Wan Kwestin

?Yumi save mekem wan samting sipos wan tabu Kristin we i sik tumas i no save joen wetem kongregesen blong selebretem Lodsapa?

Yes. Yumi save mekem wan samting mo i impoten blong mekem wan samting, sipos wan tabu Kristin we i sik tumas no i mas stap long bed oltaem, i no save kam long miting taem kongregesen i selebretem Memoriol blong ded blong Kraes. Sipos i olsem, grup blong ol elda i save mekem plan wetem wan elda no wan narafala Kristin brata we i bigman long saed blong spirit, blong hem i tekem bred mo waen i go long tabu Kristin ya long naet blong Memoriol, afta we san i godaon.

I no wan rul, be maet elda ya no brata we i visitim tabu Kristin ya i save givim wan smol tok mo ridim ol vas long Baebol we i stret long taem ya. Maet hem i save folem eksampol we Jisas i givim taem Hem i stanemap Lodsapa. Brata ya i save ridim Matiu 26:26, mekem wan prea, mo givim bred we i no gat is long hem i go long tabu Kristin ya. Afta, maet brata ya i save ridim Matiu japta 26, vas 27 mo 28, mekem wan prea bakegen mo givim waen long tabu Kristin ya. Hem i save givim wan smol tok we i eksplenem mining blong bred mo waen, mo i stret blong i finis wetem wan prea.

I tru se, yumi evriwan i mas traehad blong kam long miting blong kongregesen blong selebretem Lodsapa. ?Be olsem wanem nao sipos wan tabu Kristin i sik bigwan, we maet i slip long hospital, no i gat wan narafala samting i blokem hem, mekem se hem i no save kakae bred mo dring waen long dei blong Memoriol, Nisan 14, afta we san i godaon? Tabu Kristin ya i save folem rul we i stap long Loa Blong Moses bifo, mo i save selebretem Lodsapa hem wan, 30 dei biaen.—Namba 9:9-14.