1 Man i No Naf Blong Kasem Save Long God—?Hemia i Tru?
?Yu yu harem tok ya finis?: “I had tumas long yumi, blong yumi kasem save long God.”
Catéchisme de l’Église Catholique i tokbaot God se: “Yumi no save eksplenem hem, yumi no save kasem save long hem, yumi no save luk hem, mo yumi no save talem se hem i olsem wanem.”—pej 24, poen 42. Plante jos we oli talem se oli Kristin, oli tijim se God i wan Triniti we yumi no save kasem save long hem.
?Baebol i tijim wanem?: Jisas i talem se olgeta we oli ‘save tru God’ bambae oli kasem blesing. (Jon 17:3) Sipos man i no naf blong save God, ?from wanem Jisas i talem se yumi mas save tru God? God i no haedem ol save long saed blong hem. Defren olgeta, hem i wantem we ol man oli mas save hem.—Jeremaea 31:34.
I tru se bambae yumi no naf blong kasem save evri samting long saed blong God. Hemia from we ol tingting mo fasin blong God oli hae moa long ol tingting mo fasin blong yumi.—Prija 3:11; Aesea 55:8, 9.
?Trutok ya i save givhan long yu olsem wanem?: Sipos i tru we yumi no naf blong kasem save long God, bambae yumi westem taem nomo blong traem save hem. Be i no olsem. God i mekem se yumi naf blong kasem save long hem mo i mekem se yumi save kam fren blong hem tu. God i tokbaot gudfala man ya Ebraham se i ‘fren blong hem.’ Mo Deved we i King blong Isrel, hem i raetem se: “Yu [Hae God] yu fren blong olgeta we oli stap obei long yu.”—Aesea 41:8; Ol Sam 25:14.
?Olsem wanem? ?I tru se man i save kam fren blong God? Yes i tru. Makem gud ol tok ya long Ol Wok 17:27, we i talem se: “God ya i no stap longwe long yumi nating.” ?Hem i no stap longwe long yumi olsem wanem? Hem i givim tok blong hem, Baebol, blong givhan long yumi blong save gud hem.a
God i talemaot nem blong hem long yumi. Nem ya hem i Jehova. (Eksodas 3:14, futnot) Hem i yusum Baebol blong talemaot ol samting we hem i bin mekem long ol man, olsem nao bambae yumi naf blong kasem save se Jehova hem i wanem kaen God. Antap long ol samting ya, God i soemaot tingting we hem i gat long yumi. Hem i talem se hem i ‘gat sore long man, mo hem i stap givhan long man long gladhat blong hem. Hem i no save kros kwik. Oltaem hem i stap lavem man mo oltaem hem i stap holemstrong promes blong hem.’ (Eksodas 34:6) Ol fasin blong yumi oli save mekem we Jehova i harem gud no i harem nogud. Yu traem tingbaot neson blong Isrel bifo. Taem ol man long neson ya oli mekem stronghed agens long Jehova, hem i “harem nogud.” Be olgeta we oli waes mo oli obei, oli mekem Jehova i glad we i glad.—Ol Sam 78:40; Ol Proveb 27:11.
[Futnot]
a Sipos yu wantem save wanem we Baebol i talem long saed blong God, lukluk japta 1 blong buk ya ?Wanem Samting We Baebol i Rili Tijim? we ol Witnes blong Jehova oli wokem.
[Tok blong makem poen long pej 4]
?Olsem wanem blong save God, sipos God i wan Triniti we man i no naf blong kasem save long hem?
[Foto Credit Line long pej 4]
The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International