Wan Man Afrika We i Gat Tingting Daon i Laekem Tok Blong God
PLANTE taem, ol Witnes we oli go long Afrika oli sapraes blong faenem se i isi nomo blong statem wan storian long Baebol wetem ol manples. Ol kwestin olsem, “?Wanem ya Kingdom blong God?” no “?I gat wan samting we i save finisim ol trabol olsem kakae i sot, sik, faet mo raf fasin?” i pulum tingting blong man blong lesin. Plante man oli glad blong letem wan narafala i soem long olgeta wanem ansa we Baebol i givim long ol kwestin ya. Plante taem, samting ya i lidim man blong stadi Baebol. Mo taem ol studen ya oli gohed gud long saed blong spirit, oli tekem baptaes blong kam Kristin.
Ol Wok 8:26-40 i tokbaot wan long ol faswan man Afrika we i mekem olsem. Hem i wan man Itiopia we i go long Jerusalem blong mekem wosip long trufala God ya, Jeova.
Olsem pija we i stap daon i soem, man Itiopia ya i sidaon long kat blong hem blong gobak long ples blong hem mo i stap ridim buk blong profet Aesea. Wan strenja i kam klosap long hem mo i askem long hem se: “?Olsem wanem? ?Yu yu save mining blong tok ya we yu stap ridim?” Wetem tingting daon, man Itiopia ya i talem long strenja ya se hem i nidim we wan i givhan long hem. Hem i talem long strenja ya, Kristin man ya blong prij, we nem blong hem Filip, se i jam long kat wetem hem. Ale, hem i askem long Filip blong eksplenem long hem mining blong tok blong Baebol we hem i jes ridim. Filip i eksplenem se hemia wan profet tok we i kamtru long saed blong ded blong Mesaea, Jisas Kraes. Filip i talemaot sam narafala samting moa long saed blong ‘gud nius long saed blong Jisas,’ mo i sua se maet hem i talemaot tu long man ya se God i mekem Jisas i laef bakegen.
Taem man Itiopia ya i harem ol nambawan trutok ya, hem i wantem kam wan disaepol blong Jisas mo i askem se: “?Wanem nao i blokem mi, blong mi no save baptaes?” Taem hem i baptaes finis, man Afrika ya we i gat tingting daon, i folem rod i gobak long ples blong hem we hem i glad tumas mo Baebol i no moa tokbaot hem bakegen.
Tede, ol Witnes blong Jeova oli halpem plante milian man raon long wol blong oli kasem semfala “gud nius ya.” Oli mekem klosap sikis milian Baebol stadi fri nomo long haos blong man.