Baebol i Talem Wanem

?God i Wantem We Yu Kam Rijman?

“!Hemia wan niufala dei we God i givim long mi! !Bambae mi mi wan rijman!”

“Mi wantem kam rijman​—from we God mo ol enjel oli wantem se mi kam rijman.”

“God i givim paoa long yumi blong yumi save kasem ol rij samting.”

“Mi gat plante samting from buk ya [Baebol].”

OL TOKTOK ya oli soemaot tingting blong plante man blong ol defdefren skul, we oli ting se ol sas samting we olgeta oli gat oli wan blesing blong God. Oli talem se sipos yu mekem wanem we God i wantem yumi blong mekem, bambae God i givim paoa long yu blong kasem ol gudfala samting long laef blong yu naoia, mo bambae i blesem yu long fiuja tu. Plante skul oli tijim samting ya, mo oli salem moa ol buk we oli leftemap tijing ya. ?Olsem wanem? ?“Tijing ya se God i blesem man we i mekem i gud,” i laenap wetem wanem we Baebol i talem?

I sua se, Man we i Wokem yumi, we Baebol i kolem hem se “hapi God,” i wantem se yumi tu yumi gat wan laef we i gud mo i hapi. (1 Timoti 1:11; Ol Sam 1:1-3) Antap moa, hem i blesem olgeta we oli mekem samting we hem i glad long hem. (Ol Proveb 10:22) ?Be long saed blong yumi tede, blesing ya we hem i givim, hemia blong gat plante samting long saed blong bodi? Yumi kasem klia ansa blong kwestin ya taem yumi tingbaot se wanem nao stamba tingting blong God long saed blong yumi.

?I Taem Naoia Blong Kam Rijman?

Longtaem bifo, Jeova i blesem sam long ol man blong hem taem hem i givim plante samting long olgeta. Tingbaot ol man olsem Job mo King Solomon. Jeova i blesem olgeta mo i givim plante samting long olgeta. (1 King 10:23; Job 42:12) Be i gat plante narafala man blong God tu olsem Jon Baptaes mo Jisas Kraes we oli no gat plante samting. (Mak 1:6; Luk 9:58) ?From wanem i olsem? Baebol i talem se, God i wok wetem ol man blong hem long sam samting folem stamba tingting blong hem mo long taem we i stret blong hem i mekem olsem. (Prija 3:1) ?Olsem wanem Jeova i mekem samting ya wetem yumi tede?

Ol profet tok blong Baebol oli soemaot se yumi laef long “lashaf blong fasin blong laef long wol ya,” no ol “lasdei” blong wol ya. Long ol lasdei ya bambae i gat ol bigfala faet, ol sik, kakae i sot, graon i seksek, mo komuniti i seraot. Stat long 1914, ol trabol ya oli kamaot long laef blong olgeta man mo oli kam antap kasem wan mak we neva i kasem bifo. (Matiu 24:3, NW; 2 Timoti 3:1-5; Luk 21:10, 11; Revelesen 6:3-8) !Yes, wol ya i olsem wan sip we klosap i draon! ?Taem yu luk se ol samting ya oli stap hapen, yu ting se i stret we God i blesem wanwan long ol man blong hem blong oli gat plante samting? ?Yu ting se God i gat wan narafala impoten samting we hem i wantem yumi blong putum long fasples long laef blong yumi?

Jisas Kraes i skelem taem blong yumi wetem taem blong Noa. Jisas i talem se: “Taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan, i tekemaot olgeta. Nao long taem ya we mi, mi Pikinini blong Man mi kamtru, bambae i sem mak nomo.” (Matiu 24:37-39) Jisas i skelem taem blong yumi wetem taem blong Lot tu. Ol man Sodom mo Gomora we oli laef raonabaot long Lot oli stap ‘kakae, oli stap dring, oli stap pem ol samting, oli stap salem ol samting, oli stap wokem garen mo oli stap wokem haos.’ Jisas i talem se: “Be long dei ya we Lot i aot long Sodom, faea mo salfa i kamaot long skae, i foldaon long ol man ya, i bonem olgeta evriwan i lus. Mo long taem ya we mi, mi Pikinini blong Man mi kamtru, nao ol man oli luksave mi, bambae i sem mak nomo.”—Luk 17:28-30.

