Traem Lukaot Ol Gudfala Fasin Long Evri Man
“God blong mi. Plis yu yu tingbaot mi, mo yu mekem i gud long mi.”—NEHEMAEA 13:31.
1. ?Olsem wanem Jeova i stap mekem i gud long olgeta man?
TAEM ren i foldaon blong plante dei, nao hem i stop mo san i saen, ating ol man oli harem gud long jenis ya. Yes, jenis ya i mekem we oli glad. Long sem fasin, taem san i strong mo ples i drae blong longtaem, ol man oli glad we ren i foldaon—nating se hem i bigwan no i smol—hemia i mekem we oli harem gud mo ples i kolkol lelebet. Ol defdefren weta olsemia oli wan presen we i kamaot long Jeova, Man ya we i Wokem Yumi. Taem Jisas i tijim ol man, hem i tokbaot gladhat blong Jeova blong givim presen, i se: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala. Long fasin ya, bambae yufala i soemaot we yufala i pikinini blong Papa blong yufala long heven, from we hem i stap letem san blong hem i saen long ol gudfala man, mo long ol man nogud long sem mak nomo. Mo hem i stap sanem ren i kam long ol man we laef blong olgeta i stret, mo long olgeta we laef blong olgeta i no stret tu.” (Matiu 5:43-45) Yes, Jeova i mekem i gud long evri man. Ol man blong hem oli mas traehad blong folem fasin blong hem, taswe oli traem lukaot ol gudfala fasin long ol narafala.
2. (a) ?Wanem i pulum Jeova blong mekem i gud long ol man? (b) ?Taem Jeova i wajem samting we yumi mekem from kaen fasin blong hem, hem i lukluk wanem?
2 ?Wanem i pulum Jeova blong mekem i gud long ol man? Stat long taem we Adam i sin, Jeova i traehad blong faenem ol gudfala fasin long ol man. (Ol Sam 130:3, 4) Stamba tingting blong hem, hemia blong givim laef long Paradaes long olgeta man we oli obei long hem. (Efesas 1:9, 10) Kaengud fasin blong Jeova we yumi no gat raet nating blong kasem, i pulum hem blong wokem rod blong tekemaot yumi long sin, tru long Laen ya we hem i promes blong sanem. (Jenesis 3:15; Rom 5:12, 15) Man we i bilif long ransom, hem i gat janis blong kam stret gud olgeta long fiuja. Naoia, Jeova i stap wajem yumi wanwan mo hem i stap luk wanem we yumi mekem blong soemaot tangkiu from kaen fasin blong hem. (1 Jon 3:16) Hem i luk evri smosmol no bigfala samting we yumi mekem blong soemaot tangkiu long hem. Aposol Pol i raetem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem.”—Hibrus 6:10.
3. ?Wanem kwestin we yumi mas askem long yumi wan?
3 ?Taswe, olsem wanem yumi save folem fasin blong Jeova blong traem lukluk gudfala fasin blong narafala? I gud yumi tingbaot ansa long kwestin ya long fo defren pat blong laef blong yumi: (1) wok blong prij, (2) famle, (3) kongregesen, mo (4) fasin fren blong yumi wetem narafala.
Long Wok Blong Prij Mo Pulum Man i Kam Disaepol
4. ?Olsem wanem wok blong prij i soemaot se yumi stap lukaot gudfala fasin long narafala?
4 Taem ol disaepol blong Jisas oli askem hem blong talem mining blong parabol blong wit mo rabis gras, Jisas i eksplenem se, “garen ya, hemia wol ya.” Yumi ol disaepol blong Kraes tede, yumi luksave se ol tok ya oli tru, taem yumi mekem wok blong prij. (Matiu 13:36-38; 28:19, 20) Long wok ya blong prij, yumi talemaot bilif blong yumi long ol narafala man. Tede, ol man oli savegud ol Witnes blong Jeova from wok ya blong prij long ol haos wanwan mo long ol rod. Hemia wan pruf se yumi stap wok strong blong faenem olgeta ya we oli glad blong harem mesej blong Kingdom. Yes, Jisas i givim oda ya se: “Taem yufala i go long wan taon no wan vilej, yufala i mas faenem wan gudfala man we i glad blong yufala i go stap wetem hem.”—Matiu 10:11; Ol Wok 17:17; 20:20.
