‘Hae God, Bambae Mi Wokbaot Raon Long Olta Blong Yu’

“HAE GOD. Mi wasem han blong mi blong soemaot we laef blong mi i klin long fes blong yu, nao mi stap wokbaot raon long olta blong yu, mi stap mekem wosip long yu.” (Ol Sam 26:6) King Deved blong bifo i bin talem ol tok ya blong talemaot we hem i onagud long Jeova. Be, ?from wanem hem i “wokbaot raon” long olta blong Jeova, mo wanem mining blong samting ya?

Long tingting blong Deved, stamba ples blong mekem wosip blong Jeova hemia long haos tapolen, we i gat olta ya blong mekem sakrefaes, we oli wokem long bras. Long taem we hem i rul olsem king, olta ya i stap long Gibeon, long not saed blong Jerusalem. (1 King 3:4) Saes blong olta ya i kasem 2.2 mita long fofala saed blong hem. Hem i smol moa long bigfala olta ya we bambae i stanap long yad blong tempel blong Solomon.a Nating se i olsem, Deved i glad tumas long haos prea ya wetem olta blong hem, we hem i stamba ples blong klin wosip long Isrel.​—Ol Sam 26:8.

Ol sakrefaes ya we i blong bonem i bon evriwan, wetem ol sakrefaes we i blong soemaot we man i stap fren gud wetem Hae God, ol sakrefaes we man i mas mekem blong tekemaot sin blong hem, mo ol sakrefaes ya tu, we man i mas mekem wan taem evri yia long Dei blong Stretem Sin, hemia sam long ol sakrefaes ya we nesen blong Isrel i mas mekem. Olta ya wetem ol sakrefaes we man i mekem long hem, i gat mining long ol Kristin tede. Aposol Pol i eksplenem se olta ya i pija blong olgeta samting we God i wantem mekem, we tru long olta ya nao Hem i bin agri long wan sakrefaes we i stret gud olgeta blong pemaot ol man. Pol i talem se: “Ol ‘samting ya we God i wantem,’ we tok ya i talem, oli mekem yumi tabu tumas, from we Jisas Kraes i givim bodi blong hem wan taem nomo, i no save mekem bakegen.”​—Hibrus 10:​5-​10, NW.

Taem ol pris oli mas mekem wok blong olgeta long olta, fastaem oli mas wasem han blong olgeta long wota blong wasemaot ol doti. Taswe i stret we King Deved i wasem han blong hem blong ‘soemaot we laef blong hem i klin’ bifo we hem i ‘wokbaot raon long olta.’ Hem i wok long ‘fasin we i stret gud, mo tok blong hem i tru oltaem.’ (1 King 9:4) Sipos hem i no folem fasin ya blong wasem han, bambae God i no save agri long wosip blong hem​—we i olsem fasin blong ‘wokbaot raon long olta.’ I tru se Deved hem i no blong laen blong ol Livaet, mo hem i no gat blesing ya blong mekem wok blong pris long olta. Mo nating se hem i king, hem i no gat raet tu blong go insaed long bigfala yad blong haos prea blong God. Be, hem i wan man Isrel we i gat bilif, hem i obei long Loa blong Moses mo evri dei hem i tekem ol sakrefaes blong hem i kam blong oli bonem long olta. Hem i mekem ful laef blong hem i laenap wetem klin wosip, i olsem we hem i stap wokbaot raon long olta.

?Tede, yumi save folem eksampel blong Deved? Yes. Yumi save wasem han blong yumi blong soemaot we laef blong yumi i klin mo yumi save wokbaot raon long olta blong God, sipos yumi soemaot bilif long sakrefaes blong Jisas, mo tu, sipos yumi ‘man we tingting blong yumi i klin mo laef blong yumi i stret,’ we yumi mekem wok blong Jeova wetem fulhat blong yumi.​—Ol Sam 24:4.

[Futnot]

[Tok blong pija long pej 23]

Olta hem i pija blong olgeta samting we Jeova i wantem mekem, we tru long olta ya nao, hem i agri long wan sakrefaes we i stret gud olgeta blong pemaot long olgeta man