Yumi Nidim Kongregesen
1 Wan taem, ol pikinini blong Kora oli bin talemaot fasin tangkyu blong olgeta from kongregesen blong Jeova. Oli talem se: “Sipos mi stap wan dei nomo long haos blong yu, be hemia i gud moa, i winim we mi stap wan taosen dei long ol narafala ples.” (Sam 84:10) Long tingting blong olgeta, wol i no save givim wan gudfala samting nating, taem oli skelem wetem kongregesen. Sipos yu yu gat sem filing, yu mas mekem kongregesen i stampa samting long laef blong yu.
2 Stat long taem we Kristin kongregesen i jes stanap kam kasem naoia, i klia se hem i gat blesing blong Jeova. (Wok 16:4, 5) I no mas gat wan long yumi we i no gat fasin tangkyu from kongregesen, no we i harem se kongregesen i jes wan samting blong mekem yumi evriwan i kam wanples nomo. Long evri ples, kongregesen blong ol Wetnes blong Jeova, hemia ples blong kasem paoa mo ol fasin we oli leftemap tingting. Hem i ples we yumi joengud tugeta blong Jeova i tijim yumi, mo we yumi mekem wok blong Kingdom olsem wan grup.—Aes. 2:2.
3 Kristin kongregesen i stampa rod blong yumi kasem tijing long saed blong trutok. (1 Tim. 3:15) Ol man blong Jisas oli mas “stap wan nomo”—wan tingting wetem God, wetem Kraes, mo wetem ol narafala long kongregesen. (Jon 17:20, 21; skelem wetem Aesea 54:13.) Nating se yumi go weples long wol, ol brata blong yumi oli bilif long ol tijing mo loa blong Baebol, mo oli folem olgeta long ol fasin we oli mekem.
4 Yumi kasem trening mo yumi gat evri samting we yumi nidim blong finisim wok blong yumi blong mekem ol disaepol. Evri manis, Wajtaoa, Wekap! mo Kingdom Wok Blong Yumi i givim ol gudfala save blong halpem yumi blong statem ol storeyan long saed blong Baebol. Ol miting oli blong soem long yumi olsem wanem blong faenem ol man we oli intres, mo mekem intres ya i gru. Bigfala namba blong ol man we oli stap joen long trutok long olgeta ples blong wol, i pruvum se paoa we i kamaot long heven i sapotem yumi long wok ya.—Mat. 28:18-20.
5 Tru long kongregesen, evri dei yumi kasem fasin we i leftemap tingting blong yumi, “i mekem yumi strong blong laekem ol man, mo blong mekem ol gudfala fasin.” (Hib. 10:24, 25) Yumi kasem paoa blong stanap strong tru long olgeta traem wetem strong bilif. Ol man blong lukaot long kongregesen we oli gat lav, oli givhan long yumi blong winim ol trabol mo wari. (Ekles. 4:9-12) Yumi kasem advaes we yumi nidim, taem yumi stap long denja blong livim stret rod. ?I gat wan narafala ogenaesesen we i givim fasin kea wetem lav olsem?—1 Tes. 5:14.
6 Jeova i wantem se yumi stap kolosap long ogenaesesen blong hem blong holemtaet fasin joengud blong yumi. (Jon 10:16) Wan rod we kongregesen i yusum blong halpem yumi blong stap kolosap long grup ya we i olsem slef we i stret, i blong sanemaot ol elda we oli goraon long ol kongregesen blong leftemap tingting blong yumi. Fasin blong yumi blong lesin long ol tok we i lidim yumi wetem lav, i save pulum yumi blong laeklaekem yumi moa, mo samting ya i save halpem yumi blong stap strong long saed blong speret.
7 Yumi nidim kongregesen blong stap laef long saed blong speret. Sipos yumi no gat, yumi no save mekem wok blong Jeova long fasin we hem i glad long yumi. Taswe, oltaem yumi mas stap kolosap long rod ya we Jeova i stanemap. Yumi mas wok blong traehad blong kasem ol mak we kongregesen i wantem kasem, mo traehad blong folem ol advaes we yumi kasem long kongregesen. Long rod ya nomo, bambae yumi save soemaot olsem wanem yumi tinghae long kongregesen.—Sam 27:4.