Ogenaesesen We i Mekem Wok Blong Jeova
Japta 13
“Mekem Olgeta Samting Blong Leftemap Nem Blong God”
YUMI givim laef blong yumi finis long God blong kam ol man blong hem mo karem nem blong hem. Taswe yumi mas soemaot ol gudfala fasin blong Jeova long olgeta toktok mo wok blong yumi. Aposol Pol i talem wan rul we i save lidim yumi, i se: “Nating se yufala i stap kakae, no yufala i stap dring, no yufala i stap mekem enikaen narafala samting, be yufala i mas mekem olgeta samting blong leftemap nem blong God.” (1 Kor. 10:31, NW ) Blong mekem olsem, yumi mas folem ol stret loa blong Jeova, we oli soemaot ol gudfala fasin. (Kol. 3:10) God hem i tabu, mo yumi mas folem tabu fasin blong hem.—Efes. 5:1, 2.
Aposol Pita i wantem we ol Kristin oli kasem save long samting ya, taswe hem i talem se: “Yufala i mas obei long God. Yufala i no letem ol samting ya we yufala i wantem bifo, taem we yufala i no save hem yet, oli pulum tingting blong yufala bakegen. God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala i mas klin gud long olgeta samting we yufala i mekem. Long Baebol God i talem se, ‘Yufala i mas tabu, yufala i mas klin gud, olsem we mi mi tabu, mi klin gud.’ ” (1 Pita 1:14-16) Olsem ol man Isrel bifo, ol memba blong Kristin kongregesen tede oli mas tabu mo klin. Hemia se, oli no mas letem sin mo fasin blong wol ya i mekem olgeta oli doti. Oli mas stap klin mo defren long ol narafala man blong oli save mekem wok blong Jeova.—Eks. 20:5.
Blong stap tabu, yumi mas folem ol loa mo rul blong Jeova we Baebol i talemaot klia nomo. (2 Tim. 3:16) Long stadi blong yumi long Baebol, yumi kasem tijing finis long ol wei blong Jeova mo yumi kam klosap long hem. Be blong kam wan man blong hem, i no naf blong lanem sam stamba tijing blong Baebol nomo mo tekem baptaes. Taem yumi stadi Baebol, yumi kasem save se yumi mas lukaot Kingdom blong God fastaem long laef blong yumi, mo ol samting we Jeova i wantem oli mas kam moa impoten bitim ol narafala samting long laef blong yumi. (Mat. 6:33; Rom 12:2) Blong mekem olsem, yumi mas wokem wan niufala fasin blong laef.—Efes. 4:22-24.
STAP KLIN LONG WOSIP MO FASIN
Samtaem i no isi blong obei long ol stret loa blong God mo holem promes we yumi mekem taem yumi givim laef blong yumi i go long hem. Enemi blong yumi, Setan, hem i wok strong blong pulumaot yumi long trutok. Mo tu, fasin blong rabis wol ya i save pulum yumi, mo sin we i stap long bodi blong yumi i save mekem i hadwok blong yumi folem ol loa blong God. Taswe yumi mas faet oltaem long saed blong spirit. Baebol i talem se yumi no mas sapraes taem samfala oli agensem yumi no yumi kasem ol traem. Sam samtaem yumi mas kasem trabol olsem, from we yumi folem stret fasin. (2 Tim. 3:12) Be yumi save haremgud, from we taem yumi kasem traem, samting ya i soemaot se yumi stap mekem ol samting we God i wantem.—1 Pita 3:14-16; 4:14-16.
