Ogenaesesen We i Mekem Wok Blong Jeova
Japta 14
Holem Pis Mo Klin Fasin Insaed Long Kongregesen
EVRI yia, plante taosen man oli kam blong mekem trufala wosip long haos blong Jeova, olsem profet tok blong Baebol i talem. (Maeka 4:1, 2) !Yumi glad tumas blong welkamem olgeta long “kongregesen blong God”! (Wok 20:28, NW) Oli glad tu blong gat janis blong mekem wok blong Jeova wetem yumi mo blong haremgud long paradaes long saed blong spirit. Paradaes ya we i klingud long saed blong spirit mo i gat pis, hem i kamaot from tabu spirit blong Jeova mo from we yumi folem ol waes advaes long Tok blong God, Baebol.—Sam 119:105; Sek. 4:6.
From we yumi stap folem ol rul blong Baebol, yumi tekem ol niufala fasin long laef blong yumi, hemia ol Kristin fasin. (Kol. 3:10) Yumi traehad bigwan blong mekem laef blong yumi i laenap wetem ol stret loa blong Jeova. Taswe taem wan smol rao i kamaot no yumi no agri wetem wan brata no sista, yumi fogetem nomo. From we yumi folem tingting blong Jeova, yumi no save seraot olsem ol man blong wol. Yumi wok gud tugeta long lav mo yumi joengud olsem wan brata nomo, long olgeta ples long wol.—Wok 10:34, 35.
Be sam samtaem trabol i save kamaot we i spolem pis mo fasin joengud long kongregesen. ?From wanem trabol olsem i kamaot? Plante taem i kamaot from we samfala oli no folem advaes blong Baebol. Yumi mas hadwok yet blong faet agensem ol fasin we sin i pulum yumi blong mekem. I no gat wan long yumi we i stret olgeta. (1 Jon 1:10) Maet wan brata no sista i no luksave se hem i stap mekem wan fasin we i save karem nogud fasin long saed blong bodi no spirit i kam insaed long kongregesen. Sipos yumi no tingtinggud bifo we yumi mekem samting mo yumi no bos long tang blong yumi, yumi save talem no mekem samting we narafala i harem nogud long hem. No ating yumi harem nogud long samting we narafala i mekem no i talem long yumi. (Rom 3:23) ?Taem trabol olsem i kamaot, yumi save mekem wanem blong stretem?
From we Jeova i lavem yumi, hem i tingbaot ol samting ya finis, mo yumi save talem tangkiu long hem from. Tok blong hem i givim advaes long wanem we yumi mas mekem taem trabol i kamaot from we yumi sinman, no from we yumi sot long sam gudfala tingting no fasin, no taem wan nogud fasin i kam insaed long kongregesen. Ol elda we oli lavem yumi mo oli lukaot long yumi olsem ol man blong lukaot long sipsip, oli save givhan long yumi. Sipos yumi folem ol advaes blong Baebol we ol elda oli soemaot long yumi, yumi save joengud wetem evriwan long kongregesen mo yumi save holem gudnem long fes blong Jeova. Sipos yumi mekem wan rong mo ol elda oli mas stretem yumi, yumi mas save se hemia i soemaot bigfala lav we Papa blong yumi long heven i gat long yumi.—Prov. 3:11, 12; Hib. 12:6.
TAEM SMOL RAO I KAMAOT
Sam samtaem, wan brata no sista long kongregesen i rao smol wetem narafala. Long taem olsem, oli mas stretem trabol ya kwiktaem long fasin we i soem lav. (Efes. 4:26; Fil. 2:2-4; Kol. 3:12-14) Ating bambae yumi faenem se bighaf blong ol problem olsem, yumi save winim taem yumi folem advaes blong aposol Pita se: “Yufala i mas lavlavem yufala. Yufala i no mas kam slak long samting ya, from we man we i stap lavem narafala man, oltaem hem i save fogivim hem from ol sin blong hem.” (1 Pita 4:8) Ol smosmol trabol ya oli kamaot from we yumi evriwan i sinman. Yumi evriwan i foldaon plante taem. (Jem. 3:2) Sipos yumi luksave samting ya, mo yumi folem rul ya blong Jisas se yumi mas mekem long ol narafala man olsem we yumi wantem se oli mekem long yumi, plante taem yumi save fogivim narafala nomo mo fogetem smol rao we i bin kamaot.—Mat. 7:12.
