?I Gat Wan Man We i Wokem Samting Ya?

Lif Blong Wota Lili We i Blokem Wota

◼ Traem tingbaot ol plastik kap we oli save klinim olgeta nomo, ol windo we oli no save wetwet long ren, ol smosmol masin we wota i no save go insaed long olgeta blong spolem olgeta. Ol saentis oli talem se hemia sam samting we yumi save wokem sipos yumi lanem ol save we i haed long saed blong lif blong wota lili.

Tingbaot: Ol smosmol lam we man i no save luk wetem prapa ae blong hem, oli kavremap ol lif blong wota lili, mo wan samting olsem wota blong kandel i kavremap ol lam ya. Taem wota i foldaon long lif blong wota lili, ol smosmol lam ya oli holem wota i stap antap, mo samting ya i blokem wota blong i no mekem lif i wetwet. From we lif i no flat, wota i ronaot bifo we i save gotru long ol smosmol lam ya blong tajem lif. ?Samting ya i mekem wanem? Lif blong wota lili i stap drae mo tu i stap klingud, from we wota i wasemaot graon mo das we i stap long hem.

Ol saentis oli wantem wokem ol samting we oli gat fasin blong lif blong wota lili. Sipos oli save wokem ol smosmol masin wetem fasin blong lif blong wota lili, bambae wota we i kasem ol masin ya i no save spolem olgeta. Buk ya Science Daily i talem se: “Fasin blong lif ya i save givhan long yumi long plante plante rod.”

?Wanem tingting blong yu? ?Lif blong wota lili i kamaot olsem nomo, no i gat wan Man we i wokem samting ya?