1. ?Wanem stamba tingting blong God long saed blong wol?

STAMBA tingting blong God long saed blong wol, i nambawan tumas. Jehova i wantem we wol ya i fulap long ol man we oli hapi mo oli gat strong bodi. Baebol i talem se ‘God i mekemrere wan gudfala ples we nem blong hem Iden’ mo ‘i mekem ol tri oli gru long [ples ya we] oli gud tumas blong luk, mo frut blong olgeta i gud tumas blong kakae.’ Afta we God i wokem faswan man mo woman, hemia Adam mo Iv, hem i putum tufala long naesfala ples ya mo i talem long tufala se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol.” (Jenesis 1:28; 2:​8, 9, 15) Taswe stamba tingting blong God hemia se ol man oli mas gat pikinini, oli mas mekem ful wol ya i kam olsem naesfala garen ya, mo oli mas lukaot long ol anamol.

2. (a) ?Olsem wanem yumi save se stamba tingting blong God long saed blong wol ya bambae i kamtru? (b) ?Baebol i talem wanem long saed blong ol man we bambae oli laef olwe?

² ?Yu ting se stamba tingting ya blong Jehova God se ol man oli laef long wan paradaes wol, bambae i save kamtru samtaem? Hemia tok blong God: “Mi mi talemaot finis se bambae i olsem, mo ol samting ya bambae oli kamtru olsem we mi mi talem.” (Aesea 46:​9-11; 55:11) !Tru ya, samting we i stap long tingting blong God, bambae hem i mas mekem i kamtru! Hem i talem se hem i “no mekem [wol ya] blong i ples nating nomo,” be “hem i mekem blong man i save stap long hem.” (Aesea 45:18) ?God i wantem we wanem kaen man i laef long wol ya? ?Mo hem i wantem we oli laef long wol ya blong hamas yia? Baebol i ansa se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”​—Ol Sam 37:29; Revelesen 21:​3, 4.

3. ?Wol i olsem wanem tede? ?From samting ya, wanem kwestin i stap?

³ I klia se stamba tingting blong God i no kamtru yet from we ol man oli stap sik mo oli stap ded, oli stap faet mo oli stap kilkilim olgeta oli ded tu. I gat wan samting i gorong samples. !Be, yumi sua se neva God i bin gat tingting ya se wol bambae i olsem we yumi luk tede! ?Wanem samting i gorong? ?From wanem stamba tingting blong God i no kamtru? I no gat wan histri buk blong man we i stap ansa long kwestin ya from we trabol ya i stat long heven fastaem.

WAN ENEMI​—?HEM I KAM WEA?

4, 5. (a) ?Hu i yusum snek blong toktok long Iv? (b) ?Wanem i save mekem se wan gudfala man i kam stilman?

⁴ Faswan buk blong Baebol i tokbaot wan man we i agensem God. Man ya i soem hem fastaem long garen blong Iden. Baebol i tokbaot hem olsem wan “snek,” be hem i no rili wan anamol. Laswan buk blong Baebol i talem se “nem blong hem ‘Setan’ no ‘Man we i agensem man’, we i stap giaman long olgeta man long wol, i lidim olgeta oli go krangke.” Mo tu, Baebol i singaot man ya se “snek ya blong bifo.” (Jenesis 3:1; Revelesen 12:9) Wan strongfala enjel, no spirit man, i yusum wan snek blong toktok long Iv, olsem we sam man oli save mekem voes blong olgeta i kamaot long maot blong wan doli. Spirit man ya i stap finis taem God i wokem wol ya blong ol man oli stap long hem.​—Job 38:​4, 7.

⁵ Be, evri samting we Jehova i wokem oli stret gud olgeta. ?Taswe hu i mekem “Setan”, no Devel ya? Blong talem stret, wan long ol strong spirit pikinini ya blong God nomo i jenisim tingting blong hem mo i kam Devel ya. ?Weswe samting ya i save hapen? Tingbaot. Tede, maet wan man i gat gudfala fasin mo i neva giaman, be biaen hem i kam wan stilman. ?Wanem i mekem we man ya i kam olsem? Maet man ya i stat tingting tumas long wan samting we hem i no gat raet blong kasem. Sipos hem i gohed blong tingbaot samting ya oltaem, bambae hem i save wantem samting ya tumas. Nao, taem wan janis i kam long hem, bambae hem i tekem aksen blong kasem samting ya we hem i wantem tumas.​—Jemes 1:​13-15.

6. ?Olsem wanem wan spirit pikinini blong God i kam Devel Setan?