Nating se Jisas i stret gud olgeta, be hem i lanem fasin blong obei from ol trabol we hem i kasem. Hem i neva letem wan traem blong Setan i winim hem mo i neva letem ol fasin blong wol oli pulum hem. (Mat. 4:1-11; Jon 6:15) Hem i neva gat tingting blong lego ol rod blong Jeova blong folem wan fasin blong wol, nogat. From we hem i holemstrong long God, ol man blong wol oli no laekem hem. Be nating, hem i gohed nomo blong folem ol stret loa blong Jeova. Smoltaem bifo we hem i ded, hem i givim woning long ol man blong hem se ol man blong wol bambae oli no laekem olgeta, bambae oli agensem olgeta, olsem we oli no laekem hem oli agensem hem, from we hem i no man blong wol ya. I stat long taem ya, ol man blong Jisas Kraes oli kasem plante trabol. Be oli save se Pikinini blong God i winim wol ya finis, mo samting ya i givim paoa long olgeta.—Jon 15:19; 16:33; 17:16.
Sipos yumi no wantem we ol fasin blong wol oli winim yumi, yumi mas holemtaet ol stret loa blong Jeova olsem we Jisas i bin mekem. Yumi no mas joen long politik mo ol plan blong wol ya blong mekem laef blong ol man i kamgud moa. Antap long hemia, yumi mas faet agensem ol rabis fasin blong wol ya. Yumi mas tinghevi long ol advaes blong Jemes 1:21 se: “Yufala i mas sakemaot olgeta rabis fasin i gowe long laef blong yufala. God i putum tok we i save sevem yufala i stap finis long tingting blong yufala, nao yufala i mas mekem tingting blong yufala i stap daon, blong harem tok ya.” Oltaem yumi mas stadi mo go long ol miting blong putum trutok i stap strong long tingting mo hat blong yumi. Nao bilif blong yumi bambae i stap strong mo yumi save stanap strong taem yumi kasem traem no trabol. Ol samting blong wol oli save pulum yumi bigwan, be yumi no mas stat blong wantem ol samting ya. ?From wanem? Jemes i givim strong woning ya se: “Yufala i olsem woman we i stap livim man blong hem, i stap go wetem narafala man. ?Weswe? ?Yufala i no save se man we i wantem tumas ol fasin blong wol, hem i kam enemi blong God? Taem yufala i wantem tumas ol fasin blong wol, be semtaem nomo yufala i kam enemi blong God.” (Jem. 4:4) ?Yu yu luksave nao from wanem Baebol i givim strong advaes se yumi mas folem ol stret loa blong Jeova mo stap longwe long ol fasin blong wol?
Baebol i givim woning long yumi se yumi no mas mekem rabis fasin mo ol fasin blong sem, i se: “From we yufala i tabu, mo yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman mo ol narafala krangke fasin olsem, mo fasin blong man we i wantem evri samting, bambae yufala i no tokbaot.” Taswe yumi no mas letem tingting blong yumi i stap long ol fasin we oli doti, oli blong sem nomo, mo ol rabis fasin, mo yumi no mas storian long ol samting ya tu. Yumi no mas lukluk ol stori long televisin no ol sinema we oli soemaot ol rabis fasin mo ol fasin blong sem. (Efes. 5:3-5) Sipos yumi blokem ol samting ya, yumi soemaot we yumi holemtaet ol klin mo stret loa blong Jeova long saed blong fasin we yumi mas folem.
KLIN LONG BODI
Ol Kristin oli mas stap klin long saed blong spirit mo fasin. Antap long hemia, oli mas luksave tu se i impoten blong stap klin long bodi. Long taem bifo, tabu God ya Jeova i talem long ol man Isrel se oltaem oli mas mekem we ples blong olgeta i stap klin. (Dut. 23:14) Oli mas folem ol loa blong Jeova long saed blong fasin klin. Yumi tu, yumi mas klin blong bambae Jeova i no save luk “wan samting we i no stret” long yumi.
Baebol i joenem fasin blong stap klin long bodi wetem tabu fasin. Olsem nao, Pol i raetem se: “Ol fren. . . . Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God, mo yumi man blong hem nomo.” (2 Kor. 7:1) Taswe, ol trufala Kristin oli mas swim oltaem blong mekem bodi blong olgeta i klin, mo oli mas wasem klos blong olgeta. Maet samting ya i no isi long sam kantri. Be klosap oltaem ol Kristin man mo woman oli save faenem naf sop mo wota blong wasem bodi mo klos blong olgeta mo blong ol pikinini blong olgeta.
