Ol Yangfala Oli Askem

?From Wanem Mi No Jes Kilim Mi, Mi Ded?

Evri yia, plante milian yangfala oli traem kilim olgeta wan i ded, mo plante taosen long olgeta oli ded long fasin ya. From we plante yangfala oli stap mekem olsem, olgeta we oli raetem “Wekap!” oli luksave se i impoten blong givim save long yu long saed ya.

“LETEM mi mi ded. I moagud mi ded nomo. !Mi wantem ded!” ?Hu i talem ol tok ya? ?Wan man we i no bilif long God? ?Wan man we i lego God? ?Wan man we God i lego hem? Nogat. Man we i talem ol tok ya hemia Jona,a wan man we i gat strong bilif. Hem i talem tok ya from hem i harem nogud tumas. (Jona 4:3) Baebol i no talem se Jona i rere blong kilim hem wan i ded. Nating se i olsem, Jona i wari tumas mo ol tok blong hem oli soemaot wan impoten samting, hemia se, samtaem ol man blong God tu oli save harem nogud tumas long sam trabol.—Ol Sam 34:19.

Sam yangfala oli harem nogud tumas mekem se oli no wantem gohed blong stap laef. Maet oli harem olsem Laura,b wan gel we i gat 16 yia blong hem, we i talem se: “Blong plante yia nao, tingting blong mi i stap foldaon bakegen mo bakegen. Plante taem, mi tingbaot blong kilim mi wan i ded.” ?Sipos yu yu save wan man we i stap talemaot tingting blong hem blong wantem kilim hem wan i ded no sipos yu wan yu gat tingting ya, yu yu save mekem wanem? Fastaem, bambae yumi tokbaot from wanem samfala oli gat tingting ya.

Stamba Blong Filing Ya Blong Harem Nogud

?From wanem wan man no woman i tingting blong kilim hem wan i ded? I gat plante samting we i stamba blong tingting ya. Wan samting, hemia se yumi stap long wan wol we “laef i strong tumas mo i had blong winim ol trabol,” mo plante yangfala oli harem nogud moa i bitim ol narafala from ol trabol mo ol traem blong laef. (2 Timoti 3:1, NW) Mo tu, sin we i stap long yumi i save mekem se samfala oli holem ol nogud tingting long saed blong olgeta wan mo ol samting we oli hapen long laef blong olgeta. (Rom 7:22-24) Samtaem, hemia from we narafala i mekem i nogud long olgeta. Be samtaem, maet from oli gat wan sik. Long wan kantri, oli bin faenemaot se, bitim 90 pesen blong olgeta we oli kilim olgeta wan i ded, oli bin safa wetem sam kaen sik long tingting.c

I tru, yumi evriwan i kasem trabol. From samting ya, Baebol i talem se “olgeta samting ya we God i mekem oli stap krae, from we olgeta oli stap harem nogud.” (Rom 8:22) Hemia i minim ol yangfala tu. Ol yangfala oli save harem nogud moa bitim ol narafala, taem i gat ol nogud samting i hapen long laef blong olgeta olsem:

◼ Ded blong wan famle no fren

◼ Raorao insaed long famle

◼ No winim eksam long skul

◼ Boefren no gelfren blong olgeta i no moa laekem olgeta, i lego olgeta

◼ Narafala i mekem i nogud long olgeta (hemia i minim long saed blong bodi no long saed blong seks)

I tru se, olgeta yangfala oli mas fesem wan no moa long ol samting we yumi tokbaot antap ya. ?From wanem samfala oli save winim ol traem ya be sam narafala oli kilim olgeta wan i ded? Ol man we oli gat bigfala save long saed ya, oli talem se ol yangfala we oli wantem finisim laef blong olgeta, hemia olgeta we oli harem se i no moa gat wan man i save halpem olgeta, mo se i no moa gat rod blong winim ol problem blong olgeta. Hemia i minim se, ol yangfala ya oli bilif se i no gat wan samting we oli save mekem blong winim ol trabol blong olgeta, mo oli no luk eni samting we i soemaot se fiuja blong olgeta bambae i gud. Dokta Kathleen McCoy i talemaot long Wekap! se, “plante taem ol yangfala ya oli no rili wantem ded. Oli wantem nomo se oli no moa harem nogud.”