Be maet samting ya i no naf, mo yu nidim blong mekem wan narafala samting blong stretem rao ya wetem wan brata no sista. Sipos i olsem, i waes blong mekem wan samting kwiktaem, from we sipos trabol ya i stap longtaem, hem i save spolem fasin fren blong yu wetem Jeova. Jisas i talem long ol disaepol blong hem se: “Sipos yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.” (Mat. 5:23, 24) Ating trabol ya i kamaot from we yutufala i no kasem save gud long tingting blong yutufala. Sipos i olsem, rod blong stretem i blong holem tingting ya se Kristin fasin ya blong joengud i impoten tumas, mo toktok gud tugeta. Sipos olgeta long kongregesen oli toktok gud tugeta oltaem, samting ya i save blokem problem ya we yumi no kasem save long tingting blong narafala, mo tu, i save givhan blong stretem mastik we i kamaot from we yumi sinman.
GIVIM ADVAES BLONG BAEBOL TAEM I GAT NID
Samtaem ol elda oli mas givim advaes long wan brata blong traem stretem tingting blong hem. I no isi blong mekem olsem. Aposol Pol i talem long ol Kristin long Galesia se: ‘Ol brata mo sista. Sipos wan long yufala i foldaon, yufala we spirit blong God i stap long yufala, yufala i mas givhan long hem blong stretem hem. Be yufala i mas mekem long kwaet fasin.’—Gal. 6:1.
Ol man we oli lukaot long ol sipsip blong God wetem lav, oli save protektem kongregesen long plante samting we i save spolem hem long saed blong spirit, mo blokem plante bigfala trabol bifo we oli kamaot. Ol man blong lukaot long ol sipsip blong God oli mas traehad blong mekem wok blong olgeta long kongregesen i laenap wetem promes blong Jeova we Aesea i talemaot, se: “Bambae oli olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Bambae oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.”—Aes. 32:2.
ROD BLONG STRETEM SAM BIGFALA RONG
Yumi mas fogivim ol smol mastik blong ol brata sista blong yumi, mo fogetem trabol ya. Be samting ya i no min se ol sin oli nating nomo mo yumi agri long olgeta, nogat. I tru se yumi evriwan i sinman, be i no evri rong we i kamaot from sin. Sipos wan brata no sista i mekem bigfala sin, nao yumi letem sin ya i pas, yumi no stap mekem i gud long brata ya mo long kongregesen tu. (Lev. 19:17; Sam 141:5) Bifo, Loa we God i givim long Moses i soemaot se i gat sam sin we oli bigwan mo sam we oli smol. Hemia i sem mak long Kristin kongregesen tede.—1 Jon 5:16, 17.
Jisas i givim spesel advaes we yumi save folem blong stretem ol bigfala trabol we i save kamaot bitwin ol Kristin. Makemgud ol step we Jisas i talem: “Sipos wan brata blong yu i mekem i no stret long yu, [1] yu mas go luk hem, nao taem yutufala nomo i stap, yu mas talemaot long hem, samting nogud ya we hem i mekem. Sipos hem i save lesin long yu, toktok blong yu bambae i mekem hem i kambak, yutufala i fren gud bakegen. Be sipos hem i no wantem lesin long yu, [2] yu mas tekem wan no tu man wetem yu, blong oli witnes blong yu. Nao bambae i olsem tok blong Baebol we i talem se, ‘Man we i stap talemaot poen agens long narafala man, hem i mas gat tok blong tu no tri witnes, blong mekem tok blong hem i stanap.’ Be sipos hem i no save lesin long yu yet, [3] yu mas talemaot trabol ya long . . . [“kongregesen,” NW]. Mo sipos hem i no save lesin long . . . [kongregesen], yu mas mekem long hem olsem we hem i wan hiten man, no wan man blong tekem mane blong takis.”—Mat. 18:15-17.
Biaen, long Matiu 18:23-35 Jisas i givim wan parabol we i soemaot se Matiu 18:15-17 i stap tokbaot ol sin olsem olgeta we oli joen wetem mane no graon. Maet wan brata i no pem stret mane blong wan samting no i mekem samting we i olsem kruked fasin. No maet wan brata i talemaot giaman toktok we i spolem gudnem blong narafala long kongregesen.
