Japta 42
Nyufala Heven Mo Nyufala Wol
1. ?Jon i talem wanem taem enjel i tekem hem i gobak long stat blong Rul Blong Wan Taosen Yia?
GUDFALA vison ya i stap gohed, nao enjel i tekem Jon i gobak long stat blong Rul Blong Wan Taosen Yia. ?Jon i luk wanem? “Nao mi luk nyufala heven wetem nyufala wol, tufala i stap. Heven mo wol we tufala i stap fastaem, tufala i lus finis, mo i no moa gat solwora i stap.” (Revelesen 21:1) !Jon i stap luk wan naesfala pija!
2. (a) ?Olsem wanem profet tok blong Aesea long saed blong nyufala heven mo nyufala wol i kamtru fastaem long ol man Isrel long 537 B.K.T.? (b) ?Olsem wanem yumi save se profet tok ya blong Aesea bambae i kamtru bakegen? ?Promes ya bambae i kamtru olsem wanem?
2 Plante handred yia bifo long taem blong Jon, Jeova i talem long Aesea se: “Mi mi wokem nyufala heven mo nyufala wol. Mo bambae yufala i no moa tingtingbak long ol olfala samting, mo bambae oli no moa girap long hat blong yufala.” (Aesea 65:17; 66:22) Profet tok ya i kamtru fastaem long 537 B.K.T., taem ol man Isrel we oli stap tru long God oli kambak long Jerusalem, afta we oli stap kalabus blong 70 yia long Babilon. Taem oli kambak long ples blong olgeta, oli mekem wan klin kampani, “wan nyufala wol,” aninit long rul blong wan nyufala gavman, hemia “nyufala heven.” Be aposol Pita i soemaot se profet tok ya bambae i kamtru long wan bigfala fasin, i se: “Be God i promes finis blong putum nyufala skae mo nyufala wol, we stret fasin nomo bambae i stap long hem. Mo yumi stap wet blong ol nyufala samting ya.” (2 Pita 3:13) Nao Jon i soemaot se promes ya bambae i kamtru long dei blong Masta. “Heven mo wol we tufala i stap fastaem,” bambae tufala i lus. Hemia i min se wol blong Setan wetem ol gavman we Setan mo ol rabis enjel blong hem oli gat paoa long olgeta bambae oli finis. Samting olsem “solwora,” hemia ol nogud stronghed man, bambae i no moa stap. Bambae i gat “nyufala heven wetem nyufala wol”—hemia nyufala kampani blong olgeta man long wol aninit long wan nyufala gavman, Kingdom blong God.—Ridim Revelesen 20:11.
3. (a) ?Jon i tokbaot wanem? ?Wanem ya Nyufala Jerusalem? (b) ?Olsem wanem Nyufala Jerusalem ‘i aot long heven i kamdaon’?
3 Jon i gohed i se: “Nao mi luk bigfala taon ya we i tabu, we hemia nyufala Jerusalem ya. Hem i kamaot long God, i aot long heven i kam, nao hem i flas gud, i olsem woman we bambae i mared, we oli flasem hem gud blong i go long man blong hem.” (Revelesen 21:2) Nyufala Jerusalem i woman blong Kraes. Hemia ol tabu Kristin man we oli stap tru long God gogo oli ded, nao oli laef bakegen blong rul olsem ol king mo pris wetem Jisas long heven. (Revelesen 3:12; 20:6) Long taem bifo, Jerusalem long wol hem i bigfala taon blong nesen ya Isrel, we gavman i stap long hem. Olsem nao, Nyufala Jerusalem wetem Hasban blong hem, hemia gavman we bambae i rul long nyufala wol. Hemia nao nyufala heven. ‘Woman ya we bambae hem i mared hem i aot long heven i kam,’ hemia i no min se hem i rili aot long heven i kamdaon long wol, no gat. Hem i min se gavman ya bambae i lukluk i kam long wol blong givhan long hem. Woman blong Smol Sipsip bambae hem i givhangud long man blong hem blong wokem wan stret gavman antap long ol man. !Tru ya, hemia bambae i wan bigfala blesing long nyufala wol ya!
4. ?God i mekem wanem promes we i kolosap sem mak long promes we i mekem long nyufala nesen blong Isrel bifo?