Ol man long ples blong yumi oli save gud yumi from we yumi stap prij long olgeta oltaem. Sipos oli luk we haos mo yad blong yumi i klin, samting ya i save givim gudfala witnes long olgeta. Evriwan long famle oli save joen blong mekem ples i stap klin. Ol papa tu oli mas lukaotgud long haos mo yad, from we oli save se sipos i no gat doti mo sipos ol samting oli stap long stret oda, bambae ol man raonabaot oli leftemap nem blong Jeova from. Ol hed blong famle oli mas luksave se wok ya wetem wok blong lidim famle long saed blong spirit, i soemaot se oli stap lukaotgud long famle blong olgeta. (1 Tim. 3:4, 12) Ol mama tu oli mas givhan blong mekem ples i stap klin, speseli insaed long haos. (Taet. 2:4, 5) Papa mama i mas tijim ol pikinini tu blong oli stap klin long bodi blong olgeta mo blong klinim mo stretem rum blong olgeta. Olsem nao, olgeta evriwan long famle oli wok wanples blong lanem mo folem klin fasin we i mekem olgeta oli rere blong laef long niufala wol aninit long rul blong Kingdom blong God.
Plante man blong Jeova tede oli yusum trak blong go long miting mo long wok blong prij. Long sam ples, oli no save go prij sipos oli no gat trak. From samting ya, ol Kristin oli mas lukaotgud long trak blong olgeta blong i klin oltaem mo i rongud. Haos mo trak blong yumi i mas soemaot se yumi ol man blong Jeova we yumi klin mo yumi tabu.
Klos mo hea blong yumi tu i mas laenap wetem ol rul blong God. Sipos yumi mas go stanap long fored blong wan haeman blong gavman, i sua se klos mo hea blong yumi i no olbaot. Ale, taem yumi stap prij no toktok long platfom long nem blong Jeova, yumi mas lukaot moa se klos mo hea blong yumi i stret. Sipos ol man oli luk we hea mo klos blong yumi i stret, samting ya i save pulum olgeta blong tinghae long wosip blong Jeova. I nogud yumi putum klos we oli no stret mo yumi spolem tingting blong narafala. (Maeka 6:8; 1 Kor. 10:31-33; 1 Tim. 2:9, 10) Taswe, taem yumi stap mekemrere from wok blong prij no blong go long miting, seket asembli, no bigfala asembli, yumi mas tingbaot ol tok blong Baebol se bodi blong yumi i mas klin mo klos mo hea blong yumi i mas stret. Sipos yumi mekem olsem, bambae yumi leftemap nem blong Jeova oltaem mo givim ona long hem.
Yumi mas folem ol semfala rul taem yumi go visitim wan branj ofis blong ol Witnes blong Jeova. Yumi mas tingbaot se nem ya Betel i minim “Haos blong God.” Taswe klos, hea, mo ol fasin blong yumi oli mas sem mak olsem taem yumi go long ol miting long Haos Kingdom blong mekem wosip long Jeova.
OL GUDFALA PLEPLEI MO SAMTING WE YUMI MEKEM BLONG SPEL
Yumi nidim blong spel mo pleplei smol. Wan taem, Jisas i singaot ol disaepol blong hem blong oli folem hem i go long wan ples we i no gat man long hem, blong bambae oli “spel smol.” (Mak 6:31) Sipos yumi spel smol long wok blong yumi mo yumi mekem wan pleplei no wan narafala samting we yumi laekem, samting ya i save mekem yumi haremgud long tingting mo bodi blong yumi. Yumi kasem paoa bakegen blong gohed long wok blong yumi.
I gat plante samting we yumi save mekem blong spel mo pleplei, taswe ol Kristin oli mas folem waes we i kamaot long God mo jusumgud samting we oli mekem. I gud blong spel mo pleplei smol, be hemia i no bigfala samting long laef blong yumi. Baebol i givim woning se: “Long ol las dei” (NW) ol man bambae oli “wantem tumas ol samting we oli stap harem gud long hem, i winim we oli stap lavem God.” (2 Tim. 3:1, 4) Bighaf blong ol samting we ol man tede oli kolem “spel” mo “pleplei” oli no stret, mo olgeta we oli wantem folem ol stret rul blong Jeova oli no save mekem ol samting ya.
