Japta Leven
Holem Pis Insaed Long Famle
1. ?Wanem sam samting we oli save mekem famle i rao?
OL FAMLE we oli gat lav, fasin blong kasem save long filing blong narafala, mo pis, insaed long olgeta, oli haremgud. I gud sipos famle blong yu i olsem. Be, sore tumas, plante famle oli no olsem, mo oli rao from ol defren risen. ?Wanem samting i save mekem rao i kamaot long famle? Long japta ya, bambae yumi tokbaot tri samting. Long sam famle, i no olgeta memba we oli folem semfala skul. Long sam narafala famle, ol pikinini oli no gat semfala papa mo mama. Sam narafala famle bakegen oli hadwok tumas blong kasem ol samting blong laef, no oli wantem plante tumas sas samting. Ale, samting ya i mekem se famle i no joengud. Be, samting we i mekem wan famle i rao, maet i no mekem narafala famle i rao. ?From wanem i olsem?
2. ?Samfala oli lukluk weples blong kasem advaes long saed blong famle, be wanem i beswan stampa blong ol advaes olsem?
2 Wan samting, hemia tingting blong ol wanwan memba blong famle. Sipos oli rili traehad blong kasem save long tingting blong ol narafala long famle, bambae i isi moa blong luksave olsem wanem blong mekem famle i joengud. Namba tu samting, hemia stampa blong advaes we i lidim yumi. Plante man oli folem advaes blong ol man we oli wok wetem olgeta, ol man we oli stap raonabaot long olgeta, ol man blong raetem nyuspepa, mo ol narafala man. Be, samfala oli lukaot advaes long Baebol we i stret long laef blong olgeta, nao oli folem advaes ya. ?Olsem wanem samting ya i save givhan blong holem pis insaed long famle?—2 Timote 3:16, 17.
SIPOS HASBAN I GAT NARAFALA SKUL
3. (a) ?Baebol i givim wanem advaes long saed blong fasin blong mared wetem wan man no woman we i gat defren bilif? (b) ?Wanem sam stampa rul we oli stret yet long hasban mo waef, nating se wan long tufala i no gat bilif?
3 Baebol i givim strong advaes agensem fasin blong mared wetem wan man no woman we i gat narafala skul. (Dutronome 7:3, 4; 1 Korin 7:39) Be, maet yu bin kasem save long trutok blong Baebol afta we yutufala i mared, mo hasban blong yu i no wantem. ?Olsem wanem sipos i olsem? Promes we yutufala i mekem long taem blong mared i stap sem mak. (1 Korin 7:10) Baebol i soem klia se mared i blong olwe. Mo hem i talem long tufala we i mared, se tufala i mas stretem ol smosmol problem bitwin long tufala, i bitim we tufala i traem blong ronwe long ol problem ya. (Efesas 5:28-31; Taetas 2:4, 5) ?Be, olsem wanem sipos hasban blong yu i agensem yu strong from yu stap folem skul we i stanap long Baebol? Maet hem i traem blokem yu blong no go long ol miting blong kongregesen. Maet hem i talem se, hem i no wantem we waef blong hem i stap go long olgeta haos wanwan blong tokbaot skul. ?Bambae yu mekem wanem?
4. ?Long wanem rod Kristin waef i save soem se hem i kasem save long filing blong hasban blong hem we i gat defren bilif?
4 Tingbaot, ‘?From wanem hasban blong mi i gat tingting olsem?’ (Proveb 16:20, 23) Sipos hem i no rili kasem save long samting we yu stap mekem, maet hem i wari long yu. Maet ol famle blong hem oli tok long hem from we yu no moa joen long sam kastom we oli ting se oli impoten. Wan hasban i talem se: “Taem mi stap mi wan long haos, mi harem se waef blong mi i lego mi.” Man ya i harem se wan skul i stilim waef blong hem. Be from we tingting blong hem i flas lelebet, hem i no wantem talemaot se hem i harem nogud blong stap hem wan. Maet i gud we yu eksplenem long hasban blong yu se, lav we yu gat long Jeova i no save mekem se yu no moa laekem hem olsem bifo. Meksua se yu spenem plante taem wetem hem.