4 Jon i talem moa long yumi i se: “Nao mi harem wan tok we i kamaot long bigfala jea blong God, we i singaot bigfala, i talem se ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta.’ ” (Revelesen 21:3) Taem Jeova i givim kontrak blong Loa long nyufala nesen blong Isrel, hem i promes se: “Bambae mi mi putum haos tapolen blong mi long medel blong yufala. Bambae sol blong mi i laekem yufala. Bambae mi mi wokbaot long medel blong yufala. Bambae mi soemaot we mi nomo mi God blong yufala. Mo yufala, bambae yufala i soemaot se yufala i man blong mi.” (Levitikas 26:11, 12) Long Revelesen Jeova i mekem wan promes we i kolosap sem mak, long ol man we oli obei long hem. Long Jajmen Dei blong wan taosen yia, olgeta man ya bambae oli spesel long tingting blong God.
5. (a) ?Olsem wanem God bambae i mekem ples blong hem wetem ol man long Rul Blong Wan Taosen Yia? (b) ?Olsem wanem God bambae i mekem ples blong hem wetem ol man afta long Rul Blong Wan Taosen Yia?
5 Long Rul Blong Wan Taosen Yia ya, Jeova bambae i “mekem ples blong hem” wetem ol man blong smoltaem. Bambae hem i yusum king mo Pikinini blong hem, Jisas Kraes blong mekem olsem. Be long en blong Wan Taosen Yia ya, taem Jisas i givim Kingdom i gobak long Papa blong hem, bambae Jeova i no moa nidim blong yusum wan man blong mekem ples blong hem wetem ol man. Long saed blong speret, Jeova bambae i stap wetem ol “man blong hem” blong olwe, we i no nidim wan man blong tekem olgeta oli kam long hem. (Ridim Jon 4:23, 24.) !Traem tingbaot bigfala blesing ya long ol man we oli kam stretgud olgeta!
6, 7. (a) ?Wanem ol gudfala promes we Jon i talemaot? ?Hu bambae oli haremgud long ol blesing ya? (b) ?Olsem wanem Aesea i eksplenem wan paradaes long saed blong bodi mo speret?
6 Jon i talem moa i se: “Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” (Revelesen 21:4) Bakegen, yumi tingbaot sam promes blong God bifo. Aesea tu i stap wet long taem ya we i no moa gat ded mo krae mo soa, be ol man bambae oli haremgud nomo. (Aesea 25:8; 35:10; 51:11; 65:19) Nao Jon tu i talem se ol promes ya bambae oli kamtru long Jajmen Dei blong wan taosen yia. Fastaem, bigfala kampani bambae oli kasem ol gudfala blesing ya. “Smol Sipsip ya we i stap long medel long bigfala jea blong God,” mo i stap lukaot long olgeta, “bambae i lidim olgeta oli go dring long ol springwora ya we i save givim laef. Mo God bambae i ravemaot wora blong ae blong olgeta.” (Revelesen 7:9, 17) Sloslou, olgeta we oli laef bakegen mo oli soemaot bilif long ol samting we Jeova i givim long olgeta, bambae oli joen wetem olgeta, mo ol man ya evriwan bambae oli haremgud long wan paradaes long saed blong bodi mo speret.
7 Aesea i talem se: “Long taem ya, ae blong ol blaenman bambae i open, mo sora blong ol man we oli no save harem bambae i no moa fas.” Yes, “long taem ya, man we i wokbaot nogud bambae i save klaemap olsem wan man dia, mo tang blong man we i no save toktok bambae i singaot from glad blong hem.” (Aesea 35:5, 6) Mo tu, long taem ya, “ol man bambae oli wokem ol haos, mo bambae oli save stap long hem. Mo bambae oli planem rop ya we oli mekem waen long frut blong hem mo bambae oli kakae frut blong hem. Bambae oli no wokem haos blong narafala man i stap long hem. Mo bambae oli no planem garen blong narafala man i kakae frut blong hem. From we laef blong olgeta bambae i longfala olsem laef blong wan tri. Mo olgeta man ya we mi mi jusumaot, bambae oli yusum gud ol samting ya we han blong olgeta i wokem.” (Aesea 65:21, 22) Taswe bambae i no gat wan samting we i save tekemaot olgeta long wol ya.
8. ?Jeova hem wan i talem wanem blong pruvum se ol gudfala promes ya oli tru?
