Pulum Ol Man Oli Aot Long Tudak, Oli Kam Long Laet
1 Olgeta ples long wol oli fulap long tudak long saed blong speret. (Aes. 60:2) Setan hem i “rabis god blong wol ya.” I stat long taem we man i sin fastaem kam kasem naoia, Setan i holem ol man oli stap long tudak long saed blong speret. From samting ya, ol fasin blong ol man oli kam rabis nomo.—2 Korin 4:4.
2 Yumi kasem laet blong trutok finis. ?Oraet, yumi sore long ol narafala man olsem Jisas i sore long ol man? (Mat. 9:36) Sipos yes, bambae yumi luksave bigfala mining blong wok we hem i givim long aposol Pol. Hem i se: “Bambae yu yu mas openem ae blong ol hiten man ya. Yu mas tanem tingting blong olgeta, blong oli aot long tudak, oli kam long delaet. Yu mas tanem olgeta blong oli aot long paoa blong Setan, oli kam long paoa blong God.”—Wok 26:16-18.
PUTUM LAET LONG TINGTING MO HAT BLONG OL
3 Setan i stap satem tingting blong ol man mo i stap mekem hat blong olgeta i strong. ?Yumi save mekem wanem blong givhan long olgeta? Yumi mas mekem Tok blong God i kasem tingting mo hat blong olgeta. Pol i prea long God blong openem ‘ol ae blong hat’ blong ol man Efesas. (Efes. 1:17, 18) I no gat wan samting we i gat moa paoa i bitim Tok blong God. Hem i save tajem hat blong man. (Hib. 4:12) Samting ya i mas pusum yumi blong traem gat gudhan blong yusum Baebol, taem yumi storeyan wetem ol narafala.
4 Traem ansarem ol kwestin we oli stap biaen. Samting ya i save givhan long yu blong kam gud moa long minista wok blong yu. ?Yu yu rere gud bifo we yu go long wok blong prij? ?Yu yu mekem sam pleplei long haos fastaem blong yu save gud ol fas tok we i save pulum tingting blong ol man? ?Yu yu traehad blong lanem Stampa Tok Blong Prij, mo blong yusum hem? ?Long wok blong prij, yu yusum Baebol blong traem pulum man blong luksave trutok?—Wok 17:2.
WAJTAOA I GIVHAN
5 Wajtaoa i givhan long plante milyan man finis, blong oli aot long tudak, oli kam long delaet. Magasin ya i soemaot olsem wanem blong mekem ol rul blong Baebol oli wok long ol fasin blong laef blong yumi. Hem i givhan long yumi blong kasem save long ol profet tok blong taem blong yumi. Mo hem i mekem se yumi luksave weswan skul i trufala mo weswan i no tru, nao yumi save wokbaot long rod we Jeova i glad long hem.
6 ?Ol trutok blong Baebol we Wajtaoa i leftemap, oli karem wanem frut? Oli givim stret save long saed blong God mo Pikinini blong hem long olkaen man. Samting ya i save sevem olgeta. (Jon 17:3; 1 Tim. 2:4) Wan man we oltaem hem i ridim Wajtaoa, hem i talem se: ‘!Mi mi laekem tumas Wajtaoa! Ol store long hem oli save givhan long ol man blong luksave klia taem we yumi stap long hem naoia. Tangkyu tumas long ol wok blong yufala blong lukaot, stadi, mo mekemrere ol save long Wajtaoa. Tru ya, hem i kakae long saed blong speret.’
TRAEM LUKSAVE
7 Manis ya i namba tu manis we yumi givimaot sabskripsen blong Wajtaoa. Long manis ya yumi mas lukaot evri jans blong pulum man i aot long tudak, i kam long delaet. Blong mekem olsemia, yumi mas storeyan long ol man long olgeta haos wanwan, long saed blong Baebol. Taem yumi faenem wan man we hem i rili intres long mesej blong Kingdom, yumi save soemaot long hem ol blesing we hem i save kasem sipos hem i ridim Wajtaoa oltaem. Sipos man ya i bin ridim Wajtaoa bifo mo hem i laekem, yu no mas mestem jans ya blong talemaot sabskripsen. Maet yu ting se i stret blong talem long hem we hem i save mekem sabskripsen blong 6 manis nomo fastaem. Nao yu mas gohed blong visitim man ya bakegen, blong mekem intres blong hem i gru moa. Nao yu save luksave sipos yu save statem wan Baebol stadi wetem hem.
8 Long plante defren rod, yumi save seremaot trutok we i mekem man i fri: Long evri haos wanwan, long rod, storeyan wetem ol man long wok, long skul, mo ol famle blong yumi. (Jon 8:32) Wajtaoa i wan spesel samting we i save givhan long ol man blong kam fri. Hem i save pulum olgeta oli aot long tudak, oli kam long delaet. Nao oli save putum tingting blong ol i stap strong long laef blong olwe long fyuja.