Mekem Jeova i Kam God Blong Yu

LONG taem blong Baebol bifo, i gat sam man we oli frengud wetem Jeova, mekem se Baebol i tokbaot Jeova se hem i God blong olgeta. Eksampol, hem i se Jeova i ‘God blong Ebraham,’ ‘God blong Deved,’ mo ‘God blong Elaeja.’​—Jenesis 31:42; 2 King 2:14; 20:5.

?Ol man ya oli kam gud fren blong God olsem wanem? ?Yumi save lanem wanem from olgeta ya we i mekem se yumi tu yumi save holem wan gudfala fasin fren wetem God ya we i Wokem yumi?

Ebraham i “Bilif Strong Long Hae God”

Ebraham i fas man we Baebol i tokbaot hem se, i bilif strong long Jeova. Bilif i nambawan fasin blong Ebraham, we i mekem se God i glad long hem. Yes, Jeova i glad bigwan long fasin blong Ebraham, mekem se taem hem i kam long Moses blong talem se hem i hu, hem i talem se hem i ‘God blong Ebraham’ mo i God blong pikinini mo smol bubu blong Ebraham tu, hemia Aesak mo Jekob.​—Jenesis 15:6; Eksodas 3:6.

?Olsem wanem Ebraham i wokem bilif ya long God? Faswan samting se, bilif blong Ebraham i stanap long wan strong fandesen. Ating Sem, we i pikinini blong Noa, hem nao i bin tijim Ebraham long ol gudfala fasin blong Jeova. Sem i luk long prapa ae blong hem, olsem wanem Jeova i bin sevem ol man. Hem i luk taem Jeova “i sevem Noa, we i wan prija we i stap talemaot stret fasin, wetem seven narafala man tu, be i letem wota i kam bigwan, i draonem ol narafala man ya we oli no obei long hem [God].” (2 Pita 2:5) Ating Sem i tijim Ebraham tu se, taem Jeova i mekem promes long wan samting, hem i mas mekem promes ya i kamtru. Taswe, taem Ebraham hem wan i kasem wan promes we God i mekem long hem, hem i glad mo i mekem laef blong hem i stanap long save ya se promes ya bambae i kamtru.

From we bilif blong Ebraham i stanap finis long wan strongfala fandesen, bilif ya i kam strong moa taem Ebraham i mekem wok we i go wetem. Aposol Pol i talem se: “From we Ebraham i stap bilif strong long God, taswe hem i obei long God long taem ya we God i singaot hem blong go long wan narafala kantri. Kantri ya, God i promes finis long hem se bambae i givim long hem. Nao Ebraham i aot long kantri blong hem, be hem i no save se niufala kantri ya we hem i stap go long hem i stap wea.” (Hibrus 11:8) Fasin obei we Ebraham i gat, i mekem se bilif blong hem i kam bigwan moa. Taswe disaepol Jemes i talem se: “Yu luk. Ebraham i bilif long God mo i mekem ol samting we God i talem long hem, mo from samting ya, bilif blong hem i kam stret gud olgeta.”​—Jemes 2:22.

Antap long hemia, Jeova i letem bilif blong Ebraham i kasem traem, mekem se bilif blong hem i kam strong moa. Pol i gohed blong talem se: “From we Ebraham i stap bilif strong long God, taswe taem God i traem hem, hem i rere blong kilim pikinini blong hem Aesak.” Ol traem oli save mekem bilif i kam strong moa, mekem se hem i kam “gud moa i winim gol.”​—Hibrus 11:17; 1 Pita 1:7.

Nating we Ebraham i no laef kasem taem we ol promes ya blong God oli kamtru, be, hem i glad blong luk ol narafala we oli folem eksampol blong hem. Woman blong hem Sera, mo tri memba blong famle blong hem​—hemia Aesak, Jekob, mo Josef—​olgeta tu, Baebol i tokbaot olgeta from strong bilif we oli gat.​—Hibrus 11:​11, 20-22.

Bilif Olsem Ebraham Tede

Man i mas gat bilif, sipos hem i wantem we Jeova i kam God blong hem. Pol i talem se: “Sipos man i no bilif strong long God, hem i no save mekem God i glad long hem.” (Hibrus 11:6) ?Olsem wanem wan man blong God tede i save wokem bilif we i strong olsem bilif blong Ebraham?

