Wan Fasin Blong Holholem Bebi
MAN BLONG WEKAP! LONG SPEN I RAETEM STORI YA
ANITA, we i wan yangfala mama blong Naejeria, i mekem bebi blong hem i swim, nao biaen hem i holholem bodi blong bebi. Tufala tugeta oli harem gud long taem ya. Anita i talem se: “Hemia wan fasin we ol mama long Naejeria oli mekem longtaem finis i kam. Mama blong mi i bin holholem mi mo ol brata blong mi olsem. Hemia wan gudfala rod blong mekem ol masel blong bebi oli kam strong mo blong mekem bebi i harem gud. Taem mi stap holholem bebi blong mi, mi singsing mo toktok long hem, ale hem i mekem ol smosmol noes long trot blong hem mo i smael long mi. !Hemia i wan gudfala taem!”
Long plante kantri oli folem fasin ya blong holholem bebi, mo naoia, sam big kantri tu oli stap tekem fasin ya. Wan grup long Spen we i gat plante save long fasin ya blong holholem ol bebi, i talem se, taem mama mo papa i holholem bebi long fasin we i slo mo i kaen, hemia i mekem se tufala i toktok wetem bebi mo bebi i haremsave ol filing blong tufala. Long kaen fasin, tufala i rabrabem tufala leg blong bebi, wetem baksaed, jes, bel, han, mo fes blong hem.
?Taem papa mama i holholem bebi, olsem wanem samting ya i givhan long hem? Stamba samting se bebi i haremsave lav mo fasin kea blong tufala. I no naf blong givim kakae nomo long wan niufala bebi, hem i nidim we papa mama i lavem hem tu. Taem yumi bebi, yumi haremsave finis han we i tajem yumi. Taswe, sipos papa mama tufala i holholem bebi blong tufala long kaen fasin, bambae hem i save filim lav we tufala i gat long hem. Tru long fasin ya, bebi i save kasem save ol fasin mo filing blong tufala. Sipos papa mama tufala i stat blong holholem bebi blong tufala taem we hem i jes bon, hemia i save givhan long tufala blong oli kam klosap moa long bebi ya mo blong trifala i laeklaekem trifala.
Antap long hemia, fasin ya i save tijim bebi blong slakem ol masel blong hem. Ale, maet samting ya i givhan long hem blong i slip gud mo i no wari. Taem yumi holholem bebi, hemia i save givhan blong mekem ol masel blong hem oli kam strong mo blong mekem blad i ron gud long ol string. Bel blong bebi i save tantanem gud ol kakae mo bebi i save pulum gud win. Sam man oli talem se fasin ya blong holholem bebi i save givhan tu long bodi blong bebi blong i blokem ol sik. Hem i save mekem se bebi i kamgud moa long fasin blong tajem mo lukluk ol samting, mo blong harem ol noes. From samting ya, bebi i save rimemba mo lanem samting.
Sam hospital oli stadi finis long fasin ya blong holholem bebi. Oli faenem se, taem bebi i bon eli, bifo long stret taem blong hem, nao oli holholem hem, hem i save aot long hospital samwe long seven dei bifo long ol narafala we oli no holholem olgeta. Mo kilo blong bebi ya klosap i 47 pesen antap long ol narafala.
!Taswe, i no ol bigfala man nomo we oli haremgud taem wan man i holholem olgeta! Taem yumi holholem wan bebi, hemia i no mekem se hem i slakem bodi blong hem nomo. Hem i haremsave lav blong yumi tu, tru long ol han blong yumi we oli kaengud, mo tru long bigfala smael we yumi givim long hem.