5. ?Sipos hasban i gat defren skul, Kristin waef i mas skelemgud wanem samting?
5 Be, sipos yu wantem winim problem ya long waes fasin, yu mas tingbaot wan narafala samting we i moa impoten. Baebol i talem long ol waef se: ‘Yufala woman we i mared, yufala i mas obei long ol man blong yufala, from we fasin ya i stret long fes blong Masta.’ (Kolosi 3:18) Olsem nao, Baebol i givim woning agensem tingting blong no wantem obei long hasban. Be tu, vas ya i tokbaot fasin ya blong obei long hasban se, ‘hem i stret long fes blong Masta.’ Hemia i soem se, fasin blong obei long hasban i joen wetem fasin blong obei long Masta. Taswe, waef i mas skelemgud tufala fasin ya.
6. ?Wanem ol rul we Kristin waef i mas tingbaot?
6 Wan Kristin i mas go long olgeta miting blong kongregesen, mo talemaot long ol narafala, bilif blong hem we i stanap long Baebol. Hemia ol impoten haf blong trufala wosip we hem i no mas fogetem. (Rom 10:9, 10, 14; Hibrus 10:24, 25) Oraet, ?bambae yu mekem wanem sipos wan man i givim oda long yu blong no obei long wan samting we God i askem long yu blong mekem? Ol aposol blong Jisas Kraes oli talem se: “Mifala i mas obei long God, mifala i no save obei long ol man nomo.” (Ol Wok 5:29) Ol aposol ya oli soem rod we yumi save folem long laef blong yumi. ?Lav we yu gat long Jeova bambae i pusum yu blong givim wosip long hem, olsem hem i gat raet blong kasem? Long semtaem, ?lav mo respek we yu gat long hasban blong yu, bambae i pusum yu blong folem ol rod we oli no mekem hem i harem nogud, blong givim wosip mo ona long Jeova?—Matyu 4:10; 1 Jon 5:3.
7. ?Kristin waef i mas gat strong tingting blong mekem wanem?
7 Jisas i soem se i no oltaem we yu save faenem wan rod we i no mekem hasban i harem nogud. Hem i givim woning se bambae plante man oli agensem trufala wosip. From samting ya, long sam famle, samfala we oli folem Baebol bambae oli harem se oli seraot long famle blong olgeta. I olsem we wan naef blong faet i seraotem famle. (Matyu 10:34-36) Samting ya i hapen long wan woman long Japan. Hasban blong hem i agensem hem blong 11 yia. Hasban ya i kilim hem nogud, mo plante taem, hem i lokem doa blong woman ya i no save kam insaed long haos. Be waef blong hem i stanap strong. Ol fren long Kristin kongregesen oli givhan long hem. Oltaem hem i prea, mo ol tok blong 1 Pita 2:20 oli leftemap tingting blong hem bigwan. Kristin woman ya i bilif se sipos hem i stanap strong, wan dei bambae hasban blong hem i joen wetem hem long wosip blong Jeova. Mo i tru, biaen, samting ya i kamaot.
8, 9. ?Waef i mas mekem wanem blong hasban i no gat risen blong tok agens?
8 I gat plante samting we yu save mekem blong jenisim tingting blong hasban blong yu. Eksampel, sipos hasban i agensem skul blong yu, yu mas lukaotgud blong no mekem ol narafala samting we hem i save toktok smol from. Klinimgud haos blong yu. Meksua se yu luk naes oltaem. Talem plante toktok long hem blong soem lav mo tangkyu. Yu no mas daonem hem long toktok blong yu, be yu mas sapotem hem. Soem se yu lukluk i go long hem blong lidim yu. Yu no mas givimbak long hem sipos yu harem se hem i mekem i no stret long yu. (1 Pita 2:21, 23) Tingbaot se yumi evriwan i no stretgud olgeta. Sipos wan rao i kamaot, yu nao yu mas faswan blong mekem tingting blong yu i stap daon mo talem sore.—Efesas 4:26.