5, 6. ?From wanem yumi gobak bakegen mo bakegen long ol man long haos blong olgeta?
5 Taem yumi go long ol haos wanwan, ol man oli no save se bambae yumi kam. Long rod ya yumi luk trufala tingting no fasin we man i gat long mesej we yumi karem. Samtaem wan man long haos i glad blong lesin, be narafala i stap insaed mo i singaot se, “Mifala i no intres,” ale yumi mas aot. !Yumi harem nogud blong luk se fasin blong wan man blong no intres no blong agensem yumi, i mekem we narafala tu i no wantem lesin long yumi! ?Long taem olsem, yumi save mekem wanem blong gohed blong lukaot gudfala fasin long ol man?
6 Nekis taem we yumi prij long sem haos bakegen maet yumi gat janis blong toktok stret long man we i bin blokem storian blong yumi fastaem. Bifo we yumi gobak long haos ya bakegen, i gud blong rimemba wanem we i bin hapen fastaem, samting ya i save givhan long yumi blong reregud. Maet man ya i ting se hem i mekem i gud taem hem i blokem hemia we i intres blong i no lesin long nius blong Kingdom. Maet hem i mekem olsem from we hem i gat sam rong tingting long saed blong wok blong yumi. Be samting ya i no mas blokem yumi blong gohed blong talemaot gud nius blong Kingdom long haos blong man ya. Wetem waes fasin, yumi traem blong stretem sam long ol rong tingting we maet man ya i gat long saed blong yumi. Yumi wantem halpem olgeta man blong oli kasem stret save blong God. Maet biaen bambae Jeova i pulum man ya i kam long hem.—Jon 6:44; 1 Timoti 2:4.
7. ?Wanem i save halpem yumi blong gat gudfala tingting taem yumi prij long ol man?
7 Taem Jisas i toktok long ol disaepol blong hem blong givim save long saed blong wok blong prij, hem i tokbaot fasin agens we bambae i save kamaot insaed long ol famle. Hem i talem long olgeta se: “Mi kam blong mekem yang boe i agens long papa blong hem mo yang gel i agens long mama blong hem, mo yang woman i agens long mama blong man blong hem.” Mo hem i ademap se: “Bambae man i gat ol enemi blong hem, we olgeta oli famle blong hem nomo.” (Matiu 10:35, 36) Be i tru tu se, laef mo fasin blong man i save jenis. Ol samting olsem sik, ded, disasta, filing we i harem nogud bigwan, mo plante narafala samting bakegen oli save gat paoa long fasin we man i mekem long yumi taem yumi prij. ?Sipos yumi gat nogud tingting ya se ol man we yumi prij long olgeta bambae oli neva lesin, yumi rili stap lukaot gudfala fasin long olgeta? I moagud yumi soem se yumi glad blong prij long haos blong olgeta bakegen samtaem. Maet yumi sek we fasin blong olgeta long nekis taem ya i defren. Samtaem, i no toktok we yumi talem we bambae i jenisim tingting blong olgeta be maet hemia fasin blong yumi blong talem tok ya. Prea long Jeova bifo we yumi stat blong prij, hemia tu bambae i halpem yumi blong gat gudfala tingting mo blong talemaot gud nius blong Kingdom long fasin we i pulum man.—Kolosi 4:6; 1 Tesalonaeka 5:17.
8. ?Taem ol Kristin oli traem lukaot gudfala fasin blong ol famle blong olgeta we oli no bilif, samting ya i karem wanem frut?
