Ogenaesesen We i Mekem Wok Blong Jeova
Japta 10
Ol Rod Blong Mekem Moa Long Wok Blong Prij
BIFO we Jisas i sanem ol disaepol blong hem oli go blong talemaot Kingdom, hem i talem long olgeta se: “I gat plante kakae tumas i stap long garen we i rere finis, be smol man nomo oli stap blong karem i go long haos.” Yes, bigfala wok i stap, taswe Jisas i talem se: “Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya.” (Mat. 9:37, 38) Jisas i tijim ol disaepol blong hem olsem wanem blong prij. Ol tok blong hem i soem se taem i sot: “Tru mi talem long yufala, bambae yufala i no save finisim ol vilej long Isrel yet, gogo kasem we mi, mi Pikinini blong Man, bambae mi kamtru.”—Mat. 10:23.
Tede tu, i nidim plante moa man blong prij. Taem i sot, mo gud nius blong Kingdom i mas kasem olgeta ples bifo we en i kam. (Mak 13:10) Wok blong yumi i sem mak long hemia we Jisas mo ol disaepol blong hem oli mekem, be from we garen i minim fulwol, wok blong yumi tede i bigwan moa. Yumi no plante be ol man long wol oli plante tumas. Nating se i olsem, Jeova i save givim paoa long ol man blong hem blong oli talemaot gud nius blong Kingdom long olgeta ples blong wol. Gud nius ya bambae i goaot mo en bambae i kam long stret taem we Jeova i makemaot. ?Be olsem wanem long yumi? ?Bambae yumi holemstrong long wok ya gogo yumi finisim gud? (Esik. 33:8, 9) ?Bambae yumi putum Kingdom blong God long fasples long laef blong yumi, blong mekem se yumi save joen fulwan long wok blong prij? ?Wanem ol mak we yumi stap traehad blong kasem long wok blong Jeova?
Jisas i talem wanem we Jeova i wantem se ol man we oli givim laef blong olgeta i go long hem finis oli mas mekem. Hem i se: “Yufala i mas lavem Hae God ya [“Jeova,” NW ] we i God blong yufala long olgeta hat blong yufala, mo long olgeta laef blong yufala, mo long olgeta tingting blong yufala, mo long olgeta paoa blong yufala.” (Mak 12:30) Yumi evriwan i mas mekem wok blong God wetem olgeta laef blong yumi. Sipos yumi wanwan i traehad long wok blong prij, yumi soemaot se yumi rili lavem Jeova mo se yumi rili minim promes blong yumi, taem yumi givim laef blong yumi i go long hem. (2 Tim. 2:15) Yumi evriwan i gat janis blong mekem olsem, nating se i gat wanem trabol long laef blong yumi mo nomata se save blong yumi i bigwan no i smol nomo. Tingbaot sam janis we yumi gat, mo jusum sam mak we bambae yu traehad blong kasem long wok blong God.
WOK OLSEM PABLISA LONG KONGREGESEN
Olgeta man we oli bilif long trutok oli gat janis blong kam wan man blong talemaot gud nius. Hemia bigfala wok ya we Jisas i givim long ol disaepol blong hem. (Mat. 24:14; 28:19, 20) Taem wan disaepol blong Jisas Kraes i luksave se gud nius ya i impoten, hem i stat blong talemaot long ol narafala. Hemia nao wanem we Andru, Filip, Konilias, mo plante narafala oli bin mekem. (Jon 1:40, 41, 43-45; Wok 10:1, 2, 24; 16:14, 15, 25-34) ?Be sipos wan man i no baptaes yet, hem i save talemaot gud nius long ol narafala? Yes, hem i save mekem olsem. Sipos wan man i naf blong kam wan pablisa we i no baptaes yet, hem i save joen long wok blong prij long ol haos wanwan. Mo sipos hem i naf, hem i save joen long ol narafala haf blong wok blong talemaot Kingdom.