9 Ol miting oli no mas mekem se yu let blong rerem kakae blong hasban blong yu. Mo tu, maet yu jusum wan taem we hasban blong yu i no stap long haos, blong joen long Kristin wok blong prij. I moa waes sipos wan Kristin waef i no traem prij long hasban blong hem we i no wantem lesin. I moa gud we hem i folem advaes blong aposol Pita, se: “Yufala woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man ya blong yufala oli luk we fasin blong yufala i klin gud, mo i blong ona nomo, hemia i naf blong pulum olgeta. Bambae i no moa gat samting se yufala i mas go tok long olgeta.” (1 Pita 3:1, 2) Ol Kristin waef oli traehad blong kamgud moa blong soemaot ol frut blong tabu speret blong God.—Galesia 5:22, 23.
TAEM WAEF I NO FOLEM KRISTIN BILIF
10. ?Kristin hasban i mas soem wanem fasin long waef we i gat defren bilif?
10 ?Olsem wanem sipos hasban i folem Kristin bilif be waef i no folem? Baebol i givim advaes long saed ya. Hem i talem se: ‘Sipos wan long yufala i gat woman blong hem we i no bilif long Kraes, be woman ya i agri blong stap gud wetem hem, man ya i no save livim woman ya.’ (1 Korin 7:12) Bakegen, Baebol i givim advaes long ol hasban, se: “Yufala man we i mared, yufala i mas laekem tumas ol woman blong yufala, yufala i mas mekem i gud long olgeta.”—Kolosi 3:19.
11. ?Olsem wanem hasban i save soem fasin luksave mo hed long waef blong hem long waes fasin, sipos waef i no folem Kristin bilif?
11 Sipos waef blong yu i no gat semfala bilif olsem yu, yu mas lukaotgud blong soem respek long hem mo tingbaot ol filing blong hem. Hem i bigwan finis. Taswe, hem i fri blong folem ol bilif blong skul blong hem, nating se yu no agri wetem ol bilif ya. Yu no mas ting se, long faswan taem we yu tokbaot bilif blong yu long hem, hem i mas sakemaot ol bilif we hem i holem longtaem finis. Yu no mas talem stret se ol kastom blong skul we hem mo famle blong hem oli tinghae long olgeta longtaem finis, oli gyaman. Long defren fasin, sloslou, yu save traem mekem hem i tingtinggud long Baebol. Maet hem i ting se yu no moa intres long hem from we yu spenem plante taem long ol wok blong kongregesen. Maet hem i agensem ol wok we yu mekem blong wosip long Jeova, be maet trufala tingting we i stap pusum hem blong mekem olsem, hemia se: “!Mi mi nidim we yu spenem moa taem wetem mi!” Mekem tingting blong yu i longfala. Sipos yu soemaot lav mo fasin blong tingbaot hem, maet samting ya bambae i givhan long hem blong folem trufala wosip.—Kolosi 3:12-14; 1 Pita 3:8, 9.
TIJIM OL PIKININI
12. ?Olsem wanem hasban mo waef we tufala i gat defren bilif, oli save folem ol rul blong Baebol blong tijim ol pikinini?
12 Taem papa mo mama i no folem semfala skul, samtaem rao i save kamaot se, ?hu nao bambae i tijim ol pikinini long saed blong skul? ?Olsem wanem blong folem ol rul blong Baebol long saed ya? Baebol i talem se papa nao i mas mekem bighaf blong wok ya blong tijim ol pikinini. Be, mama tu i gat wan impoten wok blong mekem long saed ya. (Proveb 1:8; skelem wetem Jenesis 18:19; Dutronome 11:18, 19.) Nating sipos papa i no luksave Kraes olsem hed blong hem, be hem i stap yet olsem hed blong famle.
13, 14. ?Waef i save mekem wanem sipos hasban i blokem hem blong tekem ol pikinini oli go long ol Kristin miting mo blong stadi Baebol wetem olgeta?
13 Sam hasban we oli no bilif, oli no agensem waef taem hem i wantem tijim ol pikinini long saed blong skul. Be, sam hasban oli agens. ?Olsem wanem sipos hasban blong yu i no wantem se yu tekem ol pikinini oli go long ol miting blong kongregesen, mo maet hem i blokem yu tu blong stadi Baebol wetem olgeta long haos? Naoia, yu mas skelemgud ol wok blong yu—wok we yu mas mekem i go long Jeova God, long hasban we i hed blong yu, mo long ol pikinini blong yu we yu laekem olgeta tumas. ?Olsem wanem blong mekemgud trifala wok ya evriwan?