⁶ Sem samting ya i hapen long Devel Setan. Hem i harem tok we God i talem long Adam mo Iv se tufala i mas gat plante pikinini mo fulumap wol ya. (Jenesis 1:​27, 28) Maet Setan i ting se i moagud we tufala ya i wosipim hem i bitim we tufala i wosipim God. Ale, hat blong hem i stat wantem wan samting we hem i no gat raet blong kasem. Biaen hem i tekem aksen blong kasem samting ya we hem i wantem, taem hem i trikim Iv, i giaman long hem long saed blong God. (Jenesis 3:​1-5) Nao hem i kam wan Devel we tok ya i minim “man we i giaman blong spolem nem blong narafala.” Mo long semtaem hem i kam “Setan,” we tok ya i minim “Man we i agens.”

7. (a) ?From wanem Adam mo Iv, tufala i ded? (b) ?From wanem olgeta pikinini we oli kamaot long Adam oli kam olfala mo oli ded?

⁷ Devel Setan i yusum ol giaman tok mo trik blong pulum Adam mo Iv blong no obei long God. (Jenesis 2:17; 3:6) From samting ya, tufala i ded olsem we God i talem se bambae i hapen long tufala sipos tufala i no obei long hem. (Jenesis 3:​17-19) Taem we Adam i sin, hem i no moa stret gud olgeta, mo ol pikinini we oli kamaot long hem tu oli bon wetem sin. (Rom 5:12) Yumi save eksplenem samting ya wetem wan pijatok long saed blong wan tin blong kukum bred. ?Sipos tin ya i ben smol, olgeta bred we yu kukum long tin ya bambae oli olsem wanem? Olgeta bred ya bambae oli kamaot we oli ben smol, oli no stret gud. Long sem fasin, evri man we oli kamaot long Adam oli kasem sin blong hem. From samting ya nao, olgeta man oli kam olfala mo oli ded.​—Rom 3:23.

8, 9. (a) ?Setan i tok agensem wanem samting? (b) ?From wanem God i no kilim i ded ol rebel ya wantaem?

⁸ Taem Setan i lidim Adam mo Iv blong tufala i sin agensem God, i olsem we hem i lidim wan rebelian. Hem i tok agensem fasin blong Jehova blong rulum man. Yes, i olsem we Setan i stap talem se: ‘God i no save rulum gud ol man. Hem i stap giaman mo i stap holembak ol gudgudfala samting long ol man. Ol man oli no nidim we God i rulum olgeta. Oli naf finis blong jusum wanem samting i gud mo wanem samting i nogud. Bambae oli harem gud moa sipos oli stap aninit long rul blong mi.’ ?God bambae i mekem wanem long Setan we i daonem rul blong hem? Sam man oli ting se i moagud sipos God i bin kilim i ded ol rebel ya wantaem. ?Be sipos hem i mekem olsem, bambae hem i gat pruf blong soemaot se tok blong Setan i giaman? ?Yu ting se hemia nao rod blong soemaot se rul blong God nomo i stret?

⁹ Jehova i savegud olsem wanem blong stretem ol trabol long stret fasin. Mo from stret fasin ya blong hem nao, hem i no save kilim ol rebel ya oli ded wantaem. Hem i luksave se blong soemaot long fasin we i klia se Devel Setan i giaman, hem i mas letem taem i pas. God i tekem desisen se bambae hem i letem ol man oli rul blong smoltaem aninit long paoa blong Setan. Long Japta 11 blong buk ya, bambae yumi tokbaot from wanem Jehova i mekem olsem, mo from wanem hem i letem taem ya i longfala olsem, bifo we hem i stretem bisnes ya. Be naoia i gud yu tingbaot kwestin ya: ?I stret we Adam mo Iv, tufala i bilivim ol tok blong Setan, we i neva mekem wan gudfala samting long tufala? ?I stret blong tufala i ting se Jehova, we i givim evri samting long tufala, hem i wan rabis man blong giaman? ?Sipos yu, bambae yu mekem wanem?

10. ?Olsem wanem yu yu save sapotem Jehova long bisnes ya bitwin Hem mo Setan?

¹⁰ I gud yumi tingbaot ol kwestin ya from we evri man tede oli mas ansa long bisnes ya. Yes, yu yu gat janis blong stap long saed blong Jehova mo sapotem hem long bisnes ya. Yu yu save agri long Jehova olsem Rula blong yu mo halpem hem blong pruvum se Setan i wan man blong giaman. (Ol Sam 73:28; Ol Proveb 27:11) Sore tumas, i gat smol man nomo long wol we oli jusum saed blong Jehova. Hemia i stanemap wan impoten kwestin se: ?Baebol i rili tijim se Setan i rulum wol?

?HU I RULUM WOL?

11, 12. (a) ?Olsem wanem traem ya we Setan i mekem long Jisas i soemaot se Setan i rulum wol? (b) ?Wanem narafala samting i soemaot se Setan i rulum wol?

