?Bambae Yumi Save Haremgud Samtaem Long Wan Trufala Sefples?

OL PIKININI oli glad taem oli pleplei wetem papa mama we i lavem olgeta. Plante long yumi i glad taem yumi luk samting olsem. Ol pikinini oli harem moa sef taem i gat ol papa mo mama we i kea long olgeta. Be, plante narafala pikinini oli no glad nating. Evri dei sam pikinini oli stap wari long ples we bambae oli slip long hem long naet. ?I gat wan hop blong ol pikinini ya we oli no gat ples blong stap long hem mo ol narafala we laef blong olgeta i no sef?

Yes maet i luk olsem se fiuja bambae i nogud, be Tok blong God i givim wan hop. Profet Aesea i talemaot se i gat dei i stap kam we ol man bambae oli laef we oli sefgud. Hem i raetem se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.”​—Aesea 65:21, 22.

?Be, hop ya i stanap long samting we i tru? Tok ya “hop” i no minim oltaem se yumi sua long wan samting blong i hapen. Eksampol, long Brasil, i gat wan tok we oli talem se: “Hop hem i laswan samting we bambae i ded.” Hemia i min se plante man oli gat hop nating sipos hop blong olgeta i no stanap long samting we i tru. Be hop we God i givim long yumi i defren. Aposol Pol i raetem se: “Olgeta we oli bilif long [God], bambae oli no save sem.” (Rom 10:11) Ol profet tok blong Baebol we oli kamtru finis oli mekem yumi sua fulwan se ol nara promes we Jeova God i mekem, bambae oli mas kamtru tu. Taem ol promes ya oli kamtru, ol trabol ya we oli mekem se plante pikinini oli slip long rod bambae i finis.

Tede, ol advaes blong Baebol oli save halpem olgeta we oli no gat hop blong mekem laef blong olgeta i kam moagud mo faenem wan trufala sefples. ?Olsem wanem ol advaes ya oli save halpem yumi? Ol Witnes blong Jeova long ples blong yu bambae oli glad blong halpem yu blong faenem ansa blong kwestin ya.