14 I sua se, yu mas prea long bisnes ya. (Filipae 4:6, 7; 1 Jon 5:14) Be biaen, yu nao yu mas jusum weswan rod blong folem. Sipos yu yusum waes fasin, mo mekem i klia long hasban blong yu se yu no stap traem blong mekem wok blong hem olsem hed blong famle, maet bambae hem i no moa agensem yu tumas. Nating sipos hasban blong yu i blokem yu blong tekem ol pikinini oli go long miting, mo blong stadi Baebol wetem olgeta, yu gat rod yet blong tijim olgeta. Long ol storeyan blong yufala evri dei mo from gudfala eksampel blong yu, traem tijim olgeta sloslou blong laekem Jeova, blong bilif long Tok blong hem, blong soem respek long papa mama—papa blong olgeta tu—blong tingbaot mo soem lav long ol narafala, mo blong traehad long ol wok blong olgeta. Biaen, maet papa i luk ol gudfala frut we i kamaot, nao maet hem i glad long bigfala fasin traehad blong yu blong tijim ol pikinini.—Proveb 23:24.
15. ?Kristin papa i gat wanem wok blong tijim ol pikinini?
15 Sipos waef i no bilif, hasban nao i mas mekem wok ya ‘blong stretem ol pikinini, mo blong trenem tingting blong olgeta olsem we Jeova i wantem.’ (Efesas 6:4, NW) Long semtaem, hem i mas soem kaen fasin mo lav long waef blong hem, mo no mekem i strong tumas long hem.
SIPOS PIKININI I GAT DEFREN SKUL LONG PAPA MAMA
16, 17. ?Wanem ol rul blong Baebol we Kristin pikinini i mas folem taem papa mama blong hem i gat defren bilif?
16 Naoia, plante pikinini, mo sam we oli no bigwan yet, oli folem skul we i defren long hemia blong papa mama blong olgeta. ?Yu yu wan pikinini olsem? Sipos yes, Baebol i givim advaes long yu.
17 Tok blong God i talem se: “Yufala pikinini, from we yufala i joen long Masta blong yumi, yufala i mas obei long papa mo mama blong yufala. Hemia i stret fasin blong yufala.” (Efesas 6:1, 2) Samting ya i minim se, yu mas soem respek long papa mama blong yu. Yes, i impoten we pikinini i obei long papa mama. Be hem i no mas fogetem se hem i mas obei long God tu. Taem pikinini i kam bigwan naf blong mekem ol prapa disisen blong hem, hem nao i mas karem frut blong enikaen nogud fasin we hem i mekem. Samting ya i tru long saed blong loa blong man, be i tru moa long saed blong loa blong God. Baebol i talem se: “Bambae yumi evriwan i mas talemaot olgeta fasin blong yumi long fes blong God.”—Rom 14:12.
18, 19. ?Olsem wanem Kristin pikinini i save givhan long papa mama blong hem we tufala i folem narafala skul, blong tufala i kasem save long bilif blong hem?
18 Sipos yu bin jenisim plante fasin blong yu from bilif blong yu, traem kasem save long tingting blong papa mama blong yu. Ating bambae tufala i glad sipos ol tijing blong Baebol we yu stap lanem mo folem oli pusum yu blong soem moa respek long tufala, obei moa, mo wok strong moa long ol wok we tufala i givim long yu. Be, sipos nyufala bilif blong yu i pulum yu blong agensem ol bilif mo kastom we tufala i laekem tumas, maet tufala i harem se yu stap sakemaot wan gudfala fasin blong laef we tufala i stap traem blong tijim yu long hem. Maet tufala i stap wari long yu tu, sipos ol man long ples blong yu oli no laekem bilif blong yu, no sipos bilif ya i pulum yu blong no moa tingting strong long ol wok we tufala i ting se i save givhan long yu blong kasem plante sas samting. Maet fasin flas tu i blokem tufala. Maet tufala i harem olsem we, yu stap talem long tufala se tufala i rong be yu yu stret.
