Baebol i Talem Wanem
“?Tabu Spirit i Wan Man?
?WANEM ya tabu spirit blong God? Long faswan buk blong Baebol, Baebol i tokbaot tabu spirit se ‘i stap go i kam antap long wota.’ Tabu spirit ya, samtaem Baebol i talem tu se hem i “paoa blong God.” (Jenesis 1:2, futnot) Stori blong Baebol we i tokbaot taem we Jisas i baptaes, i soem se long taem ya God i stap long ‘heven’, mo tabu spirit i “kamdaon olsem wan sotleg” long Jisas. (Matiu 3:16, 17) Mo tu, Jisas i tokbaot tabu spirit se hem i ‘spirit blong givhan.’—Jon 14:16, Nyutesteman wetem Ol Sam long Bislama.
Sam man we oli ridim ol vas ya wetem sam narafala vas blong Baebol, oli talem se tabu spirit i wan man olsem God, Jisas, mo ol enjel, we olgeta ya oli ol spirit man. Mo blong plante handred yia finis, sam mama skul blong Krisendoma oli tokbaot tabu spirit olsem wan man we i gat ol defren fasin blong hem. Nating se tijing ya long saed blong tabu spirit i kamaot longtaem finis, plante memba blong jos oli konfius yet, mo samfala oli no agri wetem wanem we ol lida blong olgeta i talem. Be, folem wan ripot we i kamaot i no longtaem, 61 pesen blong ol man we oli askem kwestin long olgeta long saed blong tabu spirit blong God, oli talem se oli bilif we tabu spirit i “wan saen se God i stap no wan paoa, be i no wan man.” ?Be, Baebol i talem wanem long saed ya?
?Baebol i Talem Wanem?
Wan man we i stadi dip long Baebol bambae i mas luksave se tabu spirit i defren olgeta long tijing ya blong ol jos se tabu spirit i wan man. I gud yumi luk sam stori blong Baebol.
1. Taem Meri, mama blong Jisas, i go luk kasen sista blong hem Elisabet, Baebol i talem se pikinini ya we i stap yet long bel blong Elisabet i muv, ‘mo Elisabet i kam fulap long tabu spirit.’ (Luk 1:41) ?I stret blong ting se wan man i kam “fulap” insaed long wan narafala man bakegen?
2. Taem Jon Baptaes i toktok long ol man blong hem long saed blong Jisas olsem man we i hae moa long hem, Jon i talem se: ‘Mi mi kam fastaem, mi stap baptaesem yufala long wota, . . . Be man ya we bambae i kam biaen long mi, hem i hae moa long mi. Mi mi no naf nating blong karem sandel blong hem. Hem bambae i baptaesem yufala long tabu spirit.’ (Matiu 3:11) Long ples ya, Jon i no stap tokbaot tabu spirit olsem wan man taem hem i talem blong baptaesem ol man long tabu spirit.
3. Taem aposol Pita i visitim wan kapten blong ol soldia blong Rom mo famle blong hem, hem i tokbaot Jisas olsem man we God i makemaot hem taem ‘i givim tabu spirit mo bigfala paoa long hem.‘ (Ol Wok 10:38) Smoltaem afta, ‘tabu spirit i kamdaon’ long kapten ya mo famle blong hem. Vas i talem we plante man oli sapraes tumas from ‘we olgeta we oli no laen blong Isrel, be God i givim tabu spirit long olgeta.’ (Ol Wok 10:44, 45) Long vas ya bakegen, ol tok we oli yusum i no laenap nating wetem tingting ya se tabu spirit i wan man.
Samtaem Tok blong God i tokbaot sam samting olsem wan man. Ol samting ya hemia, waes, fasin luksave, sin, ded, mo kaengud fasin. (Ol Proveb 8:1–9:6; Rom 5:14, 17, 21, King James Version; 6:12) Jisas hem wan i tokbaot waes olsem we hem i gat ol pikinini blong hem. Hem i talem se “olgeta pikinini blong waes oli soemaot se waes ya i stret.” (Luk 7:35, King James Version) !I klia we waes i no wan man we i gat ol pikinini blong hem! Long sem fasin, yumi no save talem se tabu spirit i wan man jes from we Baebol i tokbaot hem samtaem olsem wan man. Nogat.
?Wanem Ya Tabu Spirit?
Baebol i tokbaot tabu spirit blong God olsem paoa blong God we i stap wok. Taswe, long Baebol ya New World Translation of the Holy Scriptures, oli tanem stret Hibru tok blong talem spirit blong God se “paoa blong God we i stap wok.” (Jenesis 1:2) Fulwan Baebol i agri long tok ya.—Maeka 3:8; Luk 1:35; Ol Wok 10:38.
God i no save stap long evri ples long semtaem. Be, Hem i stap long ples blong ol spirit man, hemia ‘hom blong hem long heven,’ no ples we hem i stap long hem. Hemia i defren long bilif blong bighaf blong ol man tede. (1 King 8:39; 2 Kronikel 6:39) Mo tu, Baebol i soemaot se God i gat wan stret ples we hem i stap long hem, hemia ples we “bigfala jea” blong hem i stap long hem. (1 King 22:19; Aesea 6:1; Daniel 7:9; Revelesen 4:1-3) Taem God i stap long ‘hom blong hem long heven,’ hem i save yusum paoa blong hem blong givhan long olgeta we oli stap long heven mo long wol.—Ol Sam 139:7.
Long 1879, wan man we i stadi dip long Baebol, Charles L. Ives, i givim wan pijatok we i stret blong soemaot we God i save stap nomo long ples blong hem mo i save yusum paoa blong hem blong mekem samting we hem i wantem. Masta Charles i raetem se: “Tingbaot tok ya we yumi stap talem se, ‘Openem ol windo long rum blong letem san i kam insaed.’ Taem yumi talem tok ya, yumi no minim se san i wan samting we bambae i kam insaed long rum, be yumi minim se laet we san i mekem bambae i saen i kam insaed long rum.” Sem mak, sipos God i wantem yusum paoa blong hem blong mekem wan wok, maet long wol ya, be hem i no nid blong kamdaon long wol blong mekem olsem, nogat. Hem i jes sanem tabu spirit blong hem nomo. Tabu spirit blong hem i save go long olgeta ples long heven mo long wol. Taem yumi kasem save se tabu spirit i bigfala paoa blong God, samting ya i givhan long yumi blong trastem se Jeova bambae i mekem ol promes blong hem oli kamtru.
[Futnot]
a Ol skul we oli giaman se oli Kristin.
?YU YU BIN TINGBAOT?
◼ ?Baebol i tijim se tabu spirit i wan man?—Ol Wok 10:44, 45.
◼ ?Wanem ya tabu spirit?—Jenesis 1:2.
◼ ?Tabu spirit blong God i gat paoa olsem wanem?—Ol Sam 139:7.