Sam Nius Blong Wol
Ol Dog Mo Puskat We Oli Fatfat Tumas
Wan ripot we i kamaot long The Globe and Mail long Kanada, i talem se: “Bigfala problem long saed blong helt we i stap kasem ol dog mo ol puskat naoia hemia se oli fatfat tumas. Sem samting we i stap hapen long ol man i stap hapen long ol anamol, hemia se oli no stap kakae gud mo oli no stap mekem inaf eksasaes.” Berney Pukay, we i wok long kaonsel blong Canadian Veterinary Medical Association, i talem se fol blong samting ya i stap long fasin blong laef blong ol man we oli lukaot long ol anamol: “Yumi no stap mekem inaf eksasaes from we yumi bisi tumas. Ale dog i no kasem inaf eksasaes from we masta blong hem i bisi tumas. Yumi wantem kakae ol kakae we oli mekem yumi harem gud, ale ol anamol blong yumi tu oli kakae olsem.” Magasin ya Globe i givim woning se “ol anamol we oli fatfat tumas oli save kasem ol sik olsem sik blong suga, sik long hat, hae blad presa, mo ol joen blong bodi oli soa. . . . Oli ded kwiktaem moa i bitim ol narafala anamol we oli gat gudfala helt.” Ol dokta blong anamol oli talem se ol anamol we oli fatfat tumas oli mas katemdaon kakae blong olgeta mo oli mas mekem eksasaes, speseli ol dog.
Ol Trabol We Oli Kamaot Long Holide
Niuspepa ya Die Welt, blong Hamburg, i givim woning ya se: “Sipos yu stap rerem olting blong yu blong go spel samples, mo yu ting se taem ya blong spel bambae hem i beswan taem long yia we i jes pas !Lukaot!” Ol faet mo rao oli bin spolem holide mo taem blong spel blong fulap famle. Wan stadi we ol man long Jemani oli mekem long saed ya i soem se, “long evri tri divos we man i askem, wan hem i kamaot afta [we man mo woman] tufala i go spel.” ?From wanem i olsem? Wan risen maet hemia from we ol hasban mo waef oli no moa lan blong stap klosap oltaem mo mekem samting tugeta. Taswe, taem oli stap longtaem tugeta oli mekem olgeta oli kros. Ol man we oli stadi long fasin blong tingting blong man, oli talem se blong blokem trabol ya, i gud blong mekem plan from holide blong yu longtaem bifo. Yu save plan blong mekem sam defren samting we evriwan long famle oli intres long hem. Niuspepa ya Die Welt i talem se: “Sipos olgeta insaed long famle oli bitim mak long tingting ya se holide ya bambae i beswan, hemia i save karem trabol i kam long holide blong olgeta. From we yumi spenem eleven manis blong wan yia long wok mo long ol narafala samting blong laef, yumi wantem we olgeta tri no fo wik blong spel i tekem ples blong olgeta samting we yumi no bin gat janis blong mekem long yia ya.”
Pikinini We i Bon Afsaed Long Mared
Wan niuspepa blong Jemani (Westdeutsche Allgemeine Zeitung) i tokbaot wan stadi we oli mekem long Yurop we i soemaot se klosap 1 long evri 4 bebi we oli bon oli blong man mo woman we oli no mared. Long 1980 namba ya i smol nomo, samting olsem 1 long evri 10 pikinini we oli bon. Long Gris, 4 pesen nomo blong evri bebi we oli bon, oli bon afsaed long mared—namba ya i smol moa i bitim ol narafala kantri long Yurop. Long Swiden, long evri bebi we oli bon, i gat bitim haf we oli bon afsaed long mared. Aealan nao i luk bigfala jenis long saed ya. Long kantri ya, namba blong ol pikinini we oli bon afsaed long mared long 1980 we hem i 5 pesen nomo, i gru kasem 31.8 pesen long yia 2000. Ripot ya i talem se ol namba ya we oli gru kwiktaem tumas oli “pruvum se tingting blong ol man Yurop long saed blong mared mo famle i jenis bigwan.”