19 Taswe, i gud blong mekem plan kwiktaem, blong papa mama blong yu i save mitim sam elda no sam Wetnes long kongregesen, we oli bigman long ol Kristin fasin. Traem pulum papa mama blong yu blong go long Haos Kingdom, lesin long tok we i kamaot, mo luk wetem prapa ae blong tufala se ol Wetnes blong Jeova oli wanem kaen man. Sloslou, maet tingting blong tufala i jenis. Nating se sam papa mama oli agensem pikinini blong olgeta long strong fasin, mo oli spolem ol buk blong hem we oli tokbaot Baebol, mo oli blokem hem blong go long ol Kristin miting, be bambae pikinini i gat jans yet blong ridim ol buk ya samples, mo storeyan wetem ol narafala Kristin, mo tekem jans blong prij mo halpem ol narafala. Hem i save prea long Jeova tu. Sam yangfala oli mas wet kasem we oli kam bigwan mo oli go stap olgeta nomo, bifo we oli save mekem moa. Nating se famle blong yu i olsem wanem, yu no mas fogetem blong “ona long papa mo mama blong yu.” Mekem prapa wok blong yu blong holem pis insaed long famle. (Rom 12:17, 18) Impoten moa long ol narafala samting, traehad blong gat pis wetem God.
TRAEM BLONG OL STEP PAPA MO STEP MAMA
20. ?Wanem filing blong sam pikinini we oli gat wan step papa no step mama?
20 Long plante famle, traem we i bigwan moa, i no long saed blong bilif, be long saed blong step famle. Long plante famle tede, hasban no waef i gat pikinini finis from faswan mared blong hem, no maet tufala evriwan i gat pikinini from wan narafala mared bifo. Long famle olsem, maet ol pikinini oli jelas mo kros, no maet oli no moa save se oli mas laekem weswan papa mo mama. From samting ya, ol pikinini oli save agensem step papa no step mama, nating se hem i rili stap traehad blong kam wan gudfala papa no mama. ?Wanem i save givhan long wan step famle blong stanap strong?
21. ?Nating se ol step papa mo step mama oli gat ol prapa traem blong olgeta, from wanem oli mas lukaot ol rul blong Baebol blong givhan long olgeta?
21 Yu mas luksave se, nating we famle ya i defren long plante narafala famle, ol rul blong Baebol we oli givhan long ol narafala famle, oli save givhan long ol step famle tu. Maet yumi sakemaot sam rul, mo yumi ting se long rod ya yumi stretem wan problem. Be biaen, ating bambae yumi kasem trabol we i mekem yumi harem nogud tumas. (Ol Sam 127:1; Proveb 29:15) Yu mas traem kam waes mo gat fasin luksave. Yu nidim waes blong folem ol rul blong God, mo blong tingbaot ol blesing we oli save kamaot longtaem biaen. Mo yu nidim fasin luksave blong kasem save from wanem ol narafala memba blong famle oli talem no mekem samting we oli talem no mekem. Yu nidim tu blong traehad blong kasem save long filing blong olgeta.—Proveb 16:21; 24:3; 1 Pita 3:8.
22. ?From wanem pikinini i save faenem i hadwok blong glad long step papa no step mama blong hem?
22 Sipos yu yu wan step papa no step mama, maet yu tingbaot se bifo, taem yu stap olsem wan fren nomo blong famle ya, ol pikinini oli glad long yu. Be taem yu kam step papa no step mama blong olgeta, maet tingting blong olgeta i jenis. Taem oli tingbaot stret papa no stret mama blong olgeta we i no moa stap wetem olgeta, maet oli no moa save se oli mas laekem hu. Maet oli gat tingting se yu wantem spolem lav we oli gat long stret papa no stret mama blong olgeta we i no moa stap. Sam samtaem, maet oli talem stret long yu se, yu yu no stret papa no stret mama blong olgeta. Ol tok olsem oli save mekem yu yu harem nogud. Be, “yu no mas hareap blong kam kros.” (Eklesiastis 7:9) Yu nidim fasin luksave mo yu mas traehad blong kasem save long filing blong ol pikinini ya, nao bambae yu save givhan long olgeta blong winim ol filing blong olgeta.
