Ogenaesesen We i Mekem Wok Blong Jeova

Japta 11

Plan Long Saed Blong Ol Ples Blong Wosip

BAEBOL i talem long ol man blong wosip long trufala God Jeova se oli mas joen wanples blong kasem tijing mo blong leftemap tingting blong olgeta. (Dut. 31:12; Hib. 10:​23-25) Ol man Isrel oli ol man we God i jusum. Faswan haos wosip blong olgeta, hemia “Haos Tapolen.” (Eks. 39:​32, 40) Biaen, Solomon, pikinini blong Deved, i bildim wan tempol blong givim ona long God. (1 King 9:3) Afta we tempol ya i lus long yia 607 B.K.T., ol man Jiu oli joen long ol smosmol haos prea blong mekem wosip long God. Biaen, oli bildim tempol bakegen, mo i kam ples blong mekem trufala wosip bakegen. Jisas i tij long ol haos prea blong ol man Jiu mo long tempol tu. (Luk 4:16; Jon 18:20) Wan taem, Jisas i mekem miting long wan hil blong tijim ol man we oli biaen long hem.​—Mat. 5:​1–7:29.

Taem samfala oli tanem baksaed long trutok, ol disaepol blong Jisas oli seraot long olgeta, ale oli mekem miting blong olgeta long sam pablik ples. (Wok 19:​8, 9) Oli joen long haos blong sam man tu, blong kasem tijing long saed blong Baebol mo blong haremgud long kampani blong ol man we oli holem trufala bilif. (Rom 16:​3, 5; Kol. 4:15; Flm. 2) Taem samfala oli ronem mo kilim olgeta, oli mas mekem miting long wan ples we i haed no i longwe long ol man. Yes, ol man we oli holemstrong long God bifo, oli wantem tumas blong joen wanples long ol haos wosip blong letem “Jeova i tijim olgeta.”​—Aes. 54:13.

Tede tu, ol Kristin oli yusum haos blong sam man mo sam pablik ples blong mekem miting tugeta. Plante taem oli mekem Buk Stadi mo miting blong prij long haos blong wan man. Olgeta we oli letem haos blong olgeta blong mekem ol miting ya, oli luk se i wan ona blong gat miting long haos blong olgeta. Plante oli talem se samting ya i halpem olgeta tu long saed blong spirit.

HAOS KINGDOM

Prapa haos miting blong ol Witnes blong Jeova hemia Haos Kingdom. Long sam ples i moagud blong rentem wan haos miting i bitim we oli pem no bildim wan. Be plante kongregesen oli jusum blong pem wan graon mo bildim wan Haos Kingdom we i stret long nid blong olgeta. Sam kongregesen oli pem wan haos we i stap finis mo oli mekem i kam wan Haos Kingdom. Long taem olsem, i stret we oli mekem wan miting blong dediketem haos ya. Sipos oli mekem sam smosmol jenis nomo long wan Haos Kingdom we i stap finis, i no nid blong oli mekem wan miting blong dediketem haos ya bakegen.

Haos Kingdom i no wan haos we i flas tumas mo i mekem ol man oli sapraes, nogat. Long ol defren ples, maet ol Haos Kingdom oli defdefren, be oli wokem olgeta folem plan we i stret long ol wanwan ples. (Wok 17:24) Haos Kingdom i mas wan gudfala ples mo wan ples we i stret blong mekem ol Kristin miting long hem, mo hem i mas laenap wetem fasin blong bildim haos long ol wanwan ples.

Ol wanwan kongregesen blong ol Witnes blong Jeova oli pem Haos Kingdom blong olgeta. Oli no pasem plet i goraon blong ol man oli sakem mane, mo oli no askem mane long ol man. I gat wan bokis i stap blong putum presen mane long hem, mo olgeta we oli kam long ol miting oli gat janis blong givhan blong pem ol kaon long saed blong Haos Kingdom. Oli givim presen mane olsem oli wantem wetem gladhat. (2 Kor. 9:7) Ol elda oli kasem ol save long Kingdom Wok Blong Yumi, mo long ol leta mo advaes we i kam long branj ofis, long saed blong Haos Kingdom se i blong hu mo se yumi mas yusum olsem wanem.