Sipos yu yu gat strong pruf se wan brata long kongregesen i mekem wan bigfala sin olsem agensem yu, yu no mas hareap blong go luk ol elda no sam narafala, blong askem olgeta blong stretem bisnes ya. Jisas i talem se fastaem yu wan yu mas go toktok wetem brata ya we i bin mekem rong long yu. Yutufala nomo i mas traem stretem bisnes ya, we i no gat narafala man i save. Sipos hem i no wantem lesin long yu, maet yu letem smol taem i pas bifo we yu tekem nekis step. Tingbaot se Jisas i no talem se ‘yu go luk hem wan taem nomo blong talemaot samting nogud we hem i mekem,’ nogat. Taswe, sipos fastaem brata ya i no wantem agri se hem i mekem rong mo i no askem yu blong fogivim hem, i gud blong gobak samtaem biaen blong luk hem bakegen. Sipos yu save stretem trabol ya olsem, brata we i mekem sin bambae i gat bigfala tangkiu long yu from we yu no bin tokbaot sin blong hem long narafala mo yu no bin spolem gudnem blong hem long kongregesen. Olsemia nao, yu mekem samting we yu wantem mekem, hemia se “yutufala i fren gud bakegen.”
Sipos brata i luksave rong blong hem, i askem yu blong fogivim hem, mo i stretem rong blong hem, i no gat nid blong tekem nekiswan step. Hemia i soemaot se nating we ol sin ya oli bigwan, be hemia olkaen sin we ol brata mo sista nomo oli save stretem. Hemia i no ol sin olsem rabis fasin long saed blong seks, man i stilim narafala woman no woman i stilim narafala man, man i slip wetem man no woman i slip wetem woman, tok nogud long God, lego trutok blong tijim ol giaman tijing, wosip blong ol aedol, no narafala bigfala sin olsem. (1 Kor. 6:9, 10; Gal. 5:19-21) Blong stretem sin olsem, i no naf we yumi fogivim narafala we i mekem rong long yumi. Ol sin ya oli save mekem kongregesen i doti long saed blong fasin mo spirit. From samting ya, ol sin olsem yumi mas talemaot long ol elda blong olgeta nao oli stretem.—1 Kor. 5:6; Jem. 5:14, 15.
Sipos yu no save fren gud bakegen wetem brata blong yu taem “yutufala nomo” i traem stretem trabol ya, yu mas tekem seken step we Jisas i talem. Yu mas tekem wan no tu narafala Kristin i go wetem yu blong toktok wetem brata ya bakegen. Taem yu tekem wan no tu witnes olsem, tufala tu i mas gat tingting ya blong mekem yu mo brata blong yu yutufala i fren gud bakegen. I moa gud we tufala i bin luk rong we brata ya i mekem, be sipos i no gat man we i witnes blong samting ya, yu save tekem tufala brata blong oli witnes long ol toktok blong yutufala. Maet tufala i bin fesem wan trabol olsem finis, mo maet tufala i save soemaot sipos samting we i bin hapen i rili wan bigfala sin no nogat. Sipos yu jusum tu elda blong oli witnes blong yu, tufala i no go wetem yu long nem blong kongregesen, from we kampani blong ol elda long kongregesen i no sanem tufala.
Be maet ol traehad blong yu blong stretem trabol ya yu wan mo wetem tu narafala i no karem frut. Sipos yu gat strong tingting yet se brata ya i mekem wan bigfala rong long yu, mo yu gat pruf blong samting ya, mo sipos yu harem se yu no save letem sin ya i pas nomo, ale yu mas talemaot bisnes ya long ol elda blong kongregesen. Yu mas tingbaot se bigfala tingting blong olgeta tu i blong holem pis mo klin fasin insaed long kongregesen. Taem yu go talemaot long ol elda, yu no save go moa nao. Yu mas letem trabol ya i stap long han blong ol elda mo yu mas trastem Jeova blong stretem. Yu neva mas letem rong blong wan narafala i mekem yu yu foldaon no spolem glad blong yu long wok blong Jeova.—Sam 119:165.
Ol elda bambae oli lukluk gud long trabol ya, nao sipos i klia long olgeta se brata ya i bin mekem wan bigfala sin agens long yu mo i no wantem tanem tingting blong hem mo stretem rong ya, maet oli mas putumaot man ya long kongregesen. Long fasin ya, oli protektem ol sipsip blong God, mo oli mekem kongregesen i stap klin.—Mat. 18:17.