23. ?Olsem wanem blong stretem ol step pikinini?
23 I impoten tumas blong gat ol fasin ya taem yu stap stretem ol pikinini ya. I impoten tu we yu no stap jenisim ol rul we yu stretem pikinini from. (Proveb 6:20; 13:1) Ol pikinini wanwan oli no sem mak, taswe rod we yu folem blong stretem olgeta wanwan i no sem mak tu. Sam step papa mo step mama, oli faenem se fastaem, i moagud we stret papa no stret mama nomo i stretem pikinini. Be i impoten se tufala i gat wan tingting nomo long saed blong fasin blong stretem pikinini, mo tufala evriwan i folem rod ya. Tufala i no mas mekem i gud moa long stret pikinini blong tufala i bitim step pikinini. (Proveb 24:23) I impoten we ol pikinini oli obei, be yu mas tingbaot tu se pikinini i no stretgud olgeta. Yu no mas strong tumas long olgeta. Soem se yu laekem olgeta taem yu stretem olgeta.—Kolosi 3:21.
24. ?Wanem i save givhan blong blokem ol problem long saed blong seks insaed long step famle?
24 Fasin blong storeyangud insaed long famle i save givhan bigwan blong blokem trabol. Ol storeyan ya oli save halpem famle blong tingting oltaem long ol samting we oli moa impoten. (Skelem wetem Filipae 1:9-11.) Oli save halpem ol wanwan memba blong famle tu blong luk olsem wanem oli save givhan long famle blong kasem ol mak we oli wantem kasem. Mo tu, fasin blong toktok stret mo tru i save blokem ol problem long saed blong nogud fasin blong seks. Ol gel oli mas save wanem klos mo fasin i stret blong mekem, taem oli stap wetem step papa mo ol step brata blong olgeta. Mo ol boe, oli nidim advaes long stret fasin we oli mas mekem long step mama mo ol step sista blong olgeta.—1 Tesalonaeka 4:3-8.
25. ?Wanem ol fasin we oli save givhan blong holem pis long wan step famle?
25 Taem yu stap traehad blong kamgud long spesel wok ya blong step papa no step mama, yu mas gat longfala tingting. I tekem taem blong frengud wetem narafala. I no isi nating blong pulum pikinini we i no stret pikinini blong yu blong laekem mo respektem yu. Be yu save mekem. Sipos yu gat waes mo fasin luksave long hat blong yu, mo yu wantem tumas blong mekem Jeova i glad, hemia nao rod blong gat pis insaed long step famle. (Proveb 16:20) Ol fasin ya oli save givhan long yu blong winim plante narafala problem tu.
?FASIN BLONG RONEM OL SAS SAMTING I STAP SERAOTEM FAMLE BLONG YU?
26. ?Olsem wanem ol problem mo tingting long saed blong ol sas samting oli save seraotem famle?
26 Ol problem mo tingting long saed blong ol sas samting, oli save seraotem famle long plante rod. Sore tumas, i gat trabol mo rao oltaem long sam famle, from mane mo from we oli wantem kam rij—no maet oli jes wantem kasem sam moa sas samting. Fasin seraot i save stat sipos hasban mo waef tugeta i wok, nao tufala i folem tingting ya se, “mi mi gat mane blong mi, yu yu gat mane blong yu.” Wan narafala samting i save kamaot tu. Maet tufala i no rao. Be taem tufala tugeta i wok, maet tufala i gat smoltaem nomo i stap blong joen wanples mo storeyan. Wan fasin we i stap kam antap bigwan long wol, hemia se papa i go wok long wan narafala ples farawe long famle, blong winim moa mane bitim mane we hem i save winim long ples blong hem. Maet hem i go blong sam manis no blong sam yia. Fasin ya i save mekem bigfala trabol i kamaot.
27. ?Wanem advaes i save givhan long famle we i kasem hadtaem long saed blong mane?