?I Gat Rod Blong Winim Ol Problem?

Maet yu save wan man we i ‘no moa wantem harem nogud,’ nao hem i talem se hem i wantem kilim hem wan i ded. ?Sipos i olsem, yu save mekem wanem?

Sipos wan fren blong yu i harem nogud tumas gogo i wantem kilim hem wan i ded, yu mas traehad blong pulum hem blong lukaot help. Biaen, yu mas talemaot long wan bigman se fren blong yu i wantem kilim hem wan i ded, nating sipos fren blong yu i no wantem we yu talemaot filing ya blong hem long narafala. Yu no mas wari se bambae yu spolem fasin fren blong yutufala. Taem yu talemaot samting ya, yu soemaot se yu yu wan “trufala fren,” wan fren we i “rere blong givhan long taem blong trabol.” (Ol Proveb 17:17, NW) !Taem yu mekem olsem, yu save sevem laef blong fren blong yu!

?Be olsem wanem sipos yu wan yu gat sam tingting blong finisim laef blong yu? Dokta McCoy i talem se: “Yu mas lukaot help. Talemaot ol filing blong yu long narafala, maet long papa mama, wan famle, wan fren, wan tija, wan man blong jos. Hem i mas wan man we i kea long yu, wan man we bambae i tinghevi long trabol blong yu, wan man we bambae i lesin long yu, mo we i save mekem se famle blong yu i lesin long wanem we yu talem.

Yu no save lusum wan samting sipos yu talemaot ol problem blong yu, be bambae yu save kasem gudfala samting from. Tingbaot wan eksampol long Baebol. Wan taem long laef blong gudfala man ya Job, hem i talem se: “Tru, sol blong mi i harem nogud tumas long ol samting we i hapen long laef blong mi.” Be biaen hem i gohed i se: “Bambae mi karemaot ol wari blong mi. !Sol blong mi i harem nogud, mi mi mas toktok!” (Job 10:1, NW) Job i harem nogud mo hem i nidim blong tokbaot filing blong hem. Maet yu save haremgud sipos yu tokbaot filing blong yu long wan fren blong yu we i bigman.

Ol elda long kongregesen tu oli save givhan long ol Kristin we oli harem nogud. (Jemes 5:14, 15, NW) I tru se taem yu tokbaot ol problem blong yu, hemia bambae i no mekem se ol problem ya oli lus. Be maet samting ya i save halpem yu blong luksave se ol problem blong yu oli no bigwan tumas. Mo tu, maet wan samting nomo we yu nidim blong faenem sam gudfala rod blong winim ol problem ya, hemia help blong wan narafala we yu save trastem hem.

Ol Samting Long Laef Oli Save Jenis

Taem yu harem nogud, tingbaot samting ya: Nomata i luk olsem se i no gat rod blong winim ol trabol, sloslo ol samting long laef oli save jenis. Deved, man blong raetem Sam, we i kasem plante traem long laef blong hem, i prea se: “Mi mi stap harem nogud gogo mi slak from. Evri naet mi stap krae gogo bed blong mi i wetwet long wota blong ae blong mi. Oltaem pilo blong mi i wetwet gud long wota blong ae blong mi.” (Ol Sam 6:6) Be long wan narafala singsing bakegen, hem i raetem se: “Yu yu tekemaot harem nogud blong mi finis, mo yu mekem mi mi glad we mi stap danis from.”—Ol Sam 30:11.