Sipos yu yu baptaes finis, bambae yu mekem bes blong yu blong halpem ol narafala blong oli kasem save long gud nius. Ol man mo ol woman tu oli save joen long wok ya we God i putum long han blong yumi. Evriwan long kongregesen oli mas mekemgud ol defdefren wok blong olgeta blong givim gudfala eksampol long ol narafala. (1 Tim. 2:9-15; Taet. 2:1-10; 1 Pita 5:5) Ol brata long kongregesen we oli gohed gud, oli save kam man blong givhan. (1 Tim. 3:8-10, 12, 13) Sipos ol man blong givhan oli wantem mekem wok blong lukaot long kongregesen mo oli kasem ol mak we Baebol i putum, ale oli save kam elda. Nao oli save tij insaed long kongregesen mo mekem wok ya blong lukaot long ol sipsip blong God. (1 Tim. 3:1-7; Taet. 1:5-9) I wan nambawan blesing blong mekem wok blong Kingdom blong God, nating se yumi mekem plante wok no smol nomo. Wan man we i naf blong mekem moa wok, mo i kasem sam spesel wok blong Kingdom, hem i save harem gud.
GO WOK LONG PLES WE I NIDIM MOA MAN BLONG PRIJ
Ating yu stap long wan kongregesen we i stap goraon plante taem long teritori blong hem, mo i stap givim wan gudfala witnes. Sipos i olsem, maet yu wantem muv i go long wan ples we i no gat plante pablisa long hem, blong yu save mekem moa wok. (Wok 16:9) Ating seket elda i save givim advaes long yu, olsem wanem yu save givhan long wan narafala kongregesen long seket blong yu. Sipos yu wantem go stap long wan narafala ples long kantri blong yu, yu save raet i go long branj ofis blong kasem moa save long saed ya. Sipos yu yu stap mekem wok blong elda no man blong givhan, maet i gat wan narafala kongregesen long kantri blong yu we i glad se yu givhan long hem.
?Olsem wanem? ?Yu yu wantem givhan blong mekem wok blong Kingdom i go moa long wan narafala kantri? Sipos yes, yu mas tingting gud fastaem. Hemia bambae i wan bigfala jenis long laef blong yu mo blong olgeta we oli go wetem yu. (Luk 14:28) Sipos yu wantem go blong smoltaem nomo, maet i moagud we yu traem muv i go long wan ples long kantri blong yu nomo.
Bifo we branj ofis long kantri blong yu no long wan narafala kantri i save givim nem blong sam kongregesen we oli nidim moa man blong wok, Sevis Komiti blong kongregesen blong yu i mas raetem wan leta blong talem se yu yu naf blong wok long narafala kantri. Nating se yu stap wok olsem wan elda, wan man blong givhan, wan paenia, no wan pablisa, be oli mas raetem wan leta long saed blong yu. Sevis Komiti bambae i sanem leta ya wetem kwestin blong yu i go long branj ofis blong kantri we yu yu wantem go long hem.
Sipos yu wantem muv i go long wan ples we i gat moa nid, i gud yu tokbaot samting ya wetem ol elda long kongregesen blong yu. Ating oli save givhan long yu blong save rod blong mekem samting ya, no blong save olsem wanem blong kam naf blong mekem samting ya long fiuja.
WOK LONG WAN KONGREGESEN WE I TOKTOK NARAFALA LANWIS
Blong mekem moa long wok blong God, maet yu wantem lanem wan narafala lanwis, no maet yu lanem saen lanwis we i blong toktok long olgeta we sora blong olgeta i fas. Sam famle we ol memba blong olgeta oli toktok tu lanwis mo oli wantem givhan moa long wok blong Kingdom, oli joen long wan kongregesen we i toktok narafala lanwis. Sipos yu yu wantem lanem blong prij long wan narafala lanwis, i gud yu toktok wetem ol elda long kongregesen blong yu mo seket elda. Maet oli save givim advaes long yu mo leftemap tingting blong yu long rod ya. Long sam ples, branj ofis i givim raet blong oli mekem kos long sam seket blong lanem narafala lanwis. Olsem nao, oli save prij long ol man we oli toktok lanwis ya long teritori blong seket ya.
WOK BLONG HAFTAEM PAENIA, FULTAEM PAENIA MO SPESEL PAENIA
Ol pablisa oli mas save ol mak we oli mas kasem blong kam haftaem paenia, fultaem paenia, no spesel paenia, no blong mekem sam narafala spesel wok bakegen. Sam Kingdom Wok Blong Yumi oli givim save long saed ya. Blong wan pablisa i kam paenia, hem i mas baptaes, i mas soemaot gudfala eksampol long ol Kristin fasin, mo i no mas gat plante samting long laef blong hem we i blokem hem blong kasem ol aoa we hem i mas mekem evri manis long wok blong talemaot gud nius. Sevis Komiti blong kongregesen i jekem olgeta we oli fulumap pepa blong haftaem paenia, mo i givim raet long olgeta blong mekem wok ya. Be branj ofis i putumap ol fultaem mo spesel paenia.