¹¹ Jisas i soemaot klia se Setan nao i rulum wol. Wan taem, Setan i wokem wan merikel blong soemaot long Jisas “olgeta kantri long wol ya wetem ol gudgudfala samting we oli gat.” Nao Setan i mekem promes ya long Jisas i se: “Sipos yu bodaon long mi, yu mekem wosip long mi, bambae mi mi givim olgeta samting ya i go long yu.” (Matiu 4:​8, 9; Luk 4:​5, 6) Tingbaot samting ya. ?Sipos olgeta kingdom blong wol ya oli blong God, yu ting se bambae Setan i save yusum ol kingdom ya blong traem Jisas? Nogat, from we samting ya bambae i no rili traem Jisas. Jisas i no agensem tingting ya se olgeta kantri blong wol ya oli blong Setan. Sipos oli no blong Setan ating bambae Jisas i talem samting ya long hem.

¹² I tru, Jehova i God ya we i gat olgeta paoa, hem i God we i Wokem heven mo wol. (Revelesen 4:11) Be i no gat wan vas long Baebol we i talem se Jehova God no Jisas Kraes i rulum wol ya. Blong talem stret, Jisas i talem se Setan i “stap rulum wol ya.” (Jon 12:31; 14:30; 16:11) Baebol i talem tu se Devel Setan hem i “rabis god blong wol ya.” (2 Korin 4:​3, 4) Kristin aposol Jon i tokbaot man ya blong agens, i se: “Olgeta man blong wol ya oli stap long paoa blong Setan.”​—1 Jon 5:19.

?OLSEM WANEM WOL BLONG SETAN BAMBAE I LUS?

13. ?From wanem i nidim wan niufala wol?

¹³ Long evri yia we i pas, wol ya i stap kam moa nogud. Long evri ples i gat ol ami oli stap faet, ol lida blong politik oli no tok tru, ol lida blong skul oli gat tu fes, mo ol man blong brekem loa oli no moa kea long rabis fasin blong olgeta. I no moa gat rod blong man i jenisim wol ya mo mekem i kamgud bakegen. Baebol i soemaot se taem i klosap nao blong God i finisim rabis wol ya long dei blong faet blong hem, hemia Amagedon. Afta long faet ya, bambae i gat wan niufala wol we stret fasin nomo i stap long hem.​—Revelesen 16:​14-16.

14. ?God i jusum hu blong rul long Kingdom blong Hem? ?Olsem wanem Baebol i talemaot samting ya?

¹⁴ Jehova God i jusum Jisas Kraes blong rul long Kingdom, no gavman blong Hem long heven. Longtaem bifo, Baebol i bin talemaot se: “!Wan pikinini boe bambae i bon long mifala! !Pikinini ya, bambae yu yu givim long mifala, mo hem bambae i rul long mifala! Ol nem blong hem, bambae oli singaot hem se, . . . ‘Pikinini ya blong King, we Hem i Stamba blong Pis.’ Taem we hem i stap rul, oltaem paoa blong hem bambae i stap kam bigwan moa, mo ples we hem bambae i rul long hem, oltaem bambae i stap kwaet.” (Aesea 9:​6, 7) Jisas i tijim ol man blong hem blong prea from gavman ya, se: “Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.” (Matiu 6:​10, NW ) Long wan narafala haf blong buk ya, bambae yumi luk se i no longtaem Kingdom blong God bambae i karemaot olgeta gavman blong wol ya, mo hem wan nomo bambae i rul long ples blong olgeta. (Daniel 2:44) Ale, Kingdom blong God bambae i mekem wol ya i kam wan paradaes.

!WAN NIUFALA WOL I KLOSAP!

15. ?Wanem ya “niufala wol” ya?

¹⁵ Baebol i mekem yumi sua long samting ya se: “God i promes finis blong putum niufala skae mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.” (2 Pita 3:13; Aesea 65:17) Long sam ples long Baebol we i tokbaot “wol,” hem i minim ol man we oli laef long graon ya. (Jenesis 11:1) Taswe, “niufala wol” ya we stret fasin nomo bambae i stap long hem, i minim olgeta man we God i glad long olgeta.

16. ?Wanem nambawan presen we God bambae i givim long ol man we oli stret long fes blong hem? ?Mo yumi mas mekem wanem blong kasem presen ya?

¹⁶ Jisas i promes se long niufala wol we i stap kam, olgeta we God i agri long olgeta bambae oli kasem presen ya “laef we i no save finis.” (Mak 10:30) Plis openem Baebol blong yu long Jon 3:16 mo Jon 17:​3, mo ridim tok blong Jisas se yumi mas mekem wanem blong kasem laef ya we i no save finis. Ale, tingbaot ol blesing we Baebol i tokbaot long saed blong Paradaes ya long wol we ol man oli save harem gud long hem, sipos God i luk se oli stret blong kasem nambawan presen ya blong hem.