Ol faswan Kristin oli no save joen long ol rabis pleplei we ol man long taem blong olgeta oli mekem blong haremgud. Long ol bigfala stadium long Rom, oli mekem sam man oli harem nogud tumas long bodi blong olgeta, mo ol narafala oli wajem olsem we i wan pleplei nomo. Ol pleplei blong ol man Rom oli fulap long fasin blong faet, kilim man i ded, mo rabis fasin long saed blong seks. Be ol faswan Kristin oli no joen nating long ol pleplei ya. Ol pleplei blong ol man tede tu oli fulap long ol nogud fasin ya, mo ol man we oli gat rabis tingting oli laekem ol pleplei ya. Taswe ‘yumi mas lukaot gud long ol fasin blong yumi,’ mo yumi no mas joen long ol nogud pleplei blong wol ya. (Efes. 5:15, 16; Sam 11:5) Mo tu, nating se wan pleplei i gud nomo, be sipos yumi mas stap wanples wetem ol man blong wol, oli save gat paoa long yumi mo pulum yumi blong mekem nogud fasin.—1 Pita 4:1-4.
I gat plante gudfala pleplei mo samting blong spel we ol Kristin oli save mekem, blong jenisim tingting smol mo haremgud bakegen long bodi mo tingting blong olgeta. Ol tok blong Baebol mo ol gudfala advaes long ol buk blong ol Witnes blong Jeova, oli givhan bigwan long saed ya.
Sam samtaem, maet wan Kristin famle i singaot sam narafala famle oli kam long haos blong olgeta blong haremgud tugeta. Samtaem i gat wan lafet blong mared no wan narafala lafet, nao oli singaot ol Kristin brata sista oli kam. (Jon 2:2) Man we i singaot ol narafala oli kam i mas save se wok blong hem nao blong meksua se i gat stret mo gudfala fasin nomo long lafet olsem. From samting ya, ol Kristin we oli gat fasin luksave, oli luk se i waes blong singaot sam man nomo, i no plante tumas, mo tu, i waes blong no letem ol lafet ya oli gohed longtaem tumas. Sipos i gat strong dring long ol lafet ya, be i mas gat smol nomo, i no plante. (Fil. 4:5, NW ) Blong mekem se ol Kristin lafet oli gud mo oli leftemap tingting, kakae mo dring i no mas stap olsem bigfala samting long ol lafet ya.
I klia se, taem i gat plante man i joen wanples, yumi mas lukaotgud long fasin blong yumi. Tingting blong haremgud we i stap long taem olsem i bin lidim samfala blong brekem ol rul blong stret Kristin fasin. Oli bin kakae mo dring tumas, mo samfala oli bin mekem sam narafala nogud fasin.
I gud nomo blong singaot ol narafala oli kam long haos blong yumi blong kakae, spel, mo storian. (1 Pita 4:9) Be taem yumi mekem olsem, i gud yumi tingbaot samfala long kongregesen we laef blong olgeta i no isi mo oli nidim kampani blong ol narafala. (Luk 14:12-14) Sipos wan Kristin i singaot yumi i kam long haos blong hem, fasin blong yumi i mas laenap wetem tok blong Mak 12:31. Oltaem i gud blong soemaot tangkiu from kaen fasin blong narafala.
Ol Kristin oli glad tumas long fulap presen we God i givim long olgeta, mo oli ‘stap kakae, dring, mo stap glad long ol samting we oli stap hadwok long hem.’ (Pri. 3:12, 13) Sipos yumi mekem ol samting ya mo ol narafala wok bakegen long fasin we i leftemap nem blong God, olgeta we oli kam joen wetem yumi bambae oli haremgud blong tingtingbak long ol gudfala taem ya. Bambae tingting blong olgeta i no trabol from, be bambae oli glad mo bambae oli kasem paoa long saed blong spirit.