Ol Honet Oli Wok Wetem Magnet
Wan niuspepa blong London (The Daily Telegraph) i talem se: “Ol honet oli gat gud save blong bildim haos. Blong meksua se bed blong olgeta i stret, i no kruked, ol honet oli yusum wan samting we i wok olsem level blong kapenta.” Wan grup blong sayentis long Yunivesiti blong Tel Aviv, long Isrel, oli stadi ol honet blong kantri ya. Olgeta ya oli faenemaot se ol bebet ya oli stap fasem wan samting olsem ston magnet i go long ruf blong olgeta wanwan hol long bed we oli wokem. Smol magnet ya i smol we i smol, i no bitim 1 milimita mo hem i gat sam narafala samting insaed long hem, olsem titanium, aean, mo oksijen. Ripot we ol man ya oli raetem i talem se: “Taem ol honet oli bildim bed blong olgeta, oli laenemap olgeta hol tugeta long wanwan level, mo samting olsem leg i sapotem ol wanwan level ya.” Man i no save gud yet se wanem stret wok blong ol smol magnet ya, be i klia se “olgeta smosmol magnet tugeta oli halpem ol [honet] blong faenem rod blong olgeta taem ples i tudak mo i mekem se oli no wokem bed blong olgeta we wan saed i hevi moa long narasaed. Naoia ol man oli stap mekem moa stadi blong faenemaot sipos ol narafala bebet we oli famle blong honet, olsem ol sugabag, oli yusum semfala rod ya.”
Ol Yangfala Woman We Oli Gat Sik Blong Bun
Wan niuspepa blong Japan (Asahi Shimbun) i givim woning se bigfala namba blong ol yangfala woman we oli stap katem kakae blong lusum kilo, oli stap putum olgeta wan long denja ya blong kasem sik blong bun (we oli kolem osteoporosis) taem oli kam olfala. Sik ya (osteoporosis) i kasem moa ol olfala woman, mo hem i wan sik we i mekem se bun i no moa strong mo i save brobrok isi nomo. Wan samting insaed long bodi blong woman, we oli kolem hormone, hemia nao i givhan long bodi blong wokem ol bun we oli strong. I stat long taem we wan gel i kasem sik mun blong hem, ol bun oli kam strong kwiktaem mo taem gel ya i kasem raonabaot 20 yia blong hem, ol bun blong hem oli strong gud. Be taem woman i kasem samwe long 40 yia blong hem, sloslo ol bun blong hem oli no moa strong olsem fastaem. Profesa Ikuko Ezawa, long Japan’s Women’s University, i eksplenem se: “Sipos wan yang woman i lukaot gud long helt blong hem, hem i bildimap gud ol bun blong hem, ale nating sipos [afta long 40 yia blong hem] ol bun oli stat blong no moa strong olsem bifo, be bambae i tektaem bifo we oli save brobrok isi.” Taswe, profesa ya i ademap se: “I impoten tumas blong bildimap ol bun blong yumi blong oli strong gud taem yumi kasem 20 yia.” Be fulap yangfala woman oli no tinghevi long sik ya osteoporosis. Profesa Ezawa i talem se: “I klia se [plante yangfala woman] oli no stap kakae inaf gudfala kakae we i save givhan long bodi. Taem bodi i no kasem inaf calcium mo inaf eksasaes, ol bun bambae oli safa from.”
Oli Gat 100 Yia Be Oli Hapi Mo Oli Helti
Ripot we wan niuspepa (Yomiuri Shimbun) i givim i soemaot se, “80 pesen blong ol man we oli bitim 100 yia finis oli harem se oli helti mo oli harem i gud evri dei.” Long Japan, namba blong ol olfala we oli bitim 100 yia finis, i jes bitim 1,000 long 1981, mo long yia 2000 namba ya i gru kasem 13,000. I no longtaem i pas, wan grup blong man (we oli kolem Japan’s Foundation of Health and Stamina) i mekem wan stadi long bitim 1,900 olfala we oli bitim 100 yia finis. Stadi ya i bigfala moa i bitim olgeta stadi we oli mekem bifo long saed blong “fasin blong laef” blong ol olfala we oli bitim 100 yia. Niuspepa ya i ripotem se “bigfala namba blong ol man ya (43.6 pesen), we hemia i antap moa long ol woman (25.8 pesen), oli talem se oli gat ‘wan mining long laef.’ ” Bighaf blong ol olfala ya oli talem se sam long ol samting we i givim mining long laef blong olgeta hemia “famle,” “tingting blong wantem gat longfala laef,” mo “fasin blong gat gudfala helt mo wan hapi laef.” Taswe, niuspepa ya i talem se i gud sipos ol man oli “gat wan risen blong laef, hemia i save mekem we laef blong yumi i longwan moa.”