Olgeta long kongregesen oli mas ting se i wan ona blong givim presen mane blong sapotem Haos Kingdom mo blong givim taem mo paoa blong olgeta blong klinim haos ya, fiksimap, mo mekem i naes. Insaed mo afsaed, Haos Kingdom i mas stret blong karem nem blong ogenaesesen blong Jeova. Oli save putumap wan elda no wan man blong givhan blong mekem wan lis evri wik blong ol wok we i nidim blong mekem, mo hem i save meksua se wok ya i finis. Klosap oltaem oli mekem plan se wanwan Buk Stadi i gat taem blong hem blong klinim Haos Kingdom, mo elda we i lukaot long ol buk stadi no brata we i givhan long hem i mas lidim wok ya.

Taem i gat moa long wan kongregesen we i yusum Haos Kingdom, ol elda blong ol kongregesen ya oli mas putumap wan Komiti Blong Meksua Se Evri Samting i Wokgud Long Haos Kingdom. Komiti ya i meksua se kongregesen i fiksimap ol samting we i brok long Haos Kingdom mo long yad blong hem. Ol elda long ol kongregesen ya oli putumap wan jeaman blong komiti ya. Komiti i wok aninit long han blong ol elda ya, blong jekemap se Haos Kingdom i klin oltaem, mo blong meksua se i no gat samting i brok mo se i gat naf tul blong klinim ples insaed mo afsaed. Komiti ya i mekem sem wok we wan elda no man blong givhan i mekem sipos wan kongregesen nomo i yusum Haos Kingdom. I nidim we olgeta kongregesen we oli yusum Haos Kingdom oli wokgud tugeta.

Taem plante kongregesen oli yusum Haos Kingdom, ol elda oli mekem program blong taem blong ol miting. Sipos ol kongregesen oli wantem folem plan blong jenisim taem blong ol miting, ol elda oli mas soem fasin blong tingbaot narafala mo lav, taem oli mekem program ya. (Fil. 2:​2-4; 1 Pita 3:8) Ol kongregesen nomo oli tekem desisen se bambae oli jenisim taem blong ol miting evri yia no afta we sam yia i pas nomo. Wan kongregesen i no mas tekem desisen blong ol narafala kongregesen long saed ya. Taem blong ol miting i mas jenis long faswan wik blong yia. Long wik we seket elda i visitim wan long ol kongregesen we oli yusum Haos Kingdom, ol narafala kongregesen bambae oli jenisim taem blong ol miting blong olgeta.

Sipos wan man i wantem yusum Haos Kingdom blong mekem tok blong mared no tok blong berem dedman, hem i save askem long Sevis Komiti. Ol elda ya bambae oli tokbaot bisnes ya mo tekem desisen folem advaes we branj ofis i givim.

Sipos Sevis Komiti i talem se wan man i save yusum Haos Kingdom blong mekem tok blong mared no tok blong berem dedman, fasin blong ol man we oli kam i mas gud, olsem i stret long wan ples blong trufala wosip. Oli no mas mekem wan samting we kongregesen i save harem nogud from, no sakem doti long Jeova no spolem gudnem blong kongregesen. (Fil. 2:​14, 15) Samtaem oli yusum Haos Kingdom blong mekem sam spesel kos we branj ofis i lidim, olsem Kingdom Ministri Skul no Paenia Skul.

Oltaem kongregesen i mas soem respek long haos miting blong olgeta. Klos, hea, mo fasin blong evriwan i mas soemaot se oli tinghae long wosip blong Jeova. (Pri. 5:1; 1 Tim. 2:​9, 10) Taem yumi folem advaes long saed ya, yumi soemaot se yumi gat tangkiu from ol Kristin miting.