8 !Taem yumi tingtinggud long ol promes ya, yumi haremgud tumas! Ol gudfala samting nomo oli stap wet long ol man we bambae oli obei long God aninit long gudfala gavman long heven. ?Ol promes ya oli rili tru? ?No oli drim blong wan olfala man nomo we i stap kalabus long aelan ya Patmos? Jeova hem wan i givim ansa long kwestin ya: “Nao man ya we i stap sidaon long bigfala jea blong hem, hem i talem se ‘!Yu luk! Mi mi stap mekem olgeta nyufala samting.’ Nao hem i talem long mi bakegen, i se ‘Yu raetem tok ya, from we tok blong mi i tru, mo ol man oli save bilif long hem.’ Mo i talem se ‘Naoia olgeta samting i finis. Mi mi faswan, bifo olgeta, mo bambae mi mi laswan, biaen olgeta [Alfa mo Omega, “NW”].’ ”—Revelesen 21:5, 6a.
9. ?Olsem wanem yumi save sua gud se ol blesing ya long fyuja bambae oli kamtru?
9 I olsem we Jeova hem wan i saenem wan promes no wan pepa blong givim raet long ol man we oli obei long hem blong kasem ol blesing ya long fyuja. ?Hu i save talem se Bigfala Man ya i stap gyaman? Ol promes ya blong Jeova oli tru tumas. Taswe hem i save tok olsem we oli kamtru finis, i se: “Naoia olgeta samting i finis.” Jeova hem i “[Alfa mo Omega, NW] . . . Hae God ya we i gat olgeta paoa, we i stap fastaem bifo olgeta, mo we i stap naoia, mo we bambae i kam.” (Revelesen 1:8) !Yes Jeova nomo ya! Hem wan i talem se: “Mi mi faswan, bifo olgeta, mo mi mi laswan, biaen olgeta. I no gat narafala God, mi nomo.” (Aesea 44:6) From samting ya, hem i save givim ol profet tok mo hem i save mekem olgeta oli kamtru fulwan. !Samting ya i mekem bilif blong yumi i strong gud! Taswe hem i promes se: “!Yu luk! Mi mi stap mekem olgeta nyufala samting.” Taswe yumi no mas tingbaot sipos ol merikel ya bambae oli tru no no gat. I moa gud we yumi tingbaot se: ‘?Mi wan mi mas mekem wanem blong kasem ol blesing olsem?’
“Wora” Long Ol Man We Oli Tosta
10. ?Wanem “wora” we Jeova i save givim? ?Wora ya i minim wanem?
10 Jeova hem wan i talem se: “Man we i tosta, bambae mi mi givim wora long hem we hem i no pem, we i kam long springwora we i gat laef long hem.” (Revelesen 21:6b) Blong man i no moa tosta, hem i mas luksave nid blong hem long saed blong speret mo hem i mas wantem “wora” ya we Jeova i stap givim. (Aesea 55:1; Matyu 5:3) ?Wanem ya “wora” ya? Jisas hem wan i ansa long kwestin ya taem hem i stap prij long wan woman kolosap long wan wel long Sameria. Hem i talem long woman ya se: “Man we i dring wora ya we mi bambae mi givim long hem, bambae hem i no save tosta bakegen samtaem. Wora ya we mi bambae mi givim long hem i save kam olsem wan springwora we i save ron oltaem insaed long hem, blong givim laef ya long hem we i no save finis.” ‘Springwora ya we i save ron oltaem blong givim laef’ hem i kamaot long God tru long Kraes. Hemia ol samting we God i mekem tru long Kraes blong givim laef we i stretgud olgeta long ol man. !Olsem woman Sameria ya, yumi mas wantem dring oltaem long springwora ya! !Yumi mas rere blong livim ol smosmol samting we oli no impoten blong talemaot gud nyus long ol narafala, olsem woman ya i mekem!—Jon 4:14, 15, 28, 29.
Ol Man We Oli Winim Faet Blong Olgeta
11. ?Jeova i mekem wanem promes? ?Tok ya i stret long hu fastaem?
11 Olgeta we oli dring long gudfala “wora” ya oli mas win long faet blong olgeta, olsem Jeova i gohed blong talem se: “Man we i winim faet blong hem, i gat promes blong mi i stap long hem. Mi bambae mi God blong hem, mo hem bambae i pikinini blong mi.” (Revelesen 21:7) Promes ya i kolosap sem mak long ol promes long ol mesej long ol seven kongregesen. Taswe ol tok ya i stret fastaem long ol disaepol we tabu speret i makemaot olgeta. (Revelesen 2:7, 11, 17, 26-28; 3:5, 12, 21) Ol brata blong Kraes long saed blong speret long ol yia we oli pas oli wantem tumas blong kasem blesing ya we oli kam haf blong Nyufala Jerusalem. Sipos oli winim faet blong olgeta, olsem Jisas i winim faet blong hem, bambae oli kasem samting ya we oli putum tingting blong olgeta i stap strong long hem.—Jon 16:33.
