Stadi 4
?Hu Ya Devel Setan?
Devel Setan—?Hem i kam long weples? (1, 2)
?Olsem wanem Setan i stap lidim ol man oli go krangke? (3-7)
?From wanem yu yu mas agensem Devel Setan? (7)
1. Tok ya “devel” i minim wan man we i stap talem ol rabis gyaman tok agensem wan narafala man. “Setan” i minim wan enemi no man blong agens. Hemia nao tufala nem blong bigfala enemi blong God. Fastaem, hem i wan enjel we i stretgud olgeta mo i stap long heven wetem God. Be biaen, hem i tingbaot hem wan tumas, mo i wantem kasem wosip we i mas go long God nomo.—Matyu 4:8-10.
2. Enjel ya, Setan, i yusum wan snek blong toktok long Iv. Tru long ol gyaman tok blong hem, hem i pulum Iv blong brekem loa blong God. Long fasin ya, Setan i faet agensem “hae rul” blong God, hemia posisen blong hem olsem God we i Antap olgeta. Setan i stanemap wan kwestin long saed blong rul blong God: ?Rul ya i stret mo i givhan long ol man we Hem i rul long olgeta, no no gat? Hem i stanemap wan narafala kwestin tu: ?Man i save stap tru long God olwe, no no gat? Long rod ya, Setan hem wan i mekem we hem i kam olsem enemi blong God. From samting ya nao, hem i kasem nem ya Devel Setan.—Jenesis 3:1-5; Job 1:8-11; Revelesen 12:9.
3. Setan i stap traem blong trikim ol man blong oli wosipim hem. (2 Korin 11:3, 14) Wan rod we hem i yusum blong lidim ol man oli go krangke, hemia tru long ol gyaman skul. Sipos wan skul i tijim gyaman tok long saed blong God, hem i stap mekem wok blong Setan nomo. (Jon 8:44) Ol man we oli memba blong ol gyaman skul, maet oli bilif strong se oli stap wosipim trufala God. Be oli stap mekem wok blong Setan nomo. Hem i ‘rabis god blong wol ya.’—2 Korin 4:4.
4. Wok wetem ol rabis speret, hemia wan narafala rod we Setan i yusum blong pulum ol man oli kam aninit long paoa blong hem. Maet oli singaotem ol speret blong protektem olgeta, blong spolem narafala, blong talemaot fyuja, no blong mekem merikel. Setan nao i rabis paoa we i stap biaen long olgeta fasin ya. Blong mekem God i glad, yumi no mas joen nating long enikaen fasin blong wok wetem ol rabis speret.—Dutronome 18:10-12; Ol Wok 19:18, 19.
5. Mo tu, Setan i stap lidim ol man oli go krangke, tru long fasin blong flas from kala blong skin no kantri blong olgeta, mo tru long fasin blong wosip long ol pati blong politik. Samfala oli ting se kantri no kala blong olgeta i moagud i bitim hemia blong ol narafala man. Be samting ya i no tru. (Ol Wok 10:34, 35) Samfala oli trastem ol politik pati blong finisim ol problem long wol ya. Taem oli mekem olsem, oli sakemaot Kingdom blong God. Kingdom ya nomo i rod blong winim olgeta problem blong yumi.—Daniel 2:44.
6. Wan narafala rod we Setan i yusum blong lidim ol man oli go krangke, hemia blong pulum olgeta blong wantem mekem ol rabis fasin. Jeova i talem long yumi blong stap longwe long ol fasin nogud, from we hem i save se bambae oli spolem yumi. (Galesia 6:7, 8) Maet samfala man oli wantem se yu yu joen wetem olgeta long sam fasin olsem. Be, rimemba se, i rili Setan we i wantem se yu mekem ol samting ya.—1 Korin 6:9, 10; 15:33.
7. Maet Setan i mekem se samfala oli ronem yu no oli agensem yu blong traem pulum yu blong lego Jeova. Maet sam famle blong yu oli kam kros tumas from we yu yu stap stadi Baebol. Maet sam narafala oli jikim yu. ?Be hu nao i givim laef long yu? Setan i wantem mekem yu yu fraet, blong bambae yu no gohed blong lanem moa long saed blong Jeova. !Yu no mas letem Setan i win! (Matyu 10:34-39; 1 Pita 5:8, 9) Sipos yu yu agensem Devel Setan, bambae yu mekem Jeova i glad, mo bambae yu soem se yu sapotem hae rul blong Hem.—Proveb 27:11.
[Tok blong pija long pej 9]
Gyaman skul, wok wetem ol rabis speret, tingting se wan kantri i moagud long narawan, oli spolem man
[Tok blong pija long pej 9]
Blong agensem Setan, gohed blong lanem moa long saed blong Jeova