarafala anamol blong wol oli stap. Loa blong God i putum tabu long ol anamol ya, se oli no klin long fes blong God, ale ol man oli no mas kakae olgeta. Be Pita i harem wan tok we i talem long hem se: ‘Pita. Yu girap, yu kilim wan long ol samting ya, yu kakae.’

Pita i talem se: ‘!Nogat! Neva mi mi kakae wan samting we i no klin long fes blong yu.’ Nao hem i harem wan tok i kamaot bakegen, i se: ‘Samting we mi God mi talem finis se i klin, yu no save talem se i no klin.’ Ol samting ya i kamaot tri taem. Taem Pita i stap tingting yet long mining blong ol samting ya we hem i luk, ol man ya we Konilias i sanem olgeta, oli kamtru long haos blong Saemon, nao oli singaot Pita.

Pita i godaon, mo i talem long olgeta se: ‘Mi nao man ya we yufala i stap lukaot. ?Yufala i wantem mi from wan samting?’ Ol man ya oli talem se wan enjel blong God i kamtru long Konilias, i talem long hem blong i singaot Pita i kam long haos blong hem. Ale Pita i agri blong go wetem olgeta. Long nekis dei, oli aot blong go luk Konilias long Sisaria.

Konilias wetem ol famle blong hem mo ol fren we hem i singaot olgeta, oli stap wet long Pita. Taem Pita i kamtru, Konilias i foldaon long leg blong hem, blong i mekem wosip long hem, olsem yu luk long pija ya. Be Pita i talem long hem se: ‘No, yu stanap. Mi tu mi man nomo.’ Yes, Baebol i soem se i no stret blong bodaon long wan man blong mekem wosip long hem. Yumi mas mekem wosip long Jeova nomo.

Nao Pita i stap stori long ol man we oli hivap long haos blong Konilias, i se: ‘Mi mi luk we God i glad long olgeta man we oli wantem mekem wok blong hem, nomata wanem laen ol man ya oli kamaot long hem.’ Taem Pita i stap toktok yet, God i sanem tabu spirit i kamdaon, nao ol man ya oli stat toktok long ol narafala lanwis. Ol disaepol we oli kam wetem Pita, we oli man Isrel, oli sapraes long samting ya, se God i givim tabu spirit long ol man ya we oli no laen blong Isrel. Oli ting se God i glad long ol man Isrel nomo. Be naoia oli kasem save se long ae blong God, i no gat wan laen we i moa gud no i moa impoten i bitim narafala laen. God i mekem i sem mak long olgeta man. I gud yumi evriwan i mekem samting ya.

Ol Wok 10:​1-48; 11:​1-18; Revelesen 19:10.