Long ol miting long Haos Kingdom, sam brata we oli naf oli mekem wok ya blong welkamem ol man. Ol brata ya oli mas wekapgud long tingting blong olgeta, oli mas soem fasin fren, mo oli mas gat fasin luksave. Wok blong olgeta i blong sekhan long ol niuwan we oli kam long miting mo welkamem olgeta, mo tu, oli faenem jea blong olgeta we oli kam let, oli kaontem mo raetemdaon hamas man i stap long miting, mo oli meksua se ples i no hot tumas mo i no kolkol tumas. Taem miting i stap gohed, oli mas meksua se ples i kwaet mo i gat oda. I moagud we ol pikinini oli sidaon wetem papa mama blong olgeta. Taem wan pikinini i mekem noes, maet wan man blong welkam i askem wetem kaen fasin long papa no mama blong pikinini ya blong i tekem hem i go afsaed, olsem nao, hem i no blokem ol narafala we oli wantem lesin. Ol man blong welkam oli save pulum ol famle wetem ol smosmol pikinini blong oli sidaon long ol jea we i isi blong mama papa i tekem pikinini i go afsaed blong stretem hem no blong lukaot long narafala nid blong hem. Olsem nao bambae oli no blokem ol narafala we oli wantem lesin.

Fasin blong ol pikinini insaed mo afsaed long Haos Kingdom i save mekem se ol man oli tingting gud long kongregesen no oli tingting nogud long hem. Taswe, sipos i gat nid, ol man blong welkam oli mas mekem ol papa mama oli tingbaot se oli mas lukaotgud long ol pikinini blong olgeta, blong oli no resis insaed long Haos Kingdom no long yad bifo mo afta long ol miting. I klia se wok we ol man blong welkam oli mekem i givhan bigwan blong mekem se olgeta evriwan oli haremgud long ol miting. I moagud we ol man blong givhan oli mekem wok ya blong welkam, speseli olgeta we oli winim finis plante problem long famle.​—1 Tim. 3:12.

WOK BLONG BILDIM OL HAOS KINGDOM

Long plante kantri, i gat wan bokis long ol Haos Kingdom we oli makem nem blong hem se Presen Mane Blong Bildim Ol Haos Kingdom. Presen mane ya i blong bildim ol niufala Haos Kingdom mo blong fiksimap olgeta we oli kam nogud. Sipos i no gat ol presen mane ya, plante kongregesen bambae oli no naf blong mekem wok ya.

Long faswan handred yia, sam Kristin oli gat mane, samfala nogat. Taswe aposol Pol i raetem se: “Naoia, from we yufala i gat plante samting, i stret blong yufala i givhan long sam narafala man we oli sot. Nao sipos samtaem yufala i sot mo olgeta oli gat plante, bambae olgeta oli save givhan long yufala bakegen. Hemia i rod blong mekem i stret long olgeta man.” (2 Kor. 8:14) Tede yumi folem sem fasin. Haf blong Presen Mane Blong Bildim Ol Haos Kingdom i go long ol kantri we oli sot long plante samting, blong oli save bildim ol Haos Kingdom. Ogenaesesen blong Jeova mo ol kongregesen we oli kasem presen mane ya, oli talem bigfala tangkiu long kampani blong ol brata long fulwol we oli givim mane ya.

Long plante kantri, oli putumap ol Rijonal Bilding Komiti blong lukaot long wok ya blong bildim mo mekemgud bakegen ol Haos Kingdom. Wanwan komiti i gat prapa eria blong hem, ale hem i givhan long ol kongregesen long eria ya. Blong putumap komiti ya, oli jusum ol elda we oli savegud wok ya blong bildim haos, pem mo salem graon, oli bisnesman, olgeta oli save wok ya blong lukaot long ol kaon, mo sam narafala wok bakegen. Olgeta ya oli save givhan bigwan blong mekem wan projek i gohed gud, long stat blong hem go kasem en.

Sipos i gat wan Rijonal Bilding Komiti long eria blong yu, ol elda oli mas toktok wetem komiti ya bifo we oli statem wan projek long saed blong Haos Kingdom. Komiti ya i save givhan long kongregesen blong pem wan graon we i stret mo blong jusum wan stret plan mo fasin blong bildim Haos Kingdom. Komiti ya bambae i givim wok long ol volontia tu we oli glad blong givhan blong bildim haos ya. Blong sapotem plan ya, olgeta we oli naf mo oli wantem wok, oli save fulumap wan pepa blong ol volontia mo givim long Sevis Komiti blong kongregesen.