17, 18. ?Olsem wanem yumi sua se bambae i gat pis mo ol man bambae oli save stap gud long olgeta ples long wol?

¹⁷ Rabis fasin, faet, fasin blong brekem loa, mo raf fasin bambae oli finis. “Bambae . . . ol man nogud oli lus . . . Ol man we tingting blong olgeta i stap daon, bambae oli tekem graon ya i blong olgeta.” (Ol Sam 37:​10, 11) Bambae i gat pis, from we ‘God bambae i mekem ol faet i finis long olgeta ples long wol.’ (Ol Sam 46:9; Aesea 2:4) Ale, ‘bambae stret fasin i kam bigwan mo ol man bambae oli gat gudfala laef oltaem, olsem we mun i stap saen oltaem’​—!hemia i minim blong olwe!​—Ol Sam 72:7.

¹⁸ Ol man blong Jehova bambae oli save stapgud we i no gat samting i save spolem olgeta. Ol man Isrel we Baebol i tokbaot olgeta, oli stap gud long ples blong olgeta taem oli obei long God. (Levitikas 25:​18, 19) Bambae ol man oli save harem gud tu long Paradaes from we bambae i no moa gat wan samting i save spolem olgeta.​—Aesea 32:18; Maeka 4:4.

19. ?Olsem wanem yumi save se bambae i gat plante kakae long niufala wol blong God?

¹⁹ Bambae ol man oli no moa sot long kakae. Man blong raetem Sam i singsing se: “Bambae i gat plante kakae long ples ya, we bambae ol hil oli fulap gud long hem.” (Ol Sam 72:16) Jehova God bambae i blesem ol stret man blong hem, mo ‘i mekem we graon ya i givim plante kakae.’​—Ol Sam 67:6.

20. ?From wanem yumi sua se ful wol bambae i kam wan paradaes?

²⁰ Ful wol bambae i kam wan paradaes. Ol niufala haos mo garen we oli naes tumas, bambae oli stap long wol ya we naoia ol sinman oli spolem. (Aesea 65:​21-24; Revelesen 11:18) Taem ol yia oli pas, ol man bambae oli wok long evri ples blong wol, gogo ful wol i kam olsem garen blong Iden bakegen we i naes mo i karem plante kakae. Mo God bambae i neva fogetem blong ‘givim plante kakae long olgeta laef samting, mo mekem olgeta evriwan oli harem gud.’​—Ol Sam 145:16.

21. ?Wanem i soem se pis bambae i stap bitwin ol man mo ol anamol?

²¹ Bambae i gat pis bitwin ol man mo ol anamol. Ol anamol blong bus mo ol anamol blong haos bambae oli kakae wanples. Ol pikinini tu bambae oli no save fraet long ol anamol olsem tede, we oli save kilim man i ded.​—Aesea 11:​6-9; 65:25.

22. ?Wanem bambae i hapen long ol sik?

²² Bambae i no moa gat sik. Jisas we i Rula blong Kingdom blong God long heven, bambae i hilim plante moa man i bitim wanem we hem i mekem taem hem i stap long wol bifo. (Matiu 9:35; Mak 1:​40-42; Jon 5:​5-9) Yes, long taem ya, bambae “i no moa gat man olbaot long kantri ya we i save talem se hem i sik.”​—Aesea 33:24; 35:​5, 6.

23. ?From wanem laef bakegen long ded bambae i mekem yumi glad tumas?

²³ Ol famle mo ol fren we oli ded, bambae oli laef bakegen mo bambae oli gat hop blong neva ded samtaem. Olgeta man we oli ded mo we oli stap long memori blong God, bambae oli laef bakegen. Tru ya, “olgeta man we oli ded [bambae] oli laef bakegen, ol man we oli stret, wetem ol man we oli no stret.”​—Ol Wok 24:15; Jon 5:​28, 29.

24. ?Yu yu harem olsem wanem taem yu tingbaot se yu yu gat janis blong laef long Paradaes long wol?

²⁴ !Yes, i gat wan nambawan fiuja i stap blong olgeta we oli wantem save long hem, mo we oli wantem mekem wok blong Jehova God, Bigfala Man ya we i Wokem yumi! Jisas i stap tokbaot Paradaes ya long wol taem Hem i mekem promes ya long rabis man we i hang long pos klosap long hem, se: “Bambae yu stap wetem mi long Paradaes.” (Luk 23:43) I impoten tumas we yumi traem kasem moa save long saed blong Jisas Kraes, from we, tru long hem nao, olgeta blesing ya bambae oli save kamtru.

1. ?Wanem prea we bambae yumi tokbaot?

