?Yu Talem Wanem Long Man We i No Bilif Long God?
1 Wan tija blong Polan i bin talem long wan misinari long Afrika se : “Mi mi no bilif se God i stap.” Be, misinari ya i storeyan gud wetem woman ya, mo i givim buk ya long hem, Life—How Did It Get Here? By Evolution or by Creation? Taem misinari ya i kambak long nekis wik, tija i talem long hem se: “!Naoia mi bilif se i rili gat wan God i stap!” Hem i bin ridim buk ya Creation mo naoia hem i askem blong stadi long Baebol. ?Yu save mekem wanem blong givim witnes long olgeta we oli talem se oli no bilif long God? Fastaem, tingbaot ol defren risen from wanem ol man oli no bilif se God i stap.
2 Ol Risen We Oli Mekem Se Man i No Bilif Long God: Fasin blong no bilif long God i no wan tingting we man i bon wetem. Plante long olgeta oli bin joenem wan jos bifo, mo long taem ya, oli bilif long God. Nating se i olsem, problem long saed blong helt, no problem long famle, no sam fasin we i no stret, maet i bin mekem se oli no moa bilif long God. Sam narafala, maet ol kos blong hae save we oli kasem long skul, i mekem se oli no gat wan stret tingting long saed blong God. Tingbaot eksampel blong sam man we fastaem oli no bilif long God, be biaen oli gat wan strong bilif long Jeova God, mo oli kam ol Witnes blong hem.
3 Wan woman long Paris i bon wetem wan sik we i kasem bun blong hem. Nomata se hem i baptaes long Katolik, hem i talem se hem i no bilif long God. Taem hem i askem long ol woman blong jos, se: from wanem God i letem hem i bon wetem wan sik olsem, olgeta oli ansa se: “From we hem i laekem yu.” Woman ya i no wantem bilivim wan tok we i krangke olsem. Mo tu, tingbaot wan yangfala man long Finlan. Hem i kasem wan sik long saed blong masel, we ol dokta oli no save winim, nao i stap sidaon long wil jea nomo. Mama blong hem i tekem hem i go long wan man blong Pentekostol Jos, we oli talem se hem i save mekem sikman i kam gud bakegen. Be man ya i no naf blong mekem wan merikel blong yangfala ya i kam gud bakegen. From samting ya, yangfala man ya i lusum intres blong hem long God mo i no moa bilif long God.
4 Long Honduras, wan man i bon long Katolik Jos, be hem i stadi long hae save blong Sosialis mo tingting blong olgeta we oli no bilif se i gat wan God. Hem i bilif long tijing we hem i kasem long Yunivesiti, we i tijim se man i kamaot from laki nomo, nao hem i no moa bilif long God. I sem mak long wan woman long Yunaeted Stet, we i gruap long Metodis Skul. Long skul hem i tekem stadi long saed blong ol tingting mo fasin blong man. ?Samting ya i jenisim bilif blong hem? Hem i talem se: “Long tri manis nomo oli spolem olgeta bilif we mi gat long saed blong jos.”
5 Kasem Olgeta We Hat Blong Olgeta i Wantem Trutok: Plante man we oli talem se oli no bilif long God, oli wantem save, sipos i gat rod blong stretem ol trabol long saed blong helt, famle, fasin we i no stret, no ol narafala trabol bakegen. Oli rili intres blong faenem ansa long sam kwestin olsem: ‘?From wanem i gat nogud fasin?’ ‘?From wanem ol nogud samting i kasem ol gudfala man?’ mo ‘?Wanem mining blong laef?’
6 Wan hasban wetem woman blong hem, we tufala i stap long Switselan, tufala i gruap wetem tingting ya se i no gat God. Fastaem we tufala i harem trutok, tufala i no wantem lesin. Be tufala i kasem sam bigfala trabol long saed blong famle, mo tufala i stap tingbaot blong divos. Taem ol Witnes oli kambak blong luk tufala, oli yusum Baebol blong soem long tufala, olsem wanem tufala i save winim ol trabol blong tufala. Man mo woman ya tufala i sapraes long ol advaes blong Baebol we i save givhan long laef, mo i agri blong stadi Baebol. Mared blong tufala i kam strong bakegen, tufala i gohed gud long saed blong spirit, mo tufala i tekem baptaes.
7 ?Yu Save Talem Wanem Long Man We i No Bilif Long God?: Taem wan man i talem long yu se hem i no bilif long God, traem faenem risen from wanem hem i talem olsem. ?Hem i from edukesen we hem i kasem, ol trabol we i kasem, no from sam nogud fasin no giaman tijing blong ol jos? Maet yu save askem long hem se: “?Tingting ya we yu gat, i stap long yu longtaem finis?” no “?From wanem yu tingting olsem?” Ansa blong hem bambae i givhan long yu blong save wanem we yu mas talem. Taem i nidim blong givim sam pruf, buk ya Is There a Creator Who Cares About You? maet i stret long hem.
8 Maet yu save gohed blong storeyan wetem man we i no bilif God, taem yu askem se:
◼ “Yu bin tingbaot se: ‘?Sipos i gat wan God, from wanem fulap man i safa mo wol ya i fulap long fasin we i no stret?’ [Letem man i ansa.] ?Mi save soem long yu wanem tingting blong Baebol long saed ya?” Ridim Jeremaea 10:23. Afta we yu ridim vas ya, askem tingting blong hem long saed ya. Nao soem pej 16 mo 17 long buklet ya Will There Ever Be a World Without War? No maet yu save yusum japta 10 long buk ya Creator. Askem hem blong tekem buk ya mo ridim ol haf we oli stap insaed.—Blong kasem moa advaes, lukluk Reasoning buk, pej 150-151.
9 I tru se, i no olgeta man we oli no bilif long God bambae oli akseptem trutok. Be plante long olgeta oli rere blong lesin long tingting blong yumi. Talem ol tok we oli pulum intres blong olgeta, mo antap long ol samting ya, yusum paoa blong Tok blong God blong givhan long olgeta blong luksave trutok.—Wok 28:23, 24; Hib. 4:12.