Mekem Olgeta Samting Blong Givim Ona Long God

¹ !Yumi haremgud tumas blong joen wetem ol gudfala brata mo sista blong yumi! (1 Kor. 16:​17, 18) Yumi mekem olsem long ol miting, ol asembli, mo long wok blong prij. Mo tu, yumi haremgud long ol narafala taem tu, we yumi joen wanples wetem sam narafala blong storeyan mo kakae tugeta, olsem taem yumi singaot samfala blong oli kam long haos blong yumi. Taem yumi mekem olsem, yumi soem gudfala fasin blong welkamem ol narafala long haos blong yumi, mo yumi serem fasin joen we i leftemap tingting blong evriwan. (Rom 12:13; 1 Pita 4:⁠9) Taem yumi mekem plan blong wan lafet blong mared, i gud we yumi tingbaot gudfala advaes long Wajtaoa blong Epril 15, 1984 (Engglis).

² Taem Yumi Joen Wanples Blong Haremgud Tugeta: ‘Long olgeta samting we yumi kakae mo we yumi dring, mo long olgeta fasin blong yumi, oltaem yumi mas leftemap nem blong God.’ (1 Kor. 10:​31-33) Samfala oli no lesin long advaes ya. Mo i gat sam problem i stap kamaot yet, from we ol grup we oli joen tugeta blong mekem lafet oli bigfala tumas, mo i no gat naf man blong kontrolem mo lukaot long olgeta. Samtaem, samfala oli mekem wan bigfala lafet wetem ol pleplei, myusek mo danis blong ol man blong wol, nao oli singaot plante handred man blong joen wetem olgeta. Samtaem oli askem long olgeta we oli go long ol lafet ya blong pem blong go insaed. Ol lafet olsem, oli kolosap sem mak long ol lafet blong ol man blong wol, mo oli soem speret blong wol we i no laenap wetem ol gudfala fasin mo ol rul blong Baebol.​—⁠Rom 13:​13, 14; Efes. 5:​15-20.

³ Mifala i kasem ripot se sam bigfala grup blong ol Wetnes oli bin joen long ol haos we oli rentem, oli mekem ol pleplei mo myusek mo danis we oli no stret, oli folem fasin blong wol, mo i no gat samfala we oli kontrolem mo lukaotgud long ol lafet ya. Samfala oli bin mekem lafet olsem hemia long sam hotel no ples blong ol turis. Mo oli bin singaot ol narafala blong kam, wetem ol tok ya se hemia wiken blong “Ol Wetnes blong Jeova.” From we i hadwok blong kontrolem mo lukaotgud long wan bigfala grup olsem, sam trabol i bin kamaot. Tumas noes, tumas alkol, mo samtaem ol rabis fasin long saed blong seks tu i kamaot. (Efes. 5:​3, 4) Ol lafet we i gat rabis fasin olsem i joen wetem olgeta, oli no givim ona long Jeova. Defren olgeta, oli sakem doti long gudnem blong kongregesen mo oli mekem samfala oli foldaon.​—⁠1 Kor. 10:​23, 24, 29.

⁴ Ol Kristin oli kasem advaes blong tekem ol narafala oli kam long haos blong olgeta. Be bigfala samting long ol taem olsem, hemia fasin blong leftemap tingting long saed blong speret. (Rom 1:​11, 12) I moa gud blong joen long ol smol grup nomo. Buk ya Minista Wok Blong Yumi i talem long pej 135 mo 136 se: “Samtaem, wan famle i save singaot sam narafala famle i kam long haos blong olgeta blong oli save storeyan mo haremgud tugeta. . . . Sipos wan brata i singaot sam man i kam long wan kaen miting olsem, hem i mas savegud ol samting we olgeta bambae oli mekem. I nogud sam rabis fasin oli kamaot, from brata ya bambae i gat fol from. Taswe ol waes Kristin oli no save singaot plante man tumas i kam, mo oli no save letem miting i stap long plante haoa.” Jisas i soem se i no nidim ol flas kakae long ol lafet olsem, taem bigfala tingting blong yumi i blong serem ol samting long saed blong speret blong leftemap tingting blong ol fren blong yumi.​—⁠Luk 10:​40-42.

⁵ I wan gudfala samting blong gat fasin blong tekem ol Kristin fren blong yumi oli kam long haos. Be, wan smol grup long haos i defren olgeta long wan bigfala lafet long wan bigfala haos we oli rentem, mo we speret blong hem i kolosap sem mak long ol lafet blong ol man blong wol. Taem yu singaot samfala blong joen wanples wetem yu, yu mas sua se yu save karem ful responsabiliti blong ol samting we i hapen long taem ya.​—⁠Lukluk Wajtaoa blong Ogis 15, 1992, pej 17 kasem 20.

⁶ I tru, Jeova i givim wan blesing long yumi. Hemia ol brata sista long saed blong speret we yumi save joen wetem olgeta. Yumi save haremgud long fasin ya we i leftemap tingting blong yumi, mo we i pusum yumi blong gohed long ol gudfala wok. (Mat. 5:16; 1 Pita 2:12) Taem yumi joen wanples wetem sam narafala, yumi no mas bitim mak mo yumi no mas mekem wan lafet we i bigfala tumas. Sipos yumi folem gudfala fasin ya, oltaem bambae yumi givim ona long God blong yumi, mo leftemap tingting blong ol narafala tu.​—⁠Rom 15:⁠2.