Bilif blong yumi i mas stanap long wan strong fandesen, olsem Ebraham i mekem. Yumi save mekem olsem ya, taem yumi stadi oltaem long Baebol mo ol buk long saed blong Baebol. Taem yumi ridim Baebol mo tingting dip long wanem we yumi ridim, samting ya i save mekem yumi sua se ol promes blong God bambae oli kamtru. Ale, samting ya bambae i pusum yumi blong jenisim laef blong yumi mo mekem i laenap wetem wanem we yumi hop long hem. Bilif blong yumi bambae i kam strong moa taem yumi obei oltaem, olsem taem yumi obei long oda ya blong go prij mo blong go long ol Kristin miting.​—Matiu 24:14; 28:​19, 20; Hibrus 10:​24, 25.

Bilif blong yumi i mas kasem traem, maet from fasin agens, strongfala sik, wan we yumi laekem tumas i ded, no from sam narafala samting bakegen. Taem yumi holemstrong long Jeova nating se yumi kasem traem, bilif blong yumi i save kam strong moa mo i gud moa i winim gol. Maet yumi laef kasem taem we ol promes blong God oli kamtru, no maet yumi ded bifo we ol promes ya oli kamtru. Be bilif we yumi gat i save mekem yumi kam klosap moa long Jeova. Mo tu, eksampol blong yumi i save leftemap tingting blong ol narafala blong folem bilif blong yumi. (Hibrus 13:7) Samting ya i hapen long Ralph we i folem bilif blong papa mama blong hem. Hem i talem se:

“Taem mi mi laef wetem papa mama blong mi, tufala i leftemap tingting blong ful famle blong girap eli moning, blong mifala i ridim Baebol tugeta. Long rod ya mifala i ridim fulwan Baebol.” Ralph i stap gohed yet blong ridim Baebol evri moning, mo samting ya i givhan long hem long fuldei. Taem Ralph i smol, hem i stap go wetem papa blong hem long wok blong prij evri wik. “Long taem ya nao, mi lanem blong mekem ol visit mo ol Baebol stadi.” Naoia, Ralph i wok olsem volontia long wan branj ofis blong ol Witnes blong Jeova long Yurop. !Hemia wan nambawan blesing we i kamaot from bilif we papa mama i soemaot!

Man We i Stret Gud Long Fes Blong Jeova

Deved i bon 900 yia afta long Ebraham. Hem i wan long ol man blong Jeova long Baebol we laef blong olgeta i spesel. Taem Jeova i jusum Deved blong bambae i kam king, profet Samuel i talem se: ‘[Jeova] bambae i faenem wan man we i stret gud long fes blong hem.’ Tru ya, fasin fren we i stap bitwin Jeova mo Deved i strong gud, taswe taem profet Aesea i toktok long King Hesekia hem i talem se Jeova i “God blong olfala bubu ya blong yu bifo, King Deved.”​—1 Samuel 13:14; 2 King 20:5; Aesea 38:5.

Nating we Deved i stret gud long fes blong Jeova, be sam samtaem hem i letem ol samting we hem nomo i wantem oli bos long hem. Hem i mekem tri bigfala mastik: Hem i no folem oda blong karem bokis blong kontrak i go long Jerusalem; hem i slip wetem Batseba mo i mekem plan blong hasban blong Batseba i ded long faet; mo tu Deved i mekem sensas blong kaontem olgeta man Isrel mo Juda. Hemia wan samting we Jeova i no talem long hem blong i mekem. Long olgeta taem ya, Deved i no folem Loa blong God.​—2 Samuel 6:2-10; 11:2-27; 24:1-9.

Taem ol sin blong Deved oli kam long klia ples, Deved i agri nomo se hem i mas kasem panis from, mo hem i no putum fol long narafala man. Hem wan i talemaot se hem i no karem Bokis blong kontrak folem oda we Jeova i wantem, mo hem i se “mifala i no traehad blong faenemaot fasin we [Jeova] i bin talem long yumi blong folem oltaem.” Taem profet Natan i talemaot sin we Deved i mekem wetem Batseba, Deved i ansa i se: “Mi mi bin mekem wan samting we i nogud olgeta, i agens long Hae God.” Mo tu, taem Deved i luksave se fasin ya we hem i mekem taem hem i kaontem ol man, i krangke nomo, hem i talem se: “Mi mekem wan sin we i nogud tumas.” Deved i tanem tingting blong hem long ol sin blong hem mo i gohed blong stap klosap long Jeova.​—1 Kronikel 15:13; NW; 2 Samuel 12:13; 24:10.

