Baebol i Talem Wanem

?From Wanem Yumi Mas Lukaot Long Wok Blong Rabis Spirit?

LONG wan kantri blong Esia, ol man oli stap mekem lafet blong wosipim ol rabis spirit. I gat wan taem long lafet ya we i impoten moa, hemia taem we oli jusum tu woman blong joen long spesel seremoni blong mekem se rabis spirit i kam holem tufala. Ae blong tufala i waet evriwan we yu no save luk blak wan blong hem mo bodi blong tufala i stat seksek bigwan olsem we lektrik i stap jokem tufala.

Long Poto Riko, wan kleva (santero) i stap traem toktok wetem wan rabis spirit we oli kolem Chango, we hem i god blong tanda. Taem kleva ya i talemaot ol vison blong hem, evri man long rum ya oli seksek olsem se rabis spirit i go insaed long olgeta.

Fasin ya blong wok wetem ol rabis spirit i stap gohed long plante kantri tede. Plante plante man oli bilif long majik mo paoa blong ol spirit man, mo oli intres blong faenemaot ol samting olsem. Tede i gat plante samting moa i bitim bifo, we oli stap soemaot wok blong rabis spirit, olsem ol buk, ol gem, televisen, ol film blong ol rabis spirit, majik, mo ol samting we oli soemaot paoa blong ol rabis spirit.

Be, Baebol i tijim se eni samting we i joen wetem majik no sam kaen spesel paoa, hemia wok wetem ol rabis enjel. Wok wetem ol rabis enjel i no wan samting we i nating nomo, mo i no wan pleplei. Man i no mas ting se hemia nao rod blong faenemaot samting we hem i no save luk. Man we i mekem olsem, i stap toktok wetem ol rabis spirit, hemia ol enjel ya we oli rebel agensem Jeova.—Revelesen 12:9, 12.

Ol rabis enjel oli yusum ol wok olsem majik no kleva blong pulum man, olsem man we i yusum bet blong hukum fis. Wan man blong hukum fis i yusum defdefren kaen bet blong pulum defdefren kaen fis. Long sem fasin, ol rabis enjel oli yusum ol defdefren rod olsem blong pulum olkaen man oli kam stap aninit long paoa blong olgeta. Baebol i kolem lida blong ol rabis enjel ya se, “rabis god blong wol ya.” Hem i savegud olsem wanem blong blaenem tingting blong ol man we oli no bilif, blong oli no luk laet blong Tok blong God mo plan blong hem.—2 Korin 4:4.

Ol Rabis Enjel Oli Lidim Man i Go Wea

Mak blong ol rabis enjel hemia se: Oli wantem pulumaot yumi long Jeova mo oli wantem mekem yumi no moa fren gud wetem Bigfala Man ya we i Wokem yumi. Oli traehad blong mekem ol man oli no moa obei long loa blong God, nating se ol man ya oli save se ol rabis enjel ya oli stap lidim olgeta no nogat. Taswe, ol man we oli wok wetem ol rabis enjel ya, God i no glad long olgeta, oli no gat hop long fiuja, mo i no longtaem bambae oli lus blong olwe.—Revelesen 21:8.

Luis we hem i wan woman blong Poto Riko i talem se: “Taem mi smol, famle blong mi i joen long wok blong rabis spirit. Hemia i kam olsem wan haf blong wosip blong mifala mo i olsem wan fasin blong laef blong mifala. Mi stap talemaot samting we bambae i kamaot long fiuja blong man mo mi stap ridim ol spesel kad blong faenemaot samting we bambae i hapen long laef blong man. Mi ting se save we mi gat blong mekem ol samting ya i wan paoa nomo we i blong mi. Oltaem mi mi naf blong faenem wanem namba long lotri we bambae i win, ale long rod ya mi givhan long ol narafala blong winim mane. Ol spesel paoa ya we mi gat oli stap blokem mi nomo blong mi no kasem save long Baebol mo blong mi no kam fren blong God.”—Jon 17:3.