12. ?Olsem wanem promes blong Jeova long Revelesen 21:7 bambae i kamtru long bigfala kampani?
12 Bigfala kampani we oli kamaot long olgeta nesen, oli bilif long promes ya tu. Olgeta tu oli mas win long faet blong olgeta. Oli mas obei long God mo mekem wok blong hem gogo oli pastru long taem blong bigfala trabol long wol. Long taem ya nao bambae oli kasem pei blong olgeta long wol, hemia ‘kingdom ya we Papa i mekemrere finis long olgeta bifo, long taem ya we hem i statem wol.’ (Matyu 25:34, NW) Olgeta ya wetem ol narafala sipsip blong Masta long wol we oli winim laswan traem long en blong wan taosen yia, hemia nao ol “man blong God.” (Revelesen 20:9) Bambae oli kam olsem ol tabu pikinini blong God, we oli frengud wetem Bigfala Man we i Wokem olgeta, Jeova God, olsem ol memba long ogenaesesen blong hem long heven mo wol.—Aesea 66:22; Jon 20:31; Rom 8:21.
13, 14. ?Blong kasem ol gudfala promes blong God, yumi mas strong blong blokem wanem rabis fasin? ?From wanem?
13 !Taem ol Wetnes blong Jeova oli stap wet blong gudfala promes ya i kamtru, i impoten tumas we oli stap klin mo stap longwe long ol rabis samting blong wol blong Setan! Yumi mas gat strong tingting, stanap strong, blong mekem se Devel Setan i no save pulum yumi i go insaed long kampani blong ol man we Jeova hem wan i tokbaot long ples ya i se: “Be i gat promes blong mi tu i stap long ol man blong fraet, mo long ol man blong brekem tok, mo long ol man blong mekem ol fasin nogud we i krangke. Promes ya i stap long ol man blong kilim man, mo long ol man blong mekem nogud wetem woman mo long ol man blong mekem posen mo kleva, mo long ol man blong mekem wosip long ol narafala god, mo long ol man blong gyaman. Hemia promes blong mi long olgeta. I gat ples blong ol man ya i stap. Bambae olgeta oli go long bigfala hol ya blong faea, we i fulap long faea mo salfa, we hemia i olsem seken ded ya.” (Revelesen 21:8) Yes, ol man we oli wantem kasem ol gudfala blesing long fyuja oli mas blokem ol rabis fasin we oli mekem olfala wol ya i doti. Ol man ya oli mas winim faet blong olgeta. Blong mekem olsem, oli mas stanap strong, obei long God, mo winim ol traem mo trabol we oli kasem.—Rom 8:35-39.
14 Krisendom i stap talem se hem i woman blong Kraes. Be hem nao i fulap long ol rabis fasin we Jon i tokbaot long vas ya. Taswe bambae hem i lus blong olwe wetem ol narafala haf blong Bigfala Babilon. (Revelesen 18:8, 21) Long sem fasin, sipos samfala long smol kampani no long bigfala kampani oli mekem ol rabis fasin ya, no oli traem pulum ol narafala man blong mekem, olgeta tu oli save lus blong olwe. Sipos oli stap gohed long ol rabis fasin ya, oli no save kasem ol gudfala promes blong God. Mo long nyufala wol, man we hem i traem blong statem ol rabis fasin ya bakegen, bambae hem i lus kwiktaem. Bambae hem i kasem seken ded ya we i no moa save laef bakegen.—Aesea 65:20.
15. ?Hu ya i givim nambawan eksampel olsem ol man we oli win long faet blong olgeta? ?Wanem gudfala vison i laswan long Revelesen?
15 Nambawan eksampel blong olgeta we oli win long faet blong olgeta se Smol Sipsip ya, Jisas Kraes wetem woman blong hem, hemia 144,000 no Nyu Jerusalem. !Taswe i stret nomo we long en blong Revelesen i gat wan naes pija blong Nyufala Jerusalem! Naoia Jon i eksplenem laswan vison ya.
[Tok Blong Pija Long Pej 302]
Long nyufala wol, ol man bambae oli haremgud long wok blong olgeta mo kampani blong ol narafala man