8 Long sam kongregesen i gat plante memba blong sem famle we oli wosipim Jeova. Plante taem, ol yangfala long ol famle ya oli mekem disisen blong folem trutok from we oli luk fasin blong wan olfala long famle we i gohed strong long trutok. Oli luk we olfala ya i joengud wetem famle mo i gat wan mared we i strong, ale samting ya i pulum ol yangfala ya blong respektem hem mo blong jenisim tingting blong olgeta. Plante Kristin waef tu, oli folem advaes blong aposol Pita nao oli pulum hasban blong olgeta i kam long trutok, we ‘oli no nid blong talem wan samting long olgeta.’—1 Pita 3:1, 2.
Insaed Long Famle
9, 10. ?Olsem wanem Jekob mo Josef tugeta i lukaot gudfala fasin long famle blong olgeta?
9 Insaed long famle tu yumi nidim blong lukaot ol gudfala fasin blong yumi ya we blad i joenem yumi. Tingbaot lesen ya we Jekob i soem long fasin we hem i mekem long ol pikinini boe blong hem. Long Jenesis japta 37, vas 3 mo 4, Baebol i talem stret se Jekob i laekem moa Josef. From samting ya, ol brata blong Josef oli jalus, gogo, oli wantem kilim Josef i ded. Be, makemgud fasin blong Jekob mo Josef, plante yia biaen. Tufala tugeta i lukaot gudfala fasin long ol memba blong famle blong olgeta.
10 Taem ol man olbaot long kantri blong Ijip oli stap trabol long kakae, Josef i bos long wok ya blong givimaot kakae we ol man oli nidim. Long taem ya hem i welkamem ol brata blong hem. Fastaem, hem i no talemaot long olgeta se hem i hu, be hem i meksua se oli gat inaf kakae blong olgeta, mo inaf kakae blong karem i gobak long olfala papa blong olgeta. Yes, nating se ol brata ya oli bin mekem i nogud tumas long Josef, be Josef i mekem i gud long olgeta. (Jenesis 41:53–42:8; 45:23) Jekob i soem sem fasin. Taem hem i stap slip we klosap bambae i ded, hem i talemaot blesing i go long ol boe blong hem. Nating se nogud fasin blong samfala i mekem se papa i karemaot sam blesing long olgeta, be hem i givim graon long evriwan long olgeta. (Jenesis 49:3-28) !Jekob i rili soem wan gudfala eksampol blong lav we i stap olwe!
11, 12. (a) ?Wanem eksampol we wan profet i givim blong soem se i impoten blong lukaot gudfala fasin blong narafala insaed long famle? (b) ?Yumi lanem wanem long eksampol blong papa ya we Jisas i tokbaot long parabol blong boe we i lusum rod?
11 Longfala tingting we Jeova i soem taem nesen blong Isrel i mekem stronghed i givim moa save long yumi long fasin blong hem blong lukaot gudfala fasin long ol man. Jeova i yusum famle laef blong profet Hosea olsem wan pija blong lav blong hem wan we i no save lus samtaem. Woman blong Hosea, nem blong hem Goma, i mekem i krangke long man blong hem plante taem. Nating se i olsem, Jeova i talem long Hosea se: “Yu go luk woman blong yu bakegen. Nating we hem i stap mekem i krangke wetem narafala man, be yu mas soemaotgud long hem we yu yu lavem hem. Yu mas lavem hem mo yu mas mekem i gud long hem, stret olsem we mi mi lavem yufala. Nating we ol man ples blong yu oli stap folem ol narafala god, mo oli stap tekem ol grep we oli sandrae long hem, oli givim i go long olgeta olsem presen blong olgeta, be mi mi stap lavem yufala yet, mo oltaem mi stap mekem i gud tumas long yufala.” (Hosea 3:1) ?From wanem Jeova i talem olsem? Jeova i save se insaed long nesen ya we i mekem stronghed, i gat wanwan man we bambae oli jenisim fasin blong olgeta from we hem i gat longfala tingting. Hosea i talemaot se: “Mo biaen, bambae yufala [ol man Isrel] i tanem tingting blong yufala, yufala i kambak long Hae God bakegen, from we hem nao i God blong yumi. Mo bambae yufala i kambak tu long man we i laen blong King Deved ya bifo, blong hem i king blong yumi. Nao bambae yumi ona gud long Hae God, mo bambae yumi glad blong karem ol presen we hem i givim long yumi.” (Hosea 3:5) Taem yumi fesem sam trabol insaed long famle i gud blong tingbaot gudfala eksampol ya. Sipos yu gohed blong lukaot gudfala fasin blong ol narafala memba blong famle, bambae yu soem gudfala eksampol blong longfala tingting.
