Katem Man We Oli No Yusum Blad—“Wan Rod We Ol Dokta Oli Stat Folem Moa”

LONG niuspepa ya Maclean’s, i gat wan stori we i karem taetel ya “Katem Man We Oli No Yusum Blad.” Stori ya i tokbaot ol dokta long Kanada se oli bin “folem sam niufala teknik we i mekem se, long ol faef yia we oli jes pas, fasin blong katem man we oli no yusum blad i kam wan rod we ol dokta oli stat folem moa.” Brian Muirhead, wan spesel dokta blong katem sikman long Helt Sayens Senta long Winnipeg, hem i wan long olgeta we i bin traem ol niufala teknik ya. ?Wanem i pulum hem blong wantem folem ol niufala rod ya blong no yusum blad blong winim sik blong man?

Long 1986, Dokta. Muirhead i bin tekem disisen blong mekem wan samting we i no isi nating. Hem i mas katem wan olfala man blong 70 yia we i gat wan soa insaed long bel blong hem. Olfala ya i wan Witnes blong Jeova. Bilif blong olfala ya i pulum hem blong askem dokta se oli no putum blad long hem taem we bambae oli katem hem. (Ol Wok 15:​28, 29) Maclean’s i gohed se, Dokta. Muirhead “i folem wan rod we i no gat plante man i folem, hemia blong pamem wota we i gat sol, i go sloslou insaed long blad blong sikman ya blong mekem se blad presa blong hem i stap antap. Rod ya i wokgud, mo i mekem Muirhead i bilif moa se ‘yumi stap givim tumas blad long ol man. Mi ting se naoia i taem blong faenem sam narafala rod we oli save tekem ples blong blad.’ ”

Risen we i pusum ol dokta blong traem kasem moa save long rod ya blong katem man, we oli no yusum blad, hemia from we “oli wari se long fiuja bambae i no gat inaf saplae blong blad we ol man oli givim [i kam long ol hospital], be tu, from we plante moa man naoia oli fraet blong kasem wan sik taem oli tekem blad blong narafala man.” From we ol dokta ya oli no fraet blong traem ol niufala rod, save we oli faenem i bin givhan bigwan long ol Witnes blong Jeova, mo plante narafala man tu. Maclean’s i talem se: “Fasin blong katem man mo no yusum blad i mekem se man i no moa nidim blong givim blad, mo antap long hemia, rod ya i daonem denja​—nating se i bigwan no i smol​—blong kasem sik from blad blong narafala we i sik.” Mo nating sipos blad we narafala i givim hem i “klin” nomo, be man we i tekem blad ya i save sik, from we bodi blong hem i no moa naf blong faet agensem enikaen sik.

?Wanem i stamba blong bilif ya blong ol Witnes blong Jeova we i mekem se oli yusum sam rod blong winim sik we i no nidim blong tekem blad? Maet bambae yu intres blong ridim smol buk ya, How Can Blood Save Your Life? Ol Witnes blong Jeova bambae oli glad blong givim buk ya long yu.