tingting mo ol gudfala fasin, oli mas mekem sam samting tugeta, oli mas stretem olgeta taem i gat nid blong mekem, mo oli mas soemaot wan gudfala rod long olgeta.

⁵ Long Distrik Asembli, yumi kasem buk ya Questions Young People Ask​—Answers That Work. Hem i save halpem gud ol yangfala. Hem i save halpem ol papa mama blong toktok wetem ol pikinini long ol gudfala rul blong Baebol. Sipos ol loa blong God oli kam insaed long tingting mo hat blong ol pikinini, oli save givhan long hem blong agensem ol samting we i traem pulum hem. Sipos famle i joen blong tokbaot nyufala buk ya, bambae ol trabol oli no kasem ol yangfala.

⁶ Taem buk ya Young People Ask i kamaot long Distrik Asembli, brata we i mekem tok ya i tok stret long ol yangfala we i stap long fored. Hem i soemaot olsem wanem buk ya i save halpem olgeta. Hem i pulum tingting blong ol papa mama blong oli yusum hem blong mekem stadi wetem famle blong olgeta. Long en blong evri japta, i gat sam “poen blong toktok.” Sosaete i no putum ol kwestin ya blong askem sam kwestin long olgeta haf wanwan, no gat. Ol kwestin ya oli laenap wetem ol stampa tok we i stap insaed long wan japta. Ating sam papa i wantem askem ol kwestin ya taem oli ridim finis olgeta haf blong wan japta. Sam narafala oli wantem askem wan kwestin taem oli ridim finis wan stampa tok mo ol haf we i stap biaen long hem.

Halpem Ol Yangfala Long Ples Blong Yufala

⁷ Plante taem, yumi faenem sam yangfala long wok blong prij. Sipos oli ridim buk ya Young People Ask, olgeta tu oli save faenem ansa long sam kwestin we oli askem. Taswe, long manis Febuwari bambae yumi givimaot buk ya. Ating yu mekem sam fas tok oli rere finis blong givimaot hem. No yu save talem se:

⁸ “Plante man oli ting se taem oli yang, oli harem gud moa, i winim taem oli stap kam olfala. Be long taem blong yumi, yumi luksave plante yangfala we oli harem nogud tumas long laef blong olgeta. ?Ating yu tu yu luksave samting ya, a? [Letem man i ansa] Ol man oli no tinghae long ol rul blong God olsem bifo. From samting ya, plante bisnes long wol oli paspas. Ol yangfala oli kasem plante trabol, mo oli harem nogud from. ?Wanem tingting blong yu long kwestin ya? ?Weples oli save faenem ansa long ol kwestin blong olgeta, blong folem stret rod? [Letem man i ansa] Plis, yu save luk olsem wanem Baebol i leftemap tingting blong yumi long Sam 119:9. [Ridim] Baebol i talem se papa mo mama i mas tijim gud ol pikinini long ol stret rod. Mo long Proveb 1:8, hem i talem se: [Ridim]. Taswe mifala i soemaot buk ya, Young People Ask. Hem i givim sam nambawan advaes we oli stanap long Baebol. Mo tu, hem i storebaot plante trabol we sam yangfala oli kasem. Ol store ya oli save givhan long ol yangfala blong luksave olsem wanem oli save winim ol trabol. Mo sipos oli folem ol advaes blong buk ya, bambae oli harem gud long fyuja blong olgeta. [Soemaot ol nem blong sam japta, blong pulum tingting blong ol man.] Buk ya i rili nambawan, mo hem i gat sam gudfala pija long hem. Mifala i givim hem blong 200 VT nomo, mo sipos yu tekem hem, bambae yu laekem hem.”

⁹ Baebol i soemaot we ol yangfala oli mas yusum paoa blong olgeta blong traem kasem sam gudfala mak we oli stret long lukluk blong God. Nyufala buk ya i save lidim plante man oli go long Baebol blong traem kasem ol advaes blong hem. Yes, buk ya i nambawan blong halpem ol yangfala blong oli harem gud naoia, mo long fyuja blong olgeta.

Advaes

● Ol buk we yufala i save seremaot long Febuwari: Buk ya Young People Ask blong 200 VT. Sipos ol man oli no wantem buk ya, yumi save givimaot wan long tufala buklet ya: Jehovah’s Witnesses in the Twentieth Century, no Jehovah’s Witnesses Unitedly Doing God’s Will Worldwide, blong 40 VT. Maj: Baebol​—?Tok Blong God, No Tok Blong Ol Man? blong 130 VT. Epril mo Mei: Sabskripsen long Wajtaoa. Sipos wan man i no wantem sabskripsen, yumi save givimaot 2 magasin wetem wan buklet (big saes) blong 100 VT.

● Bambae long Tusde Epril 10, 1990, yumi mekem Memoriol. Tok blong Memoriol i save stat bifo we san i godaon finis. Be yufala i mas rimemba we bred mo waen i no mas pasraon long ol man bifo we san i godaon finis. Yufala i mas jekem taem we san i godaon long ples blong yufala. Sipos kongregesen blong yufala i holem wan miting long tusde evri wik, yufala i save putum miting ya long wan narafala dei blong wik ya.

