Yumi Save Mekem Plante Moa Wok
1 Jisas Kraes i mekem sam bigbigfala samting taem hem i prij long wol. Hem i mekem merikel blong givim kakae long plante taosen man, hem i winim sik blong plante man, mo hem i mekem se sam oli laef bakegen long ded. (Mat. 8:1-17; 14:14-21; Jon 11:38-44) Wok blong Jisas i pulum intres blong olgeta man long Isrel. Be, long laswan sapa bifo we hem i ded, hem i talem long ol man blong bilif we oli folem hem, se: “Tru, mi talem long yufala. Man we i bilif long mi, hem bambae i save mekem ol wok ya we mi mi stap mekem. Yes, hem bambae i save mekem wan wok we i bigwan moa, i winim wok ya we mi mi mekem.” (Jon 14:12, NW) ?Olsem wanem yumi save mekem wan wok we i “bigwan moa”?
2 Yumi Kavremap Moa Teritori: Jisas i mekem wok blong hem long Palestaen nomo, mo hem i talem long ol faswan disaepol blong hem blong givim wetnes ‘gogo oli finisim olgeta ples long wol.’ Oli mas go longwe moa i bitim ples we Jisas i prij long hem. (Ol Wok 1:8) Wok blong prij we hem i statem i kavremap fulwol naoia, i go kasem 232 kantri. (Mat. 24:14) ?Yu yu stap joen fulwan long wok blong prij long teritori blong kongregesen blong yu?
3 Yumi Kasem Plante Moa Man: Taem Jisas i lego wol ya, hem i letem wok blong prij i stap long han blong samwe 120 disaepol blong hem. (Ol Wok 1:15) From strong tingting we oli gat long wok blong givim wetnes long dei blong Pentekos 33 K.T., namba blong ol man we oli akseptem trutok mo tekem baptaes i kasem raonabaot tri taosen man. (Ol Wok 2:1-11, 37-41) Tede yumi gohed blong hivimap olgeta we “oli stret blong kasem laef we i no save finis,” mo wan medel namba blong olgeta we oli tekem baptaes evri dei i bitim 1,000. (Ol Wok 13:48) ?Yu yu stap mekem evri samting we yu save mekem blong kasem ol man we hat blong olgeta i stret, long olgeta ples we oli stap long hem, mo blong visitim kwiktaem olgeta we oli intres?
4 Yumi Prij Longtaem Moa: Wok blong Jisas long wol i no bitim tri yia haf. Bighaf blong yumi i prij longtaem moa i bitim hemia finis. Nomata hamas taem bambae God i letem yumi blong gohed long wok ya, be yumi tangkyu from jans ya we yumi gat blong halpem ol wanwan nyufala disaepol blong stat wokbaot long rod we i go kasem laef. (Mat. 7:14) ?Yu yu stap spenem plante taem evri manis long wok blong Masta?—1 Kor. 15:58.
5 Yumi save suagud se bambae yumi gohed blong mekem ol wok we oli bigwan moa, from we Jisas i stap sapotem ol trufala disaepol blong hem.—Mat. 28:19, 20.