Wan pablisa i save mekem wok blong haftaem paenia blong wan manis, plante manis, no i save gohed olwe sipos hem i naf. Plante pablisa oli glad blong mekem haftaem paenia long sam spesel manis, olsem ol manis bifo mo afta long Memoriol no manis we seket elda i visitim kongregesen. Samfala oli mekem long taem blong spel. Ol yangfala pablisa we oli stap skul yet be oli baptaes finis, oli save mekem haftaem paenia long ol manis we oli spel. Nating se yu gat wanem narafala wok long laef blong yu, be sipos yu yu gat gudfala fasin mo klin laef, mo yu save kasem ol aoa long wok blong prij, mo yu gat strong tingting blong mekem wok blong haftaem paenia blong wan manis no plante manis, ale ol elda long kongregesen bambae oli glad blong kasem pepa we yu fulumap blong mekem wok ya.
Blong kam wan fultaem paenia yu mas naf blong kasem ol aoa we yu mas mekem long wan yia. Kingdom Wok Blong Yumi i givim advaes se i gud blong putum wan namba blong aoa we yu mas kasem evri manis. Sipos yu kam fultaem paenia, yu mas wokgud oltaem wetem kongregesen we yu stap long hem. Ol paenia we oli wok strong oli rili wan blesing long kongregesen. Oli pulum ol pablisa blong prij plante, mo oli pulum samfala blong oli joen long wok blong paenia. Bifo we ol elda oli save sanem leta blong askem sipos yu save kam wan fultaem paenia, yu mas baptaes sikis manis finis, yu mas gat gudfala klin fasin blong laef, mo yu mas wan gudfala pablisa. Yu mas naf blong folem wan program blong kasem ol aoa blong yu long wok blong prij.
Sipos wan fultaem paenia i wokgud long wok blong prij, mo i save go long eni ples we branj ofis i wantem, maet oli putumap hem i kam wan spesel paenia. Plante taem, oli nidim ol spesel paenia long ol ples we i no gat kongregesen long hem. Oli save prij mo faenem ol man we oli laekem trutok mo statem ol niufala kongregesen. Sam kongregesen oli no gat naf pablisa blong finisim teritori blong olgeta kwik, ale branj ofis i sanem spesel paenia i go long ol ples ya. Sipos wan spesel paenia i wan elda tu, maet oli sanem hem i go long wan smol kongregesen, nating se i no nidim moa man blong prij long ples ya. Branj ofis i sanem smol mane i go long ol spesel paenia evri manis blong oli save pem ol samting we oli nidim blong laef.
MINISTERIOL TRENING SKUL
Plante niufala kongregesen oli stanap evri yia. Samting ya i soemaot se Jeova i stap blesem traehad blong ol man blong hem blong talemaot gud nius blong Kingdom. (Wok 16:5) Taem i gat ol niufala kongregesen, i nidim plante moa elda mo man blong givhan. Ol brata we oli no mared mo oli naf, oli save mekem wok ya sipos oli talem long Jeova se: “!Mi ya, mi save go! !Yu sanem mi!” (Aes. 6:8) Plante oli talem olsem taem oli fulumap pepa blong go long Ministeriol Trening Skul. Hemia wan kos blong ol man blong givhan mo elda we oli no mared, mo we oli glad blong wok long ples we i gat nid. Ol brata olsem oli save faenemaot moa long saed blong kos ya sipos oli go long ol miting long seket asembli we oli blong olgeta we oli intres long Ministeriol Trening Skul.
Skul ya i givim tijing long saed blong Baebol mo ogenaesesen, blong givhan long ol man we oli naf blong oli lukaotgud long ol sipsip blong God mo blong oli mekem ol narafala wok tu. (Jer. 23:4) Sam long ol brata we oli kasem trening ya oli go wok long wan ples long kantri blong olgeta nomo, mo sam narafala oli go wok long narafala kantri. Branj ofis i save askem long sam long olgeta blong oli gobak long kongregesen blong olgeta nomo afta we oli finisim trening ya, blong oli givhan long ol brata sista long ples ya mo leftemap tingting blong olgeta. Trening ya i givhan long olgeta blong halpem moa ol man blong God, long saed blong spirit mo insaed long ogenaesesen blong hem.—2 Tim. 3:16, 17.
