Harem Gud Long Wanem Samting We Yu Gat Finis
1 Baebol i talem long yumi se yumi mas givim ol samting we famle blong yumi i nidim long saed blong bodi. Be hemia i no mas kam faswan samting long laef blong yumi. Ol samting long saed blong spirit oli mas stap long fas ples. (Mat. 6:33; 1 Tim. 5:8) Naoia, i hadwok blong skelem gud ol samting blong spirit mo ol samting blong bodi, from we ‘laef long wol ya i kam strong tumas.’ (2 Tim. 3:1) ?Wanem samting i save givhan long yumi?
2 Kasem Tingting Blong Baebol: Tok blong God i givim woning long yumi se sipos yumi ronem mane mo ol sas samting, bambae yumi save foldaon long saed blong spirit. (Pri. 5:10; Mat. 13:22; 1 Tim. 6:9, 10) Long impoten taem ya we yumi stap long hem, eniwan long yumi i save kasem bigfala trabol sipos yumi spenem tumas taem long wok blong winim mane, nao yumi putum ol samting long saed blong spirit—ol miting, stadi, mo wok blong prij—oli kam namba tu samting long laef blong yumi. (Luk 21:34-36) Baebol i givim advaes we i soemaot wan defren rod, i se: “Sipos yumi gat kakae blong yumi mo klos blong yumi, hemia i naf, yumi save harem gud.”—1 Tim. 6:7, 8.
3 Hemia i no min se ol Kristin oli mas laef olsem ol man we oli pua bitim mak. Nogat. Be vas ya i givhan long yumi blong luksave wanem samting yumi rili nidim long saed blong bodi—kakae, klos, mo haos we i naf long yumi mo i stret long ples we yumi stap long hem. Sipos yumi gat ol samting we yumi nidim blong laef, yumi no mas traem ronem moa samting. Taem yumi stap tingting blong pem wan samting no blong mekem moa wok blong winim mane, i gud blong askem kwestin ya: ‘?Mi mi rili nidim samting ya?’ Fasin ya bambae i givhan long yumi blong folem advaes ya we i kamaot long God se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem.”—Hib. 13:5.
4 Sipos yumi trastem Jeova, bambae hem i blesem yumi. (Prov. 3:5, 6) I tru se yumi mas wok had blong kasem ol samting we yumi nidim blong laef evri dei, be yumi no mas mekem wok ya i kam bigfala samting long laef blong yumi. Nating se yumi gat plante no yumi gat smol, be yumi dipen long Jeova nomo blong givim wanem we yumi nidim. (Fil. 4:11-13) From samting ya, yumi kasem glad we i kamaot long God wetem plante narafala blesing tu.
5 Folem Bilif Blong Ol Narafala: Wan Kristin mama we i no gat man blong hem, i stap tijim gel blong hem blong folem trutok. Blong mekem se laef blong hem i no moa fasfas, sloslo, hem i stap lego sam samting long saed blong bodi. Hem i gat wan naesfala haos wetem ol gudfala samting insaed long hem, be hem i girap, i muv i go long wan haos we i smol moa. Biaen, hem i muv i go long wan rum we i smol moa bakegen. Nao hem i katem ol aoa we hem i spenem long wok blong kasem mane, mo i yusum taem ya long wok blong prij. Afta we gel blong sista ya i kam bigwan mo i mared, mama blong hem i ritae bifo long stret taem blong hem, nating se samting ya i katem mane we kampani blong wok i givim long hem. Naoia i mekem seven yia we sista ya i joen long wok blong fultaem paenia. Hem i no sore we hem i bin lego sam samting long saed blong bodi blong putum wok blong Kingdom long fas ples long laef blong hem.
6 Wan elda mo woman blong hem tufala i mekem wok blong paenia blong plante yia, taem tufala i stap tijim trifala pikinini blong tufala. Famle ya i lanem blong harem gud long samting we oli nidim, be i no long ol samting we oli wantem. Brata i talem se: “Mifala i lanem blong laef wetem smol samting nomo. Mifala i bin fesem sam hadtaem, be oltaem Jeova i givim samting we mifala i nidim. . . . Taem mi luk we famle i stap putum ol samting long saed blong spirit long fasples olsem, mi harem se mifala i stap folem stret rod, mo mi harem gud.” Woman blong hem i talem se: “Taem mi luk we [man blong mi] i bisi oltaem long ol samting long saed blong spirit, mi harem gud tumas long hat blong mi.” Ol pikinini blong tufala tu oli glad we papa mama blong olgeta oli bin tekem disisen blong mekem wok blong Jeova fultaem.
7 Long saed blong olgeta we oli jusum blong ona gud long God i bitim we oli ronem ol sas samting, Baebol i promes se bambae oli kasem ol nambawan blesing naoia, mo laef we i no save finis long fiuja.—1 Tim. 4:8.