12 Parabol blong Jisas long saed blong boe we i lusum rod, hemia tu i save givhan long yumi blong save olsem wanem blong lukaot gudfala fasin blong ol memba blong famle blong yumi. Yangfala boe ya i gobak long famle blong hem afta we hem i finis long ol rabis fasin long laef blong hem. Papa blong hem i mekem i gud long hem, i soem sore long hem. ?Be papa ya i mekem wanem taem fasbon boe blong hem i stat toktok smosmol agensem smol brata blong hem? Papa ya i toktok i go long fasbon boe ya i se: “Pikinini blong mi. Oltaem yu yu stap klosap long mi, mo olgeta samting blong mi oli blong yu.” Papa ya i no talem samting ya blong daonem no jikim fasbon boe blong hem. Hem i talem olsem blong mekem boe ya i luksave se papa ya i lavem hem yet. Hem i gohed i se: “Be i stret nomo blong yumi mekem lafet ya, yumi glad, from we brata ya blong yu we i olsem we hem i ded finis, naoia hem i laef bakegen. Hem i lus, be naoia yumi faenem hem bakegen.” Long sem fasin, yumi tu yumi save lukluk gudfala fasin blong ol man.—Luk 15:11-32.
Insaed Long Kristin Kongregesen
13, 14. ?Wanem wan rod blong wokem lav we i stamba loa blong king blong yumi insaed long Kristin kongregesen?
13 From we yumi Kristin, yumi traehad blong wokem lav we hem i wan stamba loa blong King blong yumi. (Jemes 2:1-9) I tru, maet yumi no tingting tumas long fasin blong wanwan insaed long kongregesen we maet oli rij moa no pua moa long yumi. Be olsem wanem long kala blong skin, kalja no skul we yumi evriwan i kamaot long hem. ?Yumi stap letem ol samting ya oli seraotem yumi yet? ?Sipos yes, olsem wanem yumi save putum advaes blong Jemes long hat blong yumi mo mekem i wok?
14 Taem yumi mekem welkam long evri man we i kam long ol Kristin miting, yumi pruvum se long hat blong yumi, yumi gat lav. Taem yumi go toktok wetem ol niuwan we oli kam long Haos Kingdom, yumi givhan long olgeta blong lusum fraet no sem we maet oli gat fastaem. Yes, ol fasin olsem nao oli mekem we sam niuwan we oli kam fastaem long ol Kristin miting oli talem se: “Evriwan oli gat fasin blong frengud wetem mi. I olsem se oli save mi finis. Mi filim olsem se mi pat blong famle blong olgeta.”
15. ?Olsem wanem blong halpem ol yangfala long kongregesen blong oli soem intres long ol olfala?