27 Yumi no save putum sam rul long saed ya, from we ol famle oli gat ol defdefren wari mo nid. Be, advaes blong Baebol i save givhan. Eksampel, Proveb 13:10 i soem se fasin blong “toktokgud tugeta” i save mekem se olgeta long famle oli no stap traehad blong nating nomo. Toktokgud tugeta i no minim se wanwan long famle oli talemaot tingting blong olgeta nomo. Oli mas askem advaes tu, mo faenemaot tingting blong ol narafala long wan bisnes. Mo tu, sipos famle i mekem wan plan blong makemaot olsem wanem bambae oli spenem mane evri wik, samting ya i save mekem ol traehad blong evri memba blong famle oli joen blong karem gudfala frut. Samtaem, maet i nidim we hasban mo waef tugeta i wok blong smoltaem, blong pem sam kaon blong famle. Samting ya i tru moa taem tufala i gat pikinini, no taem sam narafala oli dipen long tufala long saed blong mane. Long taem olsem, hasban i mas mekem i klia long waef blong hem se hem i gat taem yet blong spenem wetem hem. Wetem lav, hasban mo ol pikinini oli save givhan blong mekem sam wok we plante taem, waef i stap mekem hem wan.—Filipae 2:1-4.
28. ?Wanem advaes we famle i save folem blong mekem se i joengud?
28 I tru, long wol blong naoia, yumi nidim mane. Be, rimemba se mane i no save karem glad long yumi. Hem i no givim laef tu. (Eklesiastis 7:12) Yes, fasin blong ronem ol sas samting i save spolem yumi long saed blong speret mo i save spolem ol gudfala fasin blong yumi. (1 Timote 6:9-12) I moa gud we yumi lukaot Kingdom blong God mo stret fasin fastaem. !Olsem nao, yumi save bilif strong se bambae God i blesem ol traehad blong yumi blong kasem ol samting blong laef we yumi nidim! (Matyu 6:25-33; Hibrus 13:5) Sipos yu putum ol Kristin wok long fasples mo yu stap traehad blong gat pis wetem God fastaem, bambae yu luk se famle blong yu i rili joengud long ol rod we oli moa impoten, nating se laef blong sam memba blong hem oli defren long sam rod.
?OLSEM WANEM OL RUL YA BLONG BAEBOL OLI SAVE GIVHAN . . . BLONG HOLEM PIS INSAED LONG FAMLE?
Ol Kristin oli traehad blong kasem fasin luksave.—Proveb 16:21; 24:3.
Hasban mo waef i mas laeklaekem mo respektem tufala, nating se wan long tufala i no folem Kristin bilif.—Efesas 5:23, 25.
Wan Kristin bambae i neva minim blong brekem loa blong God.—Ol Wok 5:29.
Ol Kristin oli traehad blong gat pis wetem olgeta man.—Rom 12:18.
Yu no mas hareap blong kam kros.—Eklesiastis 7:9.
[Bokis blong pija long pej 139]
MARED LONG STRET ROD I WINIM RESPEK MO I KAREM PIS
Long taem blong yumi, plante man mo woman oli stap tugeta be oli no mared long stret rod folem loa. Hemia wan samting we ol man mo woman we oli kasem save long trutok oli mas stretem. Long sam ples, maet kastom blong ol manples no velej i agri long mared blong olgeta, be maet mared ya i no stret folem loa blong gavman. Rul blong Baebol i talem se man i mas rejistarem mared blong hem long stret rod. (Taetas 3:1; Hibrus 13:4) Mo tu, Baebol i talem klia long olgeta we oli joen long Kristin kongregesen se, oli mas gat wan hasban no wan waef nomo. (1 Korin 7:2; 1 Timote 3:2, 12) Taem yu folem rul ya, yu mekem faswan samting blong putum pis insaed long famle blong yu. (Ol Sam 119:165) Ol rul blong Jeova oli wokgud mo oli no strong tumas blong folem. Samting we hem i tijim yumi long hem, i blong mekem i gud long yumi.—Aesea 48:17, 18.
[Tok Blong Pija Long Pej 130]
Traem kasem save long tingting blong narafala
[Tok Blong Pija Long Pej 138]
Nating se yu yu wan stret papa no mama, no yu wan step papa no step mama, yu mas dipen long Baebol blong lidim yu