Taem i gat wan disasta, maet oli singaot sam Rijonal Bilding Komiti blong oli lukaot long wok blong mekemgud ol Haos Kingdom we oli brok mo maet haos blong sam brata tu. Maet oli sanem wan Rijonal Bilding Komiti i go long narafala kantri blong givhan long wok ya no blong trenem ol brata long kantri ya blong mekem wok ya. Sam samtaem oli save givhan blong bildim ol Haos Asembli mo branj ofis tu. Olgeta plan ya oli wokgud from we ol man blong God oli rere blong lego samting we olgeta nomo oli wantem blong mekem samting we God i wantem.​—Kol. 3:​23, 24.

I nidim plante moa Haos Kingdom, antap moa long ol kantri we oli no gat mane mo i no gat plante man we oli save wok ya blong bildim haos. Taswe, oli mekem ol Grup Blong Bildim Ol Haos Kingdom. Ol brata long ol grup ya oli glad nomo blong go long ol defren kongregesen long wan kantri blong lidim wok ya blong bildim ol Haos Kingdom. Hemia i mekem wok ya i spid moa mo i givim nambawan trening long ol lokol brata.

OL HAOS ASEMBLI

Klosap oltaem ol faswan Kristin oli mekem miting long ol smosmol grup. Be wanwan taem “plante man” oli hivap wanples. (Wok 11:26) Sem mak tede, ol man blong Jeova oli hivap long ol bigfala grup blong mekem ol seket asembli mo ol spesel dei asembli. Plante taem oli rentem wan haos we i stret long namba blong ol man. Be sipos i no gat wan haos we i naf, oli save wokem wan ples blong wosip we oli kolem Haos Asembli.

Wanwan taem oli pem wan haos we i stap finis ale oli mekem i gud bakegen, nao oli yusum olsem wan Haos Asembli. Be plante taem oli pem wan graon mo oli bildim wan niufala haos. Ol Haos Asembli oli defdefren saes, i dipen nomo long nid blong ol brata long wan ples. Bifo we oli bildim wan Haos Asembli, branj ofis i lukluk gud long praes blong hem mo i tingbaot hamas taem evri yia bambae oli yusum haos ya.

Branj ofis i putumap wan Komiti Blong Haos Asembli blong i lukaot long Haos Asembli. From we ol haos ya oli bigwan, branj ofis i putum sam man we oli wok fultaem blong lukaot long olgeta mo blong fiksimap ol samting we oli brok. Oli mekem plan se ol wanwan seket oli tekem taem blong olgeta blong klinim Haos Asembli. Maet oli mekem wan spesel plan blong klinimgud haos ya tu taem long wan yia mo blong fiksimap ol samting. I moagud we ol volontia oli mekem wok ya, i bitim we oli pem ol man blong mekem. From samting ya, i gud we ol kongregesen oli sapotem plan ya wetem fulhat blong olgeta.​—Sam 110:3; Mal. 1:10.

Samtaem oli save yusum Haos Asembli blong mekem sam tiokratik kos, olsem Ministeriol Trening Skul mo sam spesel miting blong ol seket mo distrik elda. Haos Asembli i wan haos we yumi dediketem blong mekem wosip long Jeova, sem mak olsem Haos Kingdom. Taswe, taem yumi joen wanples long Haos Asembli, fasin blong yumi wetem klos mo hea blong yumi i mas soemaot se yumi respektem ples ya olsem wan ples blong mekem wosip long Jeova.​—Pri. 5:1; 1 Tim. 2:​9, 10.

Yumi luksave se Jeova i stap blesem ogenaesesen blong hem, from we plante niuwan oli stap hareap nomo blong joen long ogenaesesen ya long lashaf ya blong ol las dei. (Aes. 60:​8, 10, 11, 22) Taswe, yumi mas sapotem wetem fulhat blong yumi ol plan blong wokem ol naesfala haos wosip mo mekem olgeta oli stap gud mo klin oltaem. Long ol haos ya yumi save joen wanples blong letem Jeova i tijim yumi. Taem yumi sapotem ol plan ya, yumi soemaot tangkiu from ol haos ya we oli givhan long yumi blong joen wanples blong leftemap tingting blong yumi, antap moa naoia we yumi luk se dei blong Jeova i klosap tumas.