15 Long sam kongregesen, taem miting i finis, sam yangfala oli hivap wanples long wan kona blong Haos Kingdom no maet afsaed. Oli no traem blong joen wetem olgeta we oli olfala moa insaed long kongregesen. ?Wanem wan gudfala samting blong mekem blong stopem fasin olsem? Fastaem, hemia wok blong ol papa mama blong trenem ol yangfala blong olgeta long haos mo mekem se oli reregud from ol miting. (Ol Proveb 22:6) Maet oli givim wok long yangfala blong rerem ol defdefren buk we oli nidim blong karem i go long miting. Mo tu, ol papa mama nao oli naf moa blong leftemap tingting blong ol pikinini blong olgeta blong storian wetem ol olfala mo olgeta we oli sik insaed long Haos Kingdom. Taem ol yangfala ya oli gat wan gudfala samting blong talem long ol narafala, oli glad from we oli filim se oli mekem wan gudfala samting.
16, 17. ?Olsem wanem ol bigman long kongregesen oli save lukaot gudfala fasin long ol yangfala?
16 I gud tu we ol olfala brata mo sista oli soem intres long ol yangfala long kongregesen. (Filipae 2:4) Oli save tekem faswan step blong talem ol tok blong leftemap tingting blong ol yangfala. Plante taem yumi lanem sam nambawan poen long ol miting. Ol olfala oli save askem long ol yangfala sipos oli bin laekem miting ya mo sipos i gat sam poen we oli rili bin laekem we yumi save mekem i wok. Ol yangfala oli wan impoten haf blong kongregesen, taswe i gud sipos evriwan insaed long kongregesen oli soem se oli tinghae long fasin blong ol yangfala blong lesingud long ol miting. I gud blong presem ol yangfala from ansa we oli mekem no from wan tok we oli mekem long miting. Taem ol yangfala ya oli kam bigwan moa, fasin we oli mekem long ol olfala long kongregesen mo fasin blong olgeta blong mekem ol defdefren wok long haos, bambae i soemaot se oli naf blong lukaot long sam bigbigfala wok.—Luk 16:10.
17 Taem ol yangfala oli agri blong mekem moa wok, oli save gru moa long saed blong spirit mo kam naf blong kasem sam bigfala wok insaed long kongregesen. Mo tu, taem ol yangfala oli stap bisi long ol wok olsem, oli no gat taem blong folem ol krangke fasin. (2 Timoti 2:22) Ol wok ya we oli givim long ol yangfala brata i ‘traem olgeta fastaem’ blong luk ‘sipos oli naf’ blong kam man blong givhan. (1 Timoti 3:10) Fasin blong olgeta ya blong tekpat long ol miting mo wok strong long wok blong prij, mo fasin blong olgeta blong intres long ol memba blong kongregesen, i save givhan long ol elda blong luksave sipos oli naf blong karem moa wok.
Lukaot Ol Gudfala Fasin Long Evri Man
18. ?Wanem trap we ol elda oli mas lukaot long hem taem oli jajem man, mo from wanem?
18 Ol Proveb 24:23 i talem se: “Fasin ya we man blong mekem kot i stap lesin long wan saed nomo, hem i nogud olgeta.” Sipos ol elda oli gat waes we i kamaot long God bambae oli lukaot se oli no mekem i gud moa long wan man bitim narawan taem oli stretem wan bisnes long kongregesen. Jemes i talemaot se: “Fasin blong man we i kasem waes we i kam long heven, hem i narafala. Nambawan samting blong hem, laef blong hem i klin gud, mo hem i man blong pis, i kwaet man, i man blong joen gud long narafala man, mo i man we i gat sore long man. Waes blong man ya i gat plante gudfala frut long laef blong hem. Hem i no save jajem man long fasin we i no stret, mo hem i no save giaman.” (Jemes 3:17) Be long semtaem we ol elda oli lukaot gudfala fasin blong narafala, oli no mas letem fasin fren we oli gat wetem man ya no filing blong olgeta tu i mekem se oli blaen long trabol we i rili stap. Asaf, wan man blong raetem Sam, i talem se: “God i stap mekem kot long heven, hem i stap jajem ol haeman ya we oli gat paoa blong jajem man. Hem i talem se, ‘Yufala i mas lego fasin ya we yufala i stap jajem ol man long fasin we i no stret. Bambae yufala i no moa saed long ol man nogud bakegen.’ ” (Ol Sam 82:1, 2) Folem advaes ya, taem ol Kristin elda oli mas stretem wan bisnes insaed long kongregesen, oli sakemaot eni filing no tingting we i save pulum olgeta blong mekem i gud moa long wan brata no sista we i gud fren no famle blong hem. Long rod ya nao oli leftemap pis mo oli letem spirit blong Jeova i wok long kongregesen.—1 Tesalonaeka 5:23.