OL WOK BLONG PIKININI LONG SKUL
Edukesen long skul i givhan bigwan long ol pikinini blong ol Witnes blong Jeova. Long skul, oli lanem blong rid mo raet. Mo plante narafala samting we ol yangfala oli lanem long praemeri skul mo haeskul i save halpem olgeta blong kasem ol gudfala mak long wok blong Jeova. Be long ol yia we oli stap skul, oli mas ‘tingbaot God we i mekem olgeta.’ Blong mekem olsem, oli mas putum ol samting long saed blong spirit i stap long fas ples long laef blong olgeta.—Pri. 12:1.
Sipos yu yu wan Kristin yangfala we yu stap skul yet, yu mas lukaotgud. Ol yangfala blong wol oli stronghed bitim mak, be yu yu no mas joen wetem olgeta long fasin ya. (2 Tim. 3:1, 2) I gat plante samting we yu save mekem blong blokem ol fasin blong wol. Jeova i no lego yumi we yumi no gat samting blong protektem yumi long ol denja blong wol, nogat. (Sam 23:4; 91:1, 2) Taswe yu mas yusum ol samting we Jeova i givim blong blokem paoa blong wol ya.—Sam 23:5.
Blong stap longwe long ol fasin blong wol, ol yangfala Witnes oli mas luksave se sipos oli joen long ol samting we ol narafala yangfala oli mekem afta long ol aoa blong skul, oli save kasem trabol. Maet ol yangfala long klas blong yu mo tija oli no kasem save long desisen blong yu blong no joen long ol samting ya. Be i moa impoten we yu yu mekem God i glad fastaem. Taswe, yu mas lesin long tingting blong yu we yu trenem finis folem ol tok blong Baebol, mo yu mas stanap strong long desisen blong yu blong no joen long ol fasin blong wol we oli agensem ol rul blong Baebol. Hemia ol fasin olsem, daonem ol narafala blong winim olgeta, mo leftemap kantri blong yu antap long ol narafala kantri. (Gal. 5:19, 26, NW ) Sipos yufala ol yangfala i lesin long advaes blong papa mama blong yufala we oli onagud long God, mo yufala i joen long ol miting blong kasem tijing mo blong kampani wetem ol narafala long kongregesen, samting ya bambae i halpem yufala blong folem ol stret loa blong Jeova oltaem.
WOK BLONG KASEM MANE MO OL MAN WE YUMI WOK WETEM OLGETA
Baebol i talem se ol papa oli mas wok blong kasem ol samting we famle blong olgeta i nidim. (1 Tim. 5:8) Nating se i olsem, oli save se from we oli man blong wok blong God, wok blong Kingdom i mas kam fastaem long wok blong winim mane. (Mat. 6:33; Rom 11:13) Sipos oli onagud long God mo oli glad nomo long smol kakae mo klos we oli gat, bambae oli no kasem ol wari mo foldaon long ol trap we ol man blong ronem mane oli harem nogud long olgeta.—1 Tim. 6:6-10.
I no ol hed blong famle nomo, be olgeta Kristin we oli givim laef blong olgeta i go long God, we oli mas tingbaot ol rul blong Baebol long saed blong wok blong winim mane. Taem yumi wok blong kasem ol samting blong laef we yumi nidim, yumi mas folem stret fasin nomo. Yumi no save mekem sam wok we i agensem loa blong God no loa blong gavman. (Rom 13:1, 2; 1 Kor. 6:9, 10) Mo tu, yumi mas tingbaot oltaem se sipos yumi joen wetem ol man we oli gat nogud fasin, oli save spolem gudfala fasin blong yumi. Yumi, yumi olsem ol soldia blong Kraes, taswe yumi no joen long olkaen bisnes we oli agensem ol Kristin fasin no we oli save spolem yumi long saed blong spirit. (2 Tim. 2:4) Mo yumi no joen nating wetem ol skul blong Bigfala Babilon we oli enemi blong God.—Rev. 18:2, 4; 2 Kor. 6:14-17.
