Stadi 9
Ol Man Blong God Oli Mas Stap Klin
?From wanem yumi mas klingud long olgeta haf blong laef blong yumi? (1)
?I minim wanem blong stap klin long saed blong speret? (2) ?long saed blong fasin? (3) ?long saed blong tingting? (4) ?long saed blong bodi? (5)
?Yumi mas stap longwe long wanem kaen doti tok? (6)
1. Jeova God i klin mo i tabu. Hem i wantem se olgeta man we oli wosipim hem oli mas stap klin oltaem—long saed blong speret, fasin, tingting, mo bodi. (1 Pita 1:16) I nidim bigfala fasin traehad blong stap klin oltaem long fes blong God. Yumi stap laef long wan wol we i doti. Mo tu, yumi mas faet agensem prapa fasin blong yumi blong wantem mekem samting we i no stret. Be yumi no mas stop long faet ya.
2. Klin Long Saed Blong Speret: Sipos yumi wantem mekem wok blong Jeova, yumi no save gohed blong folem ol tijing mo kastom blong ol gyaman skul. Yumi mas kamaot long ol gyaman skul mo yumi no mas sapotem olgeta nating. (2 Korin 6:14-18; Revelesen 18:4) Afta we yumi lanem trutok long saed blong God, yumi mas lukaotgud blong no letem ol man oli lidim yumi i go krangke wetem ol gyaman tijing blong olgeta.—2 Jon 10, 11.
3. Klin Long Ol Fasin: Jeova i wantem se ol man we oli wosipim hem, oli mekem ol trufala Kristin fasin oltaem. (1 Pita 2:12) Hem i luk evri samting we yumi mekem, nating se yumi mekem long fasin haed. (Hibrus 4:13) Yumi mas stap longwe long ol rabis fasin long saed blong seks mo ol narafala doti fasin blong wol ya.—1 Korin 6:9-11.
4. Klin Long Tingting: Sipos yumi tingting oltaem long ol samting we oli klin mo stret, fasin blong yumi tu bambae i klin. (Filipae 4:8) Be sipos yumi stap tingbaot ol doti fasin oltaem, bambae yumi mekem rabis fasin. (Matyu 15:18-20) Yumi mas stap longwe long olkaen pleplei mo sinema we oli save mekem tingting blong yumi i kam doti. Yumi save fulumap tingting blong yumi wetem ol samting we oli klin taem yumi stadi long Tok blong God.
5. Klin Long Bodi: From we ol Kristin oli wok long nem blong God, oli mas klin long bodi mo long klos blong olgeta. Yumi mas wasem han blong yumi afta we yumi go long toelet, mo bifo we yumi kakae no tajem kakae. Sipos yu no gat wan toelet, ale i stret blong berem sitsit blong yu. (Dutronome 23:12, 13) Sipos yumi stap klin long bodi, samting ya i save givhan long yumi blong gat gudfala helt. Haos blong wan Kristin i mas klin mo i mas gat oda long hem, insaed mo afsaed tu. Hem i mas luk defren long olgeta haos raonabaot, olsem wan gudfala eksampel blong fasin klin.
6. Ol Tok We i Klin: Ol man blong God oli mas talem trutok oltaem. Ol man blong gyaman bambae oli no save go insaed long Kingdom blong God. (Efesas 4:25; Revelesen 21:8) Ol Kristin oli no mas yusum ol rabis tok. Oli no mas talem no lesin long ol doti store mo tok plei we i doti. Oli stap defren long ol narafala man long wok, skul mo raonabaot long olgeta, from we ol tok blong olgeta oli klin.—Efesas 4:29, 31; 5:3.
[Tok blong pija long pej 19]
Ol man blong God oli mas klin long olgeta haf blong laef blong olgeta