Baebol i Talem Wanem

?Yumi Save Haremgud Taem Yumi Wosipim God?

“MI MI bilif mo mi lavem God,” hemia toktok blong wan woman we i talem se hem i Kristin. Nao, hem i gohed, i talem se: “Be . . . mi mi les blong go long jos.” ?Yu gat ol semfala tingting olsem woman ya? From we sam man oli les mo oli no moa glad long jos, oli mekemap ol fasin blong wosipim God long prapa tingting blong olgeta nomo.

I no longtaem i pas, wan niuspepa i talem se plante man tede oli mekem wosip long God folem prapa tingting blong olgeta nomo. Be olgeta we oli wantem haremgud taem oli wosipim God, bambae oli no save glad sipos oli stap folem tingting blong olgeta nomo. ?From wanem? From we bambae oli harem nogud bakegen long semfala samting ya nomo we i bin mekem oli harem nogud long jos blong olgeta fastaem. Yes oli no kasem samting we oli rili nidim.

Samting ya i pulum yumi blong tingbaot kwestin ya se: ?Sipos yumi folem ol tijing blong Baebol, bambae yumi les mo yumi no moa glad? !Nogat! Tingbaot ol tok blong wan man blong raetem Sam long Baebol, we i se: “!Yufala i kam, yumi presem Hae God! . . . Hae God, hem i mekem yumi. Yufala i kam, yumi bodaon, yumi nildaon long fes blong hem, yumi mekem wosip long hem.”—Ol Sam 95:1, 6.

Wan narafala man blong raetem Sam i singsing blong presem Jeova i se: “Yu nomo yu Hae God, yu nao yu hae King blong olgeta ples long wol.” Baebol i talem se Jeova i wan “hapi God,” mo olgeta we oli wosipim hem bifo mo tede tu, oli glad.—Ol Sam 83:18; 1 Timoti 1:11, NW.

Stamba Blong Trufala Glad

Stamba blong trufala glad long wosip blong yumi, hemia blong luksave samting we Jeova i mekem blong soemaot lav long yumi. ?Wanem samting ya? Baebol i talem se: “God i laekem tumas wol ya [ol man], taswe hem i givim stret Pikinini blong hem [Jisas Kraes], wan nomo we hem i gat, blong ol man we oli soemaot se oli bilif long hem bambae oli no save lus, bambae oli save kasem laef blong olwe.”—Jon 3:16, NW.

Taswe, olsem Baebol i talem, God “i wantem sevem olgeta man, mo i wantem we olgeta man bambae oli save trutok blong hem.” (1 Timoti 2:3, 4) Hemia i no minim nomo se yumi mas save samting we wanwan vas blong Baebol i talem. Be, yumi mas stadi dip long Baebol wetem tingting ya se yumi rili wantem blong “haremsave” mining blong ol vas ya. (Matiu 15:10) Blesing we yu save kasem from fasin blong stadi long Baebol, hemia se: “Bambae yu faenem save blong God.” !Yes samting ya bambae i mekem yu yu glad!—Ol Proveb 2:1-5.

Long faswan handred yia, ol man long taon ya Berea, long Masedonia, oli kasem glad ya. Taem aposol Pol i go blong talemaot gud nius long olgeta, olgeta ya “oli wantem tumas blong harem tok ya. Mo evri dei oli stap ridimgud ol tok blong Baebol blong luksave sipos ol samting ya oli tru, no olsem wanem.” Oli no save gat strong tingting ya sipos oli les no oli no glad blong stadi long Baebol.—Ol Wok 17:11, NW.

Jisas i talem se: “Olgeta we oli wantem stret fasin, olsem we man we i hanggri i wantem kakae, man we i tosta i wantem dring, oli save glad, from we bambae oli fulap gud long hem.” (Matiu 5:6, NW) Olsem man we fastaem i hanggri tumas, nao i stat bakegen blong kakaegud evri dei, plante man tede tu oli glad from we oli stap kakae gud long saed blong spirit. From samting ya, olsem ol man Berea, “plante long olgeta oli [kam man blong] bilif.”—Ol Wok 17:12.

