Stori 113

Pol Long Rom

YU LUK ol jen we oli fasem Pol, mo soldia blong Rom we i stap gad long hem. Pol i stap kalabus long Rom. Hem i stap wet long disisen blong Sisa, hedgavman blong Rom, se bambae oli mekem wanem long hem. Taem hem i stap kalabus, oli letem ol man oli kam luk hem.

Tri dei afta we Pol i kasem Rom, hem i sanem toktok i go long sam lida blong ol man Isrel, blong oli kam luk hem. Nao plante man Isrel we oli stap long Rom, oli kam. Pol i stap prij long olgeta long saed blong Jisas mo kingdom blong God. Sam long olgeta oli bilif mo oli kam Kristin man, sam narafala oli no bilif.

Pol i prij tu long ol soldia we oli gad long hem. Blong tu yia we Pol i stap kalabus long ples ya, hem i prij long olgeta man we hem i luk olgeta. From samting ya, ol man long haos blong Sisa tu oli harem gud nius blong Kingdom, mo sam long olgeta oli kam Kristin.

Be yu traem talem: ?Hu ya man ya we i stap sidaon long tebol, i stap raetem leta? Yes, hemia Timoti. Timoti tu i bin stap long kalabus from we hem i talemaot Kingdom, be naoia hem i fri bakegen. Mo hem i kam blong givhan long Pol. ?Timoti i stap raetem wanem? Bambae yumi luk.

?Yu yu tingbaot tufala taon ya, Filipae mo Efesas, we yumi tokbaot long Stori 110? Pol i givhan blong stanemap kongregesen long tufala taon ya. Naoia, long kalabus, Pol i raetem leta i go long ol Kristin ya. Tufala leta ya i stap long Baebol, nem blong tufala Efesas mo Filipae. Long pija ya, Pol i stap talem long Timoti wanem tok we hem i mas raetem blong sanem i go long ol Kristin fren blong tufala long Filipae.

Ol Kristin long Filipae oli bin mekem i gud tumas long Pol. Oli sanem sam samting i kam long hem long prisen, nao hem i stap talem tangkiu long olgeta from. Oli sanem ol samting ya i kam wetem man ya Epafrodaetas. Be Epafrodaetas i kasem wan strong sik we klosap hem i ded from. Naoia hem i kamgud finis, mo hem i rere blong gohom. Hem nao i karem leta ya blong Pol mo Timoti i gobak long Filipae.

Taem Pol i stap kalabus, hem i raetem tu moa leta bakegen, we tufala i stap long Baebol. Wan long tufala i go long ol Kristin long taon ya Kolosi. ?Yu save nem blong buk ya long Baebol? Yes, Kolosi. Narafala leta, Pol i raetem i go long wan gudfala fren blong hem we i stap long Kolosi, nem blong hem Filimon. Long leta ya, Pol i tokbaot slef blong Filimon we nem blong hem Onesimas.

Onesimas i ronwe long Filimon i kam long Rom. Ating wan man i talem long hem se Pol i stap kalabus long Rom. Hem i kam luk Pol, nao Pol i prij long hem. I no longtaem, Onesimas tu i kam wan Kristin. Taem hem i kam wan Kristin, hem i sore we hem i bin ronwe long masta blong hem. ?Yu save wanem we Pol i talem, long leta we hem i raetem long Filimon?

Pol i askem long Filimon blong fogivim Onesimas. Hem i se: ‘Bambae mi sanem hem i kambak long yu bakegen. Be naoia, hem i no wan slef nomo, hem i moa long slef. !Hem i wan gudfala Kristin brata blong yumi!’ Taem Onesimas i gobak long Kolosi, hem i karem tufala leta blong Pol i go wetem hem. Hem i givim wan leta i go long ol Kristin long Kolosi, mo narawan, hem i givim long Filimon. Yumi save se Filimon i mas glad tumas taem hem i kasem nius se slef blong hem i kam wan Kristin finis.

Long tufala leta ya we Pol i raetem, hem i talem sam nius we i gud tumas. Hem i talem long ol Kristin long Filipae se: ‘Bambae i no longtaem, mi save sanem Timoti i kam luk yufala.’ Mo hem i talem long Filimon se: ‘Plis yu mekemrere wan rum long haos blong yu, blong mi save stap long hem.’

Taem Pol i kamfri long kalabus, hem i go luk ol Kristin brata sista blong hem long plante ples. Be biaen, Pol i kalabus bakegen long Rom. Long taem ya, hem i save se bambae oli kilim hem i ded. Taswe, hem i raetem leta i go long Timoti, i askem hem blong kam kwik. Pol i talem se: ‘Mi mi holemstrong long God kasem naoia, mo God bambae i givim blesing long mi from.’ Sam yia biaen, oli kilim Pol i ded. Mo ol soldia oli spolem Jerusalem bakegen. Be long taem ya, ol soldia blong Rom nao oli kam spolem taon ya.

I gat plante moa samting yet long Baebol. Jeova God i pulum aposol Jon blong raetem ol laswan buk blong Baebol wetem buk ya Revelesen. Revelesen i tokbaot fiuja blong yumi. Naoia, bambae yumi tokbaot fiuja.

Ol Wok 28:​16-31; Filipae 1:13; 2:​19-30; 4:​18-23; Hibrus 13:23; Filimon 1-25; Kolosi 4:​7-9; 2 Timoti 4:​7-9.