I no rong blong kakae, dring, mekem mared, pem ol samting mo salem ol samting. Be samting we i no stret, hemia sipos yumi bisi tumas long ol samting ya, nao yumi no moa luksave se yumi laef long wan taem we i impoten tumas. I gud blong askem long yu wan se, ‘?Olsem wanem? ?God i stap mekem i gud long yumi sipos hem i blesem yumi wetem plante samting we oli mekem yumi wari long laef?’a Nogat. Ating hem i spolem yumi nomo. !Be hemia i no fasin blong God ya blong lav nating!—1 Timoti 6:17; 1 Jon 4:8.

!I Taem Naoia Blong Sevem Laef!

Long taem ya naoia we laef i strong tumas i bitim eni narafala taem long histri blong man, ol man blong God oli gat wan impoten wok blong mekem. Jisas i talem se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:14, NW) Ol Witnes blong Jeova oli obei long oda ya. Taswe, oli givhan long ol man raonabaot long olgeta blong oli kasem save long saed blong Kingdom mo wanem samting we God i askem long olgeta blong mekem, blong oli save kasem laef we i no save finis.—Jon 17:3.

Be God i no wantem we ol man blong hem oli mekem i strong tumas long olgeta wan, nao oli no gat ol samting long laef. Defren olgeta, hem i wantem se oli haremgud long wanem samting we oli gat finis, mo oli putum tingting blong olgeta i stap long wok blong hem. (Matiu 6:33) Mo hem bambae i meksua se oli kasem ol samting we oli nidim long laef. Hibrus 13:5 i talem se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem, from we God i talem se, ‘Bambae mi mi no save livim yu yu stap yu wan. Bambae mi mi no save lego yu samtaem.’”

God bambae i mekem promes ya i kamtru long wan nambawan rod taem hem i sevem “wan bigfala kampani” blong ol trufala man blong wosip long hem, oli aot long rabis wol ya mo oli go insaed long niufala wol we i gat pis mo oli save kasem plante samting. (Revelesen 7:9, 14, NW) Jisas i talem se: “Mi mi kam blong mekem rod blong ol sipsip oli save gat laef, mo blong laef ya blong olgeta [trufala man blong hem] i save fulap gud long evri samting.” (Jon 10:10) ‘Laef ya we i fulap gud long evri samting’ i no wan laef olsem tede we i fulap long plante samting long saed blong bodi. Laef ya hemia laef blong olwe long wan Paradaes aninit long rul blong Kingdom blong God.—Luk 23:43.

Sam man blong skul oli talem se sipos yu mekem samting we i gud, God bambae i blesem yu, i mekem yu yu rij mo i mekem we yu yu gat plante samting. Be yu no mas letem ol tingting olsemia oli pulum yu, nao yu no moa tingbaot samting we i moa impoten. I gud blong lesin long advaes we Jisas i givim wetem lav se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap, from we dei ya bambae i kasem olgeta man long wol.”—Luk 21:34, 35.

[Futnot]

?YU YU BIN TINGBAOT?

◼ ?Naoia i taem blong wanem samting?—Matiu 24:14, NW.

◼ Jisas i skelem taem blong yumi wetem taem blong sam man we Baebol i tokbaot. ?Hu ya olgeta?—Matiu 24:37-39; Luk 17:28-30.

◼ ?Wanem samting we yumi mas blokem sipos yumi wantem kasem laef blong olwe?—Luk 21:34.

[Tok blong makem poen long pej 25]

Tingting ya se sipos yu mekem samting we i gud, God bambae i blesem yu, i mekem yu gat plante samting, hemia rod blong no moa tingbaot samting we i moa impoten