Taem Yumi Mekem Mastik

Eksampol blong Deved i save leftemap tingting blong yumi, taem yumi traehad blong mekem Jeova i God long yumi. Nating se Deved i stret gud long fes blong Jeova, hem i mekem ol bigfala sin. Taswe, tingting blong yumi i no mas foldaon sipos yumi stap traehad be, biaen yumi mekem sam mastik no sam bigfala sin. (Prija 7:20) Taem Deved i tanem tingting blong hem from ol sin blong hem, God i fogivim hem, mo samting ya i save leftemap tingting blong yumi. Hemia nao samting we i hapen long Uwea sam yia bifo.

Uwe i wok olsem wan elda long wan kongregesen blong ol Witnes blong Jeova. Wan taem, hem i letem rong tingting i pulum hem, nao hem i mekem rabis fasin long saed blong seks. Fastaem, Uwe i mekem olsem King Deved, hem i no talemaot trabol ya, mo i gat tingting ya se Jeova bambae i ting nating nomo long bisnes ya. Sloslo, tingting blong hem i stap stikim hem, mekem se hem i talemaot rong ya long wan narafala elda, nao oli givhan long Uwe blong i kamgud bakegen long saed blong spirit.

Uwe i tanem tingting blong hem from sin blong hem, mo i stap klosap long Jeova mo kongregesen. Hem i glad tumas long ol advaes we hem i kasem, mekem se sam wik biaen hem i raetem leta i go long ol elda blong talem bigfala glad mo tangkiu we hem i gat from help we oli givim long hem. Hem i raetem se: “Yufala i givhan long mi blong karemaot doti ya long nem blong Jeova.” Uwe i holem fasin fren we hem i gat wetem Jeova mo, sam taem i pas, nao hem i save mekem wok olsem elda bakegen insaed long semfala kongregesen.

“Wan Man Olsem Yumi Nomo”

Elaeja i laef sam handred yia afta long Deved, mo i wan long ol faswan profet blong Isrel. Elaeja i sapotem trufala wosip long taem we kruked fasin mo rabis fasin i kam antap. Hem i neva lego wosip blong hem long Jeova. !Taswe, man ya we i tekem ples blong hem, Elisa, i singaot Jeova se ‘God blong Elaeja’!​—2 King 2:14.

Nating se i olsem, Elaeja i no defren long ol man long wol ya. Jemes i talem se: “Elaeja i wan man olsem yumi nomo.” (Jemes 5:17) Eksampol, afta we Elaeja i spolem ol man Isrel we oli wosipim Bal, Kwin Jesebel i wantem kilim hem i ded. ?Elaeja i mekem wanem? Hem i fraet mo i ronwe i go haed long draeples. Nao i sidaon long sed blong wan smol tri, mo i krae i se: “[Jeova], mi mi harem nogud tumas. Plis yu tekemaot laef blong mi. I moa gud mi mi ded.” Elaeja i no moa wantem mekem wok blong profet, be i wantem hem i ded nomo.​—1 King 19:4.

Be, Jeova i kasem save long filing blong Elaeja. God i givim paoa long Elaeja, mo i talem long Elaeja se i gat sam narafala man blong hem we oli stap holemstrong long trufala wosip. Mo tu, Jeova i trastem yet Elaeja mo hem i gat wok yet blong givim long Elaeja.​—1 King 19:5-18.

Filing blong Elaeja we i trabol i no minim se God i no moa glad long hem, nogat. Klosap 1,000 yia biaen, taem bodi blong Jisas Kraes i jenis fored long Pita, Jemes, mo Jon, Jeova i jusum blong soem Moses mo Elaeja long wan vison we tufala i stanap long saed blong Jisas. (Matiu 17:1-9) Yes, Jeova i tingbaot Elaeja olsem wan profet we ol man oli save folem eksampol blong hem. Nating se Elaeja i “wan man olsem yumi nomo,” God i tinghae long wok blong hem blong stanemap trufala wosip bakegen mo leftemap nem blong Hem.