MILIAN man raon long wol oli savegud prea ya we plante long olgeta oli kolem Lodsprea. Hemia wan prea we Jisas Kraes hem wan i talem olsem wan eksampol we ol man oli save folem taem oli prea. Prea ya i gat bigfala mining. Trifala faswan samting long prea ya oli save halpem yumi blong lanem moa long saed blong wanem we Baebol i tijim.

2. ?Wanem tri samting we Jisas i tijim ol disaepol blong talem long prea blong olgeta?

² Long fashaf blong prea ya, Jisas i talem long ol man we oli stap lesin long hem se: “Yufala i mas prea olsem: ‘Papa blong mifala long heven, nem blong yu i tabu. Letem kingdom blong yu i kam. Mekem ol samting we yu yu wantem oli kamaot long wol, olsem we oli kamaot finis long heven.’ ” (Matiu 6:​9-13, NW ) ?Wanem mining blong trifala samting ya?

3. ?Yumi nidim blong save wanem long saed blong Kingdom blong God?

³ Yumi lanem plante samting finis long saed blong nem blong God, Jehova. Mo yumi bin tokbaot smol, stamba tingting blong God long saed blong ol man we i kamtru finis mo we bambae i kamtru yet. ?Be Jisas i stap tokbaot wanem, taem hem i talem se yumi mas prea se: “Letem kingdom blong yu i kam”? ?Wanem ya Kingdom blong God? ?Olsem wanem Kingdom ya bambae i mekem nem blong God i tabu? ?Olsem wanem Kingdom ya bambae i mekem ol samting we God i wantem oli kamtru?

?KINGDOM BLONG GOD HEM I WANEM?

4. ?Kingdom blong God hem i wanem? ?Hu ya King blong hem?

⁴ Kingdom blong God i wan gavman we Jehova God i stanemap, wetem wan King we Hem i jusum. ?Hu ya King blong Kingdom blong God? Hemia Jisas Kraes. Jisas i wan King we i hae moa long olgeta lida blong wol, mo Baebol i kolem hem ‘King blong ol king, mo Masta blong ol masta.’ (1 Timoti 6:15) Hem i gat paoa blong mekem i gud moa i bitim eni lida blong wol, nating se ol lida ya oli gud olsem wanem.

5. ?Kingdom blong God i stap wea, mo bambae i rulum wanem?

⁵ ?Kingdom blong God i stap wea? Blong ansa long kwestin ya yumi save tingbaot se, ?Jisas i stap wea? Maet yu rimemba samting we yumi lanem finis se ol man oli kilim Jisas i ded taem oli nilim hem long pos. Biaen, hem i laef bakegen. Mo smoltaem biaen, hem i gobak long heven. (Ol Wok 2:33) Ol samting ya oli soemaot klia nomo se Kingdom blong God i stap long heven. Taswe Baebol i talem se hem i “kingdom blong heven.” (2 Timoti 4:​18, King James Version) Nating se Kingdom blong God i stap long heven, bambae hem i rulum wol.​—Revelesen 11:15.

6, 7. ?Wanem i mekem se Jisas i beswan man blong kam King?

⁶ ?Wanem i mekem se Jisas i beswan man blong kam King? Wan samting se bambae hem i neva ded. Baebol i skelem Jisas wetem ol king blong wol ya mo i talem se ‘hem nomo i no save ded samtaem, mo i stap long delaet we i saen we i saen, we man i no save kam klosap long hem.’ (1 Timoti 6:16) Hemia i min se, olgeta gudfala samting we Jisas i mekem, bambae oli stap olwe. Mo yumi sua se bambae hem i mekem sam nambawan samting long ol man.

⁷ Tingbaot profet tok ya long Baebol long saed blong Jisas: ‘King ya, spirit blong Hae God bambae i stap long hem, i mekem hem i waes, mo i mekem hem i man blong save. Spirit ya bambae i givim gudfala toktok long hem, mo i mekem hem i gat paoa. Bambae hem i mekem hem i save ol samting we Hae God i wantem, mo i mekem hem i man blong ona long Hae God. Oltaem nomo, king ya bambae i glad tumas blong obei long Hae God. Sipos hem i jajem man, bambae hem i no save luk long ol samting ya nomo we ol man oli save luk long ae blong olgeta, bambae hem i no save tingbaot ol samting ya nomo we ol man oli stap talem long hem. Bambae hem i stretem bisnes blong ol man we trabol i kasem olgeta, mo bambae i mekem long fasin we i stret olgeta. Bambae hem i mekem rod blong ol puaman oli save kasem ol samting we oli gat raet blong kasem.’ (Aesea 11:​2-4) Ol tok ya oli soemaot se Jisas bambae i wan King we i folem stret fasin mo i gat sore taem hem i rulum ol man long wol. ?Yu yu wantem se wan man olsem nao i rul long yu?

8. ?Hu bambae i rul wetem Jisas?