19. ?Olsem wanem yumi save lukaot gudfala fasin long narafala?
19 Taem yumi lukaot gudfala fasin blong ol brata sista blong yumi, yumi soem sem tingting ya we Pol i gat taem hem i toktok long kongregesen blong Tesalonaeka. “Mo Masta ya blong yumi, hem i stap mekem mitrifala i trastem yufala, se naoia yufala i stap mekem olsem we mitrifala i talem long yufala, mo we bambae yufala i gohed blong mekem olsem.” (2 Tesalonaeka 3:4) Taem yumi lukaot gudfala fasin long narafala, bambae yumi no hareap blong luk ol mastik blong olgeta. Bambae yumi lukaot samting we yumi save talem blong presem ol brata blong yumi, i bitim we yumi lukaot samting blong daonem olgeta from. Pol i raetem se: “Sipos wan masta i putum wok long han blong bos blong ol man blong hem, man ya bambae i mas lukaot gud blong mekem ol samting we masta blong hem i talem long hem.” (1 Korin 4:2) Fasin blong evri Kristin brata mo sista blong stap tru long God i mekem se yumi tinghae long olgeta evriwan, i no se yumi tinghae nomo long olgeta we oli gat bigfala wok insaed long kongregesen. Samting ya i pulum yumi i kam klosap moa long olgeta, nao Kristin fasin fren blong yumi i kam strong moa. Yumi karem tingting olsem we Pol i gat long ol brata long taem blong hem. Yes, ol brata blong yumi oli ‘stap givhan long yumi blong talemaot long ol man we God i King,’ mo oli ‘mekem yumi harem gud tumas.’ (Kolosi 4:11) Taem yumi gat tingting olsem, yumi soemaot tingting we i olsem Jeova.
20. ?Wanem ol blesing we bambae yumi kasem sipos yumi lukaot gudfala fasin blong ol man?
20 I sua se bambae yumi wantem talem tok olsem Nehemaea taem hem i prea se: “God blong mi. Plis yu yu tingbaot mi, mo yu mekem i gud long mi.” (Nehemaea 13:31) !Yumi glad tumas we Jeova i lukaot gudfala fasin blong ol man! (1 King 14:13) I gud yumi mekem i sem mak taem yumi joen wetem ol narafala. Ale, taem yumi mekem olsem, yumi gat hop se God bambae i pemaot yumi wetem ransom blong Kraes mo bambae yumi kasem laef we i no save finis long niufala wol we, naoia, i klosap tumas.—Ol Sam 130:3-8.
?Bambae Yu Yu Ansa Olsem Wanem?
• ?From wanem, Jeova i mekem i gud long evri man?
• ?Olsem wanem blong lukaot gudfala fasin blong ol man
• taem yumi prij?
• long famle blong yumi?
• long kongregesen blong yumi?
• taem yumi fren wetem evri man?
[Tok blong pija long pej 18]
Nating se ol brata blong Josef oli no laekem hem fastaem, Josef i luk gudfala saed blong olgeta
[Tok blong pija long pej 19]
Taem man i agensem yumi, samting ya i no blokem yumi blong traem givhan long hem
[Tok blong pija long pej 20]
Nating se sam pikinini blong Jekob oli mekem nogud, Jekob i tingbaot olgeta evriwan taem hem i blesem olgeta
[Tok blong pija long pej 21]
I gud yumi welkamem evriwan long ol Kristin miting