WOK BLONG MISINARI
Blong talemaot gud nius blong Kingdom ‘gogo yumi finisim olgeta ples long wol’ bifo we en i kam, i bin gat nid blong sanem ol misinari oli go long plante kantri. (Wok 1:8; Mat. 24:14) Hemia i givim janis long plante taosen Witnes blong Jeova blong mekem moa long wok blong God, speseli olgeta we oli bin wok strong finis, mo oli soemaot se oli lavem Jeova wetem olgeta laef blong olgeta, mo oli karem frut long wok blong Kingdom. Plante taem olgeta we oli kam misinari oli kasem spesel trening fastaem long Wajtaoa Baebol Skul Blong Gilead.
Blong kam wan misinari, wan brata no sista i mas gat strong bodi mo paoa, from we plante misinari oli go wok long ol kantri we laef i no isi. Maet i gat ol defdefren sik long kantri ya, ating kalja i defren, mo maet misinari i no save kasem plante samting we hem i bin gat long kantri blong hem.
Sipos yu yu wan paenia mo yu gat tingting blong kam misinari blong mekem moa long wok blong Kingdom, yu save faenemaot moa long saed blong wok ya sipos yu go long miting long distrik asembli we i blong olgeta we oli intres long wok blong misinari. Seket elda tu i save givim gudfala advaes long yu. Sipos yu yu naf, maet yu kasem blesing ya blong mekem wok blong misinari, wok ya we i bin givhan bigwan blong mekem trufala wosip i kasem olgeta ples blong wol.
WOK LONG BETEL
I wan spesel blesing blong wok long wan long ol haos Betel we oli stap long plante ples blong wol. Nem ya Betel i minim “Haos blong God.” Nem ya i stret nomo long ol haos ya we oli stamba ples blong ol tiokratik wok. Ol brata sista we oli wok long Betel oli mekem impoten wok ya blong printim mo sanemaot ol buk we ol Witnes blong Jeova long olgeta ples blong wol oli yusum. Hed Kampani we i stap long Betel long Bruklin i lidim mo givim advaes long olgeta kongregesen long wol.
Plante wok long Betel i had, mo i nidim paoa blong mekem ol wok ya. Taswe bighaf blong olgeta we branj ofis i singaot olgeta blong mekem wok long Betel, oli ol yangfala brata we oli baptaes finis, oli strong mo oli no stap siksik. Sipos i gat nid long kantri blong yu mo yu wantem wok long Betel, yu save faenemaot moa long saed blong wok ya long ol spesel miting long distrik asembli, we oli blong olgeta we oli intres blong wok long Betel. Seket elda tu i save givhan long yu long saed ya.
VOLONTIA BLONG BILDIM OL HAOS WOSIP
Wok blong bildim ol Haos Kingdom mo ol Haos asembli i wan tabu wok, sem mak olsem wok ya we Solomon i mekem blong bildim haos blong God. (1 King 8:13-18) Plante brata sista oli soemaot se oli strong blong leftemap ogenaesesen blong Jeova taem oli givim taem, paoa, mo mane blong olgeta blong sapotem wok ya mo blong joen long hem.
?Olsem wanem? ?Yu yu naf blong givhan long tabu wok ya? Sipos yu yu wan pablisa we i baptaes finis mo yu glad blong joen long wok ya, Rijonal Bilding Komiti i glad tumas blong kasem pepa blong yu. Nating sipos yu no wan kapenta, mo yu wan pablisa nomo we i no baptaes yet, be maet yu save givhan blong bildim wan Haos Kingdom long ples blong yu. Sipos yu glad blong joen, i gud yu talemaot long ol elda long kongregesen blong yu mo seket elda. Sam pablisa we oli baptaes finis mo oli naf blong mekem wok ya, oli bin volontia blong go wok long ol Haos Kingdom mo Haos Asembli long ol narafala kantri.
?WANEM OL MAK WE YU WANTEM KASEM LONG WOK BLONG GOD?