Plante man oli ting se fasin blong wok wetem rabis spirit i save protektem olgeta mo givhan long olgeta. Oli talem se ol rabis enjel ya oli ol fren blong olgeta, no oli talem se wok we oli mekem i givim waes long olgeta, i mekem olgeta oli kam rij mo i mekem olgeta i glad. Be, samting ya i no tru nating. Luis i talem se: “Olgeta we oli stap mekem olsem, bambae oli mas kasem pei from ol samting nogud we oli stap mekem.”

Wan yangfala man, nem blong hem Chad, i stap luk ol samting we oli mekem hem i fraet, mo samting ya i stap mekem hem i no save slip gud long naet. Hem i talem se: “Ol rabis spirit oli stap mekem tumas trabol long mi mo oli stap spolem mi evri naet. ?Wanem i save givhan blong blokem trabol ya?”

?Olsem Wanem Blong Protektem Yu Wan?

Blong stap sef, yumi mas stap longwe long eni kaen wok we i joen wetem ol rabis spirit. (Galesia 5:19-21) Taswe, Jeova God i givim tok blong hem long ol man blong hem blong oli no joen long ol samting olsem: “Mo yufala i mas lukaot gud blong yufala i no folem fasin blong olgeta blong go luk ol kleva, mo blong makemgud ol smosmol saen we oli luk, mo blong mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long olgeta. Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta.”—Dutronome 18:10-12.

Plante man we oli bin harem tok ya oli mekem sam samting blong protektem olgeta. Oli sakemaot ol buk mo narafala samting we i joen wetem rabis spirit. Samting ya i protektem olgeta. Ken we hem i winim fasin ya we i bin holemtaet hem, i talem se: “Mi lukluk long evri samting blong mi, mo mi bonem olgeta samting we mi harem se i rabis.”—Lukluk Ol Wok 19:19, 20.

Sipos yumi wantem stap sef fulwan, yumi mas fren gud wetem trufala God ya, Jeova. Makem samting we Baebol i talem long Jemes 4:7, 8. Vas ya i talem se: “Nao from samting ya, yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala. Yufala i mas stap klosap long God, nao hem bambae i kam stap klosap long yufala. Yufala i man nogud, yufala i mas wasem han blong yufala. Yufala we i gat tu fes yufala i mas mekem tingting blong yufala i klin.”

Jeova i tijim mo i protektem olgeta we oli kam klosap long hem. ‘Olgeta ya oli save gud ol plan blong Setan, i minim se oli no foldaon long ol giaman trik blong hem.’ (2 Korin 2:11; 11:14) Mo tu, Jeova i God ya we i gat Olgeta Paoa. Taem man i singaot long Jeova wetem strong bilif, bambae Jeova i mekem man ya i fri long enikaen trabol blong ol rabis spirit. Chad we yumi tokbaot hem finis i talem se: “Taem mi kasem save se ol samting ya oli wok blong ol rabis spirit, mo mi prea long Jeova blong protektem mi, nao trabol ya i stop wantaem.”—Ol Sam 91:1, 2.

I klia se olgeta we oli wantem mekem stret fasin oli glad we God i stap protektem olgeta tede, be oli glad tu blong save se i no longtaem bambae ol rabis enjel ya mo olgeta man we oli biaenem olgeta, bambae oli lus blong olwe. !Traem tingbaot glad mo pis we bambae i stap long wol ya taem ol man oli fri, oli no moa stap aninit long paoa blong Setan mo ol rabis enjel blong hem!—Aesea 11:9; Revelesen 22:15.

?YU YU BIN TINGBAOT?

◼ ?Wanem wok blong rabis spirit we ol Kristin oli mas lukaot long hem?—Dutronome 18:10-12; Revelesen 21:8.

◼ ?Hu i stap biaen long wok blong majik no kleva no narafala wok olsem?—2 Korin 2:11; 11:14; Revelesen 12:9, 12.

◼ ?Wanem i save protektem yumi long wok blong rabis spirit?—Jemes 4:7, 8.

[Tok blong pija long pej 31]

Ol rabis enjel oli yusum ol wok olsem majik no kleva blong pulum man, olsem man we i yusum bet blong hukum fis