Wan Presen We i Nambawan Tumas Long Ol Man

OL MAN oli nidim wan samting moa i bitim win, kakae, mo wota. Yumi ol man, yumi save kasem trufala glad sipos yumi lukaot save blong God long laef blong yumi. Yumi mas save from wanem yumi laef, from wanem yumi stap long wol ya. Taswe Jisas Kraes i talem se: “Olgeta we oli stap lukaot God from we oli no gat paoa blong hem long laef blong olgeta, oli save harem gud.”—Matiu 5:3.

God i givhan long yumi blong gat ol save ya we yumi nidim, taem hem i givim tabu buk ya Baebol, we ol man oli seremaot plante moa long hem i bitim olgeta narafala tabu buk long wol. Tede ol man oli save ridim Baebol fulwan no wan haf blong hem long samwe 2,400 lanwis. (2 Timoti 3:16) Baebol i talem se God i wokem olgeta samting long heven mo wol. (Jenesis, japta 1 mo 2) Baebol i talem tu se God i wokem evri samting long sikis “dei,” we hemia i no sikis prapa dei be i minim wan taem we i longfala. Hemia i laenap gud wetem wanem we ol saentis oli faenemaot long saed blong wol, olsem hamas yia we i tekem blong evri samting i kamtru, mo oda we ol samting oli folem blong kamtru.

Mo tu, Baebol i soemaot se God i gat wan stamba tingting long saed blong ol man. Hem i talemaot stamba tingting ya long Ol Sam 37:29 se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” ?Yu luk we long vas ya hem i talem se ol stret man—we i minim ol man we oli mekem laef blong olgeta i laenap wetem ol rul blong Baebol—bambae oli laef gogo i no save finis long wol ya, i no long heven? Mo long taem ya, wol bambae i no olsem tede we man i sakem doti olbaot long hem. Be bambae hem i wan paradaes.—Ol Sam 104:5; Luk 23:43.

Save We i Lidim Man i Go Kasem Laef

Paradaes ya bambae i gat tu gudfala samting long saed blong hem. Faswan samting, hemia se bambae hem i wan naesfala garen, mo namba tu samting hemia se ol man we oli stap long hem bambae oli gat pis wetem God. Aesea 11:9 i talem se: “Kantri ya [wol] bambae i fulap gud long ol man we oli savegud Hae God, olsem we solwota i fulap gud long ples blong hem.” Save ya blong Hae God bambae i jenisim tingting blong ol man. Hem i stat finis blong jenisim tingting blong ol trufala Kristin, mo i mekem we oli save laef long pis mo oli joengud. Ol Kristin ya oli tinghevi long tok ya we Jisas i talem long prea blong hem se: “Laef ya [we i no save finis], hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

Sipos yu yu wantem gat moa save long saed blong nambawan fiuja ya we Baebol i tokbaot, ol Witnes blong Jeova oli glad blong serem save ya wetem yu we yu no nid blong pem wan samting.a

[Futnot]