?From Wanem Yumi Fogivim Narafala?
NIUSPEPA ya The Toronto Star blong Kanada i talem se: “Ol sayentis oli statem wan stadi we i soemaot se fasin blong fogif i rili save mekem filing blong man i kam gud moa—mo tu maet hem i save givhan long helt.” Nating se i olsem, Carl Thoresen, wan tija blong Stanford Yunivesiti, long Yunaeted Stet, we hem i stap lidim grup blong stadi ya, i makem gud se “smol man nomo oli kasem save se wanem ya fasin blong fogif, mo olsem wanem fasin ya i wok.”
Trufala fasin blong fogivim man hem i wan impoten fasin long laef blong ol Kristin man. Niuspepa ya Toronto Star i talem se fasin fogif i minim se, “yu luksave we narafala i bin mekem wan samting i rong long yu, yu lego fasin kros, nao sloslou yu kam gud fren blong hemia we i mekem i no stret long yu, long fasin we yu soem sore mo lav tu.” Fasin blong fogif i no minim se yu no luksave rong we narafala i mekem long yu. Hem i no minim tu se yu mekem olsem we narafala i no bin mekem i rong long yu, no se yu fogetem rong ya mo giaman se narafala i no bin mekem nogud long yu, nogat. Fasin sore i no minim se yu letem we narafala i mekem i no stret long yu. Stadi ya we oli mekem i talem se rod blong trufala fasin fogivim hemia taem man i “lego fasin blong kros mo ol nogud filing.”
Ol man blong stadi long saed ya oli talem se oli nidim blong mekem moa stadi blong faenem ol gudfala frut we bodi i save kasem from fasin blong fogif. Be, oli talem se oli faenem we fasin fogif i givhan long bodi, i mekem se “man i no stap harem nogud tumas, i no wari mo tingting i no foldaon bigwan.”
Efesas 4:32 i givim wan impoten risen blong fogif, i se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.” Yumi mas folem fasin blong God long saed blong fogif, olsem we yumi folem eksampel blong hem long ol narafala samting bakegen.—Efesas 5:1.
Sipos yumi no wantem fogivim narafala taem oli soem sore from rong we oli mekem, yumi save spolem gudfala fasin fren blong yumi wetem God. Jeova i wantem se yumi fogivim narafala. Nao bambae yumi save prea blong hem i fogivim yumi tu.—Matiu 6:14; Mak 11:25; 1 Jon 4:11.