⁸ Hemia wan narafala trutok long saed blong Kingdom blong God: Jisas i no rul hem wan. Bambae i gat sam narafala man we oli rul wetem hem. Hemia nao from wanem aposol Pol i talem long Timoti se: “Sipos yumi harem nogud be yumi stap stanap strong, bambae yumi save joen wetem hem blong holem hae nem [king] wetem hem.” (2 Timoti 2:12) Yes, Pol, Timoti, mo sam narafala man blong bilif we God i jusumaot olgeta, bambae oli rul wetem Jisas long Kingdom long heven. ?Olgeta we bambae oli kasem nambawan wok ya oli hamas?

9. ?Hamas man bambae oli rul wetem Jisas, mo God i stat jusum olgeta ya wetaem?

⁹ Long Japta 7 blong buk ya, yumi tokbaot wan vison blong aposol Jon. Long vison ya hem i luk “we antap long bigfala hil ya Saeon [ples blong hem olsem King long heven], Smol Sipsip blong God [Jisas Kraes] i stap stanap. Mo i gat wan handred foti fo taosen man oli stap wetem hem, we i gat nem blong Smol Sipsip ya wetem nem blong Papa blong hem i stap finis long fored blong olgeta.” ?Hu ya ol 144,000 man ya? Jon hem wan i ansa long kwestin ya taem hem i se: “Olgeta oli stap biaen long Smol Sipsip ya long evri ples we hem i pas long hem. God i pemaot olgeta finis, i tekemaot olgeta long ol narafala man, nao oli fri. Olgeta ya oli blong God mo blong Smol Sipsip ya, oli olsem ol fas kakae blong garen, we i blong givim i go long God.” (Revelesen 14:​1, 4) Yes, oli ol man blong Jisas Kraes we oli fasgud long bilif blong olgeta mo we God i jusum olgeta blong oli rul long heven wetem Jisas. Afta we oli laef bakegen long ded blong go long heven, bambae oli “king, oli rul long olgeta man long wol.” (Revelesen 5:10) Stat long taem blong ol aposol bifo, God i stap jusum sam Kristin we oli holemstrong long bilif, blong oli fulumap namba ya blong 144,000.

10. ?From wanem God i soem lav taem hem i jusum Jisas mo 144,000 man long wol ya blong oli rulum yumi?

¹⁰ God i soem bigfala lav taem hem i jusum Jisas mo ol 144,000 man blong oli rulum wol ya. ?From wanem? From we Jisas i save se man i harem olsem wanem taem hem i safa. Pol i talem se Jisas “i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin.” (Hibrus 4:15; 5:8) Olgeta we oli rul wetem Jisas tu oli safa mo oli traehad blong stanap strong taem oli stap long wol ya. Antap long hemia, oli bin faet strong agensem sin mo oli bin stanap strong nating se oli kasem plante defren kaen sik. I sua se bambae oli kasem save gud ol trabol we man i kasem.

?KINGDOM BLONG GOD BAMBAE I MEKEM WANEM?

11. ?From wanem Jisas i talem long ol disaepol blong hem blong oli prea se God bambae i mekem ol samting we hem i wantem oli kamaot long heven?

¹¹ Taem Jisas i talem se ol disaepol blong hem oli mas prea blong Kingdom blong God i kam, hem i talem tu se oli mas prea se God i mekem ol samting we hem i wantem oli kamtru ‘long wol, olsem we oli kamaot long heven.’ God i stap long heven, mo oltaem nomo ol gudfala enjel blong hem oli stap mekem wanem we hem i wantem. Be long Japta 3 long buk ya, yumi lanem se wan rabis enjel i no moa wantem mekem ol samting we God i wantem, nao hem i pulum Adam mo Iv blong tufala i sin. Long Japta 10 bambae yumi lukluk moa, wanem we Baebol i talem long saed blong rabis enjel ya, we yumi save hem long nem ya Devel Setan. God i letem Setan mo ol rabis enjel we oli folem hem, hemia ol dimon, oli stap smoltaem long heven. Taswe, blong smoltaem i no evri man long heven we oli stap mekem wanem we God i wantem. Be samting ya i jenis taem Kingdom blong God i stat rul. Taem Jisas Kraes i sidaon long jea blong King, hem i mekem faet long Setan.​—Revelesen 12:​7-9.

12. ?Wanem tu impoten samting we oli hapen olsem we Revelesen 12:10 i tokbaot?

¹² Ol profet tok ya oli talemaot samting we i hapen: “Mi harem we wan man long heven i singaot bigwan i talem se, ‘!Naoia God blong yumi i sevem yumi! !Naoia hem i soemaot we hem i gat paoa, mo we hem i King! Naoia Mesaea blong hem i soemaot we hem i gat paoa long evri samting. Man ya [Setan] we i agensem ol brata blong yumi, we long dei mo long naet hem i stap talemaot ol poen blong hem agens long olgeta long fes blong God, naoia God i sakemaot hem finis i gowe long heven.’ ” (Revelesen 12:10) ?Long vas ya, yu yu makem tu impoten samting we Baebol i talem se oli hapen? Faswan se, Kingdom blong God we Jisas Kraes i king long hem, i stat rul. Namba tu samting se, oli aotem Setan long heven i kamdaon long wol.

13. ?Wanem i hapen afta we oli sakemaot Setan long heven?

¹³ ?Wanem frut i kamaot afta long tufala samting ya? Baebol i talem wanem we i bin hapen long heven, i se: “Nao from samting ya, yu heven, mo yufala evriwan we i stap long heven, yufala i mas harem gud.” (Revelesen 12:12) Yes, ol gudfala enjel long heven oli glad tumas from we Setan mo ol rabis enjel blong hem oli aot finis, nao olgeta evriwan we oli stap long heven oli man blong Jehova God. Naoia heven i wan ples we pis mo fasin joen gud i stap long hem. Taswe yumi save talem se ol samting we God i wantem oli kamtru finis long heven.

14. ?Wanem i hapen from we oli sakemaot Setan long heven i kamdaon long wol?

¹⁴ ?Be olsem wanem long wol? Baebol i talem se: “Sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.” (Revelesen 12:12) Setan i kros from we oli sakemaot hem long heven mo hem i gat smol taem nomo i stap. From we hem i kros tumas hem i mekem trabol long wol. Long nekis japta bambae yumi tokbaot wanem sam long ol trabol ya we hem i mekem. Be taem yu tingbaot ol samting ya, maet yu askem se, ?Olsem wanem Kingdom bambae i mekem ol samting we God i wantem oli kamtru long wol ya?

15. ?Wanem stamba tingting blong God long saed blong wol ya?

¹⁵ ?Yu tingbaot wanem samting we God i wantem mekem long wol ya? Yu yu lanem samting ya long Japta 3. Long Iden, God i soemaot se hem i wantem we wol ya i kam wan paradaes mo i fulap long ol stret man we oli neva save ded samtaem. Setan i pulum Adam mo Iv blong tufala i sin, mo samting ya i blokem stamba tingting ya blong God blong i no kamtru kwiktaem olsem we hem i wantem. Be hemia i no min se God i jenisim tingting blong hem. Nogat. Jehova i gat tingting yet se “ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Kingdom blong God nao bambae i mekem samting ya i kamtru. ?Bambae hem i mekem samting ya olsem wanem?

16, 17. ?Daniel 2:44 i talem wanem long saed blong Kingdom blong God?

¹⁶ Tingbaot profet tok blong Daniel 2:44. Long vas ya yumi ridim se: “Long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.” ?Long ples ya yumi lanem wanem long saed blong Kingdom blong God?

¹⁷ Faswan samting, vas ya i talem se Kingdom blong God i stanap “long taem blong ol king,” i minim taem ol narafala kingdom oli stap yet. Seken samting, se Kingdom ya bambae i stap blong olwe. Bambae i no gat wan narafala gavman we i save kafsaedem hem no tekem ples blong hem. Namba tri samting, se bambae i gat wan faet bitwin Kingdom ya blong God mo ol kingdom blong wol ya. Be Kingdom blong God bambae i win. Nao hem nomo bambae i stap olsem gavman we i rulum olgeta man long wol. Ale, ol man bambae oli harem gud aninit long rul blong gavman ya we i beswan.

18. ?Wanem nem blong laswan faet bitwin long Kingdom blong God mo ol gavman blong wol?

¹⁸ Baebol i gat plante samting blong talem long saed blong laswan faet bitwin Kingdom blong God mo ol gavman blong wol ya. Eksampol, hem i tijim se taem en i kam klosap, ol rabis enjel bambae oli talemaot olkaen giaman tok blong trikim “ol king blong evri ples long wol.” ?Blong mekem wanem? “Blong tekem olgeta oli kam wanples, blong oli mekem faet long bigfala Dei blong God ya we i gat olgeta paoa.” Ol king blong wol ya bambae oli kam wanples “long ples ya we long lanwis blong ol laen blong Isrel nem blong hem ‘Amagedon.’ ” (Revelesen 16:​14, 16) Folem wanem we tufala vas ya i talem, laswan faet ya bitwin ol gavman blong man mo Kingdom blong God, oli kolem Amagedon.

19, 20. ?From wanem ol samting we God i wantem oli no stap kamtru long wol ya naoia?