Laef Yu Wan Nomo
Wan sensas we oli mekem long Franis i no longtaem i soemaot se long evri 8 man i gat 1 we i laef hem wan nomo. Franis niuspepa ya Le Monde, i ripotem se namba ya i dabol long namba we oli bin kaontem 30 yia bifo. Insaed long namba ya i gat ol yangfala we oli no gat patna yet, mo ol olfala tu. Plante moa woman oli laef olgeta wan i bitim ol man, mo stori long niuspepa i makem se “moa we woman i gat posisen long laef no wok, moa we hem i sua blong laef hem wan nomo.” Sensas ya i soemaot tu se stat long 1990, namba blong ol famle we i gat papa no mama nomo i stap wetem pikinini, i go antap 22 pesen, mo namba blong ol man mo woman we oli no gat pikinini yet i go antap 16 pesen. Stori long niuspepa i finis wetem toktok ya se “i luk olsem se i gat moa hasban mo waef we oli no gat pikinini mo i gat moa man we oli laef olgeta wan nomo i winim ol famle we oli gat papa mama mo pikinini tugeta.”
Ol Yangfala We Oli Save Seks Finis
Niuspepa ya The Guardian, i tokbaot wan ripot we Britain’s Family Matters Institute i mekem. Ripot ya i soemaot se ol yangfala oli “kwik moa blong mekem seks sipos papa mama blong olgeta oli seraot no sipos papa mama blong olgeta oli laef tugeta nomo be oli no mared.” Twanti faef pesen blong ol yangfala we oli gat 13 yia oli save seks finis mo oli bin go wetem fo defren patna finis. Mo, 1 long evri 5 yangfala oli talem se, long faswan taem we oli bin slip wetem narafala hemia from we oli drong. Ripot ya i talem se i impoten tumas we “ol pikinini oli gruap long wan famle we i tinghae long mared.” Ol problem oli kamaot taem ‘papa mama i no toktok plante wetem pikinini blong olgeta, oli no spenem taem tugeta, mo oli no intres long samting we pikinini i stap mekem.’ Ripot ya i gohed i se: “Sipos ol papa mama oli no kea long ol samting we pikinini blong olgeta i mekem, bambae ol pikinini oli gohed nomo blong gat seks mo namba blong ol yangfala we oli gat bel bifo mared bambae i go antap, mo tu, namba blong ol sik we oli goraon from fasin blong slip olbaot bambae i kam antap kwiktaem.”
Ol Draeva We Oli Wantem Slip
Wan ripot we oli kolem Fleet Maintenance & Safety Report, i talem se ol dokta we oli stadi long slip blong ol man, mo olgeta we oli wok had blong blokem ol denja we i save kasem ol draeva, oli stap givim advaes long ol draeva se oli no mas draev taem oli taed tumas. Ol dokta oli talem se evri man i mas slip samwe long eit aoa evri naet. Be stadi we oli mekem long saed ya i soem se plante man oli slip blong sam aoa nomo evri naet. Ol stadi ya oli soemaot tu se bighaf blong olgeta we oli draevem trak nating se oli taed, mo we oli spid moa taem oli harem se oli wantem slip, hemia olgeta ya we yia blong olgeta i stat long 19 go kasem 29. Ripot ya i talem se: “Ol strong dring oli save mekem we man i slip isi nomo taem hem i draev.” David Willis, we hem i presiden blong wan asosiesen (American Automobile Association Foundation for Traffic Safety), i talem se man i no save blokem slip sipos hem i onem radio no i openem windo. Be sipos yu tekem smoltaem blong slip bambae yu givhan long yu wan blong blokem slip taem yu draev. Masta Willis i talem strong se: “I gat wan rod nomo blong winim taed, hemia taem yu slip.”