Deved i luksave se ol trabol long laef oli kam mo biaen oli go. Yes, maet sam trabol oli mekem yumi harem nogud tumas naoia. Be i gud blong gat longfala tingting.Ol samting oli stap jenis, mo plante taem oli save kam moagud. Samtaem, wan samting i hapen we yu no bin luksave se bambae i hapen, be i mekem se trabol blong yu i kamgud. Mo samtaem yu faenem wan rod blong winim problem blong yu, we yu no bin tingbaot rod ya bifo. Bigfala samting se, ol trabol we oli mekem yumi harem nogud, bambae oli no save stap sem mak blong olwe.—2 Korin 4:17.

Prea i Impoten Tumas

Fasin blong storian we i impoten tumas, hemia prea. Yu save prea olsem Deved i mekem, se: “God, plis yu lukluk gud long mi, blong yu savegud ol tingting blong mi. Plis yu skelem laef blong mi, blong yu faenemaot ol samting we mi stap tingting long hem. Mo sipos i gat sam samting nogud long laef blong mi, plis i gud yu traem faenemaot, nao yu lidim mi long rod ya we i no save lus.”—Ol Sam 139:23, 24.

Prea i no jes wan rod blong givhan long yu smoltaem gogo yu haremgud bakegen. Hem i rili wan storian bitwin yu mo Papa blong yu long heven, we i wantem se yu ‘talemaot ol trabol blong yu long hem.’ (Ol Sam 62:8) Tingbaot ol stamba trutok ya long saed blong God:

◼ Hem i savegud ol samting we oli mekem yu yu harem nogud.—Ol Sam 103:14.

◼ Hem i savegud yu i bitim yu wan.—1 Jon 3:20.

◼ ‘Hem i stap tingbaot yu.’—1 Pita 5:7.

◼ Long niufala wol, God bambae i “ravemaot wota blong ae” blong yu.—Revelesen 21:4.

Sipos Helt Blong Yu i Givim Problem Long Yu

Olsem we yumi tokbaot finis, plante taem filing ya we man i wantem kilim hem wan i ded i kamaot from we hem i gat wan sik. Sipos hemia nao samting we i hapen long yu, yu no mas sem blong askem help. Jisas i talem se olgeta we oli sik oli nidim dokta. (Matiu 9:12) !Gud nius hemia se, i gat meresin blong plante sik! !Mo meresin ya i save halpem yu blong harem gud moa!

Baebol i promes se long niufala wol we God bambae i mekem, “bambae i no moa gat man olbaot long kantri ya we i save talem se hem i sik.” (Aesea 33:24) Gogo kasem taem ya, mekem bes blong yu blong stanap strong tru long ol problem blong laef. Heidi, we i laef long Jemani, hem i mekem olsem. Hem i talem se: “Bifo, samtaem tingting blong mi i foldaon bigwan mekem se mi wantem ded nomo, be naoia mi stap gohed gud long laef blong mi. Hemia from we mi prea oltaem mo tekem meresin.” !Sem samting i save hapen long yu tu!d

Wan narafala stori blong “Ol Yangfala Oli Askem” bambae i tokbaot olsem wanem yumi save winim trabol ya hemia taem wan brata no sista blong yumi i kilim hem wan i ded

[Ol futnot]

SAM SAMTING BLONG TINGBAOT

◼ Sam man oli talem se taem yu kilim yu wan i ded, samting ya i no finisim ol problem blong yu be i jes pasem ol problem blong yu i go long wan narafala man nomo. ?Eksplenem olsem wanem samting ya i hapen?

◼ ?Sipos yu gat sam bigfala wari, yu save storian wetem hu?

[Bokis/Foto pija long pej 29]

ADVAES I GO LONG OL PAPA MAMA

Long sam ples long wol, plante yangfala oli kilim olgeta wan i ded. Long Yunaeted Stet, fasin ya we man i kilim hem wan i ded, i kam namba tri samting we i mekem se plante yangfala we oli gat bitwin 15 mo 25 yia, oli lusum laef blong olgeta. Mo long ol twanti yia we oli jes pas, namba blong ol yangfala we oli gat bitwin 10 mo 14 yia mo we oli kilim olgeta wan i ded, i dabolem namba blong bifo. Olgeta we oli trabol moa long saed ya, hemia ol yangfala we oli gat wan sik long tingting, olgeta we long famle blong olgeta i bin gat sam we oli kilim olgeta wan i ded finis, mo olgeta we oli traem finis blong kilim olgeta wan i ded. Hemia sam saen we i givim woning long yumi se wan yangfala i stap tingting blong kilim hem wan i ded:

◼ Hem i no moa storian plante wetem famle mo ol fren blong hem

◼ Program we hem i folem bifo long saed blong kakae mo slip, i jenis

◼ Hem i no moa intres long ol samting we fastaem hem i laekem tumas blong mekem

◼ Fasin blong hem i jenis bigwan

◼ Hem i tekem drag no i dring bitim mak

◼ Hem i givimaot ol gudfala samting blong hem

◼ Hem i stap tokbaot ded no oltaem i tingbaot ol samting long saed blong ded

Dokta Kathleen McCoy i talem long Wekap! se, wan bigfala mastik we papa mama i save mekem, hemia blong no tinghevi long ol saen ya we i givim woning long tufala. Hem i talem se: “I no gat wan papa mama we i wantem tingbaot se wan samting i rong wetem pikinini blong tufala, taswe sam papa mama oli no wantem luksave se i gat wan problem. Oli stap tingting se, ‘hem i stap gotru long wan taem long laef blong hem we i narakaen lelebet,’ no ‘Bambae hem i kam gud yet,’ no ‘Oltaem hem i stap mekem sam fasin we i narakaen.’ Tingting ya i nogud tumas. Papa mama i mas tinghevi long ol tok blong pikinini se bambae hem i kilim hem wan i ded.”

Yu no mas sem blong kasem help long narafala blong givhan long boe no gel blong yu, sipos tingting blong hem i foldaon olgeta no maet from we hem i sik long tingting blong hem. Mo sipos yu ting se pikinini blong yu i gat tingting ya blong kilim hem wan i ded, yu mas askem hem long saed ya. Sam man oli talem se sipos yu tokbaot fasin ya blong man i kilim hem wan i ded wetem wan narafala we i gat tingting ya finis, samting ya bambae i pusum hem moa blong tekem aksen ya. Be tingting ya i rong olgeta. Plante yangfala oli glad taem papa mama i storian wetem olgeta long saed ya. Taswe, sipos pikinini blong yu i talemaot long yu se hem i stap tingting blong kilim hem wan i ded, traem faenemaot sipos hem i mekem wan plan finis long saed ya. Sipos yes, yu mas askem long hem blong i eksplenem moa long yu long saed blong plan ya. Sipos yu luk we hem i savegud evri smosmol haf blong plan ya, yu mas mekem wan samting kwiktaem blong blokem plan ya.e

Yu no mas ting se trabol ya we tingting blong yangfala i foldaon bambae i lus olsem nomo. Mo sipos i luk olsem se i lus, yu no mas ting se problem ya i finis. Sam man we oli gat bigfala save long saed ya oli talem se, long taem olsem, hemia nao taem we i denja tumas. ?From wanem? Dokta McCoy i talem se: “Wan yangfala we tingting blong hem i foldaon olgeta, maet hem i no gat inaf paoa blong kilim hem wan i ded. Be taem tingting we i foldaon finis i lus, maet yangfala ya i gat paoa nao blong kilim hem wan i ded.”

Sore tumas we sam yangfala we oli gat trabol olsem, oli tingbaot blong kilim olgeta wan i ded. Sipos papa mama mo ol narafala we oli kea, oli tinghevi long ol saen mo tekem aksen blong halpem ol yangfala ya, maet oli save “toktok gud blong leftemap tingting blong olgeta we oli harem nogud oltaem from we tingting blong olgeta i foldaon,” mo long rod ya, oli save soemaot se oli olsem wan sefples blong haed blong ol yangfala blong olgeta.—1 Tesalonaeka 5:14, NW.

[Futnot]

[Tok blong pija long pej 28]

Fasin blong storian we i impoten tumas, hemia prea