Faet Blong Yumi Agensem Ol Nogud Filing

Maet ol man blong Jeova tede tu oli harem se tingting i foldaon, no oli wari long sam samting. !Yumi save haremgud taem yumi save se Elaeja tu i harem nogud long tingting blong hem! Mo yumi haremgud blong save se Jeova i kasem save taem yumi stap faet agensem ol filing ya, sem mak olsem we Hem i savegud ol filing blong Elaeja.​—Ol Sam 103:14.

Maet long wan saed, yumi lavem God mo ol man raonabaot long yumi, mo yumi wantem blong mekem wok blong Jeova blong talemaot gud nius blong Kingdom. Be long narasaed, maet tingting blong yumi i foldaon from we ol man oli no lesin long gud nius. Maet yumi wari long sam nogud tok we ol enemi blong tru wosip oli sakem blong agensem yumi. Be, Jeova i save givhan long ol man blong hem tede, olsem we hem i givhan long Elaeja blong gohed. Tingbaot eksampol blong Herbert mo Gertrud.

Long yia 1952, Herbert mo Gertrud, tufala i kam ol Witnes blong Jeova long Leipzig, we fastaem hem i stap insaed long Demokratik Ripablik blong Jemani. Long taem ya laef blong ol man blong God i no isi, from we gavman i putum tabu long wok blong prij. ?Herbert i harem olsem wanem taem hem i mekem wok ya blong prij long haos wanwan?

“Samtaem mifala i wari. Taem mifala i go long wok blong prij, mifala i no save sipos ol man long gavman bambae oli luk mifala mo holem mifala.” ?Wanem samting i givhan long Herbert mo ol narafala blong winim fraet ya? “Mifala i stadi plante long Baebol mifala wan. Nao Jeova i givim paoa long mifala blong gohed long wok blong prij.” Herbert i gat fulap ekspiriens long wok blong prij we i leftemap tingting blong hem mo i mekem hem i haremgud tu.

Herbert i mitim wan woman we i no olfala tumas, mo woman ya i intres long Baebol. Taem Herbert i kambak blong mekem visit long woman ya, i gat wan man i stap mo i lesin long storian blong tufala. Afta we sam minit i pas Herbert i luk wan samting we i mekem hem i seksek. I gat wan hat blong polis antap long wan jea we i stap long kona blong rum ya. Hat ya i blong yangfala man ya, we i wan polis mo i wantem holem Herbert.

Man ya i talem se: “!Yu yu wan Witnes blong Jeova, mi wantem luk aedentiti kad blong yu!” Herbert i givim kad blong hem long polis ya. Nao wan samting i hapen we i mekem Herbert i sapraes. Woman ya i lukluk polis ya mo i talem long hem se: “Sipos wan nogud samting i kasem man ya blong God, mi mi no moa wantem yu yu kam long haos blong mi.”

Man ya i stop smol, nao i givimbak kad blong Herbert mo i lego hem. Herbert i kasem save biaen se polis man ya i fren wetem gel blong woman ya. I klia se, hem i no holem Herbert from we hem i wantem gohed blong fren wetem gel blong woman ya.

Mekem Jeova i God Blong Yumi

?Yumi save lanem wanem from ol stori ya? Olsem Ebraham, yumi mas gat strong bilif long ol promes blong Jeova. Yumi mas lukluk i go long Jeova mo tanem tingting blong yumi from ol mastik blong yumi, olsem Deved. Mo olsem Elaeja, yumi mas dipen long Jeova blong i givim paoa long yumi taem yumi wari long wan samting. Taem yumi mekem olsem ya, yumi save mekem Jeova i kam God blong yumi naoia, mo blong olwe, from we hem i “God ya we i laef, . . . mo we i save sevem olgeta man, be antap moa, hem i sevem yumi ya we yumi bilif long hem.”​—1 Timoti 4:10.

[Futnot]

[Tok blong pija long pej 25]

Bilif blong Ebraham i strong moa taem hem i obei

[Tok blong pija long pej 26]

Olsem Deved, yumi mas tanem tingting taem yumi mekem sin

[Tok blong pija long pej 28]

Jeova i savegud filing blong yumi, olsem we hem i savegud ol filing blong Elaeja