Sipos yumi folem ol stret rul blong God, bambae yumi no save yusum janis ya we yumi joen wanples wetem ol Kristin brata blong yumi, blong mekem bisnes blong yumi no wan narafala prapa wok blong yumi i go moa. Risen from wanem yumi joen wanples long ol miting blong kongregesen, ol seket asembli mo ol narafala asembli, i blong mekem wosip long Jeova. Yumi joen blong tekem kakae long saed blong spirit long tebel blong Jeova mo blong kampani wetem ol narafala Kristin we oli leftemap tingting blong yumi mo yumi leftemap tingting blong olgeta. (Rom 1:11, 12; Hib. 10:24, 25) Taem yumi joen wanples olsem, ol storian blong yumi oli mas stanap long ol samting long saed blong spirit nomo.
OL KRISTIN OLI MAS JOENGUD
Blong folem ol stret rul blong Jeova, ol man blong hem oli mas ‘holem pis, blong oli save joen gud oltaem.’ (Efes. 4:1-3) Olgeta wanwan oli no mekem samting we olgeta nomo oli wantem, be oli traem mekem i gud long ol narafala. Ating yu luksave finis se hemia nao fasin we i stap long Kristin kongregesen. Nomata se yumi kamaot long wanem laen, wanem kantri, nomata sipos famle blong yumi i gat haenem no nogat, yumi gat mane no nogat, be yumi evriwan i folem ol semfala stret loa blong Jeova. Plante man blong wol tu oli luksave fasin ya we i makemaot ol man blong Jeova.—1 Pita 2:12.
Aposol Pol i makem bakegen stamba blong fasin joen gud, i se: ‘Yumi olsem wan bodi nomo. I gat wan spirit nomo i stap long yumi, mo long sem fasin, God i bin singaot yumi evriwan, blong yumi putum tingting blong yumi i stap long wan promes nomo. Yumi gat wan Masta nomo, mo yumi gat wan tok nomo we yumi bilif long hem, mo i gat wan baptaes nomo. Mo i gat wan God ya nomo, we hem i Papa blong olgeta man, i hae moa long olgeta man, i stap wok long laef blong olgeta man, mo laef blong hem i stap joen long laef blong olgeta man.’ (Efes. 4:4-6) Tok ya i soemaot klia se yumi mas gat wan tingting nomo long saed blong ol stamba tijing blong Baebol, mo long ol narafala save blong Baebol tu we i strong moa blong kasem. Sipos i olsem, yumi soem se yumi luksave Jeova olsem Haefala King blong yumi, mo se yumi glad blong mekem samting we hem i wantem. Tru ya, Jeova i givim wan klin lanwis blong trutok long ol man blong hem, blong oli save joen wanples blong mekem wok blong hem wetem wan tingting nomo.—Sef. 3:9.
Fasin joengud mo pis we i stap insaed long Kristin kongregesen tede i mekem olgeta we oli wosipim Jeova oli haremgud. Jeova i mekem promes blong hem i kamtru se: “Bambae mi tekem olgeta evriwan oli kam wanples bakegen. Bambae mi mekem olsem man blong lukaot long sipsip, we i tekem ol sipsip blong hem oli kambak long fenis blong olgeta.” (Maeka 2:12) Blong holemtaet pis mo fasin joengud, evri dei yumi mas laef folem ol stret rul blong Jeova, olsem ol tabu man blong hem.
!Olgeta we Jeova i letem olgeta blong oli stap insaed long klin kongregesen blong hem, oli save glad! I nating nomo we yumi mas livim plante samting we yumi nomo i wantem, blong yumi save karem nem blong Jeova. Taem yumi gohed blong frengud wetem Jeova, bambae yumi traehad blong folem ol stret rul blong hem mo blong halpem ol narafala man blong luksave se ol rul ya oli gud tumas.—2 Kor. 3:18.