Stadi 7
Kam Kolosap Long God Tru Long Prea
?From wanem i impoten blong prea oltaem? (1)
?Yu yu mas prea long hu, mo yu mas prea olsem wanem? (2, 3)
?Wanem sam samting we i stret blong tokbaot long prea? (4)
?Wetaem yu yu mas prea? (5, 6)
?God i lesin long olgeta prea? (7)
1. Prea, hem i fasin blong toktok long God wetem tingting daon. Yu mas prea long God evri dei. Long rod ya, bambae yu harem se yu kam kolosap long hem olsem we hem i wan gudfala fren. !Jeova i hae tumas mo i gat bigfala paoa, be hem i stap lesin long ol prea blong yumi! ?Yu yu prea long God evri dei?—Ol Sam 65:2; 1 Tesalonaeka 5:17.
2. Prea i wan haf blong wosip blong yumi. Taswe, yumi mas prea long God, Jeova, nomo. Taem Jisas i stap long wol, hem i prea long Papa blong hem nomo, i no long wan narafala man. Yumi mas mekem sem mak. (Matyu 4:10; 6:9) Be, olgeta prea blong yumi oli mas pastru long nem blong Jisas. Samting ya i soem se yumi respektem haenem we Jisas i gat, mo se yumi bilif long sakrifaes blong hem we i pemaot ol man.—Jon 14:6; 1 Jon 2:1, 2.
3. Taem yumi prea, yumi mas toktok long God wetem fulhat blong yumi. Yumi no mas talem bakegen ol semfala prea, no ridimaot prea blong yumi long wan buk. (Matyu 6:7, 8) Blong prea long God, yumi no nidim blong stanap no sidaon long wan spesel fasin, hemia nomo se fasin blong yumi i mas soem respek. Yumi save prea long eni taem, mo long eni ples. Mo tu, God i save harem prea we yumi talem long hat blong yumi nomo, be i no kamaot long maot blong yumi. (1 Samuel 1:12, 13) I gud blong faenem wan ples we i kwaet, we i no gat plante man long hem, blong prea yu wan long God.—Mak 1:35.
4. ?Yu save tokbaot wanem long ol prea blong yu? Eni samting we i save gat paoa long fasin fren blong yu wetem hem. (Filipae 4:6, 7) Prea we Jisas i tijim long ol aposol blong hem, i soem se yumi mas prea long saed blong nem blong Jeova mo stampa tingting blong hem. Yumi save askem sam samting long saed blong bodi, askem God blong i fogivim ol sin blong yumi, mo blong givhan long yumi blong agensem ol samting we oli pulum yumi blong mekem i no stret. (Matyu 6:9-13) Yumi no mas tingbaot yumi wan nomo long ol prea blong yumi. Yumi mas prea from ol samting we oli laenap wetem wil blong God nomo.—1 Jon 5:14.
5. Yu save prea long enitaem we hat blong yu i pusum yu blong talem tangkyu long God mo presem hem. (1 Kronikel 29:10-13) Yu mas prea taem yu gat ol problem, mo taem i gat sam samting we oli stap traem bilif blong yu. (Ol Sam 55:22; 120:1) I stret blong prea bifo yu kakae. (Matyu 14:19) Jeova i wantem se yumi prea “oltaem nomo.”—Efesas 6:18.
6. Yumi rili nidim blong prea sipos yumi mekem wan bigfala sin. Long ol taem olsem, yumi mas askem strong long Jeova blong hem i sore long yumi mo i fogivim yumi. Sipos yumi talemaot sin blong yumi long God, mo yumi traehad blong no mekem sin ya bakegen, bambae hem i ‘rere blong fogivim yumi.’—Ol Sam 86:5; Proveb 28:13.
7. Jeova i lesin long prea blong ol stret man nomo. Blong God i harem ol prea blong yu, yu mas traehad fulwan blong obei long ol loa blong hem long laef blong yu. (Proveb 15:29; 28:9) Yu mas gat tingting daon taem yu prea. (Luk 18:9-14) Yu mas wok folem samting we yu askem long prea blong yu. Long rod ya, bambae yu pruvum se yu gat bilif, mo se yu rili minim samting we yu talem. Afta long samting ya nomo, Jeova i save ansa long prea blong yu.—Hibrus 11:6.