Sipos yu givim laef blong yu i go long Jeova finis, yu yu soemaot se yu wantem mekem wok blong Jeova gogo i no save finis. ?Be wanem ol mak we yu wantem kasem long wok blong God? Sipos yu putum sam mak, samting ya bambae i givhan long yu blong yu no westem taem mo paoa blong yu, be bambae yu yusum olgeta long waes fasin. (1 Kor. 9:26) Olsem nao, bambae yu no wokhad blong nating nomo. Ol gudfala mak ya oli save givhan long yu blong gru long saed blong spirit, mo bambae oli halpem yu blong tingbaot ol samting we oli moa impoten, taem yu wok strong blong kasem sam spesel wok.—Fil. 1:10; 1 Tim. 4:15, 16.
Long parabol blong man we i sakem sid long garen, Jisas i talem se evri gudfala graon i no karem semfala namba blong frut. Sam oli karem moa i bitim ol narafala. Jisas i talem se: “Sid we i foldaon long gudfala graon, hemia i olsem man we i harem tok ya, mo i save mining blong hem. Ol man olsem oli gat frut blong tok ya long laef blong olgeta, i olsem we sam i gat handred frut, sam i gat sikisti, mo sam i gat toti.” (Mat. 13:23) Sipos yumi kasem mining blong tok blong God, bambae yumi traehad blong karem plante frut blong leftemap nem blong Jeova. Blong karem plante frut blong Kingdom, yumi mas strong blong talemaot gud nius. Mo evri dei, yumi wantem soemaot moa ol frut blong tabu spirit long laef blong yumi. (Jon 15:2, 3; Gal. 5:22, 23) Samting we bambae i halpem yumi blong mekem olsem, hemia ol mak we yumi traehad blong kasem long wok blong God.
Aposol Pol i soemaot rod long yumi long wok blong God. (1 Kor. 11:1) Hem i traehad long wok blong Jeova mo i mekem bes blong hem. Hem i luksave se wok blong Jeova i openem rod blong hem i kasem plante blesing. Hem i talem long ol brata long Korin se: “Long ples ya i gat olsem doa we i open finis long mi, blong mi mekem wan gudfala wok we bambae i gat plante frut blong hem.” Hemia i tru long laef blong yumi tu. Yumi gat plante janis blong mekem wok blong Jeova wetem kongregesen, antap moa, wok ya blong talemaot gud nius blong Kingdom. Be olsem Pol, yumi mas tingbaot se taem yumi gotru long ‘doa ya’ bambae i gat ‘plante man we oli agensem yumi.’ (1 Kor. 16:9) Pol i rere blong mekem i strong long hem wan, olsem wan man blong spot i mas mekem taem hem i wantem tumas blong win, nating se ona we hem i kasem i blong smoltaem nomo. Makemgud tok ya blong Pol se: “I olsem we mi stap trenem bodi blong mi blong mekem mi mi strong, blong bambae mi save mekem olsem we mi mi wantem.” (1 Kor. 9:24-27) ?Olsem wanem? ?Yu tu yu mekem olsem?
Plante brata mo sista oli mekem wok blong misinari tede from we papa mama no sam narafala oli bin pulum olgeta long rod ya taem oli pikinini, nao oli putum mak blong tren long skul blong Gilead mo mekem wok blong misinari. Hemia i sem mak long plante brata sista we oli wok long Betel. Taem oli pikinini nomo no taem oli jes kasem save long gud nius mo wok long Betel, oli putum mak blong mekem spesel wok ya.
Laef blong yumi wanwan i no sem mak. Be yumi evriwan i save putum sam mak we yumi traehad blong kasem long wok blong God. Yumi save putum mak blong joen evri wik long wok blong prij, statem mo lidim wan Baebol stadi, spenem moa taem blong mekemrere ol miting, mekem wok blong haftaem paenia no fultaem paenia, go wok long wan ples we i gat nid, joen long wok blong bildim ol Haos Kingdom mo Haos Asembli, wok long Betel, no kam wan misinari. I tru, ol miting, ol asembli, mo ol buk blong ol Witnes blong Jeova, oli tokbaot sam narafala mak we yumi save kasem long wok blong God we yu yu save tingting long olgeta mo traehad blong kasem. Be bigfala samting, hemia se yu stanap strong mo joen fulwan long wok blong prij. Sipos yu mekem olsem, bambae yu givim ona long God, mo bambae yu kasem bigfala mak we yu wantem kasem, hemia blong mekem wok blong Jeova gogo i no save finis.—Luk 13:24; 1 Tim. 4:7b, 8.