Rod Blong Laef

Ol trufala Kristin long faswan handred yia oli folem “Rod blong Masta,” hemia wan tok we oli yusum long Ol Wok 9:2 blong tokbaot niufala fasin blong laef we ol faswan Kristin ya oli folem. Tede olgeta we oli wantem glad taem oli wosipim God oli mas mekem i sem mak. Oli mas letem trutok blong Baebol i jenisim tingting mo fasin blong laef blong olgeta evri dei.

Aposol Pol i talem long ol man Efesas se: “Yufala i mas sakem olfala fasin blong laef blong yufala we yufala i stap folem bifo.” Be, hem i talem se oli nidim blong mekem narafala samting moa, i se: “Yufala i mas putum niufala fasin blong laef we God i wokem olsem we hem i wantem. Laef ya i kamaot long stret fasin mo fasin blong stap tru long hem oltaem.”—Efesas 4:22-24, NW.a

Taem yumi mekem olsem advaes ya i talem, yumi mekem sam jenis long laef blong yumi we i laenap wetem wil blong God, ale yumi haremgud bigwan mo yumi save glad. ?Fasin ya blong haremgud mo glad i kamaot long wanem? Pol i raet long ol Kristin blong Kolosi se oli mas jenisim sam samting blong ‘mekem laef blong olgeta i kam stret gud olsem we Masta blong yumi i wantem, nao hem bambae i save glad long olgeta.’ (Kolosi 1:10) !Yes, taem yumi save se God i glad long samting we yumi stap mekem, ale yumi tu bambae yumi glad! Antap long hemia, Jeova i mekem i isi long yumi blong yumi save mekem hem i “glad.” ?Olsem wanem hem i mekem samting ya? Hemia taem hem i fogivim yumi.

Yumi evriwan i sinman taswe yumi nidim blong God i fogivim sin blong yumi. Long 1 Timoti 1:15, aposol Pol i talem se: “Jisas Kraes i kam long wol ya blong sevem ol man nogud.” Taem Jisas i givim laef blong hem from yumi, yumi gat janis ya blong God i fogivim yumi. Taswe wan trufala Kristin i save haremgud we tingting blong hem i no moa stikim hem from ol rong blong bifo. I olsem se God i tekemaot wan hevi baden long hem from we hem i fogivim sin blong hem. Man i save gat klin tingting mo i glad blong save se sipos hem i mekem ol samting we Jeova i wantem, Jeova bambae i fogivim ol sin blong hem.

Narafala Risen Blong Glad

Taem wan man i stat blong wosipim trufala God, hem i no mas ting se hem wan nomo i stap mekem olsem. Deved, man blong raetem Sam, i talem se: “Taem ol man oli talem long mi se, ‘Yumi go long haos blong Hae God,’ mi mi glad tumas.” (Ol Sam 122:1) Tru ya, sipos yumi joen oltaem long ol Kristin miting wetem ol trufala man blong God, yumi save glad moa.

Wan man i raetem toktok ya afta we hem i bin joen long wan miting blong ol Witnes blong Jeova, i se: “Oli welkamem mifala wetem kaen fasin mo oli givhan gud long mifala, samting ya i soem se oli joengud. Kwaet fasin mo gudfala fasin blong ol yangfala i mas mekem olgeta mo papa mama blong olgeta tu i glad. Mi wantem talem tangkiu tumas we yufala i singaot mi i kam long miting ya we i rili tajem hat blong mi mo i mekem mi glad tumas.”

Yu tu yu save faenem glad taem yu wosipim Jeova, olsem Deved bifo, hem i glad tumas blong mekem wosip long Jeova. Hem i talem se: “!Yumi glad, yumi mekem wosip long hem! !Yumi kam long fes blong hem, yumi singsing!” (Ol Sam 100:2) Olgeta we oli wosipim trufala God wetem wan tingting we i stret bambae oli glad tumas long wosip blong olgeta.

[Futnot]

?YU YU BIN TINGBAOT?

◼ ?Wanem stamba blong trufala wosip?—1 Timoti 2:3-6.

◼ ?Wanem samting we ransom sakrefaes blong Jisas i mekem we i save givim glad long yumi?—1 Timoti 1:15.

◼ ?Olsem wanem ol Kristin miting oli save mekem yumi glad long wosip long yumi?—Ol Sam 100:1-5.

[Tok blong pija long pej 10]

Taem yumi joen wetem narafala blong stadi long Baebol, yumi save haremgud