● Sekretari mo Brata we i lukaot long wok blong prij, tufala i mas jekem wok blong ol fultaem paenia. Sipos wan long olgeta i hadwok blong kasem mak blong hem long ol haoa we hem i mas mekem evri manis, tufala i mas halpem hem. Yufala i save faenem sam rul long saed ya, long leta blong Sosaete (S-201) blong Oktomba 1, 1988, mo blong Oktomba 1, 1989. Mo tu yufala i save lukluk ol haf 12 kasem 20 blong pepa we i stap insaed long Kingdom Wok blong Septemba 1986.

● Evri kongregesen i mas odarem ol Bound Volumes blong Wajtaoa mo Wekap! blong yia 1989 long Franis mo Engglis. Putum namba blong ol Buk ya long wan pepa S-14 we i no gat wan narafala oda long hem. Taem mifala i kasem ol buk ya, bambae mifala i sanem long yufala.

Yumi Trastem Jeova, Mo Yumi Mekem Wok Blong Paenia

¹ Sipos yumi wantem putum Kingdom long fas ples, yumi mas trastem Jeova. (Sam 56:11; Prov. 3:5; Mat. 6:33) Yumi mas tanem baksaed long ol samting we ol man blong wol oli tinghae long olgeta, mo yumi mas traehad blong mekem ol wok blong speret. Ol man blong wol oli wantem tumas ol samting blong bodi, be Jeova i pulum yumi blong harem gud from we yumi gat ol samting we oli impoten moa.— 1 Tim. 6:8; Fil. 1:10.

² Ol yang Kristin we oli wantem folem ol rul blong God, oli faenem we i hadwok. Sam tija mo sam pikinini long skul oli traem pulum tingting blong ol, blong oli go long hae skul. Ol yang Kristin oli luksave ol samting we oli nidim long saed blong bodi. Be oli waes tu, from we oli no letem ol narafala oli pulum olgeta. Oli wantem mekem wok blong paenia. Oli trastem ol promes blong Jeova, mo oli save se bambae hem i givim olgeta samting we oli nidim.—Sam 62:2; 68:19; 1 Tim 5:8; 6:9, 10.

Skelem Ol Bisnes Blong Yumi Wanwan

³ Wajtaoa blong Febuwari 15, 1983, i pulum yumi blong tingbaot wan kwestin, olsem: “?Sipos mi mi no mekem wok blong paenia, wanem risen mi mi save givim long Jeova from?” I tru we long yia 1983, plante yangfala oli no gat rod blong mekem wok blong paenia. Be tingting blong olgeta i no kam slak, from we oli save se sipos oli mekem wok blong olgeta long fulhat blong olgeta, Jeova i laekem fasin ya. (Maeka 6:8; 2 Kor. 8:12) Biaen, taem ol yangfala ya oli skelem bakegen ol bisnes blong olgeta wetem ol tok blong Wajtaoa ya blong 1983, oli luksave we laef blong olgeta i jenis, mo oli stat mekem wok blong paenia. Plante taosen pablisa long wol oli mekem olsem.

⁴ Sipos ol bisnes blong laef blong yu i no letem yu yu mekem wok blong paenia long yia 1983, ating naoia ol samting oli defren. Tisyia long Wol, plante taosen brata oli stat mekem wok blong paenia. Fulap long olgeta oli wantem mekem wok ya bifo, be oli no gat rod blong mekem. Taswe oli wet kam kasem ol bisnes blong laef blong olgeta i jenis.

⁵ Samfala oli mas jenisim tingting blong olgeta long wok blong paenia. Sam narafala oli mas mekem wan gudfala program nomo. Samtaem yumi mas jenisim sam wok mo sam responsabiliti blong yumi, nao yumi save kam paenia. Taswe yumi mas stap tokbaot kwestin ya long Jeova long ol prea we yumi mekem. Mo yumi mas skelem gud ol wok mo ol narafala bisnes blong laef blong yumi. Plante taosen pablisa oli mekem olsem finis, mo naoia oli glad tumas blong mekem wok blong paenia.

⁶ Ating yu jes skelem laef blong yu, mo yu luksave se bambae i no longtaem yu save gat rod blong kam paenia. Oraet, be naoia yu save kam haftaem paenia long olgeta manis. Long sam manis nomo, bambae yu yu gat plante visit mo Baebol stadi we yu mas mekem. Ale, taem bambae yu yu stat long wok blong fultaem paenia, bambae i isi moa blong mekem wok ya. ?Ating yu save mekem olsem bifo we nyufala tiokratik yia i stat?

⁷ Jeova i stap mekem sam bigfala samting long ol lasdei blong rabis fasin ya blong wol. I stret taem naoia blong yumi evriwan i kam kolosap long hem, mo i leftemap nem blong hem ‘evri dei.’ (Sam 145:2; Jem. 4:8) Sipos ol fasin blong laef blong yu oli jenis, mo yu gat rod blong kam paenia from we yu yu gat ol gudfala fasin blong wan paenia, ale, bambae yu yu save soemaot gud long Jeova olsem wanem yu yu stap trastem hem.—Sam 94:18.