¹⁹ ?Kingdom blong God bambae i mekem wanem long faet blong Amagedon? Tingbaot bakegen, wanem stamba tingting blong God long saed blong wol ya. Jehova God i wantem we wol ya i fulap long ol man we oli gat stret fasin, we oli stret gud olgeta, mo we oli wosipim hem long Paradaes. ?From wanem samting ya i no kamtru naoia? Faswan samting se, yumi sinman, yumi stap sik mo yumi stap ded. Be long Japta 5 yumi bin lanem se Jisas i ded blong wokem rod blong yumi save laef olwe. Ating yu save gud ol tok ya we oli stap long Gospel blong Jon se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”​—Jon 3:16.

²⁰ Wan narafala samting se plante man oli mekem ol rabis fasin. Oli giaman, oli wokem ol trik blong spolem man, oli folem olkaen nogud fasin long saed blong seks. Oli no wantem mekem samting we God i wantem. Ol man we oli mekem ol rabis fasin ya bambae oli lus long faet blong God long Amagedon. (Ol Sam 37:10) Wan narafala risen from wanem ol man long wol ya oli no stap mekem ol samting we God i wantem, hemia se ol gavman oli no pulum ol man blong mekem olsem. Plante gavman oli slak blong rulum ol man, no maet oli mekem i nogud tumas long ol man, no maet oli stap wok long kruked fasin. Baebol i tok stret nomo se: “Long wol ya, sam man oli gat paoa, mo ol narafala man oli stap aninit long olgeta, oli stap harem nogud.”​—Prija 8:9.

21. ?Olsem wanem Kingdom bambae i mekem olgeta samting we God i wantem oli kamtru long wol ya?

²¹ Afta long Amagedon, ol man bambae oli stap aninit long wan gavman nomo, hemia Kingdom blong God. Kingdom ya bambae i mekem ol samting we God i wantem oli kamtru mo bambae i karem ol nambawan blesing i kam long ol man. Eksampol, bambae hem i finisim Setan mo ol rabis enjel blong hem. (Revelesen 20:​1-3) Sakrefaes blong Jisas bambae i mekem we olgeta gudfala man oli no moa sik mo oli no moa ded. Defren olgeta, aninit long rul blong Kingdom, bambae oli laef gogo i no save finis. (Revelesen 22:​1-3) Wol bambae i kam wan paradaes. Yes, Kingdom ya bambae i mekem olgeta samting we God i wantem oli kamtru long wol, mo bambae i mekem nem blong God i tabu. ?Hemia i minim wanem? I min se aninit long Kingdom blong God, olgeta man we oli laef long wol ya bambae oli ona long nem blong Jehova.

?KINGDOM BAMBAE I MEKEM OLGETA SAMTING YA WETAEM?

22. ?Olsem wanem yumi save se Kingdom blong God i no kam yet taem Jisas i stap long wol, mo i no kam yet afta we Jisas i laef bakegen?

²² Taem Jisas i tijim ol man blong hem blong prea se, “Letem kingdom blong yu i kam,” i klia se Kingdom i no stanap yet long taem ya. ?Kingdom ya i stanap taem Jisas i gobak long heven? Nogat, from we Pita mo Pol, tufala i talem se afta we Jisas i laef bakegen, profet tok ya long Ol Sam 110:1 i kamtru long hem, we i se: “Masta blong mi. Hae God i talem long yu se, . . . ‘Yu sidaon long raet saed blong mi, yu wet. Bambae mi mekem ol enemi blong yu oli stap aninit long paoa blong yu, oli slef blong yu.’ ” (Ol Wok 2:​32-35; Hibrus 10:​12, 13) Taswe afta we Jisas i gobak long heven, hem i mas wet fastaem.

23. (a) ?Kingdom blong God i stat rul wetaem? (b) ?Bambae yumi tokbaot wanem long nekis japta?

²³ ?Jisas i wet kasem wetaem? Long en blong ol yia 1800, sam Baebol studen we oli wantem tumas blong faenem trutok, oli kaontem se Jisas bambae i wet kasem 1914. (Blong save olsem wanem oli faenem yia ya, lukluk Diksonari, pej 215-218.) Ol samting we oli hapen long wol stat long 1914, oli pruvum se yia we ol Baebol studen ya oli makem, i stret. Ol profet tok we oli stap kamtru oli soemaot se long 1914 nao Kraes i kam King mo Kingdom blong God long heven i stat rul. Taswe, yumi stap laef naoia long “smol taem” ya we Setan i gat blong mekem wok blong hem. (Revelesen 12:12; Ol Sam 110:2) Mo tu, yumi save sua se i no longtaem, Kingdom blong God bambae i mekem olgeta samting we hem i wantem oli kamtru long wol ya. ?Yu yu glad blong harem wan nius olsem? ?Yu yu bilif se samting ya i save kamtru? Nekis japta bambae i halpem yu blong